صبري محمد علي (العيكورة)يكتب : سعادة النائب العام… ياخ ده كلام خطير جداً إنت وين؟

كتب الدكتور (عمر كابو) وهو من رجال القانون . كتب تحت عنوان (النائب العام … امتحان النزاهة)
ما ملخصه الاتي …. وعاوزك تركز معاي كويس فى كلام الدكتور عمر كابو الذي يقول فيه ….
إن الرويبضة ياسر عرمان (واضاف بعدها لقباً جديداً) للرجل ولكن دعوني اكتفى بمفردة شيخنا الراحل الاستاذ الطيب مصطفى رحمه الله رحمة واسعة وهى (الرويبضة) وشرحها كما وردت فى الحديث الشريف .
(طيب) عمر كابو قال عن هذا الرويبضة انه كان يقدم تنويراً للصوص قحت (اربعة طويلة) بحسب وصفه من غير ان يحدد المكان والزمان (اكد ليهم) (الشيخ) عرمان ان …..
النائب العام (وعدهم) بسحب البلاغات المدونة ضد … و (انا ما عاوز اقول المجرم ) لحين صدور حكم القضاء . ضد الاستاذ وجدي صالح . الشهير اعلامياً ب (وجدي صامولة) و (مقدم برنامج اراضي واراضي) و (وجدي شاشات) المحبوس الان على ذمة العديد من القضايا المدنية ليس بينها قضية سياسية واحدة .
(طيب) …..
(حا) تقول لي سحب البلاغات (يعني شنو) ؟
ده يا صاحبي ان صدقت مقولة (الشيخ) والدكتور كابو (معناتو)
ان المحكمة ستجد نفسها مضطرة لاطلاق سراح السيد وجدي بالضمانة العادية لانقضاء مدة السماح بتجديد الحبس ! (فهمتا علي) ؟
بمعنى آخر يا (عب باسط)
لو ان النائب العام (ركن) الاوراق دى سااااكت داخل درج الطربيزة وصهين ولم يحولها للمحكمة . فالقاضى ليس له حق فى استمرار حبس (صامولة) …!
طيب (خلينا) نقول ان ما (نور) به عرمان جماعتو كان كلام (هوا ساكت) وعاوز يعمل فيها الود قلبو على شاشات وكده . نقول ده من حقه ان يدعم اصدقاءه من (حرامية الثورات) وكده .
ولكن نقل عن عرمان جملة يجب ان تصل القصر الجمهوري وهى تأكيده (خلي بالك) من هذه الجملة .
(انه ليس هناك ادنى خوف من النيابة العامة فى وجود النائب العام الذي تمت السيطرة عليه سيطرة فعلية) !
ده كلام (منو) يا جماعة ؟
ده كلام عرمان الذي اشار اليه الدكتور (عمر كابو) إن صح !
قال (سيطرة فعلييية)
كيفن؟ ومتين؟ وبى شنو؟ علمي علمك واحد يا صاحبي .
الدكتور عمر كابو طالب النائب العام بتحويل اوراق القضيتين للمحكمة واشار الى ارقامهما وقال انه لا يجد اى مبرر قانوني ولا منطق ان تظل حبيسة الادراج .
وذكرهم بالممارسات المعيبة فى عهد النائب العام (السيد الحبر) ضد رموز الانقاذ وذكر بعض الاسماء والقضايا الشهيرة .
قبل ما انسى : –
يا السيد النائب العام ! يا (مولانا) ! كدي ياخي شوف الكلام البتقال ده صاح واللا غلط و(هداااك) ياسر عرمان و(هداااك) الدكتور عمر كابو لو الكلام ده غلط (قاضيهم ياخ) واذا الكلام ده صاح كمان فالورقة والقلم قدامك اكتب استقالتك طواالي واتخارج ! دى فضائح شنو يا جماعة ؟
قال (سيطرة فعلية قال) !

صحيفة الانتباهة