تعالوا نُغيّر عاداتنا السالبه
من المعلوم أن الحفلات تشوبها حُرمة الاختلاط ،، في بلادنا يمكنك ان تعرف فتاة في حفله اما اذا رأيتها في الشارع فهذا خطأ مع الاخذ في الاعتبار أن الحفله يُمكن ان تكون في نفس الشارع ؟؟ كيف هذا ؟؟؟
(٢ ) بعد التعارف يحدث اندغام لاتشوبه أي مجمجه مما يجعلك تقول للعلاقه ( تك )
#تك
(٣) تبدأ الفتاة بجرجرة العريس الي منزلها وإدخاله في مجمجه ذاتيه بهذه الطريقه ( وهي طريقه مشهوره لدي الفتيات ) :
– نحنا لينا كم بنتعارف
– شهرين
طيب مش مفروض أكلم ماما ؟
أُنظر أخي المسلم ،، ( هذه خدعة كبري ) ،، هذه الجمله تُلاقي استحساناً لدي العريس وتقع في دواخله في منطقة عميقة داخل جوفه تفور لها الحمية حمية الجاهليه ،، فينفعل قائلاً :
طبعاً ،، الوالده لازم تعرف
وبالطبع هذه الاجابه تكون بمثابة موافقة تامه
في رواية أُخري
بعد التعارف بيومين وفي السادسه مساءً في أغلب الروايات يأتي التلفون الفاصل في العلاقه ، وهو تلفون حاسم جداً ،، ومشهور ،، تتصل الفتاة في السادسه مساءً حينما يكون العريس يقود سياره وفي اللفه عاوز يلف والحتات زحمه شديد فيرد :
– الوووو
– الو ،، طبعاً عاوزه اكلم ماما رايك شنو ؟
غالباً العريس يكون التلفون في يده ،، والسماعه مُشربكه ،، والبوليس قدامو ،،وعاوز يلف وبتاع الامجاد الوراهو بضرب ليهو في البوري مما يجعله يبدو وكأنه قد نسي الموضوع أو شغله شاغل فيرد وهو يتحدث عبر الهاتف بصعوبه :
– طبعاً ،، كلميها ااي ،، اي والله الله يسلمك
الله يبارك فيك
الله يسلمك ….الخ
بعد اربعه ساعات في أسوأ تقدير
طبعاً كلمت ماما واتبسطت شديد ،، وكده انا ارتحت نفسياً لانو نحن ماشين صاح
تبدأ الفتاة في سؤاله عن منطقتهم ( أهو هنا بقي ده دور القبيله التي ننكرها دائماً ) ،، انتوا من وين ؟
– نحنا من الحته الفلانيه ،، أهلي ناس فلان وفلان
،،،
بعد ثلاثة ايام :
بابا طلع بعرف أهلكم !
وهنا العريس اتكمين ( أي نُصب له كمين ووقع فيه )
بعد اسبوع maximum !
( هذه الجزئيه هي من خيالات الكاتب )
ترسل العروس رساله للعريس ،، خلي بالك من نفسك ،، وأفطر
يجيب العريس : أفطر وين والله جاري ( محاوله منه لاخبارها انه مشغول ) فتجيبه بصوت حاني يدغدغ عصافير الرومانسيه في أُم قلبه :
مافطرت ؟ لييه بس خلي بالك من صحتك يا فلانوني ( باسم دلعه )
وتضيف ! ياريتني لو معاك ،، أصلوا ما اخليك ما تفطر !
هذه الجمله اذا كانت كتابة غالباً تكون مصحوبه بأحد وشوش الواصطاب وغالباً هذا الوش
فتكون الجمله :
مافطرت
ليه بس ياريتني لو كنت معاك
يبتسم العريس ابتسامه بلهاء وهو لايدري ان العروس قد أكملت نصب كمينها فيبتسم ويغلق الهاتف ويطلق آهة صفراء ويفكر في الاف الاشياء !
في نهاية الأمر يتفقا علي الزواج فتبدأ رحلة يتعب فيها العريس ،، قديماً كانت العروس للعريس والجري للمتاعيس اما الان فالكل يجري ،، والعريس يجري ،، و يجري ويجري ويجري ويكون فقط دور العروس إطلاق بعض الكلمات من حين الي آخر كمثال : يحلييييلك !!
فيصمت !!
مشاوير الزواج :
قبل التعارف
تلفون لولي امر العروس
زياره لولي أمر العروس
اسبوعين للسؤال عن أهل العريس ( شرط اساسي )
الموافقه
تعارف نساء فقط
تعارف رجال فقط
فتح الخشوووم
قولة الخير
تغليف الهدايا
( هبه الاحفاد او غاده شرفي )
تعارف كبير
خطوبه
سد المال
هند حمدتو ( زياره مبدئيه )
العقد
عزومة العريس
حنة العريس
غاده شرفي
السيره
الدخله
الجرتق
شهر العسل
بالنسبه للبنات :
حنة العروس
حجز الكوشه
حجز البنت بتاعت الفوتغرافي
رقيص العروس
لذلك فنحن أول شعب تعب لكي يرتاح ولم يرتاح بعد
تقول الاسطوره :
نحنا اول شعب قطع الرحط وفتح الخشم وعمل الصبحية،
نحنا اول من استعمل لستك العربيه ترتار وكرسي وقاعدة للطشت والزير وصنعنا منو شبط ونبلة
نحنا اول من اكل ام فتفت والمرارة
تقول لي شنو !؟
نحنا اول من عاس الكسره بالطايوق واول من اخترع المفراكة والمعراكة والكرجاكة
نحنا اول من سمى ست الريد وست البنات وسر الختم والريّح وست ابوها وست النفر وست النسا وستنا وعاشميق وسميره دنيا
نحنا اول من شال الجنازة في عنقريب ونشف العدة في نفس العنقريب
نحنا اول من استخدم راس البيت مخزن والحوش اوضة نوم واول من عمل حظيرة اكبر من البيت #الديامه
نحنا اول من قال كلام ساكت، وقام قعد، ومشي نام ،، وكر عليك، وووب علي، وسجم الرماد، وسجمي وسجم اللبت امي
نحنا اول من ادخل السوط بيت الفرح
نحنا اول من اكل الرز بالعيش واول من شرب البلح وإتمسح بالسمسم ولبخ القرض
نحنا اول من لعب البلي بغطاء البيبسي وكسر الفول بقزاز البيبسي
نحنا اول من لعب سكج بكج، وحرينا، وشليل وينو، والحجله والفات الفات،
نحنا اول من لبس الجلابيه بالجنبين والمركوب الاحمر والطاقيه الخضراء
نحنا اول من استعمل علبة النيفيا للتمباك، والسفنجه للرصع، وام دلدوم لعسر الهضم
نحنا اول من غلى الحلبة، والمحريب والشمار وشرب القنقليز والقضيم والعرديب، والولية الخلطت البهارات وعملت منها الحلو مر دي شفته و مابراها ،، ورحم الله قراصة البلح
نحنا اول من صنع البمبر واول من صنقر ودنقر وشوي القنقر وقال الله يديك العافية يأالتنقر
نحنا اول من صنع ملاح الروب والكول والكجيك والملوحه وام رقيقه والنعيميه
نحنا الكتلنا غردون وحرقنا الباشا وقلنا ياالباشا الغشيم قول لي جدادك كر، ونحنا الدنيا جبناها وبنيناها بيوت في بيوت، تقول لي شنو وتقول لي منو
نحنا أول من حلف بالطلاق ضد امريكا في قرار سيادي
نحنا أسياد العالم چججت
نحن أول دوله لديها قريه خاطبت أمريكا مُباشرة وقالت في صحفها
( قرية الشكابه شاع الدين تُحذر امريكا ولآخر مره )
لذلك تعالوا نُغيّر عاداتنا الكتيره دي ،، موش نحن شعب واحد وجيش واحد ؟؟ طيب ما نغييرها ،، الشايفنا منو
ارحكاكم نغير
ورحكاكم نغيير
يلاكم نغيير
غيراكوم ! اسمعوا كلامي ياشباب الربه
الكاتب : د. عاصم بكري
