العيكورة يكتب.. الكمساري

بقلم/صبري محمد علي (العيكورة)

خاص ب [الانتباهة]

تعرفوا يا جماعة …..

السواق لما يكبر وخلاااس النظر يقل و تغلبوا السواقة زملاؤه من الشباب فى السوق ما برضوا ليهو حكاية القعاد ساكت

فااا بخلقوا ليهو وظيفه معاهم فى (الموقف) يمشي بيها حالو !

يا عم حسن بالله اخلس لينا الحافله ديك واللا هاك ياعم حسن بالله سوق باص عكاشة ده املاه ديزل على بال ما يفطر وحاجات بالشكل ده واخر النهار اهووو

عمنا حسن برجع بيتو اخر النهار شااايل ملاح وليداتو .

نوع التكافل الجميل ده اتذكرتو وانا احاول ان اجد توصيفا سياسيا او وظيفيا (لولدنا) خالد سلك فلم اجد انسب من حكاية عمنا حسن بتاع الموقف ده

الايامات دي ….

(الباشمهندس) خالد سلك انتهى بيهو المطاف بمسمى (المتحدث بإسم العملية السياسية) ! (واااا) العملية السياسية طبعا هى الاطاري و لكنهم مستحون ان يكتبوها و(اللي هي) متحورة جينيا عن دستور المحاميين وخدوها بالنازل لمممن توصلكم لفولكر وجماعتو .

فاااا ولدنا خالد شغال للجماعة ديل زي شغلة عمنا حسن السواق مكرفون هنا ومكرفون هناك والجزيرة سادة والجزيرة مباشر ومش عارف ورش وسمكرة واصلاح قطاع الامن والدفاع والدعم السريع والجيش و .. و وكلام كباااار كده

وفى النهاية ….

الكلمة عند منو يا جماعة ؟

فيا (باشمهندس) الجيش والامن والدعم والحاجات الكبار دي احسن تفكوا طريقن .

الناس ديل قالوا رايهم وكل الشعب السوداني فهمو الا إنتو

فاااا شغلانية مواقف البصات دي بلا دركسون او قاعدة جماهيرية سمها ما شئت

مااا بتوكل عيش .

وقديما قال :

(جدنا) المتنبي

اذا رأيت نيوب الليث بارزة

فلا تظنن ان الليث يبتسم

صحيفة الانتباهة