محمد عبد الماجد
الناس البقيفوا قصاد (المكيّف)
“”””””””””””””””””””””””””””””
ما عارف ليه بتاعين الدكاكين بقطعوها مع الزبائين كدا وقت يكونوا ما عندهم (جبنة)…الواحد فيهم يقول ليك : (ما في جبنة) بطريقة هندية ما فاضل ليه إلا يرقص ليك مع الجملة دي رقصة هندية
“””””””””””””””””””””””””””””””””””””””””””””””
الآباء مع المقرارات الجديدة ..والواتس آب ..والحاجات الظهرت حديثة دي بقوا في البيت بقعدوا زي (الضيوف) ما عارفين اي حاجة
“””””””””””””””””””””””””””””””””””””””””””
بقينا بسبب لخبطة (الفهرس) دا ..اولياء الامور ما بنعرفهم منو؟..الاباء ام الابناء؟
“”””””””””””””””””””””””””””
· فلسفة الجلاليب (السمنية) في انك دائما وقت تكون لابسها بكون عندك رأي تانى.
· عاوز تطلع من الحتة دي.
· جيب ليك اي زول لابس جلابية سمنية واسألو وقول ليه اتنين زايد اتنين كم؟..بقول ليك (24)..دا لو ما قال ليك خمسين.
· عارفين ليه عشان زول الجلابية السمنية بكون عايش في عالم تاني..او في (فصل) براهو.
· في مناسبات العقد ..لمن واحد سمين كدا يقيف وسط الجماعة ويقول يا جماعة في زول شايل معاه (بطاقة شخصية) عشان يشهد معانا في العقد دا دائما صاحب الجلابية السمنية ..بقيف ويطلع من نص الناس ويقول : (انا معاي بطاقة شخصية).
· تفكتروا ليه؟.
· عشان الجلابية السمنية دائما بتتلبس بـ (بطاقتها).
· ما عارف السر في ذلك شنو؟.
· في الحفلات وقت الفنان يكون قاعد يغني …صاحب الجلابية السمنية دائما بكون واقف براهو زي (الباك) الطالع من اللعب ما بطلع مع الدفاع.
· بكسر التسلل.
· صاحب الجلابية السمنية بكون واقف براهو وقت تسألو وتقول ليه رأيك شنو في الفنان دا؟.
· يعمل ليك فيها السر احمد قدور يقعد يكب ليك (معلومات) زي الفاصوليا.
· اول الفاصوليا بتكب معلومات والله نحن في (الجغرافيا) ما درسونا ليها كدا.
· ولا سمعنا بالنظرية دي.
· ولا عندنا عنها (خلفية).
· صاحب الجلابية السمنية تسألو من اي حاجة بقعد ينظر ليك : انا بفتكر وفي الحتة دي بتنبثق الروح من الجسد زي ما تكون طالع وما طالع.
· كلام الناس المتثقفة دي.
· الغريبة …نفس الزول البكون لابس جلابية لونها سمني وقت تجي تسألو وهو لابس ليه بنطلون وقميص ..بقول ليك : ما عارف ..ولا بجاملك بقطعها ليك من البداية.
· طبعا اكتر ناس (قطاعين) في الدنيا دي وقت تمشي ليك لبتاع دكان وتقول ليه عاوز لي جبنة.
· يقوم بتاع الدكان يقول ليك : جبنة ما في.
· ما عارف ليه بتاعين الدكاكين بقطعوها مع الزبائين كدا وقت يكونوا ما عندهم (جبنة)…الواحد فيهم يقول ليك : (ما في جبنة) بطريقة هندية ما فاضل ليه إلا يرقص ليك مع الجملة دي رقصة هندية.
· رغم ان (الجبنة) ليس من البضائع (السياسية) الضرورية في الحياة ولا عاوزة (الفلسفة) دي كلها.
· الجبنة ما عندها اي علاقة بالسياسة.
· ولا الجلابية السمنية.
· في حاجات بتحصل في البلد دي عاوزة ليها (تفسير).
· او على الاقل عاوزة ليها (فهرس) عشان نشوفها واقعة في ياتو صفحة.
· فهارس البلد دي اضربت يا رجالة.
· مثلا ..تسديد رسوم (الولادة) بتلقاها مكتوبة في صفحة (42)…تمشي تفتش تكتشف الرسوم مكتوبة صفحة (73).
· اشرح ليكم الحكاية.
· بي كل بساطة.
· وبدون اي نرفزة.
· زمان (الولادة) بتكون في غرفة عمليات الولادة او في عنبر الولادة او في مستشفى الولادة المهم ما بتطلع من الحتة دي.
· هسع (الولادة) ممكن تكون في اي حتة.
· في ترخيص العربات.
· في تسديد رسوم المدرسة للاولاد.
· في موقف شندي.
· في الميناء البري.
· في مطار الخرطوم.
· في تلفزيون السودان.
· الجماعة ديل عملوا ليهم فروع (غرف ولادة) في اي مصلحة حكومية.
· في اي مؤسسة.
· في اي صينية حركة.
· في اي محل لبيع الكهرباء.
· عشان كدا انا قلت ليكم الجماعة ديل لخبطوا لينا (الفهرس).
· دا دخلو في دا.
· بقينا ما فاهمين اي حاجة.
· نحن غلبتنا.
· مرة اتجرجرنا كلنا من الحلة.
· شفنا لينا (هايس) قديم كدا وقلنا نمشي على الكورة.
· كنا عاوزين نروح عن نفسنا شوية.
· قلنا نطلع من الحتة دي فترنا من الضيق وقصقصة الاجنحة.
· ركبنا الهايس ..ومشينا على الاستاد.
· سواق الهايس المشوار كلو يحكي لينا في قصة حياتو.
· ونحن مجبورين نسمع كمان يقوم يدخل بينا في عمود..ونحن ما فايقين لجري المستشفيات دا.
· وكنا امعانا في مجاملة السواق ..مرات كنا قاعدين نضحك ليه..وهو بحكي لينا في قصص بايخة زي يوم السبت العصر.
· انا ما عارف ليه يوم السبت العصر بكون (حزين) كدا.
· ما سر (الحزن) في عصراوي يوم السبت.
· الفلسفة شنو؟.
· المهم سواق الهايس يقص ويحكي لمن وصلنا الاستاد.
· دخلنا المباراة.
· الشوط الاول كلو واقفين نشجع..ما قعدنا.
· شوت.
· طلع.
· امشي.
· الشوط التاني حصلت المفاجأة.
· عارفين حصل شنو؟.
· والله احلف ما في زول فيكم عارف.
· الشوط التاني اكتشفنا ليك ان المباراة البنحضر فيها دي ما كورة.
· تتخيلوا طلعت شنو؟.
· طلعت (ندوة).
· ندوة ساكت.
· ندوة عن اثر الزحف الصحراوي على تغبيش الحياة.
· ونحن يا حسرة كنا فاكرنها مباراة.
· نشيل ونشجع.
· ونكورك في الحكم.
· ونجدع في بتاع الرأية.
· وفي النهاية الموضوع طلع (ندوة) ساكت.
· قلت ليكم الجماعة ديل لخبطونا ما صدقتوا ..قعدتوا تغالطوا فيني زي (القرع).
· اول القرع بغالط.
· القرع دا اتوقعوا منو اي حاجة.
· ممكن يعمل اي شيء.
· انا الحكاية دي برضو بدرجها ليكم ضمن اللخبطة التى حصلت في (الفهرس).
· الفهرسة انضربت.
· السلم التعليمي بقوا كل (15) يوم يغيروه.
· عليكم الله دا كلام.
· سلم السقالة ما بغيروه بالسرعة دي.
· الاب بقى لمن يكون عاوز يشرح لي ولدو درس من دروس المدرسة بتعقد.
· الاب بكون ما فاهم اي حاجة.
· عشان كدا اولياء الامور في الزمن دا بقوا ما فاهمين اي حاجة.
· الولد يكون في المستوى الثاني في مرحلة الاساس وقت يسأل ابوه سؤال في (التربية الاسلامية)…الوالد بكون ما عارف اي حاجة.
· عشان كدا الابناء الزمن دا اتصنقعوا على الاباء.
· الاباء مع المقرارات الجديدة ..والواتس آب ..والحاجات الظهرت حديثة دي بقوا في البيت بقعدوا زي الضيوف.
· اها نوع دا ..انتوا بتسموه شنو؟.
· انا غايتو زي ما قلت ليكم بسميه لخبطة حصلت في (الفهرس).
· لخطبت (الفهرس) دا ح امسكها ليكم كتير زي (بلة جابر) ما تنزعجوا ولا تزعلوا.
· بقينا بسبب لخبطة (الفهرس) دا ..اولياء الامور ما بنعرفهم منو؟..الاباء ام الابناء؟.
· اتلخبطنا في كرعينا.
· الواحد فينا بقى ما عارف كراعو اليمين من كراعو الشمال.
· انتوا ما تفتكروا الحكاية دي من رمضان.
· الحكاية دي من الفيروس الذي ضرب (الفهرس).
· فهرس حياتنا اتلخبط.
· في حاجة غلط.
· مرة في خضم هذه اللخطبة.
· وقفني بتاع المرور.
· عاين لي سمح..وحرر ليه (ايصال) …تلاتين جنيه.
· في بتاعين مرور ما بتفاهموا ..اول حاجة يحرروا الايصال بعد كدا يشوفوا الحاصل شنو؟.
· الواحد تكون ماشي عليه تحت الشجرة …وهو قاعد في عربيتو ..قبل ما تصلو ..تلقاه حرر (الايصال).
· سريعين في (القطع).
· وبكونوا لابسين نضارات ..عشان ما يدوك فرصة ذاتو للنقاش.
· المهم مشيت عليهم ..لقيتوهم حرروا الايصال.
· قلت ليهم الايصال دا في شنو؟.
· قالوا لي في (الحزام).
· قلت ليهم لكن انا رابط الحزام.
· قالوا لي عليك الله دا (حر) يربطو فيه (حزام) تلاتين جنيه.
· بعد تلاتة يوم جيت ماشي بي نفس الحتة.
· ما اتلفتوا ..قطعونا ليك ايصال كفتك 30 جنيه.
· قلت ليهم التلاتين جنيه دي في شنو؟.
· قالوا لي ما رابط الحزام.
· قلت ليهم انتوا تعالوا هنا …عدم ربط الحزام 30 جنيه دي معروفة.
· البربط الحزام برضو بدفع 30 جنيه.
· واحد منهم قام ليك من نصهم قال في حالة واحدة بس …اذا كانت درجت الحرارة فوق الخمسين.
· قلت ليهم والله لو عارف كدا كنا قرينا (ارصاد جوي)..عشان نعرف كيف نتعامل مع قوانين الحركة والمرور.
· الكلام دا طبعا ما حصل هنا …(عشان ما تجيبوا لينا مشاكل).
· الكلام دا حصل في الصين …(شفتوا انا حريف كيف؟).
· دي حرفنة مبالغ فيها.
· عشان بندقس ليكم.
· لكن انتوا يا جماعة شفتوا (الفلسفة) الجديدة الظهرت الايامات دي.
· فلسفة شنو كمان؟.
· في حاجة ظهرت حديثا مع السخانة دي.
· بقوا في ناس بمشوا التراويح ..يشوفوا (المكيّف) وين ؟..ويقيفوا ليك تحتو.
· بقيفوا قصاد المكيّف.
· يفتشوا (المكيّف) فتيش.
· ….
· ملحوظة : ان شاءالله تجي مطرة.
هوامش
· الليلة يوم الطعون.
· المشكلة ما في الطعون.
· المشكلة في (الاستئنافات).
· وكل هذه التحركات ..والحاجات بدفع تمنها الهلال.
· نحن فترنا من (الطعون).
· ناس الهلال بطعنوا في نفسهم.
· طيب وقت نحن بنعمل في الهلال كدا ..مازمبي يعمل فينا شنو؟.
· اندية الخرطوم الاهلي والخرطوم الوطني احرجوا الهلال في كأس السودان.
· ما عارف نعمل شنو في البطولة الافريقية.
· الله يستر.
· خاصة ان صراع الانتخابات كل يوم بيشتعل اكتر.
· يحفظ للكاردينال انه رفض التعيين اكثر من مرة …ونزل انتخابات للمرة الثانية.
· اخشي على الذين يتقدمون للرئاسة في الهلال من قسوة النقد.
· وان كان الطريق الى رئاسة نادي الهلال يمر بادغال ومنعطفات خطيرة.
· مهر الرئاسة غالي.
· حتى الحاج عطا المنان لم يسلم من قسوة النقد.
· من اراد نور الهلال ..عليه ان يصتلي بنار الهلال.
· ونار الهلال خطيرة.
· ….
· عاجل : كورتكم زي سياستكم كلها (طعون) وحفر. [/JUSTIFY]
وإن طال السفر – محمد عبد الماجد
صحيفة قوون
