البصات خلوها (ركزولنا) في المراكب.!

مررت برفقة صديق لي مساء امس بمدينة بحري وتحديداً منطقة الشعبية، وهناك لفتت انتباهنا احدى بصات ولاية الخرطوم الشهيرة بـ(بصات الوالي) وهي متعطلة بسبب مياه الامطار، ليقوم صديقي بالإلتفات لي بسرعة والقول بلهجة قروية ساخرة جداً: (ها اخوي…هسي عليك النبي…ناس الولاية ديل كان ركزولنا على المراكب بدل البصات ديل مش احسنلنا).!!
وحديث صديقي المتمسك بـ(لهجته القروية) المحببة، هو حديث ربما جانب الكثير من الصواب برغم السخرية التى نبع منها، فعدم مقدرة ولاية الخرطوم على تصريف مياه الامطار امر يمكن ان يجابه بحلول كثيرة اخرى، من بينها (استيراد مراكب للمواطنين) واهو…يبقى حل و(استثمار) برضو.
وكعادتي دوماً في مساعدة الجهات المسؤولة في التنقيب عن حلول للكثير من المشاكل المستعصية، سأقوم خلال المساحة التالية بعرض الخطة الكاملة لصفقة استيراد المراكب للولاية في فصل الخريف، تلك الخطة التى تبدأ من مواصفات المركب، حيث يفضل استيراد المراكب ذات السعة العالية والاسعار المنخفضة، (يعني ياجماعة نحنا حنستورد المراكب دي لي فصل الخريف دا بس…وانشاء الله الخريف الجاي يحلها الف حلال).
ومن ابرز نقاط خطة (استيراد المراكب) هي النقاط التى تتعلق بالمواطن، (يعني مثلاً جاء مواطن وقال عايز يشترى مركب من المراكب الاستوردناها دي…اهاااا…نعمل شنو)..؟؟…معقولة بس يااخوانا دي دايرة سؤال..!…طوالي نبيع ليهو و(بالاقساط كمان)، انا قبيييل مش قلت ليكم (حل) و(بزنس).؟
النقطة الثالثة تتعلق بالطاقم العامل على المركب، وطبعاً دي اهم نقطة، (قولو لي كيف.؟)…اولاً قائد المركب دا لازم يكون (ود قلبا) يعني من اولاد العاصمة وعارف (زقاقاتا) و(خيرانا) كويس، لأنو ماممكن نجيب لينا (صيني) ولا (بنغالي) في الموقع دا، ولا شنو..؟..وبالخطوة دي حنكون ضربنا (تلاتة عصافير بي حجر واحد)… اولاً حلينا ازمة المواصلات في فصل الخريف…وثانياً استثمرنا في المراكب دي…وثالثاً (شغلنا العطالة والخريجين القاعدين لينا ساكت ديل).
اخيراً…لابد من منح الكثير من الشرائح (تعويضات) عن هذا المشروع وذلك بسبب تأثرهم السلبي به، يعني مثلاً (بتاعين الاورنيش) وهم شريحة مهمة جداً من شرائح المجتمع السوداني وبتطبيق فكرة المراكب حيفقدوا الكتير من مصادر الرزق، وثانياً (الكماسرة) لأنو استحالة يكون في كمساري قاعد ليهو في (مركب)، وهذا استناداً على مثل اهلنا القديم: (المركب كان بقوا فيها ريسين بتغرق)، وانتو طبعاً عارفين (الكمساري) شايف روحو احسن من (السواق) ومن (الجلابي) ذاتو.
جدعة:
فلنبدأ فوراً في انفاذ مشروع (يامراكبي عدينا)، وذلك من اجل راحة هذا الشعب الذى بات يغرق (في شبر موية)، مع الاخذ في الاعتبار ان ذات االمراكب التى سنقوم بإستيرادها لحل مشكلة التنقل في العاصمة يمكن الاستفادة منها لاحقاً في توزيعها ضمن (خطة اسكانية جديدة) وذلك بعد انهيار مئات المنازل خلال اليومين الماضيين.!
شربكة أخيرة:
عليكم الله لقيتوني كيف…(ماختري).؟
[/JUSTIFY]

الشربكا يحلها – احمد دندش
صحيفة السوداني