ضفر عرفها ..يا باسكال جيب ولي امرك وتعال يوم عشرة

لو فكرت (تهاجر) ..تكون ضهبان.

لو فكرت في (سمك) في السخانة دي يكون ما عندك موضوع ..زي (الشباك) البقفولو (الهوا)..وهو اصلا ما في (هوا).

طيب القفلو منو؟.

لو فكرت تمشي بي كوبري الحلفاية ..اكيد كوبري شمبات مقفول.

لو فكرت في يوم عشرة ..ح تضحك من الاضان لي الاضان اذا كنت هلالابي.

لو كنت مريخابي ..في الاساس ما بتفكر.

كان بتفكر كان بقيت هلالابي..الجابرك على (الوصافة) دي شنو؟.

عشان كدا احسن تشجع من هسع (الموردة) عشان ما في زول يسألك يوم 10 مايو.

مالك ومال المريخ؟.

اديكم بيان بالعمل.

بس ما تقيفوا لي بالواحدة كدا.

قالوا ليك في جماعة كدا ..عاجبهم حكاية طائرة بدون طيار.

قالوا ليك في سوداني قال ..نحن ممكن يكون عندنا شغل بدون (مرتب).

ممكن يكون عندنا ملاح بدون (لحمة).

ممكن وظيفة بدون (شهادة).

لكن طيارة بدون طيار دي كتيرة علينا.

قالوا (الروس) الموضوع دا عندهم اسهل من تحويل الرصيد.

اسهل شيء عندهم حكاية طائرة بدون طيار.

جماعة من السودان ..قالوا عاوزين يطبقوا نفس النظرية.

الروس ديل احسن مننا في شنو؟.

جابوا ليهم كابتن طيران مريخابي ..وركبوه في طيارة وقالوا ليه (انطلق).

الطيارة قامت.

الجماعة ضربوا للروس قالوا ليهم عندنا طيارة بدون طيار الان في الاجواء.

الروس التقطوا ليك الطيارة باللدار…اكتشفوا ليك فيها (كابتن).

الروس طوالي ضربوا للسودانيين قالوا ليهم انتوا بتلعبوا علينا ما قلتوا طياراتكم دي بدون طيار.

سفير السودان بالامم المتحدة ..وضح الصورة للروس قال ليهم نحن المريخاب ديل ما قاعدين نعدهم في السودان ..عشان كدا اعتبروا لينا الطيارة دي بدون طيار.

طيار مريخابي ..ما تحسبوها لينا.

الروس قالوا للسفير جيب لينا ورق يثبت كابتن الطيران دا (مريخابي).

جابوا ليه موسى الزومة ..يتلفت زي الزول الداخل في شارع غلط.

هسع حكاية طيارة بدون طيار دي ..ذكرتني ليك بلة جابر.

فريق بدون كابتن.

في الفاشر قالوا ليك بلة جابر كان كابتن فريق المريخ.

اتخيلوا الامور وصلت وين في المريخ؟.

وصلت حد ان يكون بلة جابر كابتن فريق المريخ.

حليل جمال ابوعنجة.

حليل كمال عبدالغني.

حليل بدرالدين بخيت.

حليل عبدالسلام حميدة.

هسع المريخ من افلاسه ..بقى كابتنه بلة جابر.

دي حكاية طيارة بدون طيار ذاتها.

المريخ الان بدون كابتن.

يوم 10 مايو ح تجيبوا لينا بلة جابر كابتن لفريق المريخ.

انتوا جنيتوا.

انتوا فكت منكم.

بلة جابر ح يسلم على عمر بخيت.

بلة جابر ح يتصور مع عمر بخيت.

دي يا بلة كابتن فريق بايرن ميونخ ما لقاها.

بلة جابر دا اكيد بقوه كابتن للمريخ عشان قعد (يبكي) في عطبرة.

مجلس المريخ اجتمع بعد مباراة المريخ والامل في عطبرة ..وقرر يمنح (الكابتنية) لبلة جابر..عشان هو اكتر واحد عندو (غيرة).

الوحيد القاعد يبكي في المريخ.

بلة جابر طلع مفتح …(جعرة) واحدة بقتو كابتن لفريق المريخ.

هسع في مباراة 10 مايو لو (شيلميس) دا قعد يبكي اليوم التاني ح يسحبوا الكابتنية من بلة جابر ويمنحوها شيلميس.

الكابتنية في المريخ بـ (البكاء)..ما بـ (الاقدمية).

تبكي (تتكبتن) ..ما تبكي تشمها (قدحة).

لكن هسع (كابتنية) بلة جابر ما عندنا فيها كلام.

بلة جابر مع كابتنيته جاب ليه قون.

يا بدوي الكلام دا عيب.

بلة جابر في (ابوحمامة) ما قاعد يجيب ليه قون.

ايامك يا بلة الايامات دي ..تبكي وتبقى كابتن وتجيب اقوان كمان.

بلة خلوه.

شفتوا (ضفر) اتخارج كيف؟.

ضفر عاوز يعمل فيها (حريف).

تقول في زول عاوز منو قروش.

ضفر اتخارج من يوم 10 مايو …زي كأنو صلاح الجزولي عاوز منو قروش.

بيني وبينكم ..لو اي (مدافع) عاقل كدا ..او حتي ما عاقل شاف البعمل فيه (صلاح الجزولي) دا ح يأخد ليه (كرت احمر).

الكرت الاحمر افضل ليه من مقابلة صلاح الجزولي.

من هسع.

وانطلاقا من الفكرة دي …نقول ليكم بصورة واضحة مباراة 10 مايو هي مباراة صلاح الجزولي.

الكلام دا تاني ما بنكرروا ليكم.

عشان ما نكشف اسئلة الامتحان.

نقول ليكم من هسع صلاح الجزولي يوم 10 مايو ح يجيب ليه هدفين.

ولا هدف واحد اتذكروا الكلام دا.

انتوا قايلين يوم عشرة بعيد.

الكلام دا يوم السبت القادم.

يعني شنو؟.

يعني (ضفر) فكر.

ضفر دا اعقل مدافع في السودان.

عرفها من بدري.

ضفر عارف مباراة القمة بتسبق فترة التسجيلات بـ (6) ايام فقط.

يعني كشوفات (الشطب) بتطلع من مباراة القمة.

الكشف عند (بشه).

بشه هو البحدد منو البقعد ..ومنو البمشي.

صلاح الجزولي شغال بي نظام غريب.

صلاح الجزولي سجل في ثلاث مباريات على التوالي.

في كل مباراة سجل ليه هدف.

صلاح الجزولي اكيد في المباراة الرابعة ح يسجل.

ما في حاجة بتخليه ما يسجل.

في عطبرة ..فريق الامل سجل في الدقيقة 98.

قلنا صدفة.

قلنا ليه الحكم جعل الزمن البدل الضائع (8) دقائق.

(8) دقائق دي نص شوط ثالث.

في الفاشر ..محمد عبدالله ضفر ..جاء من دفاعو واتقدم لنص الملعب في الدقيقة 90 من عمر المباراة عشان يعمل ليه مخالفة مع لاعب هلال الفاشر.

المخالفة وحدها من غير مقدمات ..ومن غير متأخرات تستحق الكرت الاحمر..فكيف اذا كان ضفر قبل هذه المخالفة عنده (كرت اصفر).

اقنعوني ضفر ما قاصد (الكرت الاحمر).

طيب لو كان ما قاصد انو يطرد بالكرت الاحمر …ليه ضفر طلع (فرحان) بعد الكرت الاحمر.

في زول بقعد يضحك لو طردوه.

صلاح الجزولي بعمل في عمايل ما جميلة …خلى ليك (ضفر) يطرد من فاشر السلطان.

طيب لو (ضفر) حصل عليه كدا في الفاشر ..باسكال ح يحصل عليه شنو في الخرطوم.

يا باسكال ..الحكاية دي ما تقدر عليها.

افضل ..واحسن ليك تجيب ولي امرك يوم 10 مايو ..عشان نشوف حكاية (السرحان) الداخل فيه دا شنو؟.

موسى الزومة (سرح) ..بشه عملها فيه.

هسع اقل (طبظة) يا باسكال ..صلاح الجزولي دا بعملها فيكم.

صلاح الجزولي طبعا بسجل من اي وضع.

بسجل من اي حتة.

ما عندو اي مشكلة.

وحراسكم الما معروفين ديل ..مرة اكرم الهادي سليم ..ومرة ايهاب زغبير ما بنستروا.

الموضوع صعب عليهم.

معقولة …صلاح الجزولي وكاريكا وبكري المدينة …وبشه ونزار حامد ومهند الطاهر وسيسه والشغيل.

الحكاية دي صعبة شديد.

والعجب لو جاكم سيدي بيه ووارغو.

كامبوس دا (صعب).

اتوفسيتر وقع من الكرسي.

ضفر اخد كرت احمر.

ساري ما عارف يتصرف.

تراوري مشتبك مع فاروق جبرة.

اكرم الهادي سليم عامل فيها مصاب.

حالتكم صعبة.

الحاجات دي كلها (خوف) من مباراة القمة يوم 10 مايو.

اذا كان في الفاشر بترجفوا كدا ..وروني في الخرطوم ح تعملوا شنو؟.

رجفة المريخاب وجرستهم ..تمثلت في الكتابة اليومية عن الحكام.

ديل بتوسلوا عشان يمنحوهم (ضربات جزاء).

انتوا تعالوا هنا علاءالدين يوسف برضو ح يكون موقوف.

لو فييرا ما ح يلعب مباراة القمة …ننصح جمال الوالي يغادر (لندن) قبل مباراة القمة.

ملحوظة : اتوفيستر ذنبو شنو؟.

هوامش

اذا كان الهلال حسب قرار الكاف سوف يلعب امام مازمبي يوم 16 مايو ..فذلك يعني ان المباراة سوف تكون بعد خمسة ايام فقط من مباراة القمة.

اي نتيجة سلبية في مباراة القمة لا قدر الله سوف تنعكس على مباراة الهلال ومازمبي.

الانتصار في مباراة القمة سوف يعطي الهلال دافع كبير للانتصار كذلك على مازمبي.

الدفع الجماهيري والاعلامي سوف يكون كبيرا.

كما ان الروح المعنوية للاعبي الهلال سوف تكون عالية.

لذلك الانتصار في مباراة القمة يعني الانتصار في مباراة مازمبي.

يجب التركيز على مباراة القمة …بحجر واحد يمكن صيد عصفورين.

فريق الزمالك المصري اعتبره اضعف فرق مجموعة الهلال.

الزمالك اي فريق سوف يلعب معه في مصر سوف يعمل للخروج بالنقاط الثلاث للمباراة.

وذلك لأن الزمالك يلعب بدون جمهور.

كما ان مستوى الزمالك نفسه ضعيفا.

اضف الي ذلك الصراعات والخلافات التى ظهرت في الزمالك الان.

احمد حسام ميدو المدير الفني للزمالك في كل مباراة للزمالك عامل مشكلة.

مرتضي منصور رئيس نادي الزمالك نفسه غير مستقر.

مباراة الهلال امام الزمالك ..تتزامن مع الانتخابات المصرية.

وذلك يعني ان مصر كلها بتكون مركزة في الانتخابات.

وهذه فرصة ذهبية للهلال للفوز على الزمالك.

….

عاجل : ضفر ارتاح في عضمو.