صبري محمد علي (العيكورة)يكتب: لازم (ضبيحة) يا حِمَيد ؟

الخميس الماضي وبحسب صحيفة (صوت السودان) ان والي النيل الازرق سعادة الفريق احمد العمدة بادي قد اصدر قراراً بتشكيل لجنة عليا بولايته لاستقبال رئيس مجلس السيادة الانتقالي الفريق اول البرهان فى اطار زيارته المتوقعة لمهرجان الرماية رقم (٥٧) بمنطقة قرقدة بالولاية
اظن لغاية هنا …..
ويعتبر الخبر عادي ويفهم منه ان لجنة يعني (لجنة) لا يتعدى افرادها عدد اصابع اليد الواحدة او اليدين الاثنين على اكثر تقدير قد شكلت لهذا الغرض .
(لكن) تعال اقرأ معاي باقي الخبر ….!
هذه اللجنة يا صاحبي ..
برئاسة وزير المالية (ما قلنا حاجة نقول عشان الكشكوش وكده) !
و (قال ليك) ووزير الزراعة والغابات رئيساً مناوباً…!(برضو نقول لربما ان الرجل نشيط ومبدع فى الحفلات)
لكن تعال احسب معاي …
باقي اللجنة …
(قال ليك) والامين العام لحكومة الاقليم مقرراً .
ووزراء ….
البنى التحتية والتنمية العمرانية والثروة الحيوانية والصحة ورؤساء المجلس الاعلى للثقافة والاعلام والشباب والرياضة
ومحافظي محافظات الدمازين والروصيرص وقيسان وباو ! (الجماعة اظنهم ديل شغالين بالجنيه القديم لسه) المحافظات يقصد بها المحليات
(طيب) …
اصبر لي لسه اللجنة ما انتهت (قال ليك) وممثلي القوات المسلحة والشرطة والامن والمخابرات العامة والدعم السريع والاحتياطي المركزي والجيش الشعبي والادارة الاهلية والحركة الشعبية ورئيس اتحاد المصارف والغرفة التجارية والخضر والفاكهة واللجنة التسييرية للمزارعين والرعاة وممثل تجمع القوى المدنية ونشطاء السلام …!
يا جماعة …
انتو متخيلين معاي دى لجنة كونها والي لاستقبال رئيس مجلس السيادة لزيارة عابرة قد تستغرق (٧٢) ساعة فى اقصى توقعاتنا .
انتو متخيلين معاي ….
ان هذه الولاية الجريحة ما زالت تضمد آلامها من ما اصابها من اقتتال عرقي وطائفي قبل شهور معدودة !
انتو متخيلين معاي …
ان هذه الولاية ما زالت تتلقى المساعدات والاغاثات لجبر الضرر وعودة النازحين !
(متخيلين) الحكاية دي ؟
لجنة بهذا الحجم لزائر عسكري قد لا يخاطب المواطنين اصلاً فكم ستكلف اعاشتها وترحيلها !
(ياخ) موية زرقاء ساااي ما قلنا بارد فى اجتماعاتهم بتكلف كم خليك من الفطور وكده !
(لا) وكمان القرار خول لهذه اللجنة ان تشكل من اللجان ما تراه مناسباً ! (ياسلاااام ياخ) يعني الحكاية (لسه) !
بالطبع ….
لن اسأل عن تكلفة ضيافة الضيف (العزيز جداً) بل سأتساءل فى حيرة عن تكلفة اعاشة هذه اللجنة وترحيلها و…و….. كما ذكرت قبل قليل
سيدي الوالي …
سأحكي لكم طرفة كنت شاهداً عليها يوماً ما . بالشركة التى كنت اعمل بها باحدى دول الخليج . والموظف (حميد) من مواطني تلك الدولة كان يكثر من طلب (السلفيات) المالية عبر المحاسب والمحاسب كان مستاءً من تكرار طلبات (حميد) (بكسر الحاء وتشديد الياء) فاستفسره وكنت اراقب الحوار
حميد ….
بالامس القريب استلمت راتباً شهرياً فاين ذهب يا (حميد)
وحميد يقول …
كان عندي ضيوف واشتريت لهم ذبيحة !
ويبدو ان المحاسب قد اعتاد سماع ذات التبرير .
والمحاسب ….
يخبط يخبط كفيه ببعض بحسرة ويقول ..
هو لازم يا حميد كل يوم دبيحة دبيحة ! ما تجيبلهم طبق فول وطبقين بيض وخلاص !
اظنك فهمت قصة حميد سعادة الوالي ف (مافي) داعي تعملا فى النيل الازرق
والجود بالموجود
قبل ما انسى : –
اعتقد ان انسان الولاية والمشردين والنازحين والفقراء والمرضى اولى باموال الولاية
اما ضيفكم فسيكفيه …..
(صحن فول وصحنين لحمة) و(لِم باقي قروشك سيدي الوالي)

صحيفة الانتباهة