صبري محمد علي (العيكورة) يكتب: القمة العالمية للحكومات أم حاجة تانية !
زيارة الفريق البرهان لدولة الامارات وما اعلن عن لقائه او سيلتقي برئيس الدولة الشيخ محمد بن زايد وايضاً بالرئيس المصري (عب فتاح) السيسي لمناقشة القضايا الثنائية بين البلدين !
ياخي ….
مافى ساعة بتناقش ليها قضايا بين بلدين!
(ما تخمونا ساكت) …
نعم فى ظاهر الامر ان البرهان ذهب مشاركاً فى انعقاد القمة العالمية للحكومات التى تعقد (اعتقد كل عام) يومي ١٣، ١٤ من فبراير !
ولكن …
دعني عزيزي القارئ ان اتوقف قليلاً عند هذا المسمى (القمة العالمية للحكومات) ثم نعود لموضوع زيارة (عمنا) البرهان
(ااي) العنوان يعني حكومات دول تجتمع لمناقشة شنو …
(قال ليك)
لاستعراض احدث الابتكارات يقصدون فى الحكم (طبعاً) وللمضي نحو افاق جديدة من التميز والشمولية ! (غايتو انا ما فاهم حاجة) . او ان ذلك يعني ان البرلمانات العربية ومش عارف (العدل اساس الحكم) كلها (كلام ساكت)
المهم يا صاحبي (قال ليك) …
وفق رؤية الشيخ محمد بن راشد آل مكتوم نائب رئيس الدولة، حاكم دبي انشئت هذه القمة فى العام (٢٠١٣)م
(اوكي) ….
نقول هم (فوق عديلهم) ياخ ونحن مالنا والقمم الناعمة بتاعت الناس المرطبين ديل !
اغرب حاجة ….
يتفاكر حكام حول كيفية حكم شعوبهم وكأن الشعوب شعب واحد وان الفقر والغنى والمزاج واحد !
طيب (حا) يقولوا شنو يعني ؟
الحوسبة ؟ الحوكمة؟ ام الحكومات الالكترونية فى حاحة غير كده ؟
لكن ….
هل يستطع أحد منهم أن …
يتحدث عن التسليح فى بلاده؟
طبعاً (لا) .
هل هناك من يتحدث عن الصهاينة والقدس ومناقشة (خلينا نحلم)
كيفية تحريرها من براثن اليهود؟
بالطبع (لا).
طيب يا (عب باسط)
خلينا نقول (تب) ناقشوا مشكلة نقص الغذاء وحاجات بالشكل ده !
فهل يا تُرى (حا يجيبو) خبر لي ويكتنا و ويكابنا وتركينا ده؟ بالطبع مافى زول سمع بيهن اساساً .
طيب لزوم خسارة البنزين والطيارة شنو؟
ما يفتحوا الشاشات وخلال اجتماع افتراضي يقولوا العاوزين يقولوه والسلام على (طه الامام)
طيب …
نعود لزيارة عمنا الفريق البرهان (قناعتي الشخصية)
انو الزول ده ما فاضي ليهم خااالس وبرنامجه (مزحوم) من مجاميعو واظنه الجمعة او السبت القادم قالوا ماشي ليهو (لعقد) لزواج جماعي فى ولاية نهر النيل
لكن ….
سعادة الفريق فيما يبدو لي (إنو)
قال ليك يا ولد … خليني أمشي لاولاد زايد ديل أجبر بخاطرهم وآخد لى معاهم خشم خشمين كده وهى كلها ساعات معدودة وبرجع باذن الله
وبالمرة كمان ….
(ركز معاي)
عزيزي القارئ
واظن هذا هو (مخ الزيارة)
وهو ….
اراد البرهان ان يطمئن (ولاد زايد) بأن (المرحوم) الاطاري (الله لا يرحمو ولا يغفر ليهو) فى اخر ايامه كان قد أوصانا (بتوسيع قاعدة المشاركة)
ووصية الميت شنو؟ يا سمو الشيخ !
واجبة التنفيذ صاح
(ثم ثانياً) …..
المثل بقول (اللي خلف ما ماتش) يعني الاطاري ده رايح مننا وين ماهوو الورثة بسم الله ماشاء الله وانت سيد العارفين .
ويمشي بعد داك يلتقي …
الرئيس السيسي و اووول جملة يقولها ليهو
ومعاها ضحكة كده !
يا فندوم ….
(قال إطاري قال) !
انا عارفك بتاع مقصات وابن ستين لزينا فيضحك السيسي مطأطئاً رأسه قائلاً له
لا ياعب فتاح ما تقولش كده ده حنا اخوات .
معملناش حاجة يا فندوم . ده اقل واجب
قبل ما انسى : –
ولربما قدم البرهان الدعوة للزعيمين لحضور التوقيع الاخير على (الاتفاق الاطاري) لربما !
صحيفة الانتباهة
