عزيزتي.. تعلمي كيف تختارين زوجك

راقبي خطيبك.. أو حبيبك.. أو من تحاولين أن تشرّكي ليهو عشان يعرسك.. الحاجات دي مهمة وهي بعض الملاحظات الممكن تساعدك في حسن الاختيار:
لو كان عويانتو دقاااااااق وصغااااااار.. وبيتلفت كتير.. دا شليق شلاقة تدخلك إنتي وأهلك وجيرانكم ومعارفكم.. في ضفوركم.. وأي زول عندو علاقة بيكم ما بيكون حايم برا ضفورو..
لو كان النوع البيقعد في نص العنقريب.. وبيتعنقل.. ويربع كرعيهو ويخد إيدهو فوق رُكبو.. دا نوع جنو مراسيل.. قومي جيبي لي موية.. قومي ناوليني جلابيتي ديك.. دنقري تحت العنقريب دا أمرقي لي نعلاتي.. وبرضو شناااااااف.. ما بعجبو أي شي.. وأي شي يطلّع فيه إنّ.. مهما اجتهدي.. جيبي الشاي.. أول ما ياخد ليهو جغمة يكشر وشيه: “لااااااا اله الا الله.. يا ولية.. أنا قارصاني عقرب؟.. الشاي دا مُر كدي مالو؟”.. ولما تجيبي الاكل.. وبوخو يلوي.. يدخل يدو.. ويرفع الصحن: “هاكي.. سخني الملاح دا تاني.. دييييييمة جايبة لي اللكل ساقط”.. ثم في سرو: “تسقطي من الدنيا وحبانا..” واللا اقول ليكيّ نسقط الاتنين.. كيّة لي عشان عرستك”
أما لو كان النوع الفي المواصلات بيقعد في كرسي يشيل نفرين.. تلقيهو مشتّح وكل كراع في بلد.. ويخلي للزول الجنبو حتيتة صغيرونة يقعد فيها.. دا أناني.. واااااااضح.. أها زي دا.. تلقيهو في البيت راقد في السرير القصاد المكيف.. ولو عندكم مروحة استاند.. يقبلها عليهو ويتشنقل ويقرا جريدتو.. ويخليكي إنتي تتهببي بي طرف توبك.. ولو عاملين شيّة.. يلقط اللحيمات كلهن ويخلي ليكي العضام.. وانتي واجتهادك وقوة سنونك.. و لو عندكم مرارة.. يلقط الكبدة الفي المرارة.. وبعد شوية يقبل علي الكرشة.. ويخلي ليكي الفشاش تلوكي فيهو الضحوية كلها.. ويعاين لك ويقول لك: “بتلوغدي في شنو؟”..
أما الخطيب.. الشلوفتو الفوقانية تلاحظي إنها اكبر من التحتانية.. دا قواااااااااال.. تعرسيهو وخشمك وعندك.. ولا كلمة.. اي نضم بيناتكم.. في الونسة والواتساب.. وأي نصيبة جات لي اهلك وداسنها وحدستيهو تلقيها في السهلة وفي الصقيعة وفي خشوم الناس.. عليه عليك.. بالسكاااااات ثم السكات.. ثم السكات..
أما لو كان شلاليفو دقااااق.. ورقيقونات.. وديمة مارق لسانو يبل فيهن.. دا راجل نضام ونجاض.. ينجضك بالنضم.. في النوم دا تتاورو كوابيس وينضم ويكورك..
أما لو كان النوع البيحكي عن بطولاتو.. وان دقّ فلان وكسر علان وممكن يقول ليكي دقيت لي تلاتة تنفار.. دا ما تتكلي عليهو كتير إن جاكم حرامي ادخلي دورة تدريبية في الكاراتية لحماية نفسك وولدياتك وحمايتو هو..
أما لو كان كرعينو طوال.. ملفوتات.. وخطواتو قريبة من بعض.. دا من أرباب حمار النوم.. أبشرك بالسهر ومحارستو.. ما يشيلو حمار النوم ويدخلو عند الجيران أنصاص الليالي.. ويبجب لكم نصيبة..
أما لو كان راسو صغيروني ومدردم.. انتي ربنا فتحها عليكي وابقي فيهو عشرة وكنكشي فيهو بايديكي وكرعيكي.. دا راجل هدي ورضي.. أصلو ما بيزعلك.. قبل جاي، يقبل.. قبل غادي، يقبل..
أما لو كان داقي سيستم.. ومفلفل ومجلجل شعرو.. ويمشي الهوينا.. نصيحتي ليك خلي العرس كلّو كلّو..!!