المريخ في (11) سنة (33) مدرب وحبة خردل

· تقرير خطير تملّكته (شفاهيا) من احد اقطاب المريخ ، ومن الذين نثق في تقديراتهم ، وكلماتهم . وهو الي جانب ذلك من رجالات المريخ الذين عملوا في اكثر من مجلس عبر الانتخاب والتعيين.
· يتمثل التقرير في ان المريخ في (11) سنة اشرف عليه (فنيا) اكثر من (32) مدرب.
· مسطبة شعبية من المدربين.
· كفى تدليلا على هذا الكلام ان الالماني (كروجر) جاء ورحل ثلاث مرات للمريخ (هل هناك تخبط اكثر من ذلك؟).
· مدرب (ذهاب واياب).
· والـ (11) سنة هى الفترة التى ادار فيها جمال الوالي المريخ ناقص (6) شهور زعل.
· عشان ما تقولوا نحن بنظلم الزول ساكت.
· هذا الكم الهائل من المدراء الفنيين الذين تعاقبوا على تدريب المريخ يثبت ان جمال الوالي يبدل (المدربين) اكثر من استبداله لعمامته.
· كل ما يشيل (العمة) بشيل معاها الجهاز الفني للمريخ.
· كان ذلك التقرير الذي تملكته قبل الاطاحة بـ (اتوفيستر) الذي ذهب الي المانيا (محللا) كما ذهب الدكتور حسن الترابي في 30 يونيو 1989 (حبيسا) الى كوبر.
· اتوفيستر تاني الخرطوم دي ما بدخلها إلّا محلل في قناة (النيلين).
· نحن (طبقنا) من كترة (التحويلات) بقى زي (مروحة التربيزة).
· نحولوا للدوري الممتاز ..(الدوري الممتاز) ينتهي.
· نرجع عشان نشوف سيكافا في قوون..نقوم نحول (الطبق).
· نحول الطبق ..يقولوا لينا النيلين جايبة مباراة للهلال قديمة.
· نمشي (النيلين) يقولوا لينا خالد ماسا عندو (الشوط الحاسم) في قوون.
· نقوم نعمل شنو؟.
· نقوم نحول الطبق.
· بقينا شغالين (تحويلات) كدا عبدالماجد شايل (مفكو) وطالع في الحيطة يحول في الطبق من اتجاه لي اتجاه.
· لدرجة اني فكرت اثبت (عبدالماجد) مع الطبق.
· الولد فتر من النزول والطلوع.
· النيلين دي تاني لو ناقلة لينا كأس العالم (حصريا) ما بحول ليها (الطبق).
· المريخ تخلص من (اتوفيستر) قالوا ليه امشي (اشخر) في المانيا..نحن هنا كفاية علينا (شخر) ناس ضفر.
· الشخر باللغة الالمانية كيف؟.
· قالوا ليك (الشخر) بالالماني زي (صوت البنقز) في بداية الحفلة.
· الان وبعد ان تم دمج الاجابتين (برهان تيه ومحسن سيد) في اجابة واحدة يمكن ان نقول ان المريخ في (11) سنة اشرفوا عليه (33) مدربا ..اذا جبّرنا برهان ومحسن في (مدرب) واحد صحيح.
· نحن شفنا التؤام السيامي لكن الجهاز الفني السيامي دي اول مرة نسمع بيه عند المريخ.
· المرة دي قالوا نجيبهم اتنين في حتة واحدة.
· خد برهان وشيل محسن سيد (هدية).
· يا ريت لو كانوا لميتوا عليهم بالمرة كدا الكوتش (محمد الطيب) – مورينهو التصريحات الصحفية عشان تبقى الحكاية (كاب وتي شيرتي وكرفتة).
· طبعا صاحب (التي شيرتي) هو محسن سيد ..وهذا امر سوف نعوده له لاحقا بالتفصيل ان شاءالله.
· الكاب برهان تية بتاع (صدي الملاعب) في زول بجري من (الكاميرا).
· الكرتفة محمد الطيب.
· الذي يهمنا الان هو ان المريخ في (11) سنة وهي سنوات ادارة جمال الوالي للمريخ بما فيها (6) شهور زعل اشرف عليه فنيا (33) مدربا.
· 33 مدرب في 11 سنة يعني كل سنة بمعدل تلاتة مدربين.
· انظروا لهذه النسبة العالية ..والتى لا احسب ان تكون قد حدثت في اي نادي في السودان وان كان يلعب في الدرجة الثانية.
· علما ان عصام الحاج كان قد شكك في الـ (33) مدرب وقال ان جمال الوالي هو المدرب الحقيقي للمريخ وهو الذي يسطير على الامور الفنية بما فيها وضع التشكيلة واجراء التغييرات والتبديلات.
· النسبة العالية من التغيير الذي حدث للاجهزة الفنية المريخ كان السبب في (طيّش) المريخ وفي التدهور الذي يعاني منه الفريق ..وفريق المريخ الى الان لا تستطيع ان تعرف له تشكيلة ثابتة او مستوى ثابتة.
· متقلب حال المريخ من حال الي حال مع كل مدرب جديد يأتي ليشرف عليه.
· هذه الفوضى الفنية التى حدثت في المريخ سببها الرئيس هو جمال الوالي الذي ترك الامر لاعلام المريخ ليدير المريخ كما يشاء.
· وتداخلات اعلام المريخ واضحة في التشكيلة والاجهزة الفنية والتسجيل والشطب.
· الخلفية (السياسية) التى جاء منها جمال الوالي جعلته ان يكون هكذا مرنا مع اعلام المريخ يشكله كما يشاء ..احتسابا للدبلوماسية وعدم الدخول في صدام مع اعلام المريخ.
· ما يحدث في المريخ وما كان في سنوات جمال الوالي الـ (11) التى ادار فيها المريخ للاسف الشديد يوشك الى ان ينتقل الى الهلال المعروف عنه الاستقرار الفني والثبات في التشكيلة ..والتعمق في التسجيلات.
· نحن الان ننجرف الى الحالة التى فيها المريخ وبعد كل الفشل الذي حققه المريخ وتمثل في هذا الموسم في الخروج من دور الـ (64) في البطولة الافريقية والخروج من دور الـ (8) في بطولة سيكافا.
· هذا الفشل الكبير الذي يحدث في المريخ يدفعنا مجلس الهلال بغضوط من اعلام الهلال الى ان ننقله الى الهلال.
· ونحن شركاء في هذا الفشل ..(ولا نعفي انفسنا).
· ألا يجب ان نعتبر من المريخ؟.
· ماذا في المريخ (جيد) حتى ننقله للهلال ..وبالتفاصيل نفسها.
· تعجبت من الهجوم الذي تعرض له لاعبي الهلال ..والهتافات التى كانت ضدهم ..والكتابات التى نالت منهم في هياج انفعالى.
· نالوا من عمر بخيت ومساوي والمعز وهم ركائز الهلال وعضمه وثباته.
· هل يريدون ان يتجه الهلال اتجاه المريخ فيسجل على طريقتهم احمد ابكر وعماد عبدالله وبخيت خميس.
· هل تستبدلون الذي هو اعلى بما هو ادني؟.
· ان اهم ما يميز الهلال هو هذا (العضم) الذي يشكل الهلال ..كيف لكم ان نهتك اهم ميزة في الهلال.
· اما الهجوم على المدرب بغض النظر عن من هو ومن الذي اتي به هو (سخف) ..لا يخلو من (اجندة خفية).
· لقد ضغط اعلام الهلال على نصرالدين النابي حتى قدم الاخير استقالته وترك الهلال في ظروف صعبة ..ليأتي خلفه كامبوس بضغوط اعلامية.
· بعد ان جاء كامبوس انقلبوا عليه ايضا ومارسوا نفس (المسلسل) الذي مارسوها على النابي.
· يحدث هذا في ظل استسلام تام من مجلس ادارة الهلال الذي يستجيب للصحافة الزرقاء وينفذ توجيهاتها خوفا من ان تهلك بالمجلس.
· لذلك يضحي المجلس دائما بالمدرب ويحتمي باقالته ليتقى شر النقد الذي يمكن ان توجهه له صحافة الهلال.
· ان مجلس الهلال (الضعيف) والذي جاء بخلفية سياسية تشبه خلفية جمال الوالي يقود الهلال الى مصير المريخ الذي خرج من دور الـ (64) ويتحدث اعلامه عن الهلال الذي يلعب الان في المجموعات في كبرى البطولات الافريقية.
· اعلام المريخ بدون خجل يتحدث عن الهلال وهو في المجموعات وفريقهم قد خرج قبل ايام من دور التماينة من سيكافا.
· تعامل اعلام الهلال وجمهور الهلال مع الخسارة او التعادل بهذه الصورة هو تعامل يفتقد للعقلانية ..وهو شيء يدرج تحت بند الانفعال ..والعواطف (السلبية).
· الهلال مازال يحتفظ بحظوظه كاملة في تصدر مجموعته وليس التأهل فقط ..وكفي انه يتصدر مجموعته مع فيتا كلوب قبل مباراة مازمبي والزمالك اليوم.
· اللغة التى تحدث بها الكوتش محمد الطيب والذي قال ان تأهل الهلال من مرحلة المجموعات امر اذا حدث سوف يكون من عجائب الدنيا..يجب ألا تكون لغة لاعلام الهلال.
· كورة القدم لا تعرف المستحيلات ..وليس فيها من عجائب الدنيا غير ان يكون محمد الطيب مدربا ويصرح كمان عن الهلال.
· اصمت ايه المدرب الذي لم يتجاوز الى الان دهشة (الكرفتة) التى يلبسها.
· سوف يتأهل الهلال ان شاءالله وسوف نرى ان كان تأهل الهلال من عجائب الدنيا ..ام ان محدودية فكرك لا تتجاوز جدول اتنين؟.
· اعجب ان يقول مدرب مثل هذه التصريحات ..وكورة القدم لعبة متعتها في تحقيق المستحيلات..وقلب الطاولة.
· يهمنا الان ان نقول يجب ان يؤفر مجلس الهلال الاستقرار والحماية الكافية للجهاز الفني وللاعبين.
· يجب ان لا يستسلم الهلال لهذه اللغة (المحبطة)..كورة القدم تمضي على هذا المنوال ..علينا ان نقبل بكل تقلباتها ..وان نملك القدرة على التعامل مع كل الظروف والاحوال بدلا من هذا التخبط الذي يحدث الان في صحافة الهلال.
· صحافة الهلال صدرت ذلك الاحساس المحبط للجماهير ..وان تمكن الاحباط من الهلال فان تقدم الهلال عندها يبقى صعب ..(لكن برضو ما بنصل حد عجائب الدنيا).
· عودنا الهلال على ان يكسب الرهان كلما كان صعبا ..وان يكون حاضرا عندما يتأخر الجميع.
· يبقى رهانا وثقتنا في الهلال باقية في كل الاحوال.
· فقد لا تنقلوا لنا تلك الحالة التى هي في المريخ الى الهلال.
· كما ان اعلام الهلال عليه ان يتحرك في منقطته بعيدا عن المنطقة الفنية كما يفعل اعلام المريخ.
· لا نريد جمال الوالي اخر في الهلال يا الحاج عطا المنان.
· ولا نريد (كوارث) اعلام المريخ ان تكون في اعلام الهلال.
· ولجمهور الهلال دائما ان يكون سندا للهلال وداعما له ..ففي مثل هذه الحالات تكون الحاجة للجماهير فلا تتأخروا عن هلالكم.
· ملحوظة : اعلام المريخ مفروض ما يكتبوا برة سيكافا.
هوامش
· الكوتش محمد الطيب قال تأهل الهلال من مرحلة المجموعات سيكون من عجائب الدنيا.
· الزول دا مشارك في مسلسل عربي.
· عجائب شنو يا كوتش؟.
· انت راكب من وين؟.
· الكلام البتقولو في (الواتس آب) ما تقولو لينا في الجرايد.
· الغريب ان محمد الطيب لا وجود له في الساحة الرياضية غير ظهوره من حين لاخر بمثل هذه التصريحات.
· زولكم دا ما شال من مورينهو غير (التصريحات).
· لو شلت (صمتو) كان افضل ليك.
· الكرفتة ما بتصنع ليها مدرب.
· الاصابات التى تعرض له جمهور الهلال مسؤولية الولاية والاتحاد العام والمحلي بالخرطوم ومجلس ادارة نادي الهلال.
· ما تعملوا الموضوع كلو في (الكتاحة).
· انتوا يا عبدالرحمن الخضر قلتوا (المطر) ما بتقدروا عليها …الكتاحة برضو ما بتقدروا عليها.
· يعني الموية والتراب بتجهجهكم.
· ضمن الماصبين كانت اصابة ابن مدينة شندي عصام علي السنوسي الذي جاء من شندي يوم المباراة من اجل متابعة المباراة فكانت اصابته.
· واخرون لا ينقصون روعة وحبا للهلال.
· مجلس الهلال يفترض ان يشرف على تلك الحالات.
· بل يجب على حكومة الولاية تعويض اولئك المصابين.
· ونعود.
· ….
· عاجل : 33 مدرب وفي النهاية الحصاد (حبة خردل).
[/JUSTIFY]

وإن طال السفر – محمد عبد الماجد
صحيفة قوون