د/ عادل الصادق المكي

“حلف النيتو” بعيون مصرية


[SIZE=5][JUSTIFY][CENTER][B] “حلف النيتو” بعيون مصرية [/B][/CENTER]

برنامج تلفزيوني.. تقدمة قناة من القنوات المصرية.. الملت النايل سات.. البرنامج بينزل الشارع وبيختار سؤال.. ويسألو لأي زول ماشي (باكر دي يجيو ناس قنواتنا الما عارفين يسوو شنو، ناس حاكونا حاكونا، يقومو يعملو برنامج زيو ويحومو في الشوارع ويسالو الناس أسئلة تحيّر الما يتحيّر وما يتحيّر الا مغيّر).. ناس البرنامج المصري بيختارو الناس البي يظنو فيهم الخير والمعرفة.. شفتّ حلقة في البرنامج دا وكان السؤال عن ماهو حلف النيتو؟.. صراحة باللوال ضحكت في سذاجة السؤال.. وبعدينكتية ضحكت على سذاجة الإجابات.. والأشخاص البيجاوبو.. اتظكر مرة في المواصلات وأنا من الخرتوم ماشي أمدرمان ركب معاي أخ مصري مهندس.. خلو بالكم من مهندس دي “ساكن أمدرمان ليهو أسبوع”.. وقعد يتونس معاي.. وجينا بجنب البحربعد ما قطعنا كبري أمدرمان القديم من الخرتوم.. قال لي هو دا النيل؟.. قلت ليهو ايوا يا هو زاااااتو.. هو على كدا رايح فين؟.. قلت ليهو رايح مصر.. قبل علي وباستغراب وغير مصدق قال لي (والنبي؟).. قلت ايوا وحات الله ووحات الرسول ووحات السيدة زينب والمرسي ابو العباس وإن شاء الله اتقلب بعشوم النيل دا رايح مصر.. قعد يشحد فيني (بس.. بس.. خلاص أنا مصدئك يا عم.. لا بعشوم ولا سعلوة).. يكون خاف اتقلب حاجة تاكلو.. انتهى الجدل الجغرافي.. أنا ما عارف هل فعلا هو ما عندو خبر انو النيل رايح مصر؟.. واللا داير يستهبل ويزبلع علي؟.. علي أي حال أنا اعتبرتو ماسورة وما عارف حاجة إرضاءً لإحساسي بالتفوق.. لكن بعد نزل ندمت اني ما سالتو انت مهندس في شنو؟ واشحد في الله يكون مهندس ري!!. ويكون جايي عشان يراجع اتفاقية مياه النيل واحدس الجماعة يودوهو خور ابعنجة ويقولو ليهو اها تراها دي الموية الجايطننا فيها يلا وقّع، يوقع ويعزموهو فطور عند عوضية اسماك.. ولو شاف النيل جنب الخور وسأل يقولو ليهو دا البحر الأحمر ما عندكم بيهو شغلة، مويتو مُرة ومسيخة.. نرجع لبرنامجنا والسؤال عن حلف النيتو.. شابة باين عليها متعلمة ومتفلهمة ولابسة نضارات شمشية.. قالت وهي في غاية الجديّة (حلف النيتو.. أهــ.. بعرفو.. هو البيحلفو بيهو الأطباء لما يتخرجو.. والدكتور نيتو دا كان أول دكتور يحلف الحلفان دا).. وشاب برضو نفس الفلهمة وقعيّد النضم قال (أهــ.. بعرفو.. هو دا حلف بيحلفوهو الشباب لما يحبو يضحكو علي بعض.. يعني واحد اكتشف انو صاحبو ضحك عليهو يقول له انت عاوز تضحك عليّ وحياة النيتو).. وشابة أخرى وبرضها باين عليها متعلمة قالت (أهـــ.. أُمال.. بعرفو.. هو الحلف البيحلفوهو خريجي كلية الحقوق.. وخصوصا الناس الح يشتغلو في النيابة.. لانها دي شغلانة خطيرة ولازمن الها يشتغل فيها يحلف نيتو).. يا ربي وكلاء النيابة عندنا هنا قاعدين يحلفو نيتو ؟.. واللا بيحلفو اطلسي؟.. لكن عشمي كبير في وزارة الصحة أنها قبال ما تعيّن أي دكتور تحلفو نيتو.. وتطلقو فوق خلق الله!!

[/SIZE][/JUSTIFY]

الباب البجيب الريح- صحيفة اليوم التالي

تعليقات فيسبوك
شارك الموضوع :


تعليق واحد

  1. المصريين مفكرين الدنيا فهلوة وما فيهم حد بيقول مش عارف، يقسم ليك إنه عارف حتى لو مش عارف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *