العيكورة | مش ملاحظين (الحاجة دي) يا جماعة؟

بقلم: صبري محمد علي (العيكورة)
ويظل الفارق بين مظاهرات (القحاطة) ومظاهرات (الما قحاطة) فرقاً شاسع (البون) كما يظل الهدف كذلك.
بالامس القريييب ١٩ ديسمبر وتزامناً مع ذكرى الثورة (المجيدة خااالس)
حصل الآتي حسب معلومات مستقاة من المواقع الاخبارية ومن بيان الشرطة
يقول الآتي:
بدأت المظاهرات سلمية ولكن (قال ليك) سرعان ما انحرفت عن سلميتها واتجهت لمهاجمة قوات تأمين المرافق والمؤسسات العامة، وذلك باستخدام الحجارة والنبال (اااي الحكاية جابت ليها نبلة)! والزجاجات الحارقة والخوذ والدروق الواقية!
يعني الحكاية اصبحت شبه مواجهة وليست مظاهرة سلمية مطلبية لايصال رسالة محددة المطالب مطالبة بالحكم المدني وكده…!
طيب قال ليك…
تعاملت الشرطة بمهنية عالية جداً لتفريق المتظاهرين باستخدام الوسائل القانونية كالغاز المسيل للدموع وخراطيم الدفع المائي وحاجات بالشكل ده!
نشوف النتيجة شنو؟
اصابة (١٢٤) شرطياً من بينهم (٥) ضباط احدهم برتبة ملازم اول بتر احد اصابع يده اليسرى!
وفى المقابل هناك اصابات بين المتظاهرين بلغت (٦٧) متظاهراً!
طبعا الارقام دى ممكن تكون (زايدنها موية)! والله اعلم بصحتها.
لغاية هنا اعتقد ان الموضوع (مبلوع) كما عودنا حبايبنا (القحاطة)
لكن الحاجة (الما كويسة) ..
تعال اسمع معاي ….
قال ليك وقد تم القبض على (٦٧) متظاهراً! (برضو) نقول معقولة، فقد يكونوا هم من رشقوا قوات الشرطة بالحجارة وكده!
قال ليك (لا) …
فقد تم ضبط (بعض) الخمور والحبوب المخدرة وخوذ وكمامات وركشات ومواتر!!
ده وين يا جماعة؟
ده قال ليك (فى نصصص) المتظاهرين! يعني كتيبة اسناد وافساد على عينك يا تاجر!
مواتر وركشات وحبوب و (مش عارف) خمور! مش ياهو الاسناد؟ واللا انا غلطان.
يعني (اتقريفت ليك) لسفة او شمة او .. .. او …. (طوالي) يجيك بتاع الموتر يقول ليك (هاك يا عمك) استمتع بالمظاهرة ودع لنا القيادة!
(اهااا) يا جماعة زي ديل طالعين مظاهرة؟ واللا ماشين حفلة! واللا (كولومبيا)؟
اذن هنا (تفرق) الحكاية …
مظاهرة سلمية حتى نهاياتها.. (لا) مش كده وبس وتنظف الشوارع من بقايا زجاجات الماء الفارغة وخلافه. وتوصل رسالتها ثم تنصرف.. (ااي نعم) بعد يهتفوا ويكبروا ويهللوا ويطالبوا باى حاجة بس! لكن ان يمسوا شعرة من القوى الامنية فلا!
وبين مظاهرة شايلة معاها (وزنة الرأس) والحجارة!
ايها الآباء والامهات والاسر ….
فهمتوا الحكاية واللا ازيد؟ تعرفوا زي اليوم ده بسموه لوليداتكم شنو؟
بسموهو يوم (خم الرماد) بمعنى …
اطلع معانا المظاهرة وكل حاجة (ملح) وخدمة (خمسة نجوم تحت الصفر) فاهمين الحكاية؟ يعني (الليلة بلاش)! يعني تعال اتظاهر و (خرشتك علينا)!
يعني (كنداكة نحنكا ليك).
والا فما هو لزوم كل هذا الدعم اللوجستي (الركشاوي) الذى يصاحب المظاهرة وتم القبض عليه واحالته للجهات المختصة لاتخاذ اللازم.
واخيراً:
نحيي الشرطة على مهنيتها العالية وصبرها اللامحدود على هذه المصيبة (الوقعنا فيها)، وحسناً انه لم تزهق نفس بريئة، مما يدل على الوجود الامنى والاستخباراتى المكثف ونجاح الحملات المنعية لاوكار تجهيز السيناريوهات القاتمة من القتل المجاني والتلميع قبل الاستهداف.
قبل ما انسى:
لجنة الأطباء الشيوعية.. كيف كده تمام؟
حقو تغيروا المهنة!
(فاهمني يا دكتور)؟

صحيفة الانتباهة