سر جضوم البومة

بعد ما سمع الشكوى منها.. قال ليها: “تجيبي لي ديك ريشو أحمر وفي صوتو في بحة وبي يعوعي سلم سباعي”.. يعني صوتو يكون جميل وفيهو بحّة..
قامت منو ومشت كايسة للديك أب بحة دا ولي حسي ما لقتو.. وبقت كلما تمشي لي ناس زيارة وتسمع صوت ديك يعوعي تسكت الناس (كدي اسكتو اسكتو..) عشان تسمع الصوت ولما يسألوها مالك؟. وتكون دايرة تدس الغرض الأساسي.. تقول لهم زي السمعت لي صوت سكلبة وقلت يمكن جنبكم زول مات..
وصية أداها فكي للحاجة آمنة.. لأنها دايرة تكودك إحداهن..
الحيوانات والطيور ليها علاقة بكل أنواع السحر الأسود.. والنضم دا في المغرب منتشر كتير.. وحتى عندنا..
من أكتر الطيور سحرا وماركة، هي البومة.. البومة دي شفتوها خترة جدا.. أول حاجة البومة بتنوم النهار كلو.. وتكوس معايشها بالليل.. حاجة عليكم الله حايمة الليل كلو ما بتخوف؟..
تاني شي البومة صوتها كعب.. ويجنن الما يجن.. ومعروفة عند الناس انها شؤم ونحس..
أها بقت البومة تدخل في السحر.. يعني لو داير تخرب لي واحدة سمحة وعاجبها وشيها وتغيانة بيهو.. داير تخربو ليها من غير موية نار ومجازفات.. تجيب بومة وتضبحها وتسلخ وشيها وتمرق جضومها.. وتخلي الزولة العاجباها سماحتها دي تاكل جضوم البومة.. بأي طريقة.. تاني يوم تعال اتفرج فيها..
ولو في فنان وانت مغيوظ منو وداير تكضمو لي يوم القيامة ما يغني.. تجيب حلقوم بومة.. مع أوتار صوتية لي غراب.. تنشفن وتخلطن مع بعض وتسويهن حجاب وتشيلو وتباري الفنان دا من حفلة لي حفلة.. اها بعد تلاتة حفلات بيكون قضى تب.. تخليهو وتشوف البعدو.. لومكم بي، سنة واحدة والبلد تعدم اسم الغنية الهابطة..
ريش البومة برضو لزعط الشعر.. لو واحدة غايظاكي بي شعرها الطويل وسمح.. تجيبي الريش التحت الجناح. الشمال.. وتكتبي عليهو اسمها.. ومع مغيب الشمش مع حَمَار المغارب.. تحرقيهو في مُبخر وتلفي حولين المبخر وترددي لحدي ما البخور يخلص تقولي (أزعط يا زعاط أزعط.. ودقلش يا دقلاش دقلش).. تاني يوم زولتك تعدم اسم الصويفة..
أما بيض البومة فبيتعمل لي قطع الخلفة.. لزولة ما تلد أصلو.. وان صادف وحملت، تحمل حمل عنبي..
وعيون البومة كبار وبعاينن في اتجاه واحد بس.. يعني ما بتحركن.. أها ديل برضو بينفع مع واحدة دايرة راجلا أو حبيبها أو خطيبها ما يشوف واحدة غيرها.. تجيب عيون بومة.. وتنشفن في شمش الضحي.. وتلفهن في حجاب معمول من جلد البومة نفسها ومكتوب عليهو اسم الزول وتشيلو في شنطتها أو تلبسو في رقبتها.. تاني إن شاف ملكة جمال العالم يقول: “بِس.. بعاتية بَس”..
والبومة بتطير طيران ما بتسمع ليها أي صوت.. ربنا خلقها كدا.. ولذلك فإن عضام جنحين البومة بينفعو مع الحرامية، ومع الناس البي يتلبدو عشان يسمعو نضم الناس.. شوربة من عضام جنحين البومة.. تخليك لو برطعت مافي زول يسمعك..