محمد عبد الماجد
انتخابات الهلال ..اجب بلا او لا
“””””””””””””””””””””””””””
يوم فينا واحد اتسلل (المغيرب) ..ومشى اتجر أوسأل عمتيب ود السريحة وقال ليه : انت (ياحنوني) دي قصتها شنو؟
“””””””””””””””””””””””””””””””””
انتخابات الهلال ..كلمات اشرف الكاردينال والحان صلاح ادريس فكيف يكون (الصوت)
“”””””””””””””””””””””””””””””””
المريخ الليلة انشاء الله مابطلع من عطبرة لو رجعتوا بي نقطة مكسب ليكم
“”””””””””””””””””””””
تعود (عمتيب ود السريحة) ان يأتي في كل يوم عند الخامسة مساء سائقا (لوري) الطوب حقو.
خمسة إلا ربع لا.
خمسة وخمسة لا.
الخامسة مساء يعني الخامسة مساء.
في هذا الوقت يأتي..لا بتأخر ولا بتقدم ثانية.
لوري عمتيب يظبطوا بيه الساعة.
يأتي عمتيب ود السريحة عند الخامسة مساء في جوانبه رهق واضح ، وتعب غير مدسوس يشكي منه حتى (اللوري) وهو يئن في توجع.
اللوري يتشوبح في الحلة زي (الرعدة).
اول (الرعدة) بتتشوبح ..انت مالك عاوز تلخبط لينا (ضفورنا) وتعمل لينا مشاكل مع ناس الارصاد.
ناس الارصاد شبكونا ليك من اول الاسبوع هذا الاسبوع سوف تكون فيه امطار ..(خلونا نتسحر على خفيف).
عليكم امان الله ما شفنا لينا اي مطرة.
الموية في (المواسير) قاطعة.
تقول نهر النيل دا قلب (طحنية).
وين الطحنية الايامات دي؟.
انتوا يا ناس الارصاد الامطار دي بتقطوعها من وعودكم الانتخابية.
ما شفنا لينا اي مطرة ما تقعدوا تتكلموا لينا ساكت.
جهجهتوا لينا (سحورنا) ساكت.
كل يوم الواحد يقول ما يتقل في السحور ..الليلة ح تكون في (مطرة).
دا ما موضوعنا..ما تبقى تنجرف لينا في حاجة جانبية.
الموضوع ما موضوع (مطرة).
نرجع للوري.
الناس يربطون الخامسة مساء بـ (لوري) عمتيب ود السريحة ..كما كانوا يربطون العاشرة مساء بمني الشاذلي.
فقد كان للوري عمتيب ود السريحة عند الخامسة اصداء وتوابع …(واسماء في حياتنا) ذاتها.
هسع اسماء في حياتنا الدخلها هنا شنو لو ما ساي؟.
الواحد وقت يكون ما عندو موضوع بقعد يطقطق في (اصابعينو) متل الزول البصلح الروادي تقيف ساعة قدامو ما بشتغل بيك ، ولا برفع رأسو يقول ليك انت بتقول في شنو؟.
مركز في الراديو.
شغال بي اخلاص كبير.
تقول بصلح ليه في (صاروخ).
علما انو ما في اي علاقة بين الزول البطقطق اصابعينو والزول البصلح الروادي ولوري عمتيب ود السريحة الذي يأتي عند الخامسة مساء.
وارتفاع سعر الطماطم.
الطماطم هسع الدخلها شنو في انتخابات الهلال.
كلها (طماطم).
لوري عمتيب ود السريحة ..مكتوب في خلفيتو (يا حنوني).
ما عارف علاقة (يا حنوني) بالطوب شنو؟.
في حاجات ما عندها علاقات بي بعض …لكن مع ذلك بتلقاها (مربوطة) بي بعض.
زي الزول البقول ليك والله انا ما باكل السمك والعدس.
ما في اي علاقة بين السمك والعدس.
او زي الزول البقول ليك مفروض كان ادخل كلية الطب لكن المفتاح كان رايح.
مفتاح شنو؟.
مفتاح الغرفة.
انت كلية الطب عاوز تدخلها بي (قندران).
مرات تسأل ليك زول عن (الكهربة) تقول ليه الكهربة جات ..يقوم يقول ليك خالتك قالت ليك اول ما ترجع اضرب ليها.
حاجات بالشكل دا.
نحن من قمنا كنا عاوزين لينا زول يفسر لينا علاقة (يا حنوني) بي لوري عمتيب ود السريحة شنو؟.
يوم فينا واحد اتسلل (المغيرب) ..ومشى اتجرأ وسأل عمتيب ود السريحة وقال ليه : انت (يا حنوني) دي قصتها شنو؟.
عمتيب ود السريحة ..اتفجر ليك بكا.
قعد يجعر ..ما عرفنا البسكتو شنو؟.
ندمنا على السؤال.
فتحنا ليك فيه شاي وقهوة ..عشان يسكت.
فيما ما بعد عرفنا ليك عمتيب ود السريحة (انضرب) شاكوش دولي.
قام طلع من هذا الاثر بـ (يا حنوني).
اتوهم في الدنيا دي بـ (يا حنوني).
لوري عمتيب ود السريحة كان عندما يعود في الخامسة مساء بكون مشغل في استريو اللوري اغنية عائشة الفلاتية (يجوا راجعين).
الحلة كلها بتسمع الاغنية دي.
لذلك ارتبطت الخامسة مساء بهذه الاغنية واصبحت علامة مميزة للوري الطوب بتاع عمتيب ود السريحة.
مع (اللوري) دا كنا بنتذكر وقت يقسموا لينا الامتحانات عشان نجاوب على الاسئلة.
بنتذكر كان بيكون مكتوب في ورقة الامتحان (لا تكتب في الهامش).
هامش شنو؟..اشمعنا ؟..وليه ؟.
كنا نحن (الشفوت) ما بنشتغل بالنظرية دي.
انتوا وقت عاوزننا ما نكتب في الهامش جايبين لينا الهامش ليه؟.
ما كان تعملوا (هامش) في الاساس.
بعدين ناس وزارة التربية والتعليم ديل ما عارفين الممنوع مرغوب.
نحن عشان بقولوا لينا كدا كنا بنكتب عن قصد في (الهامش).
نطلع من الحتة دي.
كنا في اي ورقة بنشوف السؤال البقول لينا (اجب بلا او نعم).
دا كان اسهل سؤال بالنسبة لينا ..عشان الاحتمالات محدودة.
يا لا يا نعم.
ونحن بالشفتنة الكانت علينا وظاهرة في شنط مدرستنا ..كنا الاجابة البتكون بـ (نعم) بنكتب عليها (لا).
والبتكون بـ (لا) بنكتب عليها (نعم).
شفتنة مبالغ فيها.
نعم دي كنا ما بنحبها بنتجاوزها حتى في اسئلة الجغرافيا…عندنا معاها (مشكلة) رسمية.
نحن ناس لا لا …ذاتهم.
هسع انتخابات الهلال والتى سوف (يقترع) فيها اليوم ..اقعوا فيها الـ (لا).
ابقوا ناس (لا) ساكت.
صلاح ادريس (لا).
اشرف الكاردينال (لا).
بين صلاح ادريس واشرف الكاردينال تشابه كبير حتى في الطعون.
واحد بكتب شعر ..والتاني بلحن.
والاتنين اكتسبوا (شهرتهم) في هذا المجال من منطلق (المال).
يعني صلاح ادريس لو ما كان رجل اعمال كانت (الحانو) دي لا يغنيها ليه (الكوكي).
ولو لم يكن اشرف الكاردينال رجل اعمل (اشعارو) دي كانت في ليلة ادبية لمدرسة اساس ما بقدموها.
صلاح ادريس غير مستقر في البلد.
واشرف الكاردينال برضو.
يمكن الكاردينال بيأتي من وقت لاخر ..لكنه غير مستقر.
اتهامات وطعون قدمت ضد الرجلين …ويمكن ان تمتد الطعون بعد اعلان النتيجة الى ان تصل للمحكمة الدستورية.
اعلام صلاح ادريس لا يختلف عن اعلام الكاردينال كلاهما يغالي في الخصام ..ويفجر في الكتابات.
شي كبير بين صلاح ادريس واشرف الكاردينال.
لدرجة اني اخشى ان تحدث (لخبطة) في المواضيع دي.
يعني ممكن زول يكون عاوز يمنح صوتو صلاح ادريس ..يقوم يمنح صوتو اشرف الكاردينال.
يمكن ان يفوز الكاردينال ..يقوموا يعلنوا فوز صلاح ادريس.
يعني اللخبطة حاصلة.
مبدئيا ..يمكن ان نقول ان الانتخابات هي عملية حضارية ..وامر جميل ..وشيء مشرف.
جميل ان تحتكم تنظيمات الهلال للصندوق.
لكن الذي نخشاه ولا نريده ..هو ان تكون هناك تدخلات عليا ..وتربيطات خفية.
نخشي تدخل السلطة لترسم للهلال مجلس (منقوش).
سوف نحترم قرار الجمعية العمومية ان كان صادرا من رغبة الاعضاء.
لا نريد ان تأتي (رغبة) خارجية فوق رغبة جماهير الهلال.
نعرف اننا في العالم الثالث لن نصل الى انتخابات نزيهة وحرة بصورة مطلقة.
ولكن نحلم فقط بالحد الادنى من النزاهة.
وما نخشاه ان تأتي الانتخابات هذه المرة خالية من (النزاهة).
نخشى ان يتحول الهلال منطقة صراعات ..وخلافات وتدخلات سياسية..خاصة ان الكثير من المرشحين تحوم حولهم الكثير من الشبهات.
نريد هلالا بعيدا عن النوايا السياسية السيئة ..فقد انهك الصراع جسد الهلال.
الهلال قاتل كثيرا …وصمد كثيرا ..ويستحق الان ..وتستحق جماهيره ان يخرج فريقها لبر الامان.
اما الاخطر من هذا هو ان المرشحين صلاح واشرف عندهم مآرب اخرى في الدخول لمجلس الهلال وقيادته.
لكن الهلال محمي بجماهيره واردته ..وقوته.
….
ملحوظة : امنح صوتك لمن تثق فيه اكثر.
هوامش
انتخابات الهلال ..كلمات اشرف الكاردينال والحان صلاح ادريس فكيف يكون (الصوت).
اداء الهلال امام النسور كان ملخبط ..ومحبط.
اذا لعب الهلال بهذا المستوى سوف يخسر كل البطولات.
وسوف تكون خسائره لا قدر الله (برازيلية) في الكنغو.
اداء فاتر غياب الروح افتقاد الرغبة.
النسور كانت تستحق ان تتعادل امام الهلال لولا محمد عبدالرحمن.
علما ان النسور كانت تلعب امام الهلال بـ (10) لاعبين منذ خواتيم الشوط الاول.
المريخ الليلة ان شاءالله ما بطلع من عطبرة.
عطبرة دي على افضل الفروض ممكن ترجعوا منها بـ (نقطة).
ما عندكم منها اكتر من (نقطة).
المريخ بقى قاعد ساكت عشان كدا اي (سيكافا) تظهر بشاركوا فيها.
فاضيين وما عندهم شغلة.
تصريح الكادرينال عن دعمه للهلال لو فاز صلاح ادريس ودعمه له لو خسر الكاردينال الانتخابات رغم الاتهامات والطعون التى قدمت ضده من تنظيم الاصالة والصدارة ..تبقى تصريحات يستحق عليها الكاردينال الثناء.
يا ريت تصريحات صلاح ادريس تكون على هذا النحو ، ايضا.
على العموم احرز الكاردينال هدفا بتصريحاته تلك.
الراجح ان الصراع سوف يكون قويا.
وان الانتخابات لن تحسم امر الهلال في اليوم الاول.
سوف تكون هناك جولة اخرى.
وان كنا نتمنى ان تحسم من اول جولة …على الاقل ان حسمت من الجولة الاولى فان ذلك دليل عافية للعضوية.
المجلس الجديد سوف يجد نفسه امام تحديات خطيرة …وسوف تكون امامه مهام جسام.
مباريات الهلال القادمة في الممتاز خطيرة ..اذا لعب فيها الهلال بنفس المستوى الذي لعب به امام النسور فان خسارة الهلال سوف تكون قريبة.
عشمنا الليلة في عطبرة.
………….
عاجل : كورتنا بقت كلها (طعون). [/JUSTIFY]
وإن طال السفر – محمد عبد الماجد
صحيفة قوون
