الارهاب والحكام

صاحب العربة (خ ك د 0987-47) يقفز من شباك عربته على كوبري النيل الازرق.

يدق من فوق.

وصوت المذيع الداخلي يأتي صوته من بعيد على صاحب العربة (خكد 0987-47) الخروج من النيل الازرق…(حيا او ميتا يا بنجيب ليه الضرائب).

ما هذا (البرود) الذي يحوم بين الناس في عمارة الدهب.

كيلو اللحمة (60) جنيه.

ليه اشمعنا ..وكيف ؟.

يا حاج خلاص يمين ما تقول حاجة ..تشيل كيلو اللحمة ومعاه موزتين (هدية).

يا زول.

ناس العتميل ..عندهم (نخلة) في البيت كل السنة بتجيب ليها (4) بلحات.

(4) بلحات فقط.

باقى البلح بتشيلو المحلية.

ناس التفيتر عندهم (جدادة)…كل تلات سنوات بتجيب ليها (بيضة) واحدة.

ناس التفيتر زعلو ..قبضو (الجدادة) عشان يضبحوها ..قالوا ليها : (انت ليه بتعملي فينا كدا …انتي بتستهبلي ليه كل تلات سنوات بتجيبي ليك فد بيضة).

الجدادة قالت ليهم يا جماعة في ضمور اقتصادي عام في البلد ..وسيولة ما في ..والدولار بقى (9) جنيه.

التفيتر قال ليها وانتي مالك ومال الدولار ..(بيضتك) دي بتبيضها في البنك المركزي.

مالك ومال الدولار …انتي جدادة وإلّا لاعب محترف؟.

الجدادة ما عرفت تمشي وين؟…قالت ليهم خلاص اضبحوني.

اضبحوني وريحوني من ناس (الضرائب) ديل.

التفيتر عاين للجدادة كدا ..قال ليها عليك الله ما تقعدي تنظري لي..كمان جانا تنظير الجداد.

كلو عرفناه…ما (تجددي) فينا …نحن ما ناقصين.

وضبحوها على كدا.

في عمارة مجمع التحرير بالقاهرة اتفق المحتجزون الى ان طلبهم الاول ..ومنيتهم فقط ان يحضروا لهم (كباب).

طلبهم كدا.

عاوزين (كباب)…كلهم نادوا به ..ليخاطب الشخص الذي يحتجزهم وزارة الداخلية الحاضر وفدها اسفل العمارة بان يحضروا له (كباب).

كباب !!.

ايوا عاوزين (كباب).

والكباب عند المصريين يحظى بالصدارة في قائمة المأكولات.

الضابط المسؤول يخاطب افخم مطاعم القاهرة لتجهز له كمية كبيرة من طلبات (الكباب) الدليفري وذلك لاحضاره للمختطف في عمارة مجمع التحرير والمجموعة المختطفة.

حتى اذا وصل (الكباب) ضربوا ليك فيه لمن الله غفر ليهم ..ليجسد هذا المشهد (معاناة) الناس وغلبهم وهم ينهشون (الكباب) كما تنهش السباع الضباع.

من هنا خرج وجاء فيلم (الارهاب والكباب) للكاتب وحيد حامد والمخرج شريف عرفة ..والبطولة لعادل امام وكمال الشناوي واحمد راتب وعلاء ولي الدين.

الفيلم شارك فيه الممثل السوداني محمد السني دفع الله وكان رغم محدودية المشهد إلّا انه تميز في الفيلم واستطاع ان يضع بصمته في لحظات قليلة.

الفيلم المصري كان من انتاج 1992م ويعتبر الفيلم من اجمل افلام عادل امام وهو يناقش قضايا اجتماعية ..افترض لتحقيقها النزعة (الارهابية) حيث وجد بطل الفيلم نفسه (ارهابي) دون ان يشعر.

الان اعلام المريخ يمارس نفس (الارهاب)..ولكن ليس ببراءة عادل امام في الفيلم ..ولا بالكوميديا الموجودة في الفيلم.

ارهاب اعلام المريخ هنا فيه (خبث) واضح وهم يحاولون ان يرهبوا حكام مباراة القمة بدواعي مضحكة وسيناريوهات مكشوفة.

اعلام المريخ خرجوا لنا جميعا قبل اكثر من شهر في حملة منظمة للحكام بدأت من فيصل سيحة الذي كان اقرب الي تنفيذ اجندة (حمراء) خلال التلفزيون القومي.

فيصل سيحة حاول في حيلة مكشوفة ان يقدم لنا وقائع تأكد ظلم الحكام للمريخ في الوقت الذي كان يقدم فيه وقائع تعمل على الايحاء الى ان الهلال يجد سند ودعم من الحكام.

فيصل سيحة والذي تخصص في فقرة (الامبراطور) في برنامج عالم الرياضة التلفزيوني خرج علينا بعصبية مرة ليقول لنا ان فريق الملعب المالي الذي كان يلعب امام الهلال في البطولة الافريقية عنده (هدف) لم يحتسبه له الحكم.

وهذا عادة درج عليها فيصل سيحة ..ووصل بها حتى الى بطولة قارية لا دخل له بها.

ويا سيحة دا شعر ما عندك ليه رقبة ..شوف فريقك الطلع من دور الـ (64) والذي سوف يدخل في اجازة مفتوحة بعد مباراة القمة تمتد اكثر من شهرين.

يعني (ضفر) دا تاني ما بشوف ليه كورة إلا شهر يوليو ..وكذلك اكرم الهادي سليم.

اما امير كمال فان علاقته بالكورة سوف تنتهي غدا.

تاني شهرين ما عاوزين نشوف لينا واحد فيكم بيلعب كورة.

ح نرتاح من (اللخبطة) البتعملوا فيها دا.

الحملة على الحكام لم تكتف بسنياريوهات فيصل سيحة وحدها ..وانما امتد (الشغل) ابعد من ذلك.

رافق حملة سيحة (الانتقامية) ..حملة صحفية كبرى اقرب الي الصفحات التسجيلية ..وانت تقرأ لكل كتاب المريخ بدون فرز وهم في هجوم مستمر ودائم على الحكام.

حتى اننا نتوقع في مباراة القمة التى سوف تلعب غدا ان يكون تأثير ذلك (الارهاب) على الحكام كبيرا.

اتوقع في مباراة القمة اذا اراد الحكم ان يحسب مخالفة للهلال ان يضرب حكم المباراة تلفون لمزمل ابوالقاسم ليستشيره ان كان يصفر على هذه المخالفة ام يفوتها.

مزمل طبعا ح يقول فوّتها ما فيها حاجة.

واتوقع لحكم مباراة القمة …لو طلع مدافع الهلال الكورة وشتتها بقدمه من داخل الصندوق ان يحسب ذلك (التشتيت) ضربة جزاء للمريخ حسب توجيهات واماني مامون ابوشيبة.

ويمكن لحكم مباراة القمة ان يمنح اي لاعب في الهلال (بطاقة صفراء)..وبعضهم بطاقات حمراء ..عشان خاطر بابكر سلك.

سوف يكون حكم مباراة القمة ضحية لكتابات معاوية الجاك واحمد محمد احمد واسماعيل حسن.

لا نستبعد ان تحدث كارثة تحكيمية في مباراة القمة في ظل الارهاب الذي يمارس فيه اعلام المريخ خاصة اذا كان حكم المباراة صاحب شخصية ضعيفة ..مثل حكم مباراة الهلال والامل عطبرة والذي احتسب للهلال ضربة جزاء ثم عاد واخرجها من الصندوق بعد الضغط الذي تعرض له من لاعبي الامل عطبرة.

ديل امام الامل عطبرة بعملوا لينا كدا.

قدام الاهلي شندي بنقضوا لينا هدفين ..امام المريخ ح يعملوا لينا شنو؟.

مجلس ادارة نادي المريخ ..اكمل حلقات السيناريو عندما طالب بحكام اجانب قبل 48 ساعة من المباراة ..ليضع حكام القمة تحت ضغط رهيب.

كان تطلبوا بحكام اجانب قبل اسبوعين حتى يرتب الاتحاد العام لحكام اجانب لادارة مباراة القمة.

اما ان تخرجوا لنا بهذه (التمثلية) فان الامر يبدو مضحك جدا ..كما ان المسرحية (انكشفت).

البتعملوا فيه دا يا مريخاب (جرسة) عديل ..وهو بحث منذ الان للشماعات الخسارة.

مستوى المريخ الان لا يؤهله حتى الانتصار على فريق النيل الحصاحيصا.

اعلام الهلال بحمد الله انتبه لمخطط المريخ ..يفترض كذلك ان ينتبه مجلس ادارة نادي الهلال لهذا الترهيب لحكام مباراة القمة ونخشى ان ينعكس ذلك على اداء الحكم في مباراة الغد.

مطلوب من مجلس الهلال حماية الهلال من هذا المخطط ..وإلّا ضاع انتصار الهلال كما ضاعت الكثير من الانتصارات بسبب الظلم الذي يتعرض له الهلال من الحكام.

نرجو من جماهير الهلال ان تكون حاضرة في مباراة الغد ..لتسد ذلك الظلم بالتشجيع المتواصل …والمساندة المستمرة دون الخروج من السلوك القويم ..والروح الرياضية المتسامحة.

كتابات اعلام المريخ عن الحكام ربما تخلق (فوضى) جماهيرية في مباراة الغد ..لذا يجب الانتباه الي ذلك من قبل الشرطة والاتحاد.

كما نطالب من جماهير الهلال ان يكون شكل مساندتها للهلال هو التشجيع المستمر.

ما عاوزين نشوف اي قارورة في الملعب ..او اي هتاف خارج السلوك..ونقولها الان قبل الكورة اخلاقا.

ملحوظة : نعم قبل الكورة الاخلاق.

هوامش

رفض كامبوس الاشراف على مباراة القمة ..رفض منطقي ..ومقبول ..ولا ادري كيف تمت تسميته (هروب).

لا يستطيع الهلال ان يضع المسؤولية على كامبوس اذا اشرف على لقاء القمة…لذا فان رفض كامبوس الاشراف على الهلال في مباراة القمة هو رفض في صالح الهلال.

لا يعقل ان يشرف كامبوس على مباراة هو لا يعرف عنها اي شيء بعد ان ابتعد عن البلاد لمدة قاربت من الخمس سنوات.

مجدي مرجان مع التاج محجوب افضل للهلال ان يشرفوا على مباراة القمة من كامبوس ..من خلال متابعتهم للدوري السوداني ومعرفتهم لكل كبيرة وصغيرة في الهلال والمريخ.

التاج محجوب ليس بعيدا عن الهلال ولا المريخ من خلال اشرافه للاهلي الخرطوم.

لذا اتوقع قيادة فنية جيدة للهلال في هذا المباراة …واحسب ان مجدي والتاج سوف يكون وجودهما معا سببا في انتصار الهلال غدا باذن الله وتوفيقه.

هروب كامبوس عن مباراة القمة كما جاء في الصحف امس ..هو هروب في صالح الهلال.

خاصة ان اي لاعب في الهلال يريد ان يثبت افضليته لكامبوس وهو يتابع المباراة من المقصورة من غير ضغوط.

سوف يكون اي لاعب حريص على ان يظهر بمظهر جيد امام كامبوس.

غدا باذن الله ينتصر الهلال.

وغدا باذن الله يصبح الفرق (4) نقاط.

وغدا يدخل لاعبو المريخ في اجازة مفتوحة.

وغدا انتظرونا برة.

….

عاجل : صلاح الجزولي بعملها مرتين ، وليس مرتين…(اسألوني من الكلام دا بكرة).