الدنيا مُنى واحلام يا (سلك)
الانتباهة او لاين
مسابقة عيون الشباب على التنمية
الرئيسية/الكتاب/محمد صبري العيكوره
الدنيا مُنى واحلام يا (سلك)
بقلم/صبري محمد علي (العيكورة)
فبراير 10, 20231٬204
خاص ب [الانتباهة]
بالامس الخميس و (بالميديا) كان بين كل خبر وخبر . خبر يقول (خالد سلك قال …)
وخالد (ولدنا) يلبس هذه الايام قميص المتحدث بإسم العملية السياسية ! يعني قحت المركزي لكن نكروها (كلو كلو) ! فقال ليك (العملية السياسية)
(مافي مشكلة) …
خالد يقول .. خالد يصرح فهذا حق مكفول مافي شك .
يحلم …
براهو زى ما هو عاوز برضو حق مكفول لكن ما (يسوقنا) كمان نحلم معاهو بالخلاء و بالنهاااار كده !
(فاااا) يوم الخميس امس يا سيد (اللمنتي ليك) ولدنا خالد قال إن هناك اجتماعا (مرتقبا) لاحظ يعني هو زاااتو لا يملك معلومة تأكيد توقيت الاجتماع قال ليك (مرتقب) !
اهااا يا ود اخوي وبعدين؟
قال ليك …
هذا الاجتماع سيجمع عمنا البرهان والخال حميدتي مع ممثلين لقوى الاتفاق الاطاري (قحت المركزي) وطبعا برضو لم يذكر قحت هذه !
والشينة (مالا) يا جماعة …! منكورة .
طيب …..
قال مع (اطرااااف) وعاوزك تركز معاي في كلمة اطراف هذه يعني ليست الكل .
من الكتلة الديمقراطية ويقصد بها (قحط الارادلة والجبابرلية والمناويين والامييين و الابراهيميين …و….) وغيرهم من ما تبقى من الاحزاب (الرُبُع) .
طبعا كنت متوقع ….
(ولدنا) خالد يقيف لحد هنا باعتبار ان الاجتماع لم يتم اساسا وينتهي التصريح لغاية هنا .
(لا) بدأ يوصف لينا فى فى الشيلة و (ناس السيرة) كمان .
فقال ليك ….
من دعا للاجتماع هى الرباعية (نظام يعني اجتماع مهم وكده) !
وقال وذلك ….
لمناقشة سبل انضمام القوى الغير موقعة فى سبيل الوصول ل (مش عارف) لاتفاق سياسي بغية استعادة مسار الانتقالي المدني .
(يعني كأنو الاولاد كانوا منتخبين اساسا) وكده !
يعني الحكاية (سلبطة) و وصاية وهمبتة على هذا الشعب المسكين . (شفتا كيف)؟
خالد يا إبني ….
مش البرهان الشايفنو ده ؟ لو ما وداكم البحر مائة مرة وجابكم عطشانين احلق شنبي !
(البلد دي ما واقعه ليكم فى كرتلة) يا بني .
الجمعة ١٠/فبراير ٢٠٢٣م
صحيفة ادانتباهة
إنضم لقناة النيلين على واتساب
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة