محمد عبد الماجد
شكسبير كان مريخيا بعد العاشرة مساء
“””””””””””””””””””””””
كلاب الزمن دا عليها جنس (حنكشة)…الكلب لو فلعتو بي حجر ما يقوم..تقول جايبنو يصور مستندات
“”””””””””””””””””””””””””””””
معقولة اقعد اشجع في ناس موسى الزومة يقطع الكورة ويمر من الاول ويمر من التاني ويكمل اللاين ويرفع رأسو ويعكسها في (الكشافات)
“””””””””””””””””””””””””””””””””
ناس الاهلي الخرطوم فضل ليهم (الجنيد) ويكتبوا على النادي حقهم (نادي المريخ للتربية البدنية)
“”””””””””””””””””””””””
· يتخيل لي كدا لو الواحد عاوز يشجع المريخ إلّا يشجعو بعد العاشرة مساء…(بعد ما تضلم).
· الجابرك شنو على (التلتلة) دي؟.
· ولابد تكون كمان لابس ليك سماعات في (اضنينك) عشان ما تشعر بي انك بتشجع في المريخ…(عشان تطلع من الحرج).
· اطلع من (الحرج) اقعد وين في (السخانة) دي.
· ولا بد كمان من ان تكون لابس ليك (جونتيات).
· وشايل ليك (جبادة) عشان الناس ديل كورتهم كلها في (الكشافات).
· المريخ دا بالنهار لا بتشجع ولا حاجة.
· ولا تجاملوا في الحاجات دي ..بتوجعوا (سنونكم) ساكت.
· طبعا ما في علاقة بين السنون والمجاملة إلّا اذا كانت المجاملة دي في الزمن دا بقت (قنقر).
· طبعا الجماعة ديل غيروا اي حاجة.
· قلبوا الاشياء كلها.
· بقينا شباك الفصل من شباك الصراف ما بتفرزو.
· عطفا على ذلك ومن هذا المنطلق المريخ دا ما بتشجع إلّا ليلا.
· زي ناس (السواري) زمان..وقت الحرامية زمان كانوا بجوا بعد واحدة صباحا..يقوم ناس الحلة كل ما يشوفوا ليهم بوليس سواري يقوموا يصفقوا ليه.
· هسع الحرامية بقوا يجوا ليك من الصباح مع دوام الشغل..وبجوا لابسين كويس وبتكلموا كويس ..وعندهم (كرفتات) كمان ومكانة اجتماعية سامية.
· حرامية الزمن دا (الثقافة) العندهم عند الروس ما في.
· الغريبة كمان (الحرامي) بتلقاه ظريف ..لو قعد حكى ليك حاجة تموت من الضحك.
· حرامية الزمن دا راكبين افخم العربيات وشايلين اغلي اجهزة موبايلات وبتكلموا في السياسة زي الطلقة.
· حليل زمان وقت (الحرامي) كان بتلب بالحطية ..وكلاب الحلة كلها (تنبح) فيه ..ولمن ناس الحلة يقبضوه ..البلد كلها تضربو ..وهو يا حسرة سارق ليه (جدادة).
· هسع الكلاب ذاتها خلت (النبيح).
· الكلب تلقاه نايم قدام البيت ..لو سرقت ليك (تلاجة) ما يقوم.
· انا ما عارف الحصل على الكلاب الزمن دا شنو؟.
· كلاب الزمن دا عليها جنس (حنكشة)…الكلب لو فلعتو بي حجر ما يقوم..تقول جايبنو يصور مستندات.
· وعطفا على الكلام دا …المريخ دا ما بتشجع بالنهار.
· ليلا فقط…
· المريخ دا بالظبط كدا زي ناس (السواري ) تشجعو ليلا وتطلع الصباح تعتذر لناس الحلة.
· عندنا زول في الحلة متل (بستلة) الفول كلامو كتير.
· ما بسكت.
· لو سكت تشيلو وتجري على المستشفى بكون جاتو حاجة.
· في حاجة غلط.
· الزول دا كان الساعة 12 ليلا برجع البيت وهو (بترتح)..ما شايل نفسو.
· زي (خليل) في مسرحية (خطوبة سهير).
· انتوا إلا يوضحوا ليكم الحكاية كدا.
· إلا يقربوها ليكم شديد.
· زولكم كان بدخل ليك في (الحيطة) زي الما حصل حاجة.
· يكون عينو في الباب تلقاه بفتح في الشباك بالمفتاح.
· قلت ليكم (بترتح) براكم ما فهمتوها.
· يعيدوا ليكم الكلام يعني.
· يقوم ويقع…ويترتح.
· وكل ما يقوم ..كان بقول ليك : (المريخ بطل الكأسات المحمولة جوا).
· المريخ الزعيم.
· بقول ليكم زول (بترتح) يا جماعة خلوه يقول اي شيء…زول ما واعي.
· يقول البقولو.
· زول فاقد الوعي.
· ونحن نشيل ونرفع..لمن نوصلو البيت ..نفتح ليه الباب نشوف اقرب سرير ونرميه فوقو ونطلع على كدا..
· صاحبكم الصباح بشعر بالحرج.
· بتعقد في الدنيا دي جنس تعقيد.
· ببقى ما عارف يعمل شنو؟.
· زولكم وقت يشعر بالحرج دا كلو بقول احسن يطلع يعتذر للناس الفي الحلة.
· يقوم يطلع عشان يعتذر للناس.
· اول زول بلاقيه في الحلة بقعد (يبوس) ليه في رأسو ..ويقول ليه امسحها لي في رأسي…انا امس قلت كلام فارغ كتير ..معليش انت عارفني انا كنت ما واعي.
· الزول بقوم يقول ليه يا عمنا انت كل يوم بتسمعنا الكلام الفارغ دا وتجي الصباح تعتذر …والمساء تاني ترجع لينا (مترتح) كدا.
· وتسمعنا تاني كلامك الفارغ دا.
· ويلحقك التاي ود التاية بي (فردة) نعالك البتكون رميتها فوق قوز الرملة القبال دكان الحاج ود سعد.
· نحن فترنا من برنامجك دا.
· الزول يضيف في كلامو ويقول ليه : والله انا ترتحتك دي ما عندي معاها قضية ..دي حاجة بتخصك براك..لكن كمان انت بقيت تقول كلام فارغ كتير ..وحقيقة نحن ما بنستحمل كلامك الفارغ دا ..واعي او ما واعي نحن الموضوع دا ممكن نضارب فيه.
· الزول بتاع (الترتحة) بقوم يقول ليه : الظاهر امس انا قلت كلام فارغ كتير…الظاهر عليّ تقلت.
· الظاهر كدا لخبطت.
· صاحبكم الرسمي يقول ليه انت قلت الكلام الفارغ الشوية دا ..انت امس لخبطت شديد.
· بتاع الترتحة بقول ليه قلت شنو عليك الله؟ انا كنت ما واعي قلت ليكم ألعن ابواتكم.
· الزول الرسمي يقول ليه : ابدا.
· بتاع الترتحة يقول ليه : قلت ليكم انتوا ما عندكم رأس.
· الزول الرسمي يقول ليه : ابدا.
· بتاع الترتحة يقول ليه : اتعديت على البلد.
· الزول الرسمي يقول ليه : ابدا.
· بتاع الترتحة يقول ليه : غلطت في زول.
· الزول الرسمي يقول ليه : ابدا.
· بتاع الترتحة يقول ليه طيب قلت شنو؟…اوعى اكون قلت ليكم (قصيدة)…انا عارف نفسي وقت اقول لي (قصيدة) بلخبط واسوط البلد كلها.
· الزول الرسمي يقول ليه : يا ريت لو قلت كدا.
· الزول بتاع الترتحة يقول ليه طيب قلت شنو؟..اوعى اكون شتمت العمدة.
· الزول الرسمي يقول ليه : قلت المريخ بطل الكأسات المحمولة جوا.
· بتاع الترتحة يقول ليه انا قلت كدا لا لا امس الشيء دا الظاهر عليه كان قوي…كأسات شنو وجو شنو في (الكتاحة) دي.
· والله انا لو قلت الكلام دا استاهل الضرب..دا كلام ما بتسكت عليه.
· الزول الرسمي يقول ليه : والله امس مسكنا منك عثمان ود الاتر كان عاوز يضاربك وقت سمعك تقول في كلامك دا- مرقتك (الترتحة) قلنا ليه الزول دا ما واعي.
· واعي شنو؟..في زول واعي بقول الكلام القلتو دا.
· والله واجب علي اعتذر للناس دي كلها ..انا امس قلت كلام ما بتعقل.
· ولا بتسكت عليه.
· لخبطت انا امس.
· نقوم نطلع من الحتة دي (الرسالة وصلت) ..ونرجع لموضوعنا الاصلي.
· حقيقة ما في زول بستحمل المريخ (5) دقائق بالنهار.
· انا ما عارفكم بتشجعوا المريخ دا كيف؟.
· معقولة اقعد اشجع في ناس موسى الزومة يقطع الكورة ويمر من الاول ويمر من التاني ويكمل اللاين ويرفع رأسو ويعكسها في (الكشافات).
· تكون انت المشجع جاري مع موسى الزومة لمن نفسك يقتطع ويكمل الخط ويرفعها في الكشافات.
· الناس بعد ما تقيف في الاستاد ترجع تقعد تاني.
· يهمدوا وقت الكورة تمشي الكشافات.
· يا زول انت من زمن موسى الزومة.
· موسى الزومة شطبوه.
· موسى الزومة غادر المجموعة.
· طيب خلوه موسى الزومة معقولة كدا اقعد اشجع في ناس سعيد السعودي الكورة ماشي القون سعيد السعودي يعمل ليه حركة (سعيد العويران) ما بعملها.
· كورة ماشي القون يلم فيها سعيد السعودي يطلعها ليك من القون.
· ما قون المريخ قون الفريق التاني.
· يا زول انت من زمن سعيد السعودي…السعودي (اعاروه) هسع بقى يلعب في الاهلي شندي.
· والله يا سعيد السعودي ناس شندي ديل تطلع ليهم كورة من القون كان يمكن ان تكون هدف للاهلي شندي إلا يقطوعك قطيع.
· كمان ناس شندي بيلعبوا.
· ولا بجاملوا في الحاجات دي.
· ولا بلعبوا.
· المريخ بالنهار ما بتشجع.
· ولا في زول بمشي عليه.
· معقولة اقعد اشجع اكرم الهادي سليم ليه ؟..في شنو؟…والجابرني على كدا في الاساس شنو؟.
· يا زول انت من زمن اكرم الهادي سليم اكرم اعاروه لفريق الاهلي الخرطوم.
· انتوا المريخ فضل فيه منو؟.
· اي واحد نهبشوا تقولوا يا اعاروه يا شطبوه.
· جمال الوالي ذاتو اتخارج.
· انتوا القاعد ليكم منو؟.
· الاهلي الخرطوم بقى فرقو شنو من المريخ اذا كان بيلعب فيه مصعب عمر وموسى الزومة واكرم الهادي سليم.
· ديل فرقهم شنو من المريخ؟.
· ما في اي فرق.
· بعد كدا انا بدخل مباريات الاهلي الخرطوم لو لقيت (الجنيد) شايل طبلتو بقول خلاص دا المريخ ذاتو.
· ناس الاهلي فضل ليهم (الجنيد) ويكتبوا على النادي حقهم (نادي المريخ للتربية البدنية).
· قربوا.
· فضل ليكم يا ناس الاهلي تطيروا من دور الـ (64).
· عطفا على كدا.
· يتخيل لي من منطلق شخصي ان شكسبير دا كان بشجع المريخ بعد الساعة العاشرة مساء.
· يتخيل لي كدا.
· ويتخيل لي كمان انو كان بشرب القهوة سادة.
· وانو كان بطلع الكرسي في العصر برة البيت ..ويدخل (واتس آب).
· هو الزمن داك كان في (واتس آب).
· يعني الزمن داك كان في (مريخ)..عشان تقعدوا تسألوا لي عن (الواتس آب).
· انا يتخيل لي كدا بلة جابر دا كان موجود من زمن كيلو الموز فيه (71) موزة.
· هسع الكيلو يلفو ليك فاضي في الكيس ..وتمشي على كدا.
· تمشي شايل الكيس فاضي البيت ..قدر ما تقول للاولاد باعوه لي في الحالة دي ما يصدقو…يفتكروك (ضربت) الموز في الشارع ودخلت البيت.
· …
· ملحوظة : هسع الموز الجابو في الموضوع دا هنا شنو؟.
هوامش
· سبعة طعون اتقدمت في المرشحين امس.
· اها نحن نقعد نحرس (الطعون) دي كدا.
· الله يستر على الهلال.
· الموضوع من يبقى فيه (طعون) ما بمشي لي قدام.
· عينكم في الفيل وتطعنوا في ضلو.
· قالوا ليك الكاردينال قدموا فيه (3) طعون.
· وصلاح ادريس (طعن) واحد.
· انا من عندي براي ممكن اقدم (7) طعون في الحان صلاح ادريس.
· وممكن اقدم (9) طعون في اشعار الكاردينال.
· افتحوا لينا باب الطعون في الاشعار والالحان عشان نكمل ليكم الناقصة.
· نشوف ناس المفوضية بتصرفوا كيف؟.
· نحن فترنا من التصرف.
· وفترنا ذاتو من الكلام دا.
· …..
· عاجل : احسن حاجة الواحد يعمل ليه عجلة ويمشي عكس التيار. [/JUSTIFY]
وإن طال السفر – محمد عبد الماجد
صحيفة قوون
