سيكافا متل الاشتراك في خدمة الرسائل الما بتعرف تطلع منها تاني
سيكافا متل الاشتراك في خدمة الرسائل الما بتعرف تطلع منها تاني
“”””””””””””””””””””””””””””
الطيب مصطفى رئيس حزب منبر السلام العادل كان قد دخل في جدل عريض مع احدى الشركات بعد ان اشترك في احدى الخدمات وما عرف من بعد خلاصا من تلك الخدمة
“””””””””””””””””””””””””””””
الزول الغتيت بكون عندو (4) جلحات ما بتعرف وشو فاتح على وين؟
“”””””””””””””””””””””””””””””
اثناء التحرك على البيت بتجيك رسالة من المدام تقول ليك فيها : (ما تنسى الرغيف)
“”””””””””””””””””””””””””””””
شركات الاتصالات عندها (استنكاحات) واضحة وظاهرة وفيها الكثير من استغفال الناس وأكل اموالهم من دون وجه حق.
الزول الغتيت بكون عندو (4) جلحات ما بتعرف وشو فاتح على وين؟.
وشو زي الدكان الناصية…تجيه من اي حتة.
هسع الزول الغتيت الدخلو هنا شنو؟.
عندنا ديوان افتاء بفتي في اي حاجة…(جاهزين للقيام بي اي تكليف).
وعندنا هيئة علماء متفرغين للقيام بالموازنات…وشغل الناس بصغائر الامور لا اريد ان اقول بسفاسفها.
عشان ما تبقى ظاهرة.
لماذا لا تنظر تلك الهيئات العريضة لمثل هذه الاستقطاعات التى تتم من ارصدة هواتف الناس بالباطل.
كثير من الخدمات الهاتفية المتمثلة في (خدمات رسائل) من شركات معينة ومتخصصة عن طريق التنسيق والترتيب مع شركات الاتصالات يتم الاشتراك فيها من قبل المستخدم او المشترك ولا يعرف بعد ذلك وسيلة او طريقة لالغاء هذه الخدمة والخروج منها.
تلك الخدمات مثل الزواج الكاثوليكي تبقى ليك في رقبتك ما تعرف الانفكاك منها.
كأنها خدمات على مدى العمر ، او على طول استخدامك للشريحة التى تشترك من خلالها في خدمة معينة.
طبعا هناك الكثير من الوكالات والمؤسسات تقدم خدمة اخبارية لمشتريكها لا يعرف من بعد المشترك ما يخرجه من تلك الخدمة او يجعله يلغيّه (سيك سيك معلق فيك).
الخدمة الالزامية الزول بنتهى منها وبطلع انتوا يا ناس الاتصالات خدمات الرسائل دي الواحد يطلع منها كيف؟.
هذه الطريقة يتم بها استنزاف الكثير من المشتركين ..اذ يمكن ان يصلك في اليوم اكثر من (5) رسائل لا قيمة فيها ولا جدوى مع ارتفاع قيمة الرسالة الخدمية والتى دائما ما تأتي على نحو ان الرسالة قيمتها مثلا (14) قرشا من غير الضرائب ليترك الباب مفتوحا للضرائب لتفعل ما تشاء من الزيادات دون ان تعرف كم خصم منك في الرسالة الواحدة؟.
تمشى تسأل يقولوا ليك دي (ضريبة).
ما خليتوا فينا حاجة من (الضرائب).
شليتونا بالضرائب الكتيرة.
اذا اردنا ان نتمثل بتلك الخدمات التى تقدمها بعض الوكالات سوف يصيبك اعوجاج في (الخشم) وتهشم في (الانف) من تفاهة الرسائل التى تصلك.
مثلا موقع الجزيرة اذا اشتركت فيها فهو يقدم لك رسائل تسبب التجلط في الدم.
كأن تصلك رسالة يقولوا ليك فيها تجمع عدد من المصريين في ميدان التحرير.
قول اتجمعوا يعني شنو؟.
ثم تصلك رسالة اخرى تأكد لك تحرك قوة امنية لفض هذا التجمع.
قول اتحركوا يعني شنو؟.
ثم رسالة تقول لك وقوع اشتباكات بين قوات الامن والمتظاهرين.
قول اشتبكوا يعني شنو؟.
زاحمننا بي حاجات ما ليها اي قيمة.
تظل الرسائل تأتيك على هذا النحو التفصيلي لتعرف من اصيب ومن قتل ومن شالها موزة ورجع البيت.
ديل ما فاضل ليهم إلا يجيبوا ليك رسالة يقولوا ليك فيها عثمان ود الريح اشترى ليه كيلو موز وتمباك بي جنيه و(4) بيضات واتحرك على البيت.
واثناء تحركه على البيت جاتو رسالة من المدام قالت ليه فيها : (ما تنسى الرغيف).
وكل رسالة بالشيء الفلاني.
حاجات فارغة بس.
لو كانوا ينتظرون نهاية الحدث ثم تلخيصه في رسالة واحدة لقبلنا بذلك الامر …لكنهم يظلوا يراسلونك عن الحدث قبل وقوعه الى ان يقع ثم يحدثونك في رسائل عديدة عن اصداء الحدث.
الغريب في الامر ان الاشتراك في الخدمة ميسر بصورة لا تتخيلوها اما الغاء الخدمة او الخروج منها فهو غير متاح او غير ممكن.
البطلعك ما بتعرفو شنو؟.
تكره نفسك وتكره الرسائل واليوم الخلاك (تنطس) في رأسك وتشترك في تلك الخدمة.
وهذا مني تحذير للناس ..وتنبيه لهم أللا يشتركوا في مثل تلك الخدمات او ان يتحركوا بصورة رسمية وجماعية لمقاضاة تلك الشركات التى لا تمكّن مشتركيها من الخروج من الخدمة التى شاركوا فيها.
الطيب مصطفى رئيس حزب منبر السلام العادل كان قد دخل في جدال عريض مع احدى الشركات بعد ان اشترك في احدى الخدمات وما عرف من بعد خلاصا من تلك الخدمة.
الطيب مصطفى بموقعه واسمه ربما استمعت شركة الاتصالات لتحذيراته واخرجته من الخدمة التى اراد ايقاف الاشتراك فيها.
لكن كيف حال المواطن العادي الذي اشترك في خدمة رسائل وما عرف بعد ذلك سبيلا للخروج من الخدمة او الغاء الاشتراك.
علما ان الرسائل تأتي في اوقات مزعجة ..وتكسر سكون الشخص وخلوته بمعلومات او اخبار لا جدوى منها.
يعني ما فايدة اشتراك في خدمة بين الفينة والاخرى تأتيك منها رسالة مكتوب فيها (ارتفاع منسوب النيل).
او (الدفاع المدني يحذر الموطنين).
او السلطة تدعو لتوخى الحطية والحذر.
او الامين العام للامم المتحدة يدعو الى ضبط النفس.
يا عم روح نحن ح نظل ندعو لضبط النفس الى متين؟…فترنا من حكاية ضبط النفس ..وربط الاحزمة على البطون وتوخي الحيطة والحذر.
قول ربطنا الاحزمة يعني شنو؟.
قول ضبطنا النفس نفس هي وإلّا ساعة؟.
من حق الناس مقاضاة تلك الشركات وايقاف ذلك الاستنكاح الذي تمارسه شركات الاتصالات.
الشيء الذي يفرّس القلب ويخليه يتفتفت قدامك زي (الكتكوت) ان شريحتك مرات بكون فيها (رصيد) كويس شوية كدا تشبه (رصيدك) تلقاه اتلحس مشى وين ما عارف؟.
لمن تقعد تشك في الشفع الحايمين قدامك ديل.
وهم ما عندهم اي ذنب.
بس تشيل فيني وتودي.
ليك اللـه بس تشيل فيني وتودي دي الدخلها هنا شنو؟.
اغرب من كل هذه الاشياء ان اي شافع يشيل تلفونك يبعبص فيه تلقاه اشترك ليك في خدمة ما.
وليس ذلك إلّا لأن الاشتراك في الخدمة ميسر ومبسط بصورة لا تتخيلوه.
بعد داك تعال فتش ليك طريقة عشان تخارجك من الخدمة.
البطلعك ما بتعرفها.
حكاية الاجبارية في الاشتراك في خدمة الرسائل وعدم القدرة على الخروج من الخدمة او إلغاء الاشتراك..ذكرتني ليك مشاركة ناس المريخ في سيكافا.
الجماعة ديل اشتركوا في الخدمة دي وما عرفوا يطلعوا منها كيف؟.
وبقت تجيهم رسائل على ذات الطريقة.
(اشاد موقع اتحاد سيكافا امس بالمريخ بعد اقصائه لبطل النسخة الاخيرة ووصف اتحاد سيكافا المباراة بالنهائي المبكر و توقع ان يقدم الاحمر السوداني مباراة رفيعة المستوى امام عزام ورشح المرشخ للمضي قدما في البطولة).
موقع شنو؟.
واشادة ايه؟.
هو ناس سيكافا ديل عندهم (موقع).
واللـه لكن …تكضبوا الكضبة وتصدقوها.
او متل هذه (الدرابة).
(اشادت قناة سوبر سبورت بفريق المريخ السوداني خلال مباراته امام فيتالو البورندي ووصفته ببطل السودان و صاحب البطولات كما اشادت بالرئيس جمال الوالي الذي جعل من المريخ ناديا عالميا بإنشاء استاد مفخرة و استجلاب لاعبين من خارج السودان على قدر عالي من الكفاءة).
غايتو جنس كضب.
كمان العلم قناة سوبر سبورت كسير التلج منو؟.
بكسروا كمان لجمال الوالي.
عليكم اللـه في فريق كبير بشارك في سيكافا.
بعدين الدخل الاستاد المفخرة في الموضوع شنو؟.
الظاهر عليهم ناس سيكافا ديل كلهم مخلوعين.
ماسكهم (خلعة) جماعية.
سيكافا دي نحن الهلالاب وقت نقرأ لينا عنها حاجة بنلبس لينا (كمامات).
انتوا الشيء دي بتستحملوها كيف؟.
ألغوا الخدمة دي سريع ح تلحس رصيدكم ساكت.
…
ملحوظة : المشكلة بعد دا بطيروا منها.
هوامش
الانباء التى تداولتها المواقع والصحف امس نتمنى ان تكون صحيحة.
ونرجو ان يعود الهلال الى دور الاربعة.
رغم ان شكاوي مثل هذه الشكاوي صعب ان تكسب.
الاتحاد الافريقي هو اصل الفساد.
دا هو الفساد ذاتو.
قرن شطة واحد ما كفاية.
الموضوع دا عاوز ليه ملوة بتاعة شطة.
قرن ما بحلو ليكم.
لكن نسأل اللـه ان تأتي الامور كلها في صالح الهلال.
اعتقد ان الحدث حتى لو كان زوبعة اعلامية فانه سوف يعطي مباراة الهلال والزمالك القادمة اثارة كبيرة.
وسوف تكون المتعة حاضرة بقوة في المباراة.
المهم عندنا ان الزمالك سوف ينضرب في الخرطوم ضربة ليها ضل.
ناس حسام حسن ديل ح يفهموا حاجة.
التركيز كذلك يجب ان يكون حاضرا في مباراة الهلال القادمة امام الرابطة كوستي.
فريق الرابطة كوستى صاحب اروع اداء وعروض في الدورى الممتاز.
لذلك الحذر واجب.
والتركيز يجب ان يكون حاضرا.
الدوري الانجليزي انطلق.
والبداية كانت خسارة مانشيستر يوناتيد.
يعني الاثارة والسخونة من الاسبوع الاول.
شيلسي هذا الموسم سوف يكون صاحب الحظوظ الاكبر في الفوز بالبطولات التى يشارك فيها.
مستوى الاهلي شندي تراجع كثيرا في الفترة الاخيرة.
الحاصل شنو؟.
انتصر الفريق في اخر (5) دقائق على النيل الحصاحيصا في شندي.
النيل في اي حته فاض إلا في الحصاحيصا.
النيل خلاص ح يغادر الممتاز.
…
عاجل : الفرصة القادمة في الهلال يجب ان تمنح كليا لمحمد عبدالرحمن ووليد علاءالدين واطهر الطاهر واحمد بيتر بعد حل اشكاليتهما…مستقبل الهلال (اخضر).
[/JUSTIFY]
[/SIZE]
وإن طال السفر – محمد عبد الماجد
صحيفة قوون
