صبري محمد علي (العيكورة) يكتب: (أخوانا من الحرية والتغيير) ليتك سميتهم يا برهان !
لم أكن متحمساً ان اكتب عن خطاب الفريق البرهان الذى ألقاه بالامس بقاعدة (المرخيات) لسبب بسيط جداً هو انه لا (جديد فيه) وبدا لى كتوأم لخطابه بقاعدة (حطاب) بيد ان زى التوأم قد اختلف فسهل ملاحظة الفرق بينهما .
الفريق اظنه لم يصطحب معه (الطبنجة) هذه المرة وبدا أكثر هدوءاً وان جاء حديثه قافذاً فوق كثير من النقاط الجوهرية التى كانت تحتاج للمزيد من الايضاح (مثلاً) …
سعادة الفريق حذر من (فى ما معناهو) الابتعاد عن الجيش وسمى الاسلاميين والبعثيين والشيوعيين وحاجة بالشكل ده . طيب يا سعادتك فى (الحتة دى) كووولنا معاك واظن مافى زول قرب للجيش وخاصة الايامات دى . بل هناك مليونيات داعمة له من ناحية الاسلاميين منذ العام ٢٠١٩م لم تتوقف .
اما (الجماعة التانيين) ناس معليش معليش ما عندنا جيش . ما قلنا خلاص يا سعادتك نقلب الصفحة وعفا الله عما سلف والجماعة ديل وقعوا ليكم فى الواطة وجوكم ساريين الليل عديييل بعيداً عن اعين الاعلام .
اذا حكاية (ابعدوا) عن الجيش دى اعتقد ده كلام ساكت واذا … (انا بقول اذا) ….
فى حاجة كده واللا كده سعادة الفريق شايفها امسكوهم ياخ وحاسبوهم بالقانون لكن حكاية (مافى زول يشرب ليهو كباية شاي سااكت مع ود خالتو لانو ضابط)؟ كده لكن ما عصرت علينا ياسعادتك !
الفريق قال …
لا تسوية ثنائية ! كلام سمح ! ولن تعود قحت البائدة مرة اخرى للحكم ! كلام زى العسل لكن شوفو الفريق قال شنو فى حتة تانية من الخطاب !
قال ….
(ما معناهو) صحيح جونا بعض (اخوانا) من الحرية والتغيير والتزموا لينا ان يعملوا من اجل الوطن لا من اجل حزب والتزموا بأن لا عودة لقحت مرة اخرى !
فى اشارة لم يفصح عنها لمسودة دستور تسييرية المحامين الذى تتبناه قحت المركزي والعم (فولكر) !
قول لى الكلام ده جبتو من وين ؟
ايواااا … اقول ليك انا
فى فقرة اخرى من الخطاب سعادتو قال (ما معناهو) ان الناس ديل فى اشارة للسياسيين لن يتفقوا (فاحسن) يجلسوا حول حاجة واحدة واظنه يعني (مصيبة المحامين دى) ويعدلوها واكثر من مفردة (سوا) يقعدوا سوا يتفاكروا سوا … وهكذا !
فهمي غايتو (للحتة دي) هو ….
ان كلام سعادة الفريق اكد على ان مسودة دستور المحامين هى الخيار الاوحد او هكذا يجب ان تكون
(انا بقول ده فهمي غايتو)
واى جهة سياسية اخرى (حقو) تجى تجلس حولها زى قدح التكية وكل زول يشرم ويجرح ويعدل و(يقش خشمو) و يتخارج !
لى متين الحكاية دى ؟ اسألني يا (عب باسط) .
وبرضو بقول ده فهمي انا للموضوع ده !
طيب ….
هل تمت دعوة كل الوان الطيف السياسي لهذا (القدح) ام ما زالت (ياها المضايرا الشايفنها دي)؟
وحتى وإن ….
كان هناك من ابدى رغبته فى الجلوس سواء من نداء السودان او المبادرات الاخرى فاين الملتقى وتحت رعاية من؟
البرهان قفز فوق كل هذه الاسئلة المشروعة والبديهية جداً ومضى فى حديثه .
لم يحدث الناس عن حكومة الكفاءات التى ظل يبشر بها الناس فى احاديثه متى هي؟(الله اعلم) واين معاش المواطن من كل هذه الضوضاء السياسية .
ايضاً تحاشى الاشارة لاى مجهود خارجي لدعم الانتقال ولعل مستشاريه قد نصحوه بذلك حتى لا يزيد من تأزيم الموقف السياسي المأزوم اصلاً .
وحتى لا يثير حفيظة (ناس الكرامة) ان هو تطرق لدعم اجنبي .
بالامس الاول ….
نقلت الاخبار ان قوات الدعم السريع دون الاشارة الى الجهة تحديداً كالادارة القانونية او السياسية بداخله قد اضافت (٣١) تعديلاً على المسودة كما اضافت لها (البسملة) . مما يعني ان الحكاية اصبحت (زى ماعون الجيران) بى فوق للحيط هاكم ضوقوا وادونا النضوق ؟
فاين بقية المكون السياسي؟ ومعلوم ان الدعم السريع او الجيش او بقية الاجهزة الامنية محرم عليها ولوج السياسة الا اذا خلعوا (البزة) العسكرية اليس كذلك؟
فى ظل هذه الضبابية اعلنت مبادرة (نداء السودان) بالامس الاول عن مقترح دستور انتقالي اسوة بدستور تسييرية المحامين (المنكور) حتى هذه اللحظة !!
ترى ….
ماذا سيفعل البرهان ان اتى اخرون بمسودات دساتير اخرى ؟
اعتقد سيجد نفسه مرغماً ان يجهز الديوان والعشاء والاباريق ويدعو الجميع بدساتيرهم للتفاكر والخروج منها بدستور واحد و (بالحد التدنى) من التوافق بدلاً من الاعتماد على مسودة واحدة كما هو الحال الآن !
فهل سيتعقل الرجل ويفهم ان المبادرة (فى النهاية) ما هى الا دستور لو اعيدت صياغتها اللغوية؟
قبل ما انسى : –
كم وددت لو افصح الفريق البرهان عن اسماء (إخوانه) الذين اتوه والتزموا له من الحرية والتغيير ! حتى تكتمل الصورة.
صحيفة الانتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة