كوش نيوز .. أخبار السودان بين يديك

ناس أحمد الباشا ديل بعد كدا إلّا يمشوا الدهب



شارك الموضوع :

ناس أحمد الباشا ديل بعد كدا إلّا يمشوا الدهب

< اتذكر اني قبل ذلك نصحت الفنان (طه سليمان) ..يمشي الدهب..عندما غنى أغنيات (هابطة) 180 درجة.< ما في زول قال حاجة.< يعني شنو؟.< ما فيها أي حاجة.< الدهب مالو؟.< البلد كلها مشت الدهب.< واتذكر أني نصحت مجلس اللوردات أبو (17) لورد عندما فشلوا في الايفاء بما وعدوا به أن يمشوا الدهب.< ابقوا ناس دهب ساكت...(هنا في الخرطوم دي ما بتنافسوا).< قلتها واضحة وعديل لي ناس عبدالصمد محمد عثمان وعبدالباسط حمزة وكم لورد كدا (هسع نسيت اسماءهم)...امشوا (الدهب).< والله (اللوردات) عرفوها.< لو كان انتظروا الخروج من (التمهيدي) ...كانوا جاتهم (سكتة) قلبيه.< هسع أنا بنفس (الفهم) ..وبعد خروج المريخ من دور الـ (64) انصح ناس احمد الباشا وبلة جابر وسعيد السعودي وموسى الزومة يمشوا الدهب.< اتوفيستر دا خلوه يشيل ليكم (جهاز البحث) عن الدهب.< خلوه يصفر ليكم بدل الجهاز.< الزول دا خبرتو ما كعبة.< الالمان ديل مهما كبروا في السن ..بكونوا ما ساهلين.< يا ناس المريخ جايبين ليكم مدرب عمرو (77) سنة.< دا على شوية كدا يبقى تلات تسعات.< السبعتين فرقها شنو من التلات تسعات.< عاوز اعرف.< عاوز افهم.< دا مدرب ولّا كلية الاثار؟.< خلوها كلية الاثار.< دا مدرب ولا هيئة المواني البحرية.< أنا اول مرة اشوف لي مدرب اجنبي ...الكورة بشوفها زي (النبقة).< لذلك ..وريثما ...وعشان الحتة دي (اتوفيستر) ذاتو خلوه يمشي معاكم (الدهب).< اصلو انا اية جماعة يلخبطوا معاي بقول ليهم ح اوديكم الدهب.< عبدالماجد في البيت لمن يعمل (جوطة) بقول ليه ح اوديك الدهب.< من اجيب ليه سيرة الدهب ..الولد يستعدل ويسمع الكلام.< دحين يا احمد الباشا ويا سعيد السعودي ويا بلة جابر ويا ضفر ويا موسى الزومة ..امشوا الدهب ساكت.< مستقبلكم مضمون في الدهب.< لو طلعتوا ليكم بي (جرام) واحد ..احسن ليكم من (مسخرة) الخروج من التمهيدي.< مالكم ومال الخروج من دور الـ (64).< في فريق في الدنيا دي بخرج من المرحلة دي.< نحن لو شاركنا في بطولة الاندية الافريقية للابطال بـ (سباح)...ما بنطلع من دور الـ(64).< لو شاركنا بي سباح (وما بعرف يعوم كمان) كان ح يتأهل لدور الـ (32).< هسع السلطان كيجاب بي خبرتو ومريختو دي ..لو شارك بدل المريخ ما كان وصل مرحلة المجموعات.< جايبين ليكم محترفين دمهم بارد ...الواحد فيهم يضيّع الكورة ..ويقعد يعاين في السماء.< السماء عمل ليك شنو؟.< ناس تراوري ديل ما عندي ليهم حل غير (الدهب).< شيملس مسكوه (الحلة).< طبعاً من هسع احسموا معاه حكاية التنقيب عن الدهب ما فيه (شاورما).< عشان ما يقعد يعملها ليكم كلها (شاورما) ساكت.< عنكبة في تشكيلة التنقيب عن الدهب ...شكلو كدا بسوق (البوكسي).< نحن الحاجات دي بنعرفها.< من تطفيش الكورة نحن بنعرفهم.< اوليفيه دا النوع البختفي (6) شهور ...يرجع يقولوا ليك لقى ليه (12) كيلو دهب.< زول محظوظ.< الموضوع دا واضح بالنسبة لينا.< ما تقعدوا تعاينوا لي كدا.< ما تتلفتوا ساكت.< هسع احمد الباشا ..(شقتو) البعملها في الكورة دي لو عملها في الدهب في زول بلحقو.< يا جماعة انتوا بتتكلموا كيف؟.< المواضيع دي خلوها لينا نحن.< بنقسمها ليكم زي (المرارة).< اصحابكم ديل يا (مساوي) ويا (بشة) طاروا من دور الـ(64).< ونحن ذوق من عندنا...عاوزين نشوف ليهم (موضوع).< عاوزين نعمل ليهم (شغلة).< الدهب دا احسن منو ما في.< نحن ذاتو لو قانون الصحافة والمطبوعات اجازوه بي شكلو الحالي دا ح نمشي الدهب.< ح نخلي الجرايد.< عشان ما تقولوا الجماعة ديل بتكلموا ساكت.< ديل عاوزين يعملوا ليهم قانون ح يخلى ليك الصحافة دي زي (علب الساردين).< يا زول (علب الساردين) هسع الدخلها هنا شنو؟.< انتوا تدخلوا بين القشرة وبصلتها.< زي كوم الزراير.< هسع كوم الزراير بدخل بين البصلة وقشرتها.< يا زول انت مالك الليلة؟.< بالمناسبة دي..انتوا (العجور) من الفواكه.< فواكه شنو؟.< دا إلّا (عجور) مجنس.< ديل جنسوا أي شيء ...العجور ما خلوه.< ح اكمل ليكم فهمكم.< مرة في زول اتصل تلفون.< الو..< الو..< استاذ احمد.< ابدًا والله انا ما استاذ احمد.< ما ضروي..احمد ..عزالدين ...الطيب ...عمر ..كلو واحد.< انت ابوك الجزولي.< ابدًا والله ابوي ما الجزولي.< ما شرط ..الجزولي ...الفاتح ..مكي ...الشيخ ...عامر ...كلو واحد.< اسمع الليلة السبت.< ابدًا والله.< ما مهم ..السبت ...الاحد ...الاثنين ...الثلاثاء ..الاربعاء ..الخميس ...الجمعة ...كلو واحد.< اسمع يا استاذ عاوز اسألك سؤال.< جدًا اسأل طوالي.< انت كورة الريال متين؟.< الريال مع منو؟.< ما مشكلة...الريال واتلتيكو ..الريال وشالكة ...الريال وبرشلونة ...الريال واليوفي ...كلو واحد.< يا استاذ...< نعم معاك.< انت رأيك شنو؟.< رأيّ في شنو؟.< ما خالص ...في المفاوضات ...في ايقاف التحويلات من بنوك السعودية ...في الخريف ...في التعادل ...في أي حاجة ...ما لازم نحدد.< جدًا.< لكن ما قلت لي.< اقول ليك شنو؟.< الجماعة ديل طاروا.< ايوا طاروا ...امال يعني في دورة تدريبية.< لا ..طاروا ..طاروا عديل كدا.< ايوا طاروا ...طاروا.< ومن دور الـ(64).< لا من الطابق العاشر ...انت مالك يا زول الليلة؟.< وجابوا اتوفيستر بعد الخروج من التمهيدي؟.< وجابوا اتوفيستر.< اها لو جابوا اتوفيستر عاوز اقول ليك حاجة.< عاوز تقول شنو؟.< اتوفيستر دا بعد العمر دا إلّا تشوفوا ليه (مفرمة) طعمية وتمسكوها ليه.< الزول دا تاني ما عندو ليكم (كورة).< غايتو لو مشيوا الدهب يا احمد الباشا ..وضفر وبلة جابر وموسى الزومة وسعيد السعودي وتراوري ...اراهنكم الاتحاد العام دا حقنا دا يتحول (قبقبة).< اصلو ديل قاعدين يصلحوا ليكم في الحاجات.< ديل عملوا ليهم دورة حوض النيل مخصوص كدا ...عشان يهونوا عليهم شوية حكاية الخروج من التمهيدي.< قاموا قالوا ليهم شنو؟.< قالوا ليهم نظموا ليكم بطولة.< خلاص ح يبطلوا ليهم أي شيء.< ح يوقفوا ليهم الدوري ...عشان جمال الوالي يلقى ليهو موضوع ينشغل بيه شوية.< اسامة عطا المنان طبعاً منصبو جاهز.< طوالي ببقى المقرر.< مجدي شمس الدين ح يكون رئيس اللجنة المنظمة.< يتقسموا المناصب كدا ...في سبيل بطولة يقدموها للمريخ.< اصلو ناس المريخ قدر ما يخرجوا من البطولة الافريقية ...بقوموا يعملوا كدا.< متعودة دائماً.< اقول ليكم حاجة.< نحن الدوري الممتاز حقنا دا ...لو كان فيه مرحلة (تمهيدية) ناس المريخ كانوا طلعوا منها.< ديل أي مرحلة تمهيدية بشاركوا فيها بطلعوا منها.< لو شاركوا في مسابقة رمضان ..بطلعوا في (شعبان).< يعني بالواضح كدا ..بطلعوا قبل (رمضان).< عشان كدا ...لو ناس أحمد الباشا ..ورمضان عجب ..وراجي عبدالعاطي ..لو مشوا الدهب ...عارفين بطلعوا شنو؟.< بطلعوا (صفيح) ساكت.< دهب شنو البطلعوه ديل.< ديل في الدوري الممتاز بشيلوا (الفضة).< دهب يشوفوه وين مع ناس الهلال.< غايتو انتوا يا ناس الهلال...تتعادلوا ساكت ...ما تقعدوا الناس في البلد.< تعادل يخليكم تعملوا كدا.< لو جبتوا بطولة الاندية الافريقية للابطال ...المريخاب ديل البلد دي إلا يقعدوا فيها بي (فيزا).< زيهم وزي الاجانب.< كمان نحن بنلعب.< ولّا بنلعب.< انتوا الدوري الممتاز متين ..اشتقنا للكور البضيّعها تراوري.< ملحوظة : عنكبة التقول لاحق ليه فاتحة. هوامش< تصوروا اليوم البصلوا فيه ناس الهلال من مالي ..ناس المريخ ح يلعبوا مباراة مع الجريف.< اتوفيستر دا جايبنو لمباراة الجريف.< من بايرن ميونخ للجريف.< سهري يا هو الباقي ليّ.< الهلال سوف يصل يوم التلاتا.< والمريخ لاعب مع الجريف يوم التلاتا.< شفتوا (الصدف) دي عجيبة كيف؟.< كل ما افتح لي موقع.< أو افتح لي جريدة..القى ليك الفاتح النقر (مصرح).< يا الفاتح النقر تصريحاتك بقت اكتر من غندور رئيس وفد الحكومة المفاوض في اديس ابابا.< قالوا رجعوا.< قالوا برضو طلعوا من (التمهيدي).< كوليبالي وسيدي بيه في مالي لعبا ضد فريقهما السابق وفي ظروف صعبة ...مع ذلك احسنا.< في الخرطوم ننتظر تألقهما بشكل كبير.< ناس المريخ قلنا ليهم ...الهلال اتعادل في مالي ..فكروا في مباراة الاياب.< الجماعة ديل تصوروا بعد كدا ...عندهم عشم في النجيل الصناعي.< اقول ليكم حاجة ...نحن ناس الملعب المالي ديل بعد كدا لو لاعبناهم في (دلجة) عديل كدا ح نضربهم ليكم.< خلاص المباراة القادمة مباراة الجمهور.< وجمهور الهلال بياكل النار.< بس من هسع نقول ليكم ...اوعكم من نتيجة 1/ صفر.< عشان ما يقوموا يتعادلوا لينا في اخر لحظة...ونقوم نطير.< احسموها لينا من اول ربع ساعة بفارق اكثر من هدف.< بالمناسبة زي ما قال النابي نتيجة التعادل السلبي نتيجة خادعة.< ومخيفة جدًا كمان.< لذلك اصحوا يا جماعة.< نحن الكلام دا ما بنفع معانا.< فتحوا لينا عينكم من هسع.< واضربوهم تلاتة على الاقل.< وخلوا الباقى علينا.< .....< عاجل : التمهيدي القادم باقى ليه (11 شهر و13 يوم و17 ساعة و40 دقيقة و19 ثانية) ...التمهيدي القادم ما تلعبوا لينا مع بايرن ميونخ.[/SIZE]وإن طال السفر - محمد عبد الماجد صحيفة قوون

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس