محمد عبد الماجد
الكتابة عن (الصلصة) في عيد الانقاذ رقم (25)
“””””””””””””””””””””””””””””
خايف يجي زمن الواحد يمشي يصرف (الموية) من الصراف الآلي
“”””””””””””””””””””””””””””
جارك الليلة ح يلاقيك من الصباح – من قولة تيت يقوم يقول ليك : (والله رمضان خلاص دخل في العضم)
“”””””””””””””””””””””””””””””””””””””
تتخيلوا في السخانة دي قاعد أتابع في مسلسل عادل إمام (صاحب السعادة) مفتكر نفسي بتابع في (أغاني وأغاني)
“”””””””””””””””””””””””””
·الليلة يوم (الفلسفة).
·فلسفة شنط المدرسة.
·فلسفة ساكت العاوز يطلع من هنا يطلع…يمشي يقيف بره.
·ما اشوفو في (طابونة) السوق الكبير.
·علبة الصلصة في الشارع ليه دائماً بتكون في الشارع (مفجخة)؟.
·مطفقة يعني.
·الدكتور بشرى الفاضل في (حكاية البنت التى طارت عصافيرها) يقول : (رأيت رجلاً عبوساً، وطفلاً تغازل رجلاه علبة صلصة فارغة).
·ليه فارغة؟.
·وليه (مفجخة)؟.
·ليه بس عشان هي (صلصلة).
·دي انتوا ما تعتبروها نوع من الحقارة (العلبية).
·في العلب برضو في ظلم وخيار وفقوس.
·جوار علبة الصلصة بتكون هناك في علبة أناناس بي حالة جيدة ما قاعدة تجيها أي عوجة.
·اشمعنا علبة الصلصة.
·عشان علبة الصلصة ما عندها ضهر.
·احتمال.
·الاحتمالات في الشارع متل (لوحات الإعلان).
·يمكن عشان (علبة الأناناس) يمكن أن تكون في يوم من الأيام (كوز).
·كوز في (سبيل) مالكم؟.
·المشكلة شنو؟.
·علبة الأناناس ممكن يبقى (كوز) في يوم من الأيام.
·لكن علبة الصلصة ما ممكن تبقى (كوز).
·شفتوا الفلسفة دي كيف؟.
·فلسفة عميقة.
·فلسفة الحياة ما بتبعد عن (علبة الصلصة) دي.
·زمان وقت كنا (شفع)..قبل ما تكبر الحكاية في رأسنا كانوا وقت يرسلونا للدكان ويقولوا لينا جيبوا دقيق وشاي حب وعلبة صلصة وصابونة غسيل وكبريت وربع رطل زيت.
·كنا نجيب كل الحاجات دي وما ننسى شيء غير (علبة صلصة).
·ليه ونحن (شفع) ما بننسى إلّا (علبة الصلصة)؟.
·مفروض تكون هناك بحوث في الحتة دي.
·الحكاية دي مقالدانا من زمان ونحن شفع ، ما عندنا أي خلفية سياسية أو حتى فنية.
·ما بتفتكروا الحكاية دي فيها (اضطهاد) لعلبة الصلصة.
·تعتقدوا الموضوع دا كلو ناتج من (الصدفة).
·احتمال مرات الصدفة بتكون أخطر من الوقائع المرتب لها …والمنظمة.
·الدنمارك شاركت في بطولة الأمم الاوروبية سنة 1994 وهي مشاركة في تلك البطولة كـ (بديل)…استطاعت أن تفوز بالبطولة وبتعد منتخبات لها باع طويل في بطولة الأمم الاوربية.
·اليونان جاءت بعد سنوات طويلة وشاركت في بطولة الأمم الاوربية لتفوز بها عبر (الصدفة) أيضاً.
·يعني (الصدفة) ممكن تدخل في كورة القدم ويمكن تلخبط حسابات الناس وموازين القوة والضعف في الكورة.
·ممكن تلخبط تنظيرات جماعتنا البقولوا عليهم (محللين) فنيين.
·محلليين شنو؟..والله ما عندكم أي علاقة بـ (التحليل).
·ممكن نقول كلامكم دا ممكن يكون (تحلل).
·تحليل شنو البتعرفوا ليه انتوا؟.
·ديل مرة جابوهم يحللوا في مباراة فرنسا والبرازيل في كأس العالم.
·والله لو ما الكورة قدامك تقول الجماعة ديل بحللوا في مباراة التاج والعباسية.
·اصلو ما بتقول المباراة البحللوا فيها دي مباراة البرازيل وفرنسا في نهائي كأس العالم.
·واحد منهم شابكنا ليك طوال مدة التحليل بي جملة واحدة (اللعب الضاغط).
·اللعب الضاغط بتاع شنو يا زول؟.
·اللعب الضاغط دا اعملوا هنا في استاد الخرطوم.
·وهو نحن العملها فينا شنو غير (اللعب الضاغط).
·شابكننا السنة كلها ألعبوا ضاغط ـ ألعبوا ضاغط لمن جبتوا لينا (الضغط) من الضغط البتعملوا فيه دا.
·غايتو الواحد لو ما كان عندو (كرت) الجزيرة أو كرت بي ان كان عملتوا ليه تصلب في عصب العين.
·كان جبتوا لينا (أبو الشهيق) في عيونا.
·شفتوا ليكم زول بتشهق بي عيونو.
·جماعتنا ديل ممكن يعملوها لينا.
·مرة محلل كبير كدا قعد يحلل في مباراة تجمع بين ريال مدريد وبرشلونة.
·صاحبكم المباراة كلها بقول مفروض (ميسي) دا يراقبوه يكون معاه لاعب (مان تو مان) ..مسي دا مفروض ما يخلوه براهو.
·ميسي جاب ليه قون.
·زولكم المحلل قام انفعل فينا ..وقال لينا أنا ما قلت ليكم.
·يا أخوي ميسي دا بقفلوه.
·أنت قايلو (ماسورة).
·مفتكر الحكاية ساهلة.
·ميسي دا لو كاتب ليه شيك بدون رصيد …ما في زول بقدر يقفلو.
·لو كتل ليه زول ما بتقدرو تقفلو.
·قايلين الحكاية ساهلة.
·ميسي دا (120) بله جابر ما بقفلوه.
·موسى الزومة دا لو بقى تعدادو 7 مليون نسمة ما بقدر يقفل ميسي.
·بس فالحين لي (التقفيل).
·أي حاجة قفلوها.
·هسع عليكم الله الماسك موية الخرطوم دا منو؟.
·عاوز أعرف دي هيئة مياه ولاية الخرطوم ولا هيئة لا مياه ولاية الخرطوم.
·أو هيئة قطوعات مياه ولاية الخرطوم.
·بالله الخرطوم دي فيها كم (نيل) .. الناس عشطانة والموية قاطعة.
·محل ما تقبل تلقى ليك (نيل).
·والموية قاطعة.
·بقينا ننتظر ليك الموية لي انصاص الليل زي (كأس العالم).
·انتوا شفرتوا (الموية).
·ضميتوا فاتورة الموية لفاتورة الكهربة مع ذلك بقطعوا فيها.
·اعلموا ليكم (كرت) للموية.
·خايف يجي زمن الواحد يمشي يصرف (الموية) من الصراف الآلي.
·صعبتوا الحكاية عديل كدا.
·بقيتوا تشككونا في (النيل).
·انتوا النيل دا قلب (كرتون).
·الخرطوم فيها (نيلين).
·والناس عطشانة.
·حالتكم دي أخير منها (فلسفة) اليوم التالت في رمضان.
·فلسفة اليوم التالت كيف كمان؟.
·فلسفة اليوم التالت دي فلسفة براها.
·تطلع من الصباح يلاقيك جاركم (الجرسة) الجنو يوقفك عشان يقول : (ماشي وين من الصباح كدا ؟).
·جارك دا الليلة يلاقيك من قولة تيت يقوم يقول ليك : (والله رمضان خلاص دخل في العضم).
·يقعد يشكي ليك من الصيام ورمضان يا دوب ليه (3) أيام.
·عضم شنو البدخل فيه رمضان من اليوم الثالث؟.
·دا ما عضم دا.
·إلّا يكون العضم دا مكون من ثاني اكسيد البوش ..وكربون موية الفول.
·قال شنو؟.
·قال رمضان دخل في العضم.
·دا عضم ولّا بيت اجار البدخلو رمضان من تالت يوم.
·باقى ليكم (27) يوم.
·واحد قال لي رمضان (ثبت).
·قلت ليه : ايوا رمضان ثبت.
·قال لي إن رمضان ثبت نحن البثبتنا شنو؟..يا دوب ح يحصل لينا ارتعاش في المعدة.
·جرستكم (غريبة).
·تجرسوا متل جماهير المنتخب البطير.
·اركزوا شوية.
·جارك (الجرسة) من يشوفك يقول ليك : بالله شفت الليل اليوم دا طويل كيف؟.
·أي يوم يلاقيك فيه يقول ليك : (شفت اليوم دا طويل كيف؟).
·طويل كيف يعني؟.
·طالع ليه في (سقالة).
·يا جماعة طول اليوم أو قصرو بكون عن طريق برنامجك في اليوم.
·يعني لو عندك موضوع ..بتشوف اليوم قصيّر.
·لو ما عندك موضوع ..بتشوف اليوم طويل.
·الزول البنوم ويصحي بعد تلاتة ..ح يشوف اليوم قصيّر عشان صيامو كلو بكون (4) ساعات.
·قاعدين لي في التلفزيونات للصباح.
·الواحد يتسحر ويقفل التلفزيون وينوم ..ويقول ليك رمضان صعب.
·انتوا رمضان بتعرفوا ليه شنو؟.
·ديل رمضان عندهم مسلسلات وأغاني وأغاني وكأس العالم.
·وبعد دا كلو يقولوا ليك : (شفتوا السخانة دي كيف؟).
·الليل الواحد لو شرب (النيل الأزرق) كلو ما أظن يروى.
·عطش شديد.
·الواحد فيهم يقول ليك : (عطشان)…ويضرب ليك في (القراصة).
·وقت ساعة الفطور تجي ..ما بمشي على الموية.
·مركز مع (القراصة).
·الظريف الواحد يقول ليك عطشان….ولمن الأذان يأذن يقول ليك : (ما تشرب موية).
·أوعك تشرب موية.
·أنت ما قلت (عطشان).
·شابكنا عطشان عطشان عطشان…وقت يجي الفطور تمشي على (القراصة).
·في علاقة بين القراصة والمويات.
·الزول وقت يكون صايم ممكن يلخبط في الحاجات.
·تتخيلوا في السخانة دي قاعد اتابع في مسلسل عادل إمام (صاحب السعادة) مفتكر نفسي بتابع في (أغاني وأغاني).
·الزول بتحصل ليه (لخبطة).
·فتحت (أغاني وأغاني) إلى أن انتهى البرنامج مفتكر نفسي بشاهد في مسلسل غادة عبدالرازق (السيدة الأولى).
·ما عارف المشكلة وين؟.
·المشكلة فيني ولّا في (أغاني وأغاني)؟.
·سيد اللبن جانا الصباح ..قال عاوز (بستلة) اللبن بدون ما أشعر وديت ليه (كرت الجزيرة).
·مشيت أجيب لي (كهربة)..لقيت نفسي واقف قدام بتاع التلج.
·في علاقة بين الكهربة والتلج.
·اشتريت لي (لوح) تلج ومشيت البيت.
·….
·ملحوظة : الزول بتلخبط.
هوامش
·اليوم قفل باب الترشح في انتخابات الهلال.
·يمكن ما يترشح زول.
·يمكن الهلال يكون بدون رئيس.
·ننتظر ونشوف البحصل شنو في الترشحات اليوم.
·نيجيريا خرجت أمام فرنسا لأنها لعبت بالعقلية الأفريقية.
·عندنا مشاكل في خط (18).
·ما بنعرف نتعامل هجوماً في خط (18).
·وما بنعرف نتعامل دفاعاً في خط (18).
·كل المنتخبات الأفريقية التى خرجت من البطولة خرجت بسبب الأخطاء الشنيعة.
·أخطاء مكررة.
·بنعيد في (الخروج).
·المنتخب النيجيري كان مؤهلاً للتقدم في البطولة.
·وكذلك منتخب ساحل العاج والمنتخب الغاني.
·ربما المنتخب الأضعف بين المنتخبات الأفريقية هو المنتخب الكاميروني.
·الزمالك كالعادة خسر أمام الأهلي.
·بعد كل اضافات الزمالك وتسجيلاته خسر الزمالك أمام الأهلي.
·وهذا يعني أن الزمالك لن يكون منافساً خطيرًا على الهلال في البطولة الأفريقية.
·الزمالك يعاني من ضعف مركب.
·الأهلي الخرطوم اليوم ممكن أن يشكل خطر على الهلال.
·احذروا مفاجآت الأهلي الخرطوم.
·….
·عاجل : محمد عبدالرحمن الأيامات دي شغال بالدستة ونصها.
[/JUSTIFY]
وإن طال السفر – محمد عبد الماجد
صحيفة قوون
