دي مرتي وأنا بعرفها

الكشف عند الدكاتره بقى حاجة غالية.. والفحص في المعامل أغلى.. عشان تقابل ليك دكتور ليهو اسم تقنع من مئتين ألف كشف عادي أو تلتمائة كشف فوق العادة.. وتمشي تشوفو (يتصل بالزول الاديتو القروش.. الفطيسة الدخل عليّ دا، دفع كم؟).. ويعاين ليك.. ويقول لك افتح خشمك.. ويشبح عويناتك.. ويرقدك ورا الستارة ارفع القميص.. ارفع الفنلة.. ارفع البطن.. قوم على حيلك.. فرش الملاية الراقد فيها دي كويس.. يلا ارقد تاني.. يلا نبدأ من اللول.. ارفع القميص.. ارفع الفنلة.. انفخ بطنك.. وارخي جضومك.. انفخ جضومك.. وارخي بطنك.. اعقل كراعك اليمين.. فك الشمال.. ارفع الشمال.. وفك اليمين.. يلا أها ارفعن الاتنين.. يلا دلدل الشمال في الواطا وانت راقد.. يلا دلدل التانية وارفع دي.. يلا أها دلدلن الاتنين وانت راقد.. يلا شوت البلنتي.. يلا كدي ايديني رقبتك.. اتلفت شمال.. كويس جدا.. اتلفت يمين.. يلا شلق فوووق.. افتح خشمك.. مد لسانك.. ايوااااا.. قول (عااااااع).. قول عووووووووع.. يلا عشان نشوف العرش حق الخشم من فوق.. قول (كووووووع) وانت فاتح خشمك.. يلا عشان نشوف الأرضية قول.. (بوووووع).. وأنت فاتح خشمك برضو.. ههههههه.. الباء أبت تجي معاك؟.. جليها.. هي ذاتا ما ضروري في الكشف دا.. لكن العرش بتاع خشمك كعب خلاس.. انت عارشو بلدي لي شنو؟.. حسي كلو مسوس.. غايتو إلا ترجع ترشو بزيت عربات.. واللا تغيرو.. واللا أقول ليك خليهو كدي.. هي مطر ذاتا مافي.. قاعد ينقط؟.. إن صبت.. بس محل ما بينقط دا، خت تحتو جردل.. يلا انزل.. يمشي الدكتور قدام المرضان الخلعوهو دا.. ويلبس نضارة القراية ويشرط ورقة.. ويكتب.. وتاني يشرط ويكتب.. ويديهو الورقة.. أمشي تعمل لي الفحوصات دي.. والدواء دا تجيبو حسي من الأجزخانة الجنبنا دي.. يمشي المرضان المعمل.. يستلم سيد المعمل الورقة ويقعد يشخت عليها بي قلم ويقول لو: يا حاج ح نفحص البول والفسحة.. وح نزرع ليك من عرش الخشم.. وح ناخد عينة من الجلد.. وفحص دم كامل.. كلو الحساب ح يكون متين وخمسين جنيه.. يتلفت المرضان ويمرق قريشاتو ويلقاهن مئة جنيه بس.. ويحدس سيد المعمل.. ويقول لو.. شوف القريشات دي بتفحص لي شنو؟.. وخلي الباقي لي أول الشهر لمن الولد يصرف الماهية.. سيد المعمل يجيب آلة حاسبة ويضرّب.. ديل بي يفحصن البول والفسحة.. والباقي لك يكون تلاتة جنيهات… تنفرج أسارير المرضان ويقول لسيد المعمل.. أفحص لي البول بس… فسحة مافي… ببح.. مافي كيف؟.. مافي، المفيان العديل دا، ما بتعرفو؟.. أنا لي تلاتة يوم ما أكلت.. بس ديل يا حاج لازم يتعملن مع بعض.. يفكر المرضان ثم يكورك لي مرتو(أم عوض الله.. تعالي).. يسألو سيد المعمل.. داير أم عوض الله لي شنو؟.. يرد المرضان لسيد المعمل وهو يعاين لأم عوض الله.. بيكون عندها فسحة.. ما بتخلا.. دي مرتي وأنا بعرفها.!!