محمد عبد الماجد
النخلة ما بتفكر تفاجئكم بـ (نبق) بدل (البلح)
“”””””””””””””””””””””””””””
الزول وقت يكون صايم اول ما يدخل البيت بقول ليهم : (عملتوا سلطة الروب)
“”””””””””””””””””””
نخشي فقط ان تصرف الانتخابات وصراعها الهلال من مبارياته الافريقية
“”””””””””””””””””””””””
الارباب والكاردينال صراع الملحن والشاعر ..والاتنين بتموها موية
“””””””””””””””””””””””
عندنا نخلة (دغلة) في البيت ..زي دغالتها انا اصلو ما شفت.
النخلة النوع البتكون ماشي منها بعيد برضو تلم فيك تشرط ليك (القميص).
فيها (شوك) عجيب.
خاصة اذا كان قميصك جديد يمين تلحقك وان مشيت بي الشارع التاني.
في (دغالة) اكتر من كدا.
مرات تكون عندك جلابية لابسها اول مرة يلم فيك (مسمار) يشرطها ليك بدون اي داعي.
قدر بس.
ولا في اسباب منطقية.
تفتكروا من حيث المبدأ وسلطة الروب !! ..امريكا ضالعة في الموضوع دا.
اصلو ديل اي (شرط) بحصل بقولوا ليك الحكاية دي وراها امريكا.
تقول امريكا دي قاعدة في خشم الباب ومبطلة شغلها وحارسنا.
لمن جابوا لينا (عقدة) من امريكا.
بقى عندنا مركب نقص عديل كدا من الولايات المتحدة.
الواحد بقى يمشي للحلاق وقت الحلاق يسرح ويجرحك في اضانك بتقوم تلعن امريكا.
انا فوق قلت عرضا (سلطة الروب)…سلطة الروب الدخلها هنا شنو؟.
ما في اي داعي للكلام دا.
الزول وقت يكون صايم اول ما يدخل البيت بقول ليهم : (عملتوا سلطة الروب).
انا ما عارف الفلسفة في الحتة دي وين؟.
ليه الزول بسأل من غير ما يشعر عن (سلطة الروب)؟.
يمكن يكون عاوز يطمئن على الموقف.
عشان (جاهزية) سلطة الروب دلالة على ان الفطور مكرب.
ومن الفلسفة دي طلعت فلسفة تانية.
الزول وقت يكون معزوم فطور في حتة بقوم يقول للزول العازمو : (اسمع انا اهم حاجة عندي سلطة الروب).
المعني ظبط الفطور.
بعدين وقت يجيبوا ليه الفطور سلطة الروب ولا بمشي عليها (كلام ساكت).
نحن الحاجات دي ناقشنها عارفنها حافظنها حفظ.
ما تقعدوا تغالطوا ساكت.
نرجع للنخلة ..(فاكريني ح انسى ليكم الموضوع).
عشان بنسى!!.
انتوا معاكم (معلم).
بمناسبة المعلم دا مرة جبنا لينا فني كهربة ..عشان يركب لينا (لمبة) في الحوش.
الزول دا عذبنا جنس عذاب.
تقول عاوز يركب ليه (كشافات) لاستاد المريخ.
ينزل ويطلع فينا زي كأنو عاوز يوصل (اللمبة) دي مباشرة من سد مروي.
قلنا ليه يا معلم الموضوع دا ما صعب كدا.
الشيء دا ما عاوز ليه (صلعة) ما تقعد تنظر فينا ساكت.
صاحبكم كل مرة يطلب مننا حاجة.
اول حاجة قال لينا السلك دا ضاربه الشمس ..لازم نغير السلك.
غيرناهو.
قال لينا لازم نغير (مقعد) اللمبة ..عشان المقعد منتهي.
غيرنا المقعد.
قال ما واصلة كهربة.
قلنا ليه طيب ما توصلها نحن جايبنك هنا عشان تنزل انتخابات الهلال…وصل الكهربة يا معلم.
نزل من فوق ودخل على الغرفة ..قال المشكلة دي من (المروحة).
قعد يفك في المروحة.
اللمبة ما اشتغلت.
قال لينا عندكم (تلاجة).
قلنا ليه علاقة التلاجة باللمبة شنو؟.
قال لينا المشكلة تكون من (التلاجة).
في رمضان الحاجات بتداخل.
مشى على التلاجة فكاها ليك درج درج.
اللمبة ما اشتغلت.
قال لينا وينو (المكيف)؟.
قلنا ليه كمان (المكيف) عاوز بيه شنو؟.
اللمبة دي ما محتاجة للموضوع دا كلو.
قال لينا المشكلة من (المكيف).
المكيف كان شغال في امان الله مشى فرتكو لينا خلاهو لينا متل الاجازة البدون مرتب.
لو قالوا ليك دا كان (مكيف) ما بتصدق.
المكيف بقى ما عندو اي فرق من صينية الغداء.
اللمبة ما اشتغلت.
المعلم عاين لينا كدا من فوق لي تحت ..وقال لينا : علاقتكم كيف مع امريكا؟.
قلنا ليه علاقتنا عادية ..نحن اسرة ..ما دولة …العلاقة مع امريكا ما عندها علاقة باللمبة دي.
المعلم قال لينا انا شاكي في (امريكا).
قلنا ليه يا زول امريكا شنو؟..الحكاية دي (لمبة) ساكت …مع عاوزة ليها (دبلوماسية) او برتكول.
بعدين اذا كان الموضوع دا جاب لينا (امريكا) انزل عليك الله نحن ما عاوزين نصلح (اللمبة) دي.
خلينا قاعدين في (ضلمتنا) دي اصلها (مضلمة) طبيعي.
قال امريكا قال.
نرجع للنخلة احسن.
بلا (لمبة) بلا لمة معاكم.
يا زول لمبة شنو؟.
انا جبت سيرة (لمبة).
خليت (اللمبة).
نكرتها (حطب).
نشوف (النخلة).
النخلة (الدغلة).
موش زمان ايليا ابوماضي كان عندو (النخلة الحمقاء).
(من ليس يسخو بما تسخو الحياة به فانه جاهل بالحرص ينتحر).
نحن هنا عندنا نخلة (دغلة).
الدغالة كاتلاها.
نخلتنا الدغلة دي تكون شايلة (بلح) في امان الله من يجي رمضان النخلة بتقلب تشيل (نبق).
تقطع من (البلح).
تنكر ليك (البلح) حطب.
دا نوع من دغالة البشر النخلة عارفة الناس بحتاجو في رمضان للبلح بتقوم من (غتاتها) تشيل (نبق).
نحن (النبق) نعمل بيه شنو في رمضان؟.
النخلة من دغالتها وقت نكون قاعدين في ضلها بتمسك عليها (الضل) وتنكمش ليك متل الواو.
في ناس وقت تحتاج ليهم بعملوا ليك نفس الحركة دي علما ان النخل معروف شجر خير وبركة وسماح.
عشان ما تقولونا كلام ما قلناه.
عندنا زمان (جدادة) كانت مبالغة.
جدادة بتبيض كانت في اليوم (4) بيضات.
ناس المحلية سمعوا بالموضوع دا …اتكركروا وجابوا اوراقهم وقالوا عاوزين جباية بيض.
قلنا ليهم جباية بيض دي نحن عمرنا ما سمعنا بيها نحن عندنا (جدادة) واحدة ما عندنا مزرعة دواجن عشان تجيبوا ليكم (7) موظفين وتقعدوا تحسبوها لينا بالبيضة.
هسع عليكم الله ما بتخجلوا (7) موظفين جايين عشان جدادة واحدة.
والله الجدادة تسمع بي حركاتكم دي (بيضة) تاني ما تبيضها.
كاكاي ساكت ما تكاكي.
خلاص قفلتوا اي حاجة عاوزين تقبلوا على (الجداد).
ناس المحلية ما اشتغلوا بي كلامنا.
ولا عبرونا.
طلعوا دفاترهم وايصالاتهم ..وعينوا ليهم (موظف) لمتابعة (الجدادة) دي.
الموظف حرس (الجدادة) بي نضاراتو الكبير ديل عاملات كدا زي العرضات الما فيها حارس.
نحن وقت لقينا ليك ناس المحلية عاوزين يعيشوا على (جدادتنا) دي ..زهجنا من الموضوع.
اصلا نحن بنكره الحقارة قلنا (نضبح) الجدادة دي ونرتاح من دوشة المحلية.
معقولة بس يقعدوا يشاركونا في (بيض) الجدادة ..البيض بتاع الجدادة بقينا ما بنشوف منو اي حاجة بس نوقع على (الطبق) ويودوا (البيض) على المحلية.
جدادتكم وإلا جدادتنا يا ناس المحلية.
بقيتوا تشاركوا المواطن في جدادو.
هسع امريكا لو سمعت بي الكلام دا ..ما بترضى منكم.
ما بتقبل التعدي على (الجدادة).
الجداد دا عندو (حقوق) وعندو (منظات).
قايلين الموضوع (سايب) ساكت.
الحاجات دي فيها نظام.
معقولة (الجدادة) في البلد دي ينتظروها ناس المحلية وناس الجبايات وناس لجنة تطوير المدينة وناس اللجنة العليا ..ولجنة انشاء الكبري …ودعم وتطوير المستشفى.
اصلها دي جدادة وإلّا هيئة الامم المتحدة.
اي زول عاوز نصيبو.
عشان كدا البلد دي احسن حاجة فيها ما تعمل ليك فيها اي مشروع.
بس تقعد كدا تنظر في اي حاجة.
تعمل ليك اي حاجة ..بكرة يعملوا فيها اصحابه.
يستلموا المشروع ..وانت تقعد (فراجة).
مرة قلنا نعمل لينا حفلة في الحلة نروح بيها على روحنا.
قالوا لينا إلّا تجيبوا (تصديق).
قلنا ليهم نحن عاوزين (نغني) ساكت ما عاوزين نعمل لينا (ندوة).
نجيب لينا تصديق عشان (نفرح).
الزول لو عاوز يعمل ليه (حنة) في البيت ويجيب ليه فنان إلّا يجيب ليه (تصديق).
يعني ما (نتحنن).
لو في طلاب اتخرجوا من الجامعة وعاوزين يتخرجوا بقولوا ليهم إلا تجيبوا (تصديق).
ما في حفل تخرج بدون (تصديق).
انتوا مخرجنهم وين؟.
يتخرجوا بي جاي ..يقعدوا لي في (الضللة) بي جاي ما في اي شغل.
مع ذلك لو عاوزين يستلموا (شهاداتهم) في احتفال لا بد من انهم يدفعوا رسوم حفل التخرج.
شفتوا الناس ديل بصعبوا (الفرح) كيف؟.
ما في اي زول يفرح.
خليكم صانين كدا.
تاني الواحد لو عاوز (يتنفس) بقولوا ليه جيب لينا تصديق من وزارة الصحة الولائية.
الشهيق إلا تجيب التصديق من الوزارة الاتحادية.
ملحوظة : يعني ما نتنفس.
هوامش
تبقى الانتخابات وسيلة حضارية في التنافس.
نتمني ان تخرج انتخابات الهلال بصورة جميلة ..وان يأتي للهلال من ينفعه ويكون خيره اكبر.
اكيد صراع الارباب والكاردينال سوف يكون قويا من اجل الفوز بقيادة الهلال في الفترة القادمة.
الطعون قد تحسم امر الانتخابات قبل الاقتراع.
المهم ان التنافس يعني ان الهلال مرغوب والصراع عليه يثبت الرغبة الكبيرة عند المتنافسين لقيادة الهلال.
الارباب والكاردينال صراع الملحن والشاعر ..والاتنين بتموها موية.
المهم من سوف يؤدي (الاغنية) القادمة.
نخشي فقط ان تصرف الانتخابات وصراعها الهلال من مبارياته الافريقية.
مجلس الحاج عطا المنان عليه ان يبعد الفريق عن الانتخابات وصراعاتها.
خاصة ان الصراع والتنافس في الانتخابات في النطاق الاعلامي اصبح قويا.
ومن دون شك هذه التأجيج الاعلامي سوف يؤثر على استقرار الهلال.
البجي يجي.
صناديق الاقتراع هى الاقدر على ان تحدد من يحكم الهلال.
مثلما صعدت البرزايل بصعوبة الى دور التمانية صعدت الارجنتين بصعوبة ايضا.
وكذلك كان حال المانيا امام الجزائر.
الثابت ان كأس العالم هذه المرة ممتع وجميل رغم خروج المنتخبات الكبير.
ربما هذا هو ما جعل البطولة جميلة ورائعة.
المنتخبات الكبيرة عندها تحفظات وانكماشات اكبر.
المنتخبات الصغيرة ..جرأتها اكبر وحماسها اعلي وطموحها اعظم لذلك كورتها بتكون جميلة.
الاهلي الخرطوم ادخلنا في (تجربة).
نحن فترنا من التجارب.
طيب في الكنغو نعمل شنو؟.
الحدلله اتأهلنا.
جماعتنا ديل ما بطيروا.
اصلهم اي حاجة شاركوا فيها طاروا.
هسع في مباديء (طيران) كدا.
الهلال محتاج لتجارب قوية قبل مبارياته الافريقية.
….
عاجل : قاعدين منتظرين مباراة الهلال زي (السحور).
[/JUSTIFY]
وإن طال السفر – محمد عبد الماجد
صحيفة قوون
