د/ عادل الصادق المكي

أزمة المركوب: علامات نفسية عن الزوج عن طريق “مركوبو”


[SIZE=5][JUSTIFY][CENTER][B] أزمة المركوب: علامات نفسية عن الزوج عن طريق “مركوبو” [/B][/CENTER]

تتراكم الخلافات الزوجية فوق بعضها.. بعضها قد يناقش في حينه وبعضها قد يؤجل.. ويقعد في البطن والفي البطون ما بيغسلو الصابون.. تغسلو المفاهمة والتنازلات المتبادلة..
يعني ما في طرف يكون طوااااالي عاصر علي الطرف الآخر ودايرو يتنازل.. وفي أقرب فرصة بتاعة خلاف يجي كل شي مارق.. وممكن يكون بسبب تافه لو أخدناهو براهو ما بيكون مبرر قوي لقيام شكلة، لكن لو بحترنا نلقاهو دي الريشة البكت المتحلّم..
يوم الجمعة عزيزتي الزوجة.. لو زوجك ماشي الصلاة:
لو زوجك مشى لبس المركوب براهو وبراحة فاعلمي انه في حاله نفسية ممتازة
لو مشى لبس المركوب وسمعتيهو بدق وينفض فيهو ويضربو في بعض.. “طق طق طق” فاعلمي أنه زهجان لكن ما منك.. من موضوع برا البيت.. لكن اخدي جانب الحيطة والحذر وارفعي حالة الطوارئ إلى اللون الأصفر.
لو قعد في طرف السرير وسرح وأثناء ماهو سارح ما بيعاين ليكي وقال ليك جيبي لي المركوب اعلمي انه كايس ليه لي مشكلة.. عليك ان تجيبي المركوب بعد تمسحيهو جيدا.. وان لا تجدعيهو “ررررررررب” تحت كرعيهو ختيهو براااااااحة.. وإن دايرة تبعدي عن الشر وتغني ليهو.. أديهو شافعك الصغير وقولي ليهو: “وديهو لي أبوك برا”.. واعملي نفسك مشغولة بي حاجة جوة الأوضة.. انشغلي بعمل مقنع.. يعني ما تحشري راسك جوا الدولاب بلا غرض وتقعدي تنكتي في الهدوم أو تقعدي تسرحي شعرك مثلا.. حيزعل وممكن ينقنق سرا: “الشعيرات ديل زعطيهن.. يومك كلو ويط، ويط، تجبدي فيهن”.. قعدتي تغيري في اكياس المخدات..!!!! لانو ممكن يجي الأوضة ويعمل نفسو كايس للطاقية الراميها في السرير برا.. لكن الغرض من المناورة عشان يشوفك بتسوي في شنو؟.. والسبب الاحماكي تجيبي المركوب براكي شنو؟.. ويصرها ليكي..
أما لو قعد والمركوب تحت كرسي قدامو وعاين ولقى كديستكم متوسدة فردة مركوبو.. طوالي حيتهمكن انتي والكديسة بالتآمر عليهو.. ويقول وهو ينهر في الكديسة: “بِس.. بِس.. بَس أنا لو عرفت الجاب الكديسة دي هنا منووووووووو؟”.. عليكي أن تنهري الكديسة وتداعيها.. عشان تنفي التهمة.
أما لو كان ماشي عقد ولبس المركوب.. ومشى خطوتين وملص فردة وقعد ينفض فيها.. فاعلمي هداكي الله.. إنو اتذكر يوم العقد بتاعو.. وتعبيرا عن رغبتو في المخارجة يمرق المركوب وينفضو.. ويكون بقول في سرو: ” البي تخارجني انا شنو يا جماعة؟”..
اما لو كان مرق وعافص فردة من المركوب وواحدة لابسها كويس والفردة المعفوصة لبسها قبل يصل عتبة الباب اياك تكوركي ليهو وتقولي ليهو: “ماشي وين؟” ما حيتلفت عليكي.. وحيرفع السبابة بتاعة اليد اليمين وهو مديك قفاهو يرفعها إلى عنان السماء ويقول ليكي: “السماء السابع”.. أما لو سعلتيهو” اها.. بتجي متين؟”.. فما حيرد عليكي.. ويعمل فيها ما سامع.. ولو احتجيتي علي عدم الرد ورددتي وراهو: “أجي يا اخواني؟”.. فحيمد شلاليفو ويعوج خشمو ويحاكيكي: “أجي يا اخواني”.. ويمرق..!!!!!

[/SIZE][/JUSTIFY]

الباب البجيب الريح- صحيفة اليوم التالي

تعليقات فيسبوك


تعليق واحد

  1. انت يا ظريف يادكتور انا من المعجبين بمقالاتك ومزيدا من التقدم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *