محمد عبد الماجد
حكاية عمي زعاتف
“”””””””””””””””””””””””””””””
ختوا ليكم علامة تعجب في رأسكم انا فتران ما عاوز اكتبها ليكم في السطر
“”””””””””””””””””””””
لم يمجد وطن ويغنى له كما مجد السودان وكما غني له اهله
“”””””””””””””””””””””””””””””
تجيب ليه (سمك)..بقوم يقول ليك الليلة (العدس) دا مالو طاعم كدا؟
“””””””””””””””””””””
· استعير (نبيل الحلفاوي) في هذه الاسطر ليته يأتي في الكلمات التالية ببزة عسكرية.
· نجح نبيل الحلفاوي في تجسيد دور ضابط المخابرات (الشهم) او دور ابن البلد (الجدع).
· فيه حتة شيخ خفر مبالغة.
· احتاج لنبيل الحلفاوي هنا ليحدثنا عن انتخابات الهلال بلغة (مخبارات) مصرية.
· ختوا ليكم علامة تعجب في رأسكم انا فتران ما عاوز اكتبها ليكم في السطر.
· (المصريون) في الشاشة في ملفات مخابراتهم قادرون على ان يظهروا لنا كـ (الابطال).
· وقادرون ان يقنعونا انهم الافضل على الاطلاق في (المخابرات)..وان حبهم لوطنهم لا يعادله شيء.
· حتي اننا انتقل لنا ذلك الشعور واصبحنا نضرب بهم المثل في حبهم للوطن.
· تمثيل يا بديع.
· رغم ان الواقع يقول ان السودانيين اكثر حبا لوطنهم من المصريين.
· خامننا ساكت.
· وان وقائع التاريخ والكثير من المواقف تؤكد ان ابناء هذا الوطن يحبون وطنهم حد الموت.
· وانهم قدموا الغالي والنفيس من اجل ان يبقى وطنهم عالي وعظيم.
· يجب ان ننفك من الهيمنة التلفزيونية والسينمائية التى فرضتها علينا الدراما المصرية فصدقناها.
· واصبحنا نضرب بهم المثل في حبهم لمصر وهم ادني منّا في حبنا للسودان.
· يقيني ان اهل السودان لا يحتاجون الى دراما وهم في العادة لا يجيدون الحديث في الحب ..وان كان حبهم هذا للوطن.
· غير اني اعلم تماما انه لم يمجد وطن ويغنى له كما مجد السودان وكما غني له اهله.
· الاغنية الوطنية في السودان لم تترك مجالا لم تتغزل فيه بالوطن حتى ان وطننا احتشد بحالة من الزهو والفخر لم تتوفر لوطن آخر في العالم.
· ليس هناك ولعة فراق او معاناة غربة قدمت في العالم كله مثلما قدمها لنا صلاح احمد ابراهيم في (الطير المهاجر) التى تغني بها العملاق محمد وردي فكانت حالة من حالات (الولع) المدهش بالوطن.
· صلاح احمد ابراهيم نجح في ان يقدم لنا اغنية وطنية في ثوب عاطفي من الفصيل الاول للرومانسية والحب.
· لم يلتقط شاعر في العالم (ولعة) الطير غير صلاح احمد ابراهيم الذي عكس معاناة الابتعاد عن الوطن وحرقته في الطير المهاجر.
· قريبا من ذلك غني عثمان حسين من كلمات حسين بازرعة (كل طائر مرتحل عبر البحر حملتو اشواقي الدفيقة).
· هذا الحب للوطن بهذه الدرجة لا يوجد إلا في الاغنية السودانية ..وهو في العاطفة والوجدان السوداني بصورة واضحة وثابتة.
· الجميل ان الغناء للوطن والافتخار به في الاغنية السودانية يكون دائما عن طريق الاحتشاد بالخلق الجميلة والصفات النبيلة.
· الغناء للسودان يكون دائما هو غنا للشجاعة ..والنبل والكرم والاخلاق النبيلة وهذا امر تقدمنا به على العالمين وكان لنا فيه السبق والتفرد.
· والتميز اظنه جاء من هنا.
· في اغنية عبدالعزيز محمد داؤود التى كتبها محمد علي ابوقطاطي (الحارة بنخوضها)…انفراد تام بمكرام الاخلاق وبالانسان السوداني وصفاته النادرة.
· كفي ان المكارم نفسها تعترف بنا (عارفنا المكارم نحن بنقودها).
· الاغنية السودانية قدمت ايضا الشخصية السودانية بواقعية جميلة ، فشل المصريون حتى في ان يقدموها خيالا في التلفزيون او حتي السينما.
· البطل عبدالقادر ود حبوبة في حياته ومماته صورة نادرة للجسارة والبطولة والشجاعة.
· وكذلك كان عثمان دقنة وعمارة دنقس والمك نمر والماظ وعلي عبداللطيف وكل الشخصيات العظيمة التى نفتخر بها ونتفق.
· المرأة السودانية ايضا كانت حالة من حالات الفخر الجميل للشخصية السودانية.
· مهيرة بنت عبود …نموذج آخر للمرأة السودانية التى مازالت تقدم في الدروس والعبر.
· اعود للاغنية السودانية واقول ليس هناك حالة افتخار رصدت قدر حالة الافتخار التى قدمتها الاغنية في (انا سوداني انا) الاغنية التى قدمها حسن خليفة العطبراوي.
· ولا ننسى في ذلك اغنية السر أحمد قدور التى تغني بها ابراهيم الكاشف (انا افريقي انا سوداني).
· وهنالك اغنية اسماعيل حسن (تخيل كيف يكون الحال لو ما كنت سوداني واهل الحارة ما اهلي).
· لو احضرنا كل الاغنيات الوطنية في العالم لم نجد اغنية احتفت بوطنها كما احتفت الاغنية الوطنية بالسودان.
· لذلك نحن في كل الاحتفالات الرسمية وكل المهرجانات والخطابات السودانية نجد الاغنية الوطنية حاضرة لأنها الوحيدة التى انصفت السودان وقدمته كما نحب.
· لا اريد ان اسرف في الحديث عن الاغنية السودانية وهي محور ثانوي عبرت فيه من غير تفصيل.
· فقد اردت قبل استعارة (نبيل الحلفاوي) ..ان اتوقف عرضا في الاغنية السودانية في سياق الحديث عن (عمي زعاتف).
· عمي زعاتف دا شنو كمان؟.
· نرجع ونقول ان انتخابات الهلال الجارية حراكها الان يحتاج الي شيخ خفر في هيئة (نبيل الحلفاوي).
· ولكم من بعد ان تحركوه وترسموا له الدور كما تحبون.
· ليت (نبيل الحلفاوي) يقفز لنا في بحور هذه الكلمات ويكون حاضرا في الاسطر السابقة.
· وباقى الكلام ..خلوه ..بنتموا ليكم في مناسبة قادمة.
· دا لو بقى في مناسبة في الاساس.
· ندخل علي (عمي زعاتف).
· عمي زعاتف زول صعب ..ما بفتح بالدو.
· لو كتلوه ما بفتح بالدو.
· زول (غتيت).
· بكون قافل من اول جرة.
· ولابد فوق.
· عمي زعاتف في رمضان بتحصل ليه (اشكاليات) كتيرة بتداخل عليه الحروف.
· ما الحروف براها الحاجات كلها بتداخل عليه.
· يعني (زعاتف) عادي جدا يشوف ليك (الكاف) (عين).
· يشوف السبعة (اربعة).
· تجيب ليه (سمك)..بقوم يقول ليك الليلة (العدس) دا مالو طاعم كدا؟.
· يضيّع ليك (سمكك) ساكت.
· لكن دا كلو ما مشكلة.
· مشكلة عمي (زعاتف) كانت بتتمثل في الطلوع بالفطور.
· بشيل صينيتو ويطلع يفطر برة في الشارع.
· عمي زعاتف كل يوم بعد الفطور عامل شكلة مع زوجتو.
· موضوع الشكلة موضوع بسيط وما بستاهل.
· عمي زعاتف كان وقت يشيل الصينية ويطلع بالفطور الشافع بلحقو ليك في الباب وبقول ليه : (امي قالت ليك اوعي تنسى ليك ملعقة).
· يفطر ويجي راجع شايل الصينية تلاقيه ليك زوجتو في الباب اول حاجة بتعملها بتقعد تعد ليك (الملاعق)..وتقول ليه : (في معلقة ناقصة).
· تزرزرو ليك جنس زرزرة في (الملعقة) الناقصة دي.
· بكرة عمي زعاتف يكون عامل حاسبو شديد.
· الفطور كلو هو قاعد حارس (الملاعق).
· يرجع البيت والمعالق تامة زوجتو بتقوم ليك فيه تاني وتقول ليه : (دي ما معلقتنا) في معلقة اتبدلت في الملاعق دي.
· انا معلقتي جديدة.
· عمي زعاتف يقول ليها خلاص عليك الله تاني ما تختي لي (ملاعق) في الصينية ..بنأكل بي ايدينا.
· وناس عثمان ذاتهم بجيبوا ليهم ملاعق ..عشان الملاعق ما تتلخبط لينا تاني ما بشيل ملاعق.
· بكرة تاني تحصل مشكلة بين عمي زعاتف وزوجتو.
· عمي زعاتف اول ما يرجع شايل الصينية زوجتو تقعد تراجع في العدة.
· وفجأة تقوم ليك فيه : (وينها غطاية جك الليمون) يعني انت لازم تنسي ليك حاجة.
· زعاتف يمشي يفتش صواني الجيران صينية صينية بحثا عن (الغطاية).
· والله قادر بس يرجع ليه بي قريب غطا.
· زوجتو صعبة ممكن تجامل في اي حاجة إلا العدة.
· زعاتف يصل لي حل ويقول لي زوجتو خلاص عليك الله تاني (الجك) اديني ليه بدون غطا.
· الغطا لزومو شنو …وعثمان ود الترمسة عندو شفع …الجك قبل ما يقعد في الواطة بنسفوا ليك (الحالة) الفيه.
· انتوا تعالوا هنا لزومو شنو اي واحد شايل ليه صينية و(17) شافع.
· الشفع ديل يا جماعة بلخبطوا ليكم الصواني ساكت.
· بعدين الشفع ديل بالنهار ما قاعدين يقصروا ..عشان تجيبوهم معاكم في الفطور.
· عمي زعاتف يطلع في اليوم التالي بدون اي (غطا).
· زوجتو تكون منتظرة في الباب اول ما يرجع من الفطور تقعد تحسب في الحاجات : (وينو صحن سلطة الروب؟).
· تهرش ليك الراجل جنس هرشة في موضوع الصحن دا.
· زعاتف من الهرشة يبقى زي (السمسمة).
· كل يوم هو في الحالة دي.
· آخر حاجة زعاتف وصل الى حل ..وقال لي زوجتو اسمعي عليك الله تاني الفطور دا اعملي لي في (سندوتشات).
· زعاتف بقى يطلع ليك مع الاذان بالسندوتشات تقول ماشي ليه (مدرسة).
· المرا هرشتو يعمل شنو يعني؟.
· قدروا ظروفو يا جماعة النسوان ديل ممكن يجاملن في اي حاجة إلّا الراجل ينسي ليه (غطاية) برة في برش الفطور.
· ملحوظة : هسع لاقتكم اغنية وطنية في الكلام بتاع (زعاتف) دا ..لو ما ساي.
هوامش
· في انتخابات الهلال الكثير من الاسماء الجميلة والمشرفة …والمبشرة.
· عصام كرار من الاسماء القوية في مجموعة الكاردينال.
· وفي مجموعة الكاردينال ايضا هشام محمد أحمد.
· كذلك هناك حاتم عثمان المصرفي والهلالي الغيور الذي ترشح (مستقلا).
· نتمنى لهم التوفيق وان تنصف الجمعية العمومية للهلال فريقها وتنصر الذين يمتلكون القدرة والشخصية لنصرة الهلال ودعمه.
· جميل ان يوم امس كان خالي من الطعون.
· واجمل من ذلك ان عصام كرار باخلاق الرجال قال انهم لن يتقدمون بطعن في احد.
· وان كان الطعن حق شرعي وقانوني.
· ولكن فقط نخشي من الجرجرة.
· لو اتفتح باب الطعون تاني ما بتقفل.
· ح نفضل نطعن كدا للسنة القادمة.
· جمعية الهلال قادرة على ان تقول كلمتها.
· ومهما كانت مساوي الجمعية تبقى افضل من التعيين.
· ….
· عاجل : سيرجيو دا لو فتح (قطر) كلو بلة جابر ما بثبتو.
[/JUSTIFY]
وإن طال السفر – محمد عبد الماجد
صحيفة قوون
