واحد زايد واحد الليلة في استاد الخرطوم بساوي سبعة

ولمن يجيبوا ليك (لحمة الضان) بتقول : (والله لحمة الضان دي عاوزة ليها رغيف سخن).

الغريب ان اللحمة الضان والرغيف السخن وقت يتلموا ..بتقوم بتفكر في حاجة مافي.

تقول اللحمة والرغيف الساخن دا عاوز ليه (شطة بي ليمون).

وقت تكون الشطة حاضرة بليمونها ..بتقول الشغلة دي عاوزة ليها موية باردة.

يجيبوا ليك الموية الباردة …تقول لو لقينا لينا شاي سادة.

يجيبوا ليك الشاي السادة.

تقول (الغدوة) دي عاوزة ليها (معارضة) كاربة ..ومعارضتنا دي (بوش) كتير عليها.

طبعا ما سألت الحكومة انا بتكلم عن (المعارضة).

ما في زول بقدر يقول حاجة.

لكن معارضتنا دي بقت جزء من الحكومة والحكومة جزء من المعارضة.

بقيت لمن تقيف في الشارع ما بتعرف المعارضة من الحكومة.

هسع غازي صلاح الدين دا في واحد بقدر يحدد لي موقفو بالظبط.

غازي دا زي (خليفة) لا بتعرفو لاعب مدافع ولا بتعرفو لاعب مهاجم.

بلف الميدان كلو.

حوامة ساكت.

قريبا من ذلك او بعيد ما في مشكلة كان بدخل علينا استاذ اللغة العربية في الفصل بطوله المعتاد ورأيه الصريح والجارح في الحكومة.

ولا بجامل.

تسألو من الساعة بهاجم ليك (الخارجية).

تسألو الليلة شنو؟.

بهاجم ليك تجمع تحالف المعارضة.

زول (مهاجم) بطبيعة الحال.

في ناس كدا (الهجوم) قاعد في طرف لسانهم (هجومهم) اخطر من هجوم الهلال.

كان الاستاذ يكتب التاريخ بخطه الجميل ثم يضع على التاريخ (خطين) ، لزوم هذا الامر مهم وضروري كان ينتفض بعدهما (نافخا) هواء ساخنا من جوفه وهو ينظر بعيدا عبر نافذة الشباك على (فناء) المدرسة.

اتذكر وقتها اننا كنا حديثين عهد بكلمة (فناء) ، وهي تقابلنا لاول مرة في حياتنا فنقابلها مقابلة المشوق المستهام.

لذلك كنا نستعملها استعمالا (عشوائيا) صباح مساء في كل جملة نركبها مفيدة كانت او غير مفيدة.

من الجمل المفيدة التى كنا نستعملها فيها ، ويستحسن مننا ذلك اننا كنا نقول : (ذهب الولد الي فناء الجامع ثم عاد وهو منشرحا).

اما استعمالنا لها في غير فايدة ومن غير جدوى فقد كنا نحشرها حشرا في كلامنا فنقول : (طلعت من فناء القميص الى فناء الجلباب) فنجلد بعدها جلدا (مبرحا) من قبل استاذ اللغة العربية الذي كان يمكن ان يسامحك اذا لعنت ابوه ..اما اذا اتيت بجملة مركبة غلط فشيل شيلتك معاه.

ذلك الزمن كان السلم التعليمي ابتدائي (6) سنوات ثانوي عام (3) سنوات ثانوي عالي (3) سنوات.

هسع الـ (6) سنوات حقت الابتدائي بتروح في (ضبط الطبق)…وتروح الـ (3) سنوات الثانوي العام في (الواتس آب) وتضيع سنوات الثانوي العالي في (مكتب الاستقبال) انتظارا لانتهاء اجتماع المدير…المجتمع صيفا شتاء.

وتقضي الجامعة من حدايق السلام الى الساحة الخضراء.

الناس ديل اختزلوا لينا (السلم التعليمي) في الاجراءات المتبعة في مؤسسات الحكومة وفي امشي وتعال بكرة.

استاذ اللغة العربية كان يأتي في راس السنة ويطلب منّا ان نكتب موضوع في الانشاء عن استقلال السودان.

كنا نفعل ذلك ونكتب عن استقلال السودان إلّا احمد ود عمران فقد كان عندما يطلب منّا ان نكتب عن استقلال السودان كان يكتب هو عن عمتو (ليلي بت السرة) . فقد كان اكثر صدقا وامانة واخلاص.

يخرجه الاستاذ بعد اسبوع من هذا الحدث عند توزيع الكراريس …ليجلده وهو يقول ليه يا ولاد انا موش قلت ليكم اكتبوا عن (استقلال السودان) نقول بصوت (طلابي) عتيق : نعم.

فيرد الاستاذ اخوكم أحمد ود عمران كتب عن عمتو ليلي بنت السرة.

ثم يسأله الاستاذ يا ولد انت عملت كدا ليه؟.

فيرد أحمد ود عمران اكذب يعني يا استاذ.

فيحرج الاستاذ ايما احراج…وكان استاذنا عندما يحرج يصبح مثل (صندوق البيبيسي) الفاضي.

هو وينو الاستقلال عشان يكتبو عنو؟.

هسع انا عاوز اعمل ليكم نفس الحكاية.

موضوع الانشاء مباراة الهلال وفيتا كلوب ..لكن ما عاوز اكتب ليكم عن المباراة.

ح اعمل فيها (حريف).

عادة في يوم المباراة يستحسن الواحد ان يكتب عن حاجة تانية.

يكتب عن (الخريف).

يكتب عن (الحلو مر).

يكتب عن اي شيء عدا المباراة.

مرة استاذ اللغة العربية كان ما عندو مزاج ..واضح من التاريخ الكتبو اعلى السبورة ، انه يفتقد للمزاج.

السلام عليكم ما قالها لينا.

الاستاذ دخل الفصل وقال اي واحد يطلع كراس الانشاء ويكتب عن اي شيء.

واحد من الطلبة الشفوت رفع ايدو وقال للاستاذ معليش لو ما لقيت (اي شيء) اكتب فيها اكتب عن شيء تاني.

الاستاذ عرفو ليك عاوز يلخبط..قال ليه شيء تاني يعني شنو؟.

الطالب قال ليه شيء تاني ..يعني اي حاجة غير الحاجات دي.

الاستاذ تاني قال ليه اي حاجة زي شنو يعني؟.

الطالب قال ليه يعني الواحد ممكن يكتب عن الموية القاطعة ليها اسبوع.

نهر النيل دا تقول بمر بي اسرائيل ما بمر بالخرطوم.

الاستاذ اضايق من كلام الطالب ..قال ليه اكتب بس ما تجيب سيرة (الموية) في كلامك دا.

الطالب كتب ليه (4) صفحات عن انقطاع الموية ..ما جاب فيها سيرة (الموية)..الموية اصلا قاطعة يجيب سيرتها ليه.

صاحبكم كان وقت يكون عاوز يجيب سيرة الموية بخط (نقط نقط).

وانا قريبا من ذلك اشعر اني يوم ح اكتب ليكم العمود دا (نقط نقط).

الفهم فهم والما فهم بي طريقتو.

ما عندنا ليكم اكتر من (النقط).

النقط ذاتها في الخريف قاعدة تجهجكم.

ناس المريخ ديل سافروا لي عطبرة ..ما جابوا ليهم اكتر من (نقطة).

انتوا قايلين (النقطة) دي حاجة بسيطة.

زمان وقت الاستاذ كان يقول لينا (نقطة) سطر جديد …كان الواحد فينا زي الوضع ليه حمل تقيل من كتفو.

نخت (النقطة) ونعاين للمروحة نشوفها شغالة وإلا لا؟.

الى الان ما عارفين علاقة (النقطة) بالمروحة شنو؟.

يوم المباراة طلعت بدري من البيت..لقيت ليك (مريخابي) طالع في رأس البيت.

عرفتو ليك.

المريخاب ديل انا بشمهم شم.

حافظهم حفظ.

قلت ليه يا زول انت بتعمل في شنو في رأس البيت والدنيا صباح كدا.

المريخابي قال لي تفتكر طالع في رأس البيت (حكم رأية) ما عاوز اضبط الطبق.

مريخابي مسيخ.

قلت ليه وبتضبط في الطبق ليه؟.

قال لي تفتكر بضبط في الطبق عشان اجيب لي (سلطة اسود)..بتضبط في الطبق عشان الكورة.

مريخابي مسيخ.

قلت ليه سيكافا انتهت ..طبق شنو البتضبط فيه.

قال لي عارفها.

قلت ليه طيب كورة شنو البتضبط ليها في (الطبق).

قال لي كورة الهلال.

دمي فار ..غضبت في الدنيا دي جنس غضب.

طلعت ليه فوق رأس البيت ..وجيت واقع بيه ..قلت ليه كورة الهلال ما بجيبوها بالطبق.

انت قايلها كسرة.

قايلها (حوض النيل).

عندك كرت بتاع كأس العالم ح تشوف كورة الهلال ..ما عندك امشي تم نومك ساكت.

كورة الهلال دي (مشفرة).

ما تتعبوا ساكت يا مريخاب.

الطبق دا حدو اكاديمية فكتوريا ..اكتر من كدا ..ما بجيب ليكم حاجة.

الغريبة واحد تاني كان بضبط في (الطبق).

يلفت فيه شمال ويمين.

في السخانة دي يحول في (الطبق).

حول ليك الطبق شمال جاب ليه (موسى الزومة).

انت موسى الزومة دا موش شطبوه.

حول الطبق يمين …جاب ليه (بلة جابر).

حول الطبق لي فوق جاب ليه (الطاهر سادومبا).

نزل الطبق لي تحت جاب ليه (ضفر).

زولكم غضب قال دا طبق شنو دا الكلو (باكات) دا.

صاحبكم ما قنع.

يلكلك في (الطبق).

فوق تحت ..شرق غرب ..جاب ليه (خليفة) جاري.

واحد من الناس التحت قال ليه : بس الطبق ظبط ..ربط على كدا.

صاحبكم ربط على (خليفة)…بقى وقت يكون بتابع في المباراة من اول مباراة زولكم برفع ايدو للغيار.

يطلع هو من البيت ..ويخلي خليفة قاعد.

قلت ليكم يوم المباراة الواحد لازم يعمل فيها حريف.

قعدتوا تغالطوا.

ملحوظة : الغلاط الكتير بعمل ضمور في الضوحال…دا لو عندكم ضوحال من اصلو مع غلاطكم الكتير دا.

هوامش

الليلة شجعوا ساكت واحد زايد واحد ان شاءالله في استاد الخرطوم اليوم بتساوي سبعة.

انتوا غالبين ..ما تشيلوا هم.

سيرجيو ممكن يجيب قون من الدقيقة عشرين.

شجعوه وساندوه.

الزول دا ما بقصر معاكم.

الهلال ما بعرف حاجة غير انو يكون غالب.

هو غالب غالب.

اصلو ما عندو خيار تاني.

خيار تاني نعمل بيه شنو؟.

يغيب بشه ..يغيب بكري ..يغيب مساوي ما مشكلة.

الجمهور حاضر.

والهلال غالب.

الطريق للنصر اليوم عن طريق واحد بس.

عن طريق (التشجيع).

سيرجيو نقاطو بشيلها.

دا زول محترف ..بظهر في المباريات الكبيرة.

انتوا امشوا على الاستاد وشجعوا هلالكم.

اليوم على مداخل استاد الهلال مجموعة من الشباب ينشدون الصلاح وهم يسألون اي مشجع ان يتبرع بـ (كيلو دقيق) فقط من اجل الاسر المحتاجة للدعم والمساندة في رمضان.

تعالوا الاستاد واي واحد شايل ليه كيلو دقيق معاه ..عشان الله ينصركم ..وفريقكم يوفق.

المجموعة نشدت جماهير الهلال وهى تنتظر منهم اليوم الدعم بـ (كيلو دقيق) من اي مشجع.

تموا جميلكم.

وشجعوا هلالكم.

الحبة ما بتجيكم.

اخبار سعيدة قريبة في التسجيلات.

انتظروا بس.

ما تضيقوا.

القادم خطير خطير.

….

عاجل : لكن السخانة دي ما سخانة اربعة اقوان اتنين كفاية.