محمد عبد الماجد
سيكافا زي كورس الملاريا كل يوم ينقص حبتين
“””””””””””””””””””””””””””””
الاتحاد العام لكورة القدم السوداني ما قادر يعمل ليه معسكر إعدادي للمنتخب الوطني …يقوم ينظم سيكافا عشان خاطر المريخ
“””””””””””””””””””””””””””””””””
تعرس كيف ..إذا كانت (عروس المولد) براها بـ (150) ألف دي غير قولة الخير والشيلة وسد المال
“”””””””””””””””””””””””””””””””””
يا مريخاب نحن عندنا (مجموعات) ما تعملوا لينا (تسمم) بي بطولتكم دي
“”””””””””””””””””””””””
·انتوا (البطولة) الزي العرس دي شنو؟.
·ح تقعدوا تشرعوا لي ..وتقولوا لي زي (العرس) كيف؟.
·وليه ..واشمعنا …وكيف ؟..كلام (أسماء في حياتنا) دي.
·ح تبقوا لي زي عمر الجزولي ..تحرسوني بالواحدة ..(والله أيام زمان كانت جميلة ..وبازرعة ..والكابلي).
·يا سلام.
·ح انزل ليكم (القاموس) من فوق العمود واقعد أشرح ليكم.
·ما عشان انتوا عاوزين شرح.
·أبداً ..(والله ما في زول بقدر يقول فيكم كلمة).
·بس عشان أنا عاوز ألف وأدور شوية ..لو قلت ليكم الحاجات عديل كدا ما بتقبلوا.
·وح تقعدوا تزعلوا لي.
·وتعملوها لي كلها (حساسيات).
·بطولة سيكافا هذه المرة متل (العرس).
·ح تقولوا لي كيف؟.
·ح أقول ليكم.
·يعني ليه ما أقول ليكم.
·في الحلة ..في أي حلة كدا (بدون تحديد أسماء)…في زول بتلقاه قاعد مطرف ..كل مرة يقول ليك عرسي الشهر القادم.
·خلوها حكاية (الشهر) دا.
·في زول بطبيعة الحال دائماً بشوف أقرب مناسبة ..يقوم يقول ليك انو ح يعرس في المناسبة الفلانية.
·ولا بعرس ولا حاجة.
·بداية السنة الهجرية يقول ليك عرسي في (المولد).
·يجي المولد صاحبكم ما يعرس.
·رطل حلاوة ما يشيلها.
·طبعاً الجماعة (الشتر) ديل ..بقوا شغالين بالكيلو ..خلو (الرطل).
·يمين السكر من بقى بالكيلو بقى ما عندو (طعم).
·زمان الواحد وقت يمشي الدكان يجيب ليه (ربع رطل) سكر ..نفسو بقوم من الشيل.
·هسع شوال سكر ما بقوم ليك نفسك.
·أنا ما عارف الدنيا دي حصل فيها شنو؟.
·يمكن عشان (المجالس التشريعية) بقت كتيرة.
·أي ولاية عملت ليها مجالس تشريعية.
·ومكاتب.
·وناس بركبوا ليهم (مواتر).
·درجات بخارية يعني.
·زمان في (المغامرون الخمسة ) كانوا بقولوا ليك نوسة ركبت (دراجة بخارية) مع تختخ.
·وعمار واقف تحت الشجرة الظليلة يراقب في الموقف.
·ونحن كنا نشيل ونصدق.
·لمن اتفقعنا من (المغامرات).
·وقت المولد يجي ويفوت تقول لي الزول يا زول مالك ما عرست؟..ما قلت عرسك في المولد.
·يقوم الزول يقول ليك : أعرس كيف ؟..إذا كانت عروس المولد براها بـ (150) جنيه دي غير قولة الخير والشيلة وسد المال.
·تقول ليه ما مشكلة ..طيب هسع عرسك متين؟.
·يقول ليك في عيد الفطر.
·هو وقتها بكون فاكر عيد الفطر ما ح يجي.
·بكون شايفو بعيد.
·يجي رمضان …وأنت بتراقب في الموقف.
·يجي العيد ..وتنتظر عاشرة العيد كمان ..وقت تشوف ما في ملامح أي (حنة).
·تقول ليه يا زول أنت ما قلت العرس في العيد؟.
·يقول ليك ايوا في العيد ..لكن ما العيد الصغيّر ..العيد الكبير.
·عرسي في عيد الضحية.
·تنتظر عيد الضحية.
·ما تشوف أي حاجة…(جردل موية يدفقوا فيه بره ما تشوفو).
·طبعاً النسوان من يقعدن يدفقن في الموية بره ..أعرف طوالي انو في عرس قريب.
·أنا بعرفها ليك من (دفيق الموية).
·الحاجات دي نحن مفتحين فيها.
·عارفنها.
·حافظنها حفظ.
·تقوم بعد فترة كدا.
·تلاقيه في صلاة الجمعة طالع أول زول من الجامع ..تقول ليه يا زول تعال هنا ..أنت ما قلت عرسك في عيد الضحية؟.
·يقول ليك : منتظرين (الحجاج) يرجعو …(العروس) عندها عمها في الحج.
·الحجاج يرجعو ..(خروف للكرامة) ما يضبحوه.
·ولا حمل.
·ولا عتود.
·ولا ديك.
·ولا فروجة.
·تلاقيه تاني تثبتو ..تقول ليه يا زول أنت ما قلت بتعرس بعد الحجاج ما يرجعو؟.
·يقول ليك (المولد) جاء …عرسنا في المولد ..كلها كم شهر كدا والمولد يجي.
·أها زولكم يظل يدور في (العرس) كدا ..ما يخلي ليه (مناسبة) لاحقة ما يعلن فيها العرس.
·بالطريقة دا ..شغال السنة كلها يحول في العرس من مناسبة إلى مناسبة.
·وما بعرس.
·مرات يصل حد ..الصيوانات يحجزها.
·التلج يجيبو.
·وما بعرس.
·هسع الحكاية دي زي بطولة (سيكافا) الما عندها نادي ينظمها دي.
·أنا أول مرة أشوف لي بطولة أندية ..ومشارك فيها نادي وطني وبنظمها الاتحاد العام.
·المريخ قال ما بنظمها.
·انتوا يا ناس الاتحاد العام ..الجابركم شنو تنظموا ليكم (بطولة) للمريخ ما فيها أي جدوى.
·مالكم ومالها.
·إلّا يكون دا كسير تلج لجمال الوالي.
·المريخ صاحب البطولة ذاتو ..قال ما بنظمها ..انتوا البخليكم تنظموها شنو؟.
·الخفة ليكم في شنو؟.
·الاتحاد العام لكورة القدم السوداني ما قادر يعمل ليه معسكر إعدادي للمنتخب الوطني …يقوم ينظم بطولة سيكافا عشان خاطر المريخ.
·دا اتحاد شنو؟.
·بطولة سيكافا ذاتها زي ما قلت ليكم طلعت زي (العرس) كل مرة يأجلو فيها.
·يقولوا ليك الكلام ألف مرة.
·اخر تأجيل سمعتو قالوا اجلوها من يوم الخميس لي يوم الجمعة.
·نعم التأجيل.
·هسع أنا أقول لي (عبدالماجد) شنو؟.
·دائماً حارجني معاه بي بطولتكم دي.
·كان تعملوها يوم السبت ..يوم مباراة الهلال والزمالك ..عشان تفهموا حاجة.
·أغرب من هذا ..أن البطولة في البدء كان مشارك فيها أكثر من (12) فريقاً.
·كلهم طفشناهم ليكم.
·انسحبوا واحد ..وراء التاني.
·المريخ ذاتو نفسو مرقت من البطولة.
·أول حاجة قالوا ليك المقاولون العرب والمصري البورسعيد مشارك في هذه البطولة.
·كلام.
·كلام جرايد ساكت.
·عشان بشاركوا ليكم.
·كل يوم يعلنوا ليك في المواقع عن انسحاب فريق من البطولة.
·تصوروا حي العرب ذاتو انحسب.
·مريخ الفاشر انسحب.
·المريخ العاصمي نفسو ممكن ينحسب من البطولة الكلها انسحابات دي.
·الحاجة الما بتصدقوها …المان الصومالي (انسحب).
·أها بعد انسحاب المان الصومالي ..بطولة سيكافا دي عندها كرامة.
·والله أنا خايف مع الانسحابات الشغالة دي ..بطولة سيكافا دي تتموها بي أندية من الدرجة الثانية.
·ما عاوز أقول ليكم اسم نادي من أندية الدرجة …عشان أندية الدرجة ما يقوموا يزعلوا.
·الناس دي ما بترضى تجيب سيرتها في (سيكافا).
·سيكافا عندهم زي (العيب).
·سيكافا بقت زي كورس الملاريا ..كل يوم بينقص حبتين.
·يعني يا جماعة كل يوم ينسحبوا فريقين.
·ألحقوا ..ألعبوا البطولة سريع..قبل ما تصفى ليكم على فريق واحد.
·أقول ليكم حل.
·خلوا المريخ يشرك معاه في البطولة الفريق الرديف.
·أصلها بايظة بايظة.
·المعلوم أن هناك فريقين فقط وصلوا الخرطوم فريق فكتوريا اليوغندي وفريق الدفاع الاثيوبي.
·وروني عاوزين تعملوا ليكم دورة من 3 أندية.
·فكتوريا والدفاع والمريخ.
·طيب ما كان تسموها دورة حوض النيل.
·كان تسموها أي شيء تانية.
·سموها دورة (الترعة).
·بالكتير دورة البئر.
·حوض النيل كتيرة عليها.
·حوض نيل شنو؟..بطولة فيها كلها (3) فرق ..تسموها حوض النيل.
·طيب لو كان فيها (6) فريق كنتوا ح تسموها دورة المحيط الهندي.
·يا مريخاب ..نحن ما فاضيين ليكم.
·ولا عندنا ليكم وقت.
·ما تزعجونا ساكت.
·يا مريخاب نحن عندنا (مجموعات) ..ما تعملوا لينا (تسمم) بي بطولتكم دي.
·سيكافا دي نحن لا بتنفع معانا ولا حاجة.
·ملحوظة : تمسخو للزول بطولتو.
هوامش
·الهلال وصل القاهرة.
·وصل بالبدل الكاملة.
·حاجة ما تخلص.
·دا شغل بطولات.
·بدلكم دي لو ما جبتوا بيها الـ (3) نقاط يبقى ما في فائدة.
·هسع أتوقعت حاجة.
·أتوقعت ناس المريخ ..يمشوا بورتسودان..ويرجعوا.
·بس عشان يجوا بالمطار.
·وعشان يلبسوا ليهم (بدل).
·ناس بله جابر ..الحركات دي بتكون عجبتهم.
·تراوري بكون عاوز يموت.
·هسع يا تراوري لو كنت بتلعب في الهلال ..كان دخلت مرحلة (التشفير).
·تراوري الان ح يلعب ليه في بطولة ..جائزة المباراة فيها قالوا شوال فحم.
·أنت شوال الفحم مالو.
·هداف البطولة ح يمنحوه ليك أنبوبة غاز.
·بطولة (تجارية) كدا.
·نحن الأسبوع الفات …الفضائيات كلها كانت بتتكلم عننا.
·حسن عمر خليفة عمل ليه تقرير زي صينية الباسطة.
·حاجة ما بتخلص.
·لا حسن عمر خليفة ..لا سامر العمرابي ما قصروا.
·تقرير الهلال كان ببث على رأس كل ساعة.
·نحن كنا كل دقيقة ..بنقعد نتفرج فيه ..رغم انو بجيبوه على رأس كل ساعة.
·سيكافا حقتكم دي ..إلا يجيبوها ليكم ناس الارصاد الجوي.
·بطولة (هوا) ساكت.
·كمان نحن ما بنعرف.
·يمين ..عارفين أي حاجة.
·……….
·عاجل : الزول وقت يكون ما عندو موضوع يشارك في سيكافا. [/JUSTIFY]
وإن طال السفر – محمد عبد الماجد
صحيفة قوون
