فوكو وهامان فايتنهم موسى الزومة وسعيد السعودي بالصبر

·قبل ايام احضر المريخ محترف كاميروني اسمه (فوكو اوليفيه) ..جاء من اجل اختبارات اللعب في المريخ.
·افحصوا ليه الملاريا اول.
·نحن في البدء افتكرناه زول آثارات ماشى البجراوية اوالبركل او النقعة والمصورات.
·محترفكم دا عاوز ليه (شمسية).
·كورتو قدام خشم بابنا ما بتلعبو.
·كورتو دي بي امانة كدا ..(شليل) ما بتلعبو.
·مامون ابوشيبة قال ان فوكو اوليفيه هذا اكبر من اوليفيه (الاصلي) الذي يلعب في المريخ الان.
·عاوزين يبقوا ليك المريخ كلو (اوليفيات).
·اوليفيه واحد كفاية …انتوا ناقصين اوليفيات.
·علما ان اوليفيه الاصلي عمره بكون ضرب في الاربعين.
·اوليفيه دا بعطيك احساس انو دخل البلد دي مع حملة هكس باشا.
·الزول دا قديم من زمن الطابعة ام طبق.
·كمان نحن ما بنعرف التاريخ.
·يعني فوكو دا بالميت كدا بكون عمرو (45) سنة غير الزوغانات والجمع والعطل الرسمية.
·دا جايبنو لي شنو؟.
·عاوزين تفتحوا ليه (استديو) في شارع الشنقيطي.
·دا عاوزين بيه شنو يا جماعة؟.
·عاوزين تضبحوا.
·عاوزين تترسوا البحر.
·عاوزين تعملوا (نفير).
·البلد دي ماشى عليها خريف ..وسيول وفيضانات ما تدخلوا ليها (خوازق) على الخوازق الفيها.
·كفاية علينا الفينا.
·يوم داك لاقيت لي زول في شارع البلدية ..شبهتو ..بعد (7) شهور اكتشفتو ليكم ..(محترف) جاء يعمل (اختبارات) مع المريخ.
·ناسكم ديل ركزوا على اختباراتهم الطبية ..ما اختباراتهم الفنية.
·خليت الموضوع ..وقلت اتجاوز الحتة دي ..(اخلي الغتاتة) شوية.
·اعمل فيها ما عارف.
·اصهين.
·اكتل الدش.
·صهينت ..وكتلت الدش ..وفتحت (زي افلام).
·رجعت تاني اكتب في مذكراتي.
·رأسي ضرب.
·المضحك ان فوكو اوليفيه هذا قالوا ليك في العمر (اكبر) من اوليفيه وفي الحجم (اصغر) من اوليفيه.
·يعني عكس الحكاية تماما.
·عاكسها.
·الظاهر السمسار الذي احضر فوكو اوليفيه عكس الحكاية ..بدل ما يجيب لاعب اطول من اوليفيه واصغر منه سنا ..عكس ليهم الموضوع.
·فوكو اوليفيه جماهير المريخ هتفت ضده في مباريات المريخ (السيكافية).
·طبعا انتوا سمعتوا بي (الحكم) الذي يمكنه ان يطرد اللاعب.
·لكن الجمهور يطرد ليه لاعب دا ما سمعنا بيها إلا في المريخ.
·الجمهور ما قدر يصبر على فوكو اوليفيه.
·هسع المريخ جاب ليه محترف كاميروني جديد…(انتوا الجماعة ديل فتحوا في الكاميرون كدا مالهم فجأة؟).
·موقع الزاوية قدم سيرة اللاعب الكاميروني ساجوهامانالذي جاء من اجل اجراء الاختبارات مع المريخ ..وكانت سيرته على هذا النحو التى نستعرضها ونعلق عليها.
·وقبل السيرة نقول ان اللاعب واضح انه طاعن في السن ..يعني على الاقل كدا الزول دا بكون دفعة كمال عبدالغني.
·انتوا لو عاوزين تسجلوا هامان دا ما تسجلوا كمال عبدالغني.
·وان كنت اعرف ان الجلوس في الكنبة والقاعد فيها ما عاوز ليه (اختبارات) ولا يشترط ان يكون اللاعب صغير في السن.
·ناس المريخ بسجلوا الان في محترفين من اجل ان يجلسوا في الكنبة.
·ديل ناس كنبة.
·تقول سيرة ساجو هامان حسب ما جاء في موقع (الزواية).
·لعب هامانللمنتخبالكاميرونيالأول (الأسودغيرالمروضة) فيمناسبتينإحداهماكانتخلالتصفياتكأسالعالم 2010،عندمامثلمنتخببلادهأمامتنزانيافي 21 يونيو 2008م.
·مروضة او غير مروضة ما فارقة كتير.
·يعني لو ما كانت مروضة ح تكون في مشكلة.
·نحن الهلالاب ما في حاجة فارقة معانا.
·زولكم دا لو لعب في منتخب البرازيل عندنا فيه رأي.
·بعدين الزول دا لعب في مناسبتين فقط ..يعني مباراتين احدهما كانت سنة 2008م.
·عليكم الله في (كبر) اكتر من كدا.
·دي (شيخوخة) عديل كدا.
·خلوها (المقارنات) دي ..والتحليلات ..تعالوا شوفوا تاريخ ميلاد اللاعب.
·الناس ديل براهم قالوا كدا.
·وولدهامانفيغاوندريالكاميرونية 28 نوفمبر 1984م.
·اول حاجة عشان نثبت كذب الزول دا يوم 28 نوفمبر 1984 في الكاميرون كانت اجازة رسمية.
·قول اتولد يوم 28 نوفمبر 1984 …عمرو الان يعني (30) سنة..انتوا الزول دا جايبنو (غفير) مدرسة.
·يعني اكبر من الزومة.
·واكبر من سعيد السعودي.
·الطريف في السيرة انهم قالوا بيلعب بالقدم اليسرى واليمنى..زولكم دا لو بيلعب بي (ايديه) ما بنفع.
·اي محترف يقولوا ليك بيلعب باليسرى واليمني.
·او بيلعب في كم خانة.
·وقت الدوري يبدأ تكتشف انو كراع واحدة ما بقدر يلعب بيها.
·وانو بيلعب في خانة ثابتة ..لو غيرتو منها …(بيتهم) ما بعرف يرجع ليه.
·نعود الي السيرة التى تقول :
·بدأهامانمشوارهفي 2003 معالقطنالكاميرونيوانتقل الى فريق الساحل في 2005 ولعب له حتى 2010،وأعيرإلى اتحاد سالي في 2006،وأعيرإلى فريق ديسغيولي في المجر في 2007،وأعيرأيضا في 2008 إلى فريق يوبجست المجري،وكانت الإعارة الرابعة له لفريق أفسيفادوس في سويسرا،وعاد إلى اللعب مرة أخرى في فريق ديسيغولي،قبل أن ينضم في 2010 /2011 إلى بودابست المجري،وفي 2012 انضم إلى فريق أكزاييكالكاز اخستاني،وشارك ساجو في 124 مباراة في الفترة من 2007 إلى 2012.
·زولكم دا شغال (اعارات) ساكت.
·دا لاعب ام بسطجي.
·والاعارات انتوا براكم عارفنها.
·الاعارات شايفنها في ناس مصعب عمر ومفضل علوان وسعيد السعودي.
·اللاعب من يقولوا ليك (اعاروه)..اعرف ما فيه فايدة.
·الاعارة دي شطب بطريقة ظريفة.
·الشيء الاخر الواضح في مسيرة اللاعب تنقله الدائم بين الاندية المختلفة ..وهذا دليل اخر على عدم الجودة والاتقان والاستقرار.
·زولكم دا مرقها لـ (أكزاييك)الكازاخستاني.
·عليكم الله دا لاعب كورة وإلا (مقاتل).
·المخيف ان اللاعب اخر محطاته والتى جاء بعدها للمريخ جاء من أكزاييكالكازاخستاني.
·الزول دا (قاعدة) وإلّا شنو؟.
·يا جماعة الله ناس ساجو وفوكو ديل ..ناس موسى الزومة وسعيد السعودي فايتنهم بالصبر.
·يعني ما تضيعوا قرشوكم في الفاضي ساكت.
·تسجيلات المريخ الحالية بتأكد انو جمال الوالي ماشي وما قاعد.
·دي ما تسجيلات زول مستقر.
·دي تسجيلات زول متراوح.
·نحن كمان ما بنعرف الزول وقت يكون ماشي.
·واضح انو جمال الوالي عاوز يورط ليكم ناس المجلس القادم في (العجائز) ديل.
·جمال الوالي ناوي يسجل ليه (عجائز) قدام الملكية جوبا والبوليس الزنزباري ما بنستروا.
·اها نوع ديل (5) دقائق قدام الترجي بثبتو.
·قدام الهلال ناسكم ديل (3) دقائق ما بنستروا.
·تسجيلات المريخ ظاهر عليها تسجيلات (سيكافا).
·يعني تسجيلات قدر ناس فكتوريا والبوليس والملكية.
·تفتكروا المريخ ممكن يقابل الترجي او الاهلي المصري وين؟.
·وهم بطلعوا ليك من دور الـ (64).
·المريخ امس لعب امام الملكية جوبا …السن بضاحك نديدو.
·يا جماعة تاني اوعكم تقولوا المريخ (ند) للهلال.
·نحن خلاص مستوى زي دا ما بننزل ليه.
·وانتوا مستوى زي حقنا دا مع تسجيلاتكم دي ما بتصلوه.
·ملحوظة : خلاص نحن اتفرقنا فراق الطريفي لي جملو.
هوامش
·هسع تلقى في جماعة منكم زعلوا.
·بتزعلوا ساكت انتوا بدون سبب.
·تسجيلاتكم دي زي ملاح القرع الما فيه (ملح).
·تسجيلات مسيخة.
·زي الزول البكتشف ساعة الغداء انو ما في رغيف.
·يقوم يمشي يجيب ليه (رغيف) في السخانة دي.
·رأسك يضرب.
·انتوا برازيلي الهلال دا بيصل متين؟.
·المجموعات انتهت.
·كل يوم يقولوا ليك سوف يصل صباح اليوم لاعب الهلال البرازيلي الجديد.
·وكل يوم يقولوا ليك اتحرك من البرازيل في طريقه الى الخرطوم.
·يا جماعة الله ..صاحبكم دا لو اتحرك من (الكلاكلة) كان الي الان وصل الخرطوم.
·طبعا ناس الكلاكلات ديل عندهم مواصلات…الراكب يتحرك وهو في عز الشباب يصل وهو على اعتاب الشيخوخة.
·عندنا زول اتحرك من الكلاكلة (طفل) وصل السوق العربي وهو في الاربعين.
·هسه محترف الهلال البرازيلي واضح انه راكب بص الوالي.
·شفتوا الزول من يقعد يتجرجر ليكم كدا ..اقنعو منو.
·ما اظن يصل.
·تسجيلات لجنة التسيير مخجلة.
·والهلال في المجموعات.
·مع ذلك كانت تسجيلات الهلال بهذا التواضع.
·الي الان الهلال لم يحسم امر لاعب وطني من اجل تسجيله.
·لا اعرف كيف قبل الفاضل التوم بمنصب امين الخزينة في الهلال ..ثم استقال بعد (24) ساعة من تعيينه.
·هذه قمة الفوضي.
·اما الفاضل التوم زول ما مسؤول.
·او الوزير ما عارف شغلو.
·هذه التخبطات يدفع تمنها الهلال.
·واضح ان لجنة التسيير جاءت بكل عيوبها السابقة.
·ما في اي فائدة.
·مبروك المريخ اتأهل الي ربع النهائي بطولة سيكافا.
·اعملوا ليكم مهرجان.
·خطيرين والله.
·عليكم الله في زول هسع متابع الفوضي البتحصل دي.
·والله انتوا يا ناس المريخ عصام الحاج ما غلطان عليكم.
·…..
·عاجل : سيكافا دي مشفرة صاح …قناة واحدة ناقلاها ما في.
[/JUSTIFY]

وإن طال السفر – محمد عبد الماجد
صحيفة قوون