حارس الزمالك يشوف (عفاريت) تنطط قدام عينيه

[CENTER][B][SIZE=5] حارس الزمالك يشوف (عفاريت) تنطط قدام عينيه [/SIZE][/B][/CENTER] [SIZE=5][JUSTIFY]

(الشروق) المريخ والبوليس في الخرطوم نقلوا تمرين الهلال في القاهرة في (ساعة رياضة)
“”””””””””””””””””””””””
ناس بكري المدينة ديل يا عبدالواحد(بنعنشوكو بدوشوكو يكنكشوكو يحرفشوكو يدلوشوكو يدرفشوك)
“””””””””””””””””””””””””””””””””””
· دفاع الزمالك متل (شارع النيل) الساعة 8 صباحا يوم الجمعة.
· اي زول ممكن يفوت في (شوارع) الزمالك.
· شوارع الزمالك اتجاه واحد كلها تؤدي نحو عبدالواحد السيد فقط.
· درب السلامة لعبدالواحد السيد قريب.
· خلوني اكمل ليكم الكلام يا جماعة ما تضيقوا.
· ضايقين لي كدا متل شوالات الخيش.
· اول شوالات الخيش بالضيق.
· البلد دي اي حاجة فيها بتضيق.
· ولمن تستحكم حلقاته ..بعيدوا ليك (الحلقة الاخيرة).
· زمان نحن كنا مفتونين بي حاجة اسمها (الحلقة الاخيرة) في المسلسل.
· وقت يقولوا ليك الليلة المسلسل (الحلقة الاخيرة) نصنقر قدام في الواطة ، مع التلفزيون وش.
· والشيء الغريب والمدهش في نفس الوقت زمان الكهربة كانت بتقطع في (الحلقة الاخيرة).
· ناس الكهربة ينتظروا ليك (الحلقة الاخيرة) تجي عشان يقطعوا ليك التيار الكهربائي.
· موش ناس الهيئة القومية للكهرباء بقولوا عندهم (برمجة) لقطوعات التيار الكهربائي.
· اها برمجتهم دي كانت (قطع) مع الحلقة الاخيرة.
· يا عبدالواحد الليلة ح تشوف (الحلقة الاخيرة).
· نحن هسع بننقل ليكم (نقل مباشر) لمباراة الهلال والزمالك ..اتصلحوا كويس.
· بننقل ليكم بدون (كرت).
· وبدون حتى تحولوا (الطبق).
· انتوا بس لو بتصبروا ح تشوفوا اي شيء.
· على اللحو موش عندو اغنية بقول فيها يا اخوانا كان رقتو بوصف الشفتو.
· لكن انتوا ما بتروقوا.
· زي (فطور) العرس ..الناس كلها تلقاها واقفة في الباب بتستعجل طلوع صواني.
· يا جماعة استعجلوا لينا (الفطور).
· هسع يا جماعة ما تضيقوا.
· اي حاجة بالرواقة كويسة.
· باقى نحن (اي حاجة عندنا بي نظام).
· تقلعوا في عيونكم متل كيس الرغيف.
· اول (كيس الرغيف) بقلع عيونو.
· البلد دي اي حاجة فيها بقت بالقلع.
· هسع عليكم (التذاكر) البشيلوا فيها في بوابات المستشفيات دي ما قلع.
· دا قلع عديل.
· الواحد داخل يشوف ليه زول عيان.
· زول عندو (سرطان) عشان تدخل تشوفو يقولوا ليك تدفع (3) جنيه.
· تقول داخل مباراة الريال واتلتيكو.
· (3) جنيه ليه.
· الشيء البتغيظ …بتاع التذاكر او بتاعة التذاكر ..بيقول ليك او بتقول ليك ..امشي وتعال شيل الباقي.
· وقت تجي راجع يا تنسى الباقى…يا كمان الزول البقطع التذاكر تلقاه مافي.
· يقولوا ليك مشى (الصلاة).
· تقوم تمش تخليه ..وتتعوض الله.
· لكن دا هسع تصوروا كلو ما موضوعنا.
· ولا عاوز (انظر) ليكم.
· هو نحن الليلة قالوا ليكم (فاضيين).
· نرجع لعبدالواحد السيد ..هو يعني عبدالواحد ح يروح مننا فين؟.
· يا ود يا عبدالواحد …(ح تفهم حاجة الليلة).
· الاشكالية الكبرى اليوم ح تقع عليك.
· ح تقع في عبدالواحد ورأس عبدالواحد ..والخلفوا عبدالواحد.
· عبدالواحد تطير عيشتو.
· الليلة الشاف عيونك في نص رأسك ما كضب.
· يا عبدالواحد انت يا عبدالواحد…تلاتة في تلاتة بي كم؟.
· عبدالواحد ح يشوف (عفاريت) تنطط قدامو.
· ناس بكري المدينة وكاريكا ديل بعد الساعة سبعة مساء ببقوا زي (العفاريت).
· ما برحموا.
· بدوروا من اي حتة.
· ولا بنتظروا ليهم زول.
· عفاريت وبتتنطط قدام عينين عبدالواحد السيد.
· لا بتثبتوا ولا بتشافوا في الاساس.
· ناس بكري ديل (ما شاءالله) شوووو يجو فايتين.
· شووو يختفوا.
· شووو يطلعوا.
· شووو يجوا راجعين.
· نحن القاعدين برة في التلفزيون ما قاعدين نفهم حاجة ..بنلقى نفسنا زي الفي حصة التسميع.
· بكري المدينة دا وقت يدور ليك يبقى ليكم كم واحد كدا ..(قولوا ما شاءالله).
· وصلاح الجزولي ببقى كم صلاح.
· ومدثر كاريكا ينتشر ليك في كل الميدان متل (الكتيبة).
· قولوا ما شاءالله.
· حاجة تلخبط كدا.
· ما بتفهم شيء.
· غايتو يا عبدالواحد انا شايف من (خبرتي) البسيطة دي..انك لو كتبت (وصيتك) افضل ليك.
· اكتب (وصيتك).
· احسن ليك.
· ناس مدحت شلبي ديل شيالين حال.
· ناس كريم شحاتة ..ما برحموك ..احسن اتحرفن واكتب (الوصية).
· او اعمل فيها مصاب زي اكرم الهادي سليم.
· الحاجات دي ناس عصام الحضري عملوها.
· يا بويا شوتوا من بعيد.
· عبدالواحد كبر في السن ..واتقدم بيه العمر ..وبقى تقيل …(اللطش) البتعملوا فيه دا لو بقدر عليه ولا حاجة.
· شن قدرو كمان بالمدفعية التقيلة دي؟.
· يا باشا.
· انت في سن اعتزال ..ويمكن دي تكون اخر مباراة ليك.
· للعمر احكام.
· يمكن تكون الاخيرة يا عبدالواحد.
· ناس بكري المدينة ديل ما بخلوا فيك حاجة..(بنعنشوك وبدوشوك ويكنكشوك ويحرفشوك ويدلوشوك ويدرفشوك).
· شفتوا (الشينات) دي كتيرة كيف؟.
· وبعد الحاجات دي بكنوسوك وسلوسوك ويتلفوسوك ويحفروسك ويتربوسك.
· انت مالك ومال كدا يا اخوي.
· اكتب وصيتك يا عبدالواحد.
· اسمع الكلام …نحن ما بنكلم ساكت.
· عبدالواحد السيد طبعا عنده (ذكريات) مؤلمة مع قودوين وكلتشي عندما كانا يلعبان في الهلال.
· زمن كلتشي بي خيرو.
· تتخيلوا يا جماعة كلتشي عندما كان بيلعب في الهلال لعب قدام الاهلي المصري والزمالك والترجي التونسي والوداد.
· لمن فهم حاجة.
· اتمتع في الدنيا دي.
· فانيلتو اتشرطت.
· اتمزقت يعني.
· كلتشى لمن مشى المريخ بقى يلعب ليك مع ناس القطن التشادي ووقد الصومالي.
· جيبوا لي فريق واحد كبير وعندو اسم لعب امامه كلتشي وهو في المريخ.
· فرق.
· كبير يا هلال.
· تراوري ذاتو (اتخدع).
· راحت عليه.
· تراوري لو كان بيلعب في الهلال هسع دي كان ح يلعب امام مازمبي والزمالك والترجي ووفاق سطيف او الصفاقصي.
· صاحبكم هسع قاعد في البيت.
· بيلعب قدام البوليس الزنزباري.
· ولمن يجيب ليه قون في البوليس بفرح.
· دنيا.
· تستاهل يا كابتن.
· عليكم امان الله تراوري من قولة تيت طلع ليك من البطولة الافريقية.
· تراوري طلع من دور الـ (64).
· ويا ريت لو كان تراوري طلع قدام فريق كبير.
· تراوري طلع امام كمبالا سيتي.
· كمبالا سيتي هسع في (الكونفدرالية) مافي.
· تستاهل يا تراوري عشان تعرف (القروش) ما كل شيء.
· زولكم طلع مع النباه.
· عارفين خروج تراوري من (التمهيدي) بيذكرني شنو؟.
· بيذكرني الزول البصحوه للعشا ..ويقعدوا يرشوا فيه بالموية ويلولو فيه عشان يصحى.
· يحنسوه حنيس.
· وهو يقوم ويقع.
· زولكم اخر شيء لمن يقوم بعد ما يكبوا فوق رأسو (جردل موية)..يلقى العشاء بى (حِلبة).
· صاحبكم يكبس ويزعل ..ويقول لي اهلو ..والله لو خليتوني انوم كان احسن لي من (عشاكم) دا.
· جايبين لي (حِلبة) في العشا …نحن في مستشفى.
· دي ناس عنبر الولادة خلوها.
· دا شنو البتعملوا فيه دا؟.
· هسع تراوري حصلت ليه نفس الحكاية ..قوموه ليك من دور الـ (64).
· يا ريت بس لو طلعتوا ليكم قدام فريق بستاهل.
· طلعتوا قدام كمبالا سيتي.
· يعني دي (الحِلبة) ذاتها القلتها ليكم.
· احسن الواحد يتم نومتو.
· عبدالواحد بعد ربع ساعة بس من عمر المباراة.
· ما اكتر من كدا.
· ربع ساعة بس.
· بعد ربع ساعة بقعد يكورك.
· جيبوا لي احمد بدير.
· جيبوا لي اشرف عبدالباقي.
· جيبوا لي هالة صدقي ذاتها.
· يا جماعة ..امال فين محمود فتح الله؟.
· فين ياسر ابراهيم؟.
· انا عاوز ابوي.
· جيبوا لي ابوي.
· انا عاوز عصير برتقال.
· يا عبدالواحد اركز.
· يا عبدالواحد ما كدا.
· يا عبدالواحد انت شفت شيء.
· طيب وقت تلعب هنا في الخرطوم ح تعمل شنو؟.
· اتلكم عاوز ابوي.
· طخو.
· طخو يا ابوي.
· يا الشغيل ..انت عاوز تجيب قون متين.
· الجنينة دي ما في احسن منها.
· جيب قونك يا اخوي.
· احسن ليك واتصرف.
· وعبدالواحد يعيط.
· وحازم امام بعيط.
· واحمد جعفر بعيط.
· ومحمد ابراهيم بعيط.
· وميدو بقطع في بدلتو.
· ومرتضي منصور بيشد في شعرو.
· دا شنو البتعملوا فيه دا.
· وعمرو اديب ..يقطع الارسال ويظهر ليك ..(يقطع) في الكلام متل الباب الحالج.
· ايه دا؟.
· انتوا بتعملوا في اي يا اولاد عزيزة.
· عزيزة دي منو كمان؟.
· انا عارف.
· لقيتها قدامي وكتبتها ليكم.
· ملحوظة : يا عبدالواحد حالتك بالجد صعبة.
هوامش
· يا جماعة والله انا ما عندي ذنب.
· يا عمر بشاشه ما (تطنطن) ..صورة العمود دا بغيرها طلال مدثر…انا ما عندي قضية.
· كل يوم طلال يجيني بفن جديد.
· مرة يقول لي الصورة دي (مضلمة).
· ومرة يقول لي الصورة دي ما واضحة.
· ودي بي صفحة.
· غايتو اخيرا الظاهر عليه ح يثت ليه على صورة.
· جبت ليه صورة بي شالها…عشان ما يقول شيء.
· طلال (الترويج) عاوز ليه صورة مختلفة.
· ان شاءالله (الصورة) بعد كدا تستقر شوية.
· انتوا امس المريخ كان لاعب وإلّا انا غلطان؟.
· فتشت الفضائيات دي كلها ..ما لقيت اي حاجة.
· ناس الشروق نقلوا تمرين الهلال من القاهرة في برنامج (ساعة رياضة) ومباراة المريخ ما جابوا سيرتها.
· ما جابوها في الارضي.
· قدر ما حولت (الطبق) ما جاب لي شيء.
· عبدالماجد لقاني بحول في الطبق.
· قال لي بتحول في الطبق مالك؟.
· قلت ليه عاوز كورة المريخ يا سلك؟.
· عبدالماجد قال لي (الطبق) دا لو شربتو (حرجل) ما بجيب ليك المباراة.
· انت قايل المريخ لاعب وين؟..ومع منو؟.
· المباريات الزي دي مفروض يدسوها.
· حاجات زي دي اوعكم تجيبوها لينا هنا.
· نحن ما ناقصين كفاية علينا (البرلمان) السوداني.
· لكن بالجد.
· هو المريخ كان لاعب مع منو؟.
· ما تقولوا لي مع (البوليس).
· ليه؟..الناس عملوا شنو؟…عشان يلعبوا مع (البوليس).
· اوعكم يكونوا عملوا ليهم (مشكلة) جديدة.
· حراكاتكم دي يا ناس المريخ اصلو ما بتخلوها.
· خلاص كملتوا اي حاجة وبقيتوا تلعبوا مع (البوليس).
· قالوا ليك تراوري امس جاب ليه قون..قام جاري على الكورنر ..احمد الباشا لحقو قال ليه ما تحرجنا ساكت ، ما تفرح ..الكورة دي في سيكافا ما في المجموعات.
· والهدف ذاتو في البوليس ما في مازمبي.
· محمد عبدالله مازدا قدم تحليل اكثر من رائع لمباراة الهلال ومازمبي في التلفزيون القومي عبر برنامج عالم الرياضة.
· مازدا اخطر محلل سوداني.
· يا سامر العمرابي مازدا دا مفروض يكون في الاستديو مع فوزي التعايشة.
· كذلك كان خالد بخيت محلل خطير لمباراة الهلال والزمالك في قناة الشروق.
· خالد بخيت يجب الاستعانة به في تحليل المباريات ايضا يا سامر.
· قدموا لينا نماذج مشرفة خارجيا.
· في واحد قال لي انت صلاح الجزولي دا قصتو شنو؟.
· قلت ليه صلاح الجزولي (بيسخن) بي قرن شطة ..ويدخل المباراة.
· يا بكري المدينة ما تنسى قونك.
· ويا الشغيل ..جيب قونك.
· ….
· عاجل : سيكافا دي بطولة وإلّا (نقطة) البتجمعكم بـ (البوليس) قلت ليكم تكونوا عملتوا حاجة غلط.

[/JUSTIFY] [/SIZE]

وإن طال السفر – محمد عبد الماجد
صحيفة قوون