(العيكورة) وين المشكلة يا مبارك الفاضل؟

بقلم: صبري محمد علي (العيكورة)
نقلت الكثير من المواقع الاخبارية ومنها هذه (الانتباهة) تغريدة عبر (التيوتر) عن السيد مبارك الفاضل رئيس حزب الامة قال فيها …
(خلي بالك معاي)
إن تجمع قيادات حزب المؤتمر الوطني (المحظور) ودعوتهم لاطلاق سراح قادة الانقاذ.
اهااا (مالوم) يا مبارك؟ (قال ليك) يعتبر تحدياً للقضاء ! واظن الموضوع (الماكل معاهو جمبة خااالس) هو اجتماعهم فى قاعات عامة! طيب وفيها شنو يا حفيد المهدي ما بقروشهم وعلى كيفهم يستأجروا زى ما دايرين!
مش ده المنطق بقول كده يا جماعة؟
(لا …)
السيد مبارك ما وقف هنا كمان (عندو راي) فى الشرطة والامن بسبب اداء اعمالهم ومنحهم تصاديق لتلك التجمعات، فقال يجب ان يساءلوا كما يساءل (المؤتمرجية) لانهم طلبوا هذا التصديق! وقال عن مساجين قادة الانقاذ انهم تحت المحاكمة على ذمة جرائم وصفها (بالخطيرة)، وقال ليك كمان اهمها (ركز معاي يا ابني)
تقويض النظام! طبعاً يقصد نظام ابن عمه الراحل الصادق المهدي و(اللى هو) اى مبارك كان جزءاً اصيلاً منه، وثانياً بسبب ارتكاب مجازر فى دارفور.
ولو فتحنا ملف (تقويض الدستور) ده حا يجرنا لملف مضحك خااالس وتعويضات آل المهدي ونففففس مشاهد قحت القريبة دى كانت هى حال دولة مبارك وود عمو، لذا الملف ده حقو نخليهو مقفول احسن
عشان كده والمغسة القديييمة دى …..
ود المهدي يعتبر ان ما يقوم به المؤتمر الوطني ومطالبته باطلاق سراح قادته المسجونين ظلماً، يعتبره (العارف بالله وبالقوانين) انه تأثير على سير العدالة، بل واعطى نفسه حقاً لا يمتلك معشاره حين قال
انه تجب مساءلتهم قانونياً، ده للمؤتمرجية، وكمااان محاسبة السلطات التى منحتهم التصديق!
(يا اخى دى مكنة تمانية سلندر عديل)!
ده كلام منو يا جماعة؟ ده كلام رئيس حزب يرجو له منسوبوه الفوز فى الانتخابات والتأسيس لحكم مدني ديمقراطي يحقق الحريات ويرسخ ثقافة القبول بالرأي الآخر …!!!
(طيب) اسمعوا كلامي يا جماعة
شخصياً لا اخرج تغريدة السيد الفاضل عن حالة (الهضربة) الحاصلة اليومين ديل منذ عودة السيد/ محمد طاهر إيلا لارض الوطن. فمنذ ذلك الاستقبال الحاشد وبصراحة كده كل الاحزاب المناوئة للمؤتمر الوطني (مش على بعضها).
لذا السيد مبارك معذور إن اصابه بعض من الهزات الارتدادية لزلزال ايلا، وان تأخرت قليلاً فللبعد الجغرافي بين بورتسودان والخرطوم اثر.
العذر (التاني) الذى يمكن ان نجده للسيد مبارك هو انه كان واحداً من (الإكيلة) الذين شاركوا الانقاذ موائد القصر شأنه شأن (ولد اخوه) اللواء عبد الرحمن الصادق. الايامات دى جابت ليها صفة (الامير)! فحكاية المشاركة السابقة وجر الشريط القديم وايام (النغنغة) التى كانت اكيد (حا) تكون مصدر ازعاج اذا ما قدر للانقاذ العودة للسلطة!
تعود ….
كيفن وبى وين؟ الله اعلم
طيب يا مبارك ومن غير ما نجيب سيرة عن ضرب الامريكان لمصنع الشفاء بالخرطوم وكده.
فيا أخى.. طالما ان (الجماعة ديل) امتثلوا للانظمة وطلعوا تصريحهم ودفعوا من كرائم اموالهم واكلوا وشربوا من حلال كسبهم وطالبوا باطلاق سراح قادتهم! (انتا) الكلام ده موجعك ليه؟ حاجة غريبة لكن!
عشان كده يا جماعة لازم تعرفوا
ان الديكتاتورية المدنية من اسوأ انواع الديكتاتوريات!
قول لى ليه؟
لانها يا صاحبي هى والنفاق صنوان، ففى اول (لفة) الحكاية بتتشتت كلها.
بمعنى ….
يحدثوك فى ندواتهم بكلام معسول ويخدروك عن الديمقراطية ويبردوا ركبيك (تب) عن قبول الرأى الآخر.. ومنننن ما يشوفوا ليهم (كوز لف عمتو) بتمسكهم ام (هلا هلا) وترا ياها زى بتاعت مولانا ده
فيا هؤلاء ….
تفرغوا لترتيب بيوت أحزابكم من الداخل ومارسوا الديمقراطية اولاً قبل ان تخرجوا بها للناس. وندعو السيد الفاضل ان يعى جيداً ان زمن الحكم (بالكلام والمايكرفونات) قد انتهى، وان الصندوق هو ما ينتظر الجميع، وان كان ولا بد فعليه ان يحشد اعضاء حزبه مطالباً بالقصاص من الانقاذيين (اولاد اللذين) ديل، فان استطاع ان يملأ (باصين) فليفعل. بدل الرجفة دي!
(عووووك المؤتمر الوطنى جاكم).
والنكتة التى نحشرها هنا ان احد الاعراب فى الخلاء شاهد قطيعاً من الافيال تشن هجوماً على المزارع والناس وهى فى حالة هياج … فاصبح يلهث جارياً يستبقها ليبلغ الناس ليأخذوا حذرهم.. فمر برجال جلوس تحت ظل راكوبة فى العراء فصاح فيهم مناديا: (هوووي يا التحت الفيلة الرواكيب جنكم).
وما قال الاعرابي هو ما غرد به مبارك الفاضل.
لا احد من الساسة ومدعي القداسة الاسرية يملك هذا الوطن بصك حصري عليه او على اسرته او قبيلته، فمن اراد الحكم فعليه بالصندوق الذي يهربون منه والا فليصمت .
ونكررها بلسان الاعرابي (هوووى يا التحت المؤتمر الوطني الرواكيب جنكم)!
قبل ما انسى:
البرهان …..
يا خوي نجض شغلتك.

صحيفة الانتباهة