تضيعوا في (ضربات الجزاء) وتسجلوا من (الكورنر)

> يعذب صاحب المحل عذاب.

> يطلعوا من (رف) وينزلو لي (رف).

> يقوّم ليه نفسو.

> عليك الله نزل لي (القميص) الاخضر دا.

> لا ابدا…لونو ما عجبني.

> القميص الابيض ، لو سمحت.

> القميص الابيض ما بستحمل في السخانة دي ..(بعدين ذاتو والله نحن عندنا شفع ، القميص الابيض يقلبو ليك في 5 دقائق الى داكن اللون).

> ابو اكمام قصيرة داك ، نزلو لي.

> سعرو كتير شوية…(ليه غالي كدا؟).

> كدا شوف لي الاكمام الطويلة دي.

> القميص الاسود دا مقاسو كيف؟.

> لا لا دا كبير شوية.

> احسن اللون الفاتح دا…(اللون الاسود في السخانة دي صعب شوية).

> في النهاية بعد كل هذه التلتلة يشيل ليه (شُرابات) من المحل ويطلع يخلي (القمصان) كلها مكومة قبلها.

> او زي حكاية الزول البمشي سوق الخضار يقوم يسأل من (البطيخ).

> ما يخلي ليه (بطيخة).

> دي كبيرة.

> ودي غالية.

> ودي ما حمراء.

> ودي ما حلوة.

> وفي النهاية يشيل ليه (كيلو موز) ويتنفض من السوق طالع.

> الحكاية دي زي حكاية ناس المريخ وهلال كادوقلي امس.

> يضيعوا في (ضربات الجزاء)..ويسجلوا من (الضربات الركنية).

> الناس ديل عندهم خلل في (التقديرات).

> احساسهم فيه شوية (شتارة).

> شفتوا الزول لو عاوز تعرفوه (اشتر)..شوفوا مباراة الامس التى جمعت بين المريخ وهلال كادوقلي.

> دي مباراة فيها كمية من (الشتارة).

> شتارتها تضرس.

> شابكننا المباراة كلها يضيعوا في (ضربات الجزاء) ..وفي النهاية يسجلوا لينا من الكورنرات.

> اها في (جن) اكتر من كدا.

> انتوا الحاجة الساهلة ما بتعملوها …الجابركم شنو على الحاجات الصعبة دي.

> في داعي للاحراجات دي.

> مباراة فيها (6) اهداف ..وضربتين جزاء ضايعتين.

> في (ضياع) اكتر من كدا.

> دا (ضياع) رسمي.

> والله مباراة المريخ وهلال كادوقلي امس عملت لي وجع حلق ..او حلجت لي (توقعاتي).

> زي الفنان البكون بغني في (الحزن النبيل) بي احساس (سنتر الخرطوم).

> او زي العريس البغنوا ليه في (عريسنا قطع البحر يا عديلة ليه) وهو قاعد في الوقت داك يفكر في قروش (الصور).

> مرة جابوا لينا (فنان) كان عندنا فيه رأي واضح.

> رأي واضح وصريح.

> قررنا نكافحو ليكم بالشتارة.

> قلنا الزول دا من يبدأ الحفلة كدا ..نجيب ليه (7) شتر يرقصو قدامو عشان زمنو يفرق.

> فعلا الفنان بدأ الحفلة بـ (بين جناين الشاطيء)…جبنا ليه (الشتر) ديل برقصو قدامو.

> الفنان حاول يتجاوز المشهد الاشتر دا …وواصل محافظ على ايقاع اغنية (بين جناين الشاطيء).

> كمل الاغنية بدون اي خلل لكن بعد ما دفق (لياقتو كلها في الاغنية دي ومكافحة الشتارة).

> بعد الاغنية دي ..دخل ليك في (ربيع الدنيا).

> الموضوع بقى ليه صعب شوية كدا ..والشتر يرقصو قدامو.

> المهم كمل ليك (ربيع الدنيا) دي بي اخر نفس.

> دخل ليك في (الحب والظروف) هنا زمنو فرق.

> زولكم لمن وصل لـ (الغريبة الساعة جنبك تبدو اقصر من دقيقة) لقى نفسو بقول في (النشرة الجوية).

> طلع رسمي من (الاغنية).

> مباراة الامس كانت فيها كمية مهولة من (الشتارة).

> شتارتها (تخنق).

> لو ما لحقت نفسي بي مباراة الريال وبايرن ميونخ ..وظبط الموجة كان جبتوا لي (سحائي) يا ناس المريخ من الشتارة.

> نضفت (الاحساس).

> طلعت (التكليب) الذي حدث لنا في مباراة المريخ وهلال كادوقلي.

> انا هسع قاعد اتابع في مباراة الريال وبايرن ميونخ بجلي في (النظر).

> مرة اتابع ..ومرة اكتب.

> ما فاهم اي حاجة.

> لا قادر اكتب..لا قادر كمان اتابع.

> الريال متقدم الان بهدف على بايرن ميونخ الدقيقة 40 من الشوط الاول.

> لكن شايف المعلق (رؤوف خليف) عاصر على الريال.

> يمكن يكون الريال ما لعب بعد الهدف.

> يمكن الفريق الالماني ضغط بعد الهدف الذي سجله كريم.

> مباراة المريخ امس تجيب للزول (رمد).

> تجيب ليه حول.

> تعمل ليه تفتت في (احساسو).

> مباراة كلها (شتر).

> متل الملاح المفروك بالرغيف.

> مستوى المريخ امس للامانة كان مخجل ..كورة كلها (عك)..وضرب.

> وناس علاءالدين يوسف يضحكوا في المباراة زي كأنهم في مسرح.

> جملة واحدة صحيحة ما شفناها في مباراة الامس.

> بعدين الناس (القصار) ديل جبتوهم من وين يا ناس المريخ؟.

> بالله مع ان المباراة شفناها في التلفزيون إلّا الواحد لو ما (شبّ) ما بشوف الكورة.

> فريقكم دا انصحكم ما تمشوا بيه عطبرة.

> ناس الامل من ربع ساعة بحسومكم.

> إلا تسوقوا معاكم (سيحة).

> ولو مشيتوا بيه عطبرة ..ما تقابلونا بيه في مباراة القمة يوم 10 مايو.

> جماعتكم ديل عاوزين ليهم (سقالات).

> شيلميس واوليفيه وتراوري وامير كمال وغاندي.

> اتخيلوا الناس القصار ديل يكون معاهم (بلة جابر).

> واتخيلوا المشهد (الارضي) دا في مباراة القمة مع ناس الشغيل ومساوي ونزار حامد وكاريكا ومهند الطاهر وكوليبالي واتير توماس.

> الهلال لو لعب على (الطول) دا ..ناس المريخ بيأخدوا ستة.

> مباراة الامس تأكد ان المريخ يعاني.

> الفريق احسن يكون خسران …ويعادل وينتصر.

> القدرة على تعديل النتيجة للصالح دائما بعطي احساس القوة والجرأة والقدرة.

> الهلال عندما عاد في المباراة الاخيرة وادرك التعادل وانتصر على الخرطوم الوطني اثبت انه كبير.

> وانه قادر.

> خاصة وان فريق الخرطوم الوطني فريق كبير ومحترم ..والانتصار عليه بعد ان كان متقدم هو امر صعب.

> المريخ امس تقدم بـ (4) اهداف نضيفة ..وقبلها اهدر ضربة جزاء ..ثم جاء واستقبلت شباكه هدفين في (5) دقائق.

> ولو ان المباراة استمرت (10) دقائق لخسر المريخ نتيجة المباراة.

> الملاحظة الجديرة بالدراسة والتى يجب على فريق الامل ان يدركها هو ان دفاع المريخ اهون مما نتخيل.

> استقبل امس اهداف سهلة ..في وجود حارس مرمي هو خصما على المريخ.

> ايهاب زوغبير يتصرف في المباراة تصرف يوحي بعدم المسؤولية.

> في الشوط الاول ايهاب فلتت منه كورة بشكل مضحك ..اضاعها عبده جابر والمرمى خالي.

> الاهداف التى سجلت في المريخ ايضا تثبت ضعف هذا الحارس الى جانب ضعف الدفاع.

> ضفر ..يمكن في اي لحظة يرتكب (ضربة جزاء).

> ضربة جزاء غريبة كان سببها اللاعب ضفر الذي تدخل على مهاجم هلال كادوقلي بصورة فيها الكثير من التهور.

> صورة مرفوضة حتى في ملاعب الدافوري.

> ان تقدم المريخ برباعية ثم استقبال شباكه لهدفين …امر يؤكد الفوضي الفنية التى يعاني منها المريخ.

> كذلك يثبت ذلك عدم سيطرة الجهاز الفني على الفريق وعلى المباراة بشكل عام.

> منذ الان تبقى خسارة المريخ في عطبرة الاسبوع المقبل امر وارد بنسبة كبيرة.

> خاصة اذا استفاد فريق الامل عطبرة من هذه الاخطاء التى وقع فيها لاعبو المريخ.

> اضف الي ذلك حالة الشرود التى يعاني منها الجهاز الفني للمريخ.

> المريخاب احيانا يتوعدون الهلال بمرحلة المجموعات ..ونحن نقول ان على المريخاب ان يشكروا الله كثيرا على ان فريقهم خرج من دور الـ (64).

> مفروض بفريقكم هذا تطلعوا من دور الـ (104).

> يعني مفروض تطلعوا من الاذاعة الرياضية.

> المريخ في مباريات الدوري الممتاز القادمة صعب عليه ان يحقق انتصار.

> تاني (النقطة) مكسب للمريخ بشكله الحالي.

> النيل الحصاحيصا ..ما غلطان عليكم.

> ملحوظة : غايتو من الولايات (سمكة) ما بتجيبوها.

هوامش

> مباراة الهلال القادمة امام النيل الحصاحيصا.

> طبعا استاد الخرطوم بقى زي (الولايات).

> الاسبوع القادم ان شاءالله (صدارة) الممتاز سوف تعود لوضعها الطبيعي.

> الامل حسم موضوع الاهلي شندي.

> والامل قادر كذلك على حسم موضوع المريخ.

> الصدارة الاسبوع القادم ان شاءالله هلالية.

> الطاهر حماد براهو ممكن يغلب المريخ.

> حكم مباراة الامس احتسب ضربة جزاء وهمية للمريخ…في الوقت الذي كانت فيه ضربة جزاء هلال كادوقلي صحيحة مية المية.

> انتظروا (سيحة).

> بس ما تبدلوا الشرائط.

> الاتحاد مدني اضحى الاقرب لمغادرة الممتاز.

> مدني سوف تصبح بدون فريق في الدوري الممتاز.

> ودي خسارة كبيرة للممتاز.

> اطهر شبل الهلال يتألق مع المنتخب ويسجل.

> الهلال يجب ان يشرك اولئك الشباب …هم اضافة حقيقة للهلال.

> اتوفيستر وساري ما بنستروا في عطبرة.

> من هسع جهزوا فاروق جبرة.

> او برهان تية.

> مباراة عطبرة سوف تكون الاخيرة ان شاءالله للجهاز الفني للمريخ.

> بايرن ميونخ امس ..واضح انه ما استفاد من تجربته مع المريخ.

> قلنا ليهم الكلام دا مية مرة.

> الاهلي الخرطوم ومريخ الفاشر في مواجهة من الوزن الثقيل.

> الدوري الممتاز ولع نار رغم من اننا مازلنا في الدورة الاولى.

> الدورة الثانية سوف تكون اكثر متعة.

> صلاح الجزولي يفترض ان يكون اساسي في تشكيلة الهلال.

> صلاح الجزولي وحده الذي يمتلك التسجيل من اضعف الفرص.

> صلاح الجزولي لو اتاح له النابي فرص المشاركة في المباريات القادمة ..فان صلاح الجزولي قادر لوحده ان يهزم المريخ.

> البرود والقوة والقدرة على التعامل مع الكورة في كل الاوضاع اشياء يتميز بها صلاح الجزولي.

> اتخيلوا هجوم فيه صلاح الجزولي وكاريكا وبكري المدينة.

> كوليبالي يقعد برة شوية.

> دفاع المريخ خطوة ما بتقدم مع قوة صلاح الجزولي وبكري المدينة.

> ألعبوا على عنصر القوة في ظل ضعف لاعبي المريخ وهوان بنيتهم الجسمانية.

> ياريت صلاح الجزولي يبدأ منذ البداية في مباراة الهلال القادمة امام النيل الحصاحيصا.

> دفاع المريخ الذي تستقبل شباكه هدفين في (5) دقائق امام هلال كادوقلي سوف تستقبل شباكه خمس اهداف في 90 دقيقة.

> ….

> عاجل : غاريث بيل دا في يونيو ما بجينا.