صبري محمد علي (العيكورة) يكتب: اسمعني يا (البتغني) في الحمام

التقيت الأسبوع قبل الماضي بابن الخالة جيولوجي مستشار مهدي مبارك حاج فضل الله فى مناسبة اجتماعية خاصة بالاسرة . ومهدي هو احد الخبراء المعنيين بدراسة ظاهرة (النز) أو النضح المائي الذى ازداد فى الاونة الاخيرة بولاية الخرطوم ومناطق اخرى خارج الولاية عن المجلس القومي الجيولوجي بالسودان
هذا (النز)
أصبح يشكل خطراً على المباني وكثيراً ما تداولته وسائل الاعلام .
السيد مهدي قال (وانا فاهم كلامو ده كويس بحكم التخصص) ولكن اردت ان (اوقع) الكلام ده لناس (قراحتي) راحت او (قريعتي) راحت
حتى ينتبهوا لحكاية السلوك البشري الخاطئ الذى يزيد من تفاقم من هذه الظاهرة.
السيد مهدي …
ذكر لى تجربته مع منطقة (أمدرمان) كمثال فقال انه كان ضمن الاطقم الفنية التى تعاملت مع هذه الظاهرة منذ العام (٢٠٠٦)م والعام (٢٠١٧)م
فذكر ان منطقة امدرمان تقع فوق ما يعرف جيولوجياً بـ(الحوض النوبي) وهذا الحوض يختلف فى الاعماق من منطقة لاخرى وهو يتكون من (فورميشن) اااى ركز معاي شوية هذا التركيب غير نافذ يعني بقولوا عليهو بالانجليزي (البورزتي او البيرميبلتي) بتاعتو ضعيفة جداً لذا فهو يحتفظ بالماء بداخله ولا يسمح بدخولها من الخارج ايضاً
طيب ….
نجي نشوف ظاهرة (النز) بتحصل كيف !
(تقووووم) انتا يا العندك (مصاص) واللا مش عارف (سايفون) سطحي وفرحان بيهو تستحمى فى اليوم تسع مرات ده غير اخوانك واخواتك فى البيت وواحدين كمان (بغنوا) فى الحمام .
تتسرب هذه المياه لعمق لا يزيد عن ثلاثة امتار فتصطدم بالطبقة العليا من الحوض النوبي غير النافذ فتعود المياه ادراجها من حيث اتت فيحدث تشبع لهذه الثلاثة امتار فتسلك طريقها الى السطح سواء داخل منزلكم او منزل جارك .
طيب …؟
اول حاجة تتبادر الى اذهان العامة
ان هذه المياه هى مياه جوفية او موية النيل !
ويا حكومة الولاية جاك زول وهاك يا شكوى (صاح)؟
قال ليك (لا) …
السبب هو وجود هذه الطبقة غير المسامية التى تصطدم بها (موية حمامك) . واما منسوب النيل فقال ليك هو اقل من منسوب اراضي امدرمان والماء ينساب مع شنو يا جماعة ؟
مع الجاذبية وليس عكسها .
فلازم تعرف ان ….
هذه هي موية حمامك انت لمن كنت (عامل لي) فيها
(عثمان حسين) !
(اها) الحل شنو يا ود خالتي ؟
قال ليك من الواضح ان هناك سبباً (جيولوجياً) وسبب اخر هو السلوك البشري . والسبب الجيووجي لا يمكن تغييره اما السلوك البشري فيمكن ذلك لو تعاون الجميع وسنت تشريعات تشترك فيها جميع الجهات ذات الاختصاص بالولاية المعنية مصحوبة بالتوعية الاعلامية واقامة الندوات والتوعية عبر المساجد والمدارس والجامعات .
طيب يا ود خالتي …
لو ده كلو ما قدرنا عليه وانت عارف الايامات دي الفنانين كتار البتخرجوا من الحمامات .
نعمل شنو؟
قال ليك ….
تمشوا للخال …!
شنووو؟ قال النائب بس
لإنشاء شبكة صرف صحي هى الحل الجذري ويمكن اعطاؤها لشركات متخصصة وبنظام (البووت) وهي تعني ابنِ، شغل، واستثمر
اظن ده حل وجيه لكن البوصلنا للسيد النائب منو ؟
قبل ما انسى : –
إن شاء الله تكون فهمتني يا البتغني فى الحمام ومنتظر الحكومة تحل ليك مشكلتك مع (النز) .
مطلوب القليل من (الرفالة) لتخفيف الازمة .

صحيفة الانتباهة