صبري محمد علي (العيكورة) يكتب: (بعيداً عن السياسة)الصاروخ الصيني (العاير)

الصين وللمرة الرابعة خلال عامين تفشل فى التحكم فى صاروخ بعد اطلاقه . الصاروخ الاخير خرج عن مداره منذ (٣١) اكتوبر و(طفش) مما اضطرت معه الصين ان تعلن للعالم انها فقدت السيطرة على صاروخ كامل بوزن (٢٠) طناً اى يعادل وزن عمارة من عشرة طوابق حسبوها كيفن ؟ ما تسألني ده كلام ناس (الاندبندنت) البريطانية .

طيب يا جماعة المصيبة دى متوقع سقوطوها وين ومتين؟ كالعادة قال ليك مصر والسودان، الجزائر، المغرب وتونس والسقوط كان يتوقع له امس الاول الجمعة لكن سقط ما سقط علمي علمك واحد . ودى ما مهمة المهم يا صاحبي هو …

دى فرصة الواحد

(يعمل فيها عالم صواريخ) !

مش ناس الفضائيات بجيبوا ليك واحد كده ماكن ويلمع من مجاميعو ويكتبوا ليك تحته (المحلل السياسي والخبير الاستراتيجي المعروف) ؟

بسسس ….

اها انا عاوز اشرح حكاية تكرار (عيران) الصواريخ الصينية

اولاً لا بد من تعريف مفردة (عار) وهى مفردة دارجة تطلق على (الحمار) اذا خرج عن مداره وفُقدت السيطرة عليه ! ما تعاين لى ماااا عشان اقرب ليك المعنى ياخ . بمعنى آخر الحمار تكون راكبه ومزاجو ما رايق ينفضك هناااك ويفرتق يعمل سايرين ويخليك تنفض الغبار فى الحال دى يقال ان (الحمار عار) منك اى فقدت السيطرة عليه .

(طيب) نسقط الكلام ده على صاروخ (نسايبنا) الصينيين . فمن المعروف يا (عب باسط) ان الصواريخ تطلق بانواع مختلفة من الطاقة حسب مقاومتها للمدار الذى ستخترقه رأسياً وصولاً للمدار او دعنا نسميه (الطريق) الذى سيدور بداخله حول الكرة الارضية .

هذا الصاروخ كلما نفذ خزان وقود تخلص منه وخف وزنه ثم يبدأ بالتزود من الخزان الذى يعلوه وهكذا (الحكاية دي) محسوبة بدقة متناهية (خاالس) يعنى مافى طريقة تقيف فى الشارع شايل جالونك تأشر للعربات عشان يدوك بنزين وكده !

فالصاروخ الصيني بتاعنا ده بعد وصل مداره يفترض ان يتم التحكم فيه من المحطة الارضية حسب الغرض الذى اطلق من اجله سواء أكان الهدف رسم خرائط او تحديد درجة حرارة او اى قراءات جيوفيزيائية لكوكب الارض او اى بقعة اخرى منها فيبدأ بارسال اشارات للمحطة الارضية ليتم تحليلها والاستفادة منها .

(فالجماعة ديل) فقدوا التحكم فى المصيبة بتاعتهم دى

(و يا الواطة جاك زول) ..!

السبب شنو ؟ مش عارف (إمكن) فى واحد من ناس المحطة الارضية كان (سكران) ادخل معلومات خاطئة (الله أعلم) واللا كسر (اتوميزر) واللا خلط موية وزيت ! مش عارف

المهم المهمة فشلت وبعد داك مافى حل غير يرسلوا لناس العالم بالخبر الصاعق . يا ناس الواطة (عووووك) الصاروخ جاكم .

يا جماعة ده كلام ده ! نحن فى كل سنة مرتين تلاتة ونحن فى رعب من مشاترة الصينيين ديل؟ الناس ديل ما عندهم غير الشلاقة التكنولوجية دى ؟ ياخى يمشوا يلعبوا فى الواطة مع الزراعة اوالكباري لكن يا جماعة الهواء ده تحته ارواح بني ادمين !.

اذكر فى سنة ما ان غواصة نووية امريكية غرقت داخل احد المحيطات فتعاطف العالم اجمع مع (طنط) امريكا والكل يعرض خدماته للمساعدة فى انتشال الغواصة فقبلت امريكا كل المساعدات الا من الصينيين ! تعرف ليه ؟ قال ليك ديل (عفاريت) و(حا) يسرقوا التقانة و يطوروها لصالحهم .

الصواريخ (الباليستية) برضها نوع من هذه التقانة التى برعت فيها كوريا الشمالية (طبعاً) مرة الرئيس (عب فتاح السيسي) نطقها (البلستيكية) فاثار لغطاً اعلامياً كبيراً.

المهم يا صاحبي الباليستية أيضاً تطلق لمدار معين ثم تسقط بفعل الجاذبية الارضية وبها رأس يزود بنوع السلاح المراد استخدامه سواء كيميائي او نووي او بايولوجي فيتم توجيهه عبر الاحداثيات للنقطة المراد استهدافها . هذه الطريقة استخدمها الروس بافغانستان بنجاح فى استهداف زعامات المجاهدين اوائل حربهم .

قبل ما انسى :-

غايتو الله يهدي الصينيين بس

صحيفة الانتباهة