(وادي أم سدر) حقتنا ولا (مهند ونور)

< في زول لو عاوز يأجر ليه (بيت)..اول حاجة بيعملها...يشوف (الحيطة) البتفصل بين الرجال والنسوان.< دي اهم حاجة عندو في البيت.< كل ما كانت (الحيطة) عالية وطويلة وسميكة ...كل ما حرّضه ذلك لسكن البيت.< ولازم ..ولا بد كدا يكون في (حوش) طول وعرض يفصل بين الرجال والنسوان.< الحيطة براها ما كفاية.< التمهيدي الليلة ما عاوز اتكلم ليكم عنو.< صاحبكم دا لمن يكون بفتش ليه في (بيت) يسكن فيه ..بعد موضوع (الحيطة) بشوف (باب) الصالون بطلّع (صينية) الغداء ..ولّا ما بطلعها.< في ناس اهم حاجة عندهم في البيت ...(باب) الصالون.< لو ما بطلع (الصينية) ولا بجازفو يسكنوا فيه.< مرة عندنا جماعة ..قاعدين (6) شهور بفتشوا ليهم في (بيت) في العاصمة.< لمن ولدهم الكبير اتخرج من الجامعة ..ما لقوا ليهم بيت.< اخر حاجة لقوا ليهم بيت (نمل) ما يسكن فيه.< بيت ...بيت الشعر اكبر منو.< باب الشارع ..خليه باب الصالون...(صحن بوش) ما بطلعو.< البيت صغيّر شديد ..قالوا ليك من صغر البيت ..اجارو الشهري بدفعوه (تحويل رصيد).< الموضوع ما بستاهل (كاش).< ولا عاوز ليه زول يسأل منو.< ما بستاهل.< التمهيدي الليلة ما عاوز اتكلم ليكم عنو.< مباريات الدوري الانجليزي من غير شك جميلة ..وممتعة زي (الشطة) الليمونها كتير.< بمناسبة (الليمون) دا.< تفتكروا موضوع (الخلاف الاسري) بين اوباما وزوجته ميشيل وصل وين؟.< قالوا ليك ميشيل ..اليوم كلو قاعدة في الواتساب.< اخر حاجة ..قالوا ميشيل ..جهزت شنطتها.< طبعاً ما في أي علاقة بين الليمون ...والكلام القلتو ليكم عن (اوباما).< التمهيدي الليلة ما عاوز اتكلم ليكم عنو.< تحضر ليك مباراة لي شيلسي ومانشيستر سيتي ..زي البتحضر ليك في (فيلم اجنبي).< تشد شعرك ..وتنطط عيونك ..أي حاجة ممكن تحصل في المباراة دي.< وتركب الشاحن في الموبايل.< طبعاً في ناس شغلتهم في الدنيا دي ..وكل همهم ان يركبوا الشاحن في الموبايل.< ويقعدوا يحرسو ليك.< لو حضرت ليك مباراة لشيلسي ومانشيستر سيتي ..(رأسك يشيب من الاستغراب)..والشد العصبي.< حاجات لو قالوا ليك اقعد (اتوقعها) لينا في ورقة وقلم ..بتقول ليهم ما بقدر.< مباريات ارسنال زي حفلات التخرج ..فيها كل الفرح.< ما قلنا شيء.< التمهيدي الليلة ما عاوز اتكلم ليكم عنو.< الدوري الايطالي ..بتشوف العمرك ما ممكن تشوفه.< الدوري الاسباني (عجوة ومعطونة بي عسل).< ميسي بعمل ليه في حاجات ..لا بتتقص ولا بتتحكي...ولا في زول بستوعبها لينا.< بمناسبة (الفجل) دا.< رغم ان الموضوع ما فيه أي (فجل).< عندنا زول (اتفلق) في مباراة.< شلناه وجري على المستشفى.< الدكتور عاين ليه كدا ..قال لينا الزول دا (مفلوق).< قلنا ليه ما اصلو (مفلوق)..يعني بحضر ليه في (فيلم اجنبي) ما عارفنو مفلوق.< بعد شوية الدكتور قال لينا الزول دا دمو بينزف.< قلنا ليه يعني انت فاكرنا ... فاكرين الدم البنزف منو دا ..دم ود الجيران.< يا دكتور نحن عارفين دمو نازف ..قول لينا حاجة جديدة كدا.< شوف لينا حاجة درسوها ليكم في الطب.< الدكتور فكر كدا ..ومسك ليك الزول المفلوق ..وقال ليه : (هنا في وجع).< الزول المفلوق قال ليه : يعني ح يكون هنا في (كشك سجائر).< الدكتور اتعقد ليك جنس عقد ..ما عرف يمشي وين؟.< بعد ساعة ونص الدكتور ..يخش ويطلع كتب لينا (حبوب) بندول ..وقال لينا كمان يبلعها عند اللزوم فقط.< قلنا ليه والله لو عارفين كدا ..الزول الفلقو ذاتو ما كان فلقو ..لو عارفك ح تكتب ليه (حبوب بندول).< البلد فيها 1800 صيدلية تكتب لينا بندول.< احرجتنا ساكت مع الزول الفلقو.< احرجتنا مع ناس الحلة.< هسع لو لاقوني ناس الحلة (الشمارين) ديل ..نقول ليهم شنو؟.< نقول ليهم كتبوا ليه حبوب بندول.< نحن اقل حاجة قلنا تعمل لينا (17) قرزة.< سقنا زولنا المفلوق وطلعنا من المستشفى.< دكاترة اخر زمن.< الواحد فيهم يقرأ طب (6) سنوات.< ويعمل سنة امتياز ..وسنة خدمة الزامية ..وسنة مناطق شدة ..ويتخصص في (6) سنوات تانية ..ويكتب ليك حبوب بندول.< لو على حبوب البندول دي...حاجة سعدية كانت كتبتها لينا.< والله ابينا كلامها ساكت.< التمهيدي الليلة ما عاوز اتكلم ليكم عنو.< الدوري الانجليزي ممتع.< الايطالي مدهش.< الاسباني جميل.< لكن الدوري السوداني حقنا دا ..فيه حاجاتنا كلها ...فيه مشاكلنا ..ايجابياتنا وسلبياتنا.< فيه بله جابر ومهند الطاهر.< عشان كدا الاستمتاع بيه بكون اكبر.< عليكم الله انتوا ما شفتوا لمن الهلال ينتصر ..الحالة بتكون كيف؟.< الناس مبسوطة ..وشارع النيل يضحك من الكوبري للكوبري.< أي حاجة تمام.< الهلال فيه ملامحنا ..فيه كل حاجاتنا ...فيه كل ما هو (سوداني).< الباص القصير...سيدي بيه يجدع ليك في الكور للناس زي (الختم).< قولوا ما شاء الله كمان تدويه لينا عين زي وليد علاء الدين.< الهلال فيه ...(الهوبة) مع الامسيات ..في ضل العصاري ...حاجة زي (الحبة السوداء) تشيل ليك كل الوجع.< الهلال فيه قصصنا ..واغنيات عثمان حسين ..وعبد العزيز محمد داؤود ..وقت يغني (انت معي).< وجع الرأس يروح.< التمهيدي الليلة ما عاوز اتكلم ليكم عنو.< دي عواطفنا ..ومشاعرنا ...واغنيات محمد وردي وقت نمرق نتقادم بيها العصر.يا صارة في صرة وشيكعزة اهليوم تزعلي ..يدفق الشوق في العيونيطلع من الاحزان دربنتحاجى لو انك تجيفي نفرتك ....ضرب الجرسالحصة كانت قصتكفيك الفلاحدم الغلابة الهجوا من ضيق البلدضاقت عليهم في (الكفوف)نشف الحلقجفت عروقهم في الجسمراجيين خلاص ..الله الكريمعايشين (عشم)قابضين على الصبر اليباسيا لابسة قيفة النيل فرحيا طالعة من الضيق نعاسمعقولة انك بيننامسدولة حلمك جنبنامعروفة انك زينامتقاوية ما عاوزة البخافمتواكدة لي فجر الخلاص< الهلال برضو كدا ...بشة يسرح هناك بي غادي ..زي الزول البطلع عنقريبو في الحوش الكبير من بدري بدري.< الحاجات دي في السعودية ما في ..في الخليج بصورة عامة غير موجودة.< حصل فيكم زول قعد ليه تحت شجرة لألوب في السعودية أو قطر ..أو حتى مصر القريبة دي.< نحن هنا وقت الواحد يقعد ليه تحت شجرة سدر ..ويجر ليه (نفس طويل) بشعر انو ملك العالم دا كلو في (النفس) دا.< هي الدنيا دي عليكم الله فيها شنو؟.< غير الناس تتطلع (العناقريب) من وقت بدري ..ويقعدوا يتخاطفوا في (المخدات).< تقوم تشرب ساكت ..تلقى في واحد شال (المخدة).< الناس عاوزة تتونس.< ما شفتوا مدثر كاريكا ..يجدع الكورة قدامو ويفوت ...تاني (مجلس الأمن) ما بلحقو.< بمناسبة القهوة دي.< التمهيدي الليلة ما عاوز اتكلم ليكم عنو.< هسع (القهوة) الدخلها هنا شنو؟.< الناس مبسوطة.< الهلال اتأهل لدور الـ (16).< المريخاب مستغربين ..قالوا بعد كدا جمال الوالي لو عمل لينا الاستاد من (71) طابقاً ما بنفع معانا.< جايبين ليكم مدرب ..من تمغرب ما بفرز ليك بله جابر من سعيد السعودي.< المريخ ببقى ليه كلو (بله).< التمهيدي الليلة ما عاوز اتكلم ليكم عنو.< حاجاتنا السودانية دي جميلة ..ونحن عاجبنا ..العمة والجلابية ..وشاي المغرب..وقون بشه.< مبسوطين خلاص...بنسمع الطير المهاجر لمحمد وردي وقصتنا لعثمان حسين ..ومن اول نظرة لعبد العزيز محمد داؤود وتذكار عزيز لإبراهيم عوض ..وقون بشه.< ما عندنا أي مشكلة.< بنحب نمشي شارع النيل ..نقعد نتونس ..ونتكلم في أي حاجة ..نتكلم عن شندي ..وعن عطبرة وعن الدمازين وحلفا الجديدة والابيض والفاشر وبورتسودان ..وقون بشه.< في زول عزمنا ..بنمشي ليه ..نضرب ليك السمك ..والسلطات ...ونشرب الشربوت ..والقهوة والشاي وقون بشه.< لو عاوز تسافر...سافر.< اعمل أي حاجة.< امشي تركيا ..امشي ايطاليا ..امريكا ..امشي أي حتة...قون بشه دا ما بتلقى زيو.< نحن حاجاتنا دي باسطانا شديد..وفرحانين بيها ..وعندنا شموخ بيها ..وعزة ..وانفة ..وقون بشه.< زمان كان في مسلسل سوداني بسيط لعبد الزيز العميري اسمو (صرخة في وادي الصمت)...المسلسل معروف عند البعض بـ (وادي أم سدر).< اها وادي أم سدر دا ...ولا مسلسل مهند ونور.< عليكم الله هسع في اجمل من (بعد الغياب) لمحجوب سراج وصلاح مصطفى وقون بشه.< في اجمل من قون بشه.< التمهيدي الليلة ما عاوز اتكلم ليكم عنو.< لكن اقول ليكم بي صراحة ..والمريخاب ديل ما يزعلو..لو ما جبت سيرة (التمهيدي) ايدي بتأكلني.< ناس يطلعوا من دور الـ (64) ..ويشربوا في الشاي.< غايتو قلوب ميتة زي قلوبكم دي اصلي ما شفتها.< نحن لو طلعنا من دور الـ (64) كان طلعنا من البلد.< كان مشينا استراليا ..وطلبنا حق اللجوء (التمهيدي).< ملحوظة : الليلة مرقتوا مننا يا مريخاب.هوامش< في كوستي عاوزين نشوف (وارغو).< وعاوزين نشوف صلاح الجزولي.< من حقنا نعرف الحاصل شنو؟.< مباراة الهلال امام الرابطة ..مباراة مهمة ..والانتصار فيها غاية في الأهمية.< نشوة التأهل الافريقي ..ما تخليكم تتهاونوا وتستهتروا محلياً.< انتوا العالمي لاعب مع منو؟.< العالمي لاعب أمام الاتحاد.< تتخيلوا العالمي دا ..الولايات ما طلع عليها.< الهلال سوف يلعب غدًا المباراة الثالثة له في الولايات.< المسؤولية والجدية ....طريق الهلال للانتصار في كوستي.< يا النابي ..ركز مع الرابطة.< المرحلة الان مرحلة الرابطة.< ارموا قصة التأهل الافريقي وراء ضهركم.< تار المريخ من ليوبار ح نأخدو إن شاء الله مضاعف.< ....< عاجل : ناس المريخ ديل مع خروجهم من دور الـ (64) مفروض ما في زول فيهم يكون شايل ليه (جلاكسي)..معاكم نحن لي (ربيكا).[/SIZE]وإن طال السفر - محمد عبد الماجد صحيفة قوون