نقطة سطر جديد او بشه هدف جديد

سيكافا دي زي (الساردين) المدتو منتهية ..وتاريخ صلاحيتو ضارب

الناس البتكلموا عن مباراة الهلال والزمالك الامس على انها (ودية)…هم لا عندهم في العير ولا في النفير

الروعة نفسها جاءت في مباراة الهلال والزمالك ماشه بي كرعينها

فرحان اوي…(يا عم مواصلات الكلاكلة بي فين؟).
فرحان اوي يعني.

يا عم روّح.

ناس (تر الكنب) جاهم (سيل) شال ليه منهم اربعة غرف وصالون ومطبخ والحمامات ودولاب وطقم جلوس وكرتونة طحنية.

هسع (كرتونة الطحنية) الدخلها هنا شنو؟.

لو ما دي حركة (سيكافية) منك.

ناس (ود اللكد) جاهم سيل ما شال منهم اي شيء غير (شاحن الموبايل).

حتى (السيل) علمتوه يشيل (الشاحن).

طبع كعب.

واللـه دا سيل راقي البشيل بس (شاحن موبايل).

ناس المريخ اتأهلو بدون (شكوى).

اتأهلو بي تلفون ساكت.

واللـه لو علي رأيّ مفروض يكون كأس سيكافا (شاحن موبايل).

ما اكتر من (شاحن موبايل).

ولو جاملوا البطل كدا مع شاحن الموبايل يدوه (سماعات).

اكتر من كدا يكون دا تبذير عديل كدا.

سيكافا دي نحن في شارع حلتنا ممكن كل اربعة ايام نعملها.

في الحوش الكبير ممكن نكونها.

بالمناسبة سيكافا دي ممكن يحسموا امرها من شارع واحد في العمارات.

جمال الوالي الايامات دي محتاج ليه لي بطولة.

عاوز يرفع معنوياتو شنو؟.

عاوز يعمل ليه لي ناس (سلك) موضوع يتنونسو بيها.

المريخ الايامات دي عندو فقر حاد في الانتصارات…انتصار في سيكافا ما قادرين يحققوه.

جمال الوالي عاوز ليه بطولة (يشرب بيها الشاي).

يتصور بيها في الجرايد.

يطلع بيها تصريح.

يعمل بيها حوار في التلفزيون.

المريخاب الايامات دي يكون الشاي الايامات ما قاعد يتبلع ليهم.

قالوا نشارك في (سيكافا).

مسكول من جمال الوالي في سيكافا بـ (كأس).

انتوا فاكرين البطولة (الوهمية) دي فيها عرق.

ولا عاوزة ليها تعب.

دي بطولة زي سكر التموين الكان البشيلوه زمان بالكرت.

زي الصرفة.

بطولتكم دي زي (لبن) الاغاثة…بوزعوه للناس المحتاجين فقط.

سيكافا دي زي (الساردين) المدتو منتهية ..وتاريخ صلاحيتو ضارب.

ديل يقولوا ليهم شنو؟.

ديل يشرحوها ليهم كيف؟.

نحن حيرونا في (فرحتهم) الحالجة دي.

الناس البعلبوا في البطولة الكبرى ومع التمانية الكبار.

الهلال ضرب ليك الزمالك من (مطار الخرطوم) وهسع قاعدين منتظرين الشاي.

انت الليلة مالك ماسك لينا موضوع (الشاي) دا من الصباح.

قصة الشاي شنو؟.

اقصد منتظرين (الشكوي).

خلوا تلفوناتكم فاتحة.

خلوا نومكم خفيف.

خلوا اضانكم قريبة.

ناس الفيفا ديل ممكن يدقوا ليكم جرس في اي لحظة.

هسع انتوا يا ناس المريخ سيكافا دي بتحضروها بدون الواحد ما يفقع ليه ليمونة في جوفه.

سيكافا دي زي الزول البسافر ليه بي (لوري) يصل الخرطوم الصيدلية من طرمبة البنزين ما يقدر يفرزها.

البطولة التى يلعب فيها الهلال الان مرحلة المجموعات او دور التمانية..خرج منها المريخ من دور الـ (64).

يعني الناس البتكلموا عن مباراة الهلال والزمالك الامس على انها (ودية)…هم لا عندهم في العير ولا في النفير.

ديل ناس قاعدين ساكت.

الودية ذاتها مفروض ما يتكلموا فيها.

مفروض يتبكموا كدا بس.

ولا كلمة.

ناس في بطولة سيكافا (للساردين)…الى الان لم يحققوا انتصار إلا على فريق صومالي …(نادي ما عندو).

فريق لاعبيه كل لاعب لابس ليه فانلة بي لون مختلف.

فريق صومالي عندما يذهب للمشاركة في اي مناسبة نص اللاعبين بطلبوا حق اللجوء السياسي.

الناس الداشين ديل بتكلموا بي قوة عين عن بطولة طلعوا منها من دور الـ (64).

ديل طلعوا قبل اكتشاف الكهرباء.

طلعوا من البطولة وقت كانت ملوة البصل (شوال).

وحنة العريس كانت (17) يوم.

ويوم الخميس العصر ببدأ من يوم الاربعاء.

وكيلو الباسطة ما كان زي ما بحدث الان تسأل من سعرو فقط وتفوت.

ديل طلعوا من بطولة مع النباه الاول.

هسع فيكم زول بتذكر مباراة المريخ وكمبالا سيتي….(عيييك دي كانت متين؟).

تتخيلوا المباراة دي هي التى كانت سببا في خروج المريخ من دور الـ (64).

وتتصوروا ان تلك المباراة كانت في هذا الموسم وليس في الموسم الماضي.

شايفنها بعيدة خالص.

تلقاكم نسيتو.

يا كافي البلاء …المريخ بطلع من البطولة (مقدما) قبل المنافسات ما تبدأ.

يعني المريخ وقت خرج من دور الـ (64) نحن كنا قاعدين في بيوتنا.

لم نبدأ بعد في المشاركة في البطولة.

وقد بدأنا المشاركة مع الكبار في دور الـ (32) لقينا ليك المريخ طلع من البطولة من مرحلة التمهيدي.

اول مرة اشوف لي فريق مستعجل كدا في الخروج؟

سألنا ليكم من (المريخ) في بطولة الكبار قالوا لينا المريخ طلع.

قلنا ليهم دا شنو دا؟ اول مرة نشوف لينا فريق بعسكر في قطر شهر وبلعب امام بايرن ميونخ الالماني وبطلع من دور الـ (64).

انتوا ناديكم دا لو قلبتوه صواليين حلاقة احسن ليكم.

لو عملتوه محلات غاز افضل ليكم.

الطلوع من دور الـ (64) ما عاوز ليه (مقصورة).

ولا عاوز ليه باكات (طيارات).

ولا عاوز ليه (تلج).

ساكت واجعين لينا رأسنا في الفاضي.

عاملين لينا ازعاج من مافي.

ما شفتوا الهلال امس قدم مباراة موسيقية كيف؟.

المتعة ذاتها عندها رأي.

الروعة نفسها جاءت في مباراة الهلال والزمالك ماشه بي كرعينها.

شلناك شمعة هكذا يغني حمد الريح وهكذا نحن نحمل الهلال او يحملنا هو فنحوم به في الازقة والشوارع والبيوتات.

نشخبطه حروفا في الحيط ونكتبه علامة في الابواب.

ونشيلو شمعة.

تفرحنا بكل هذا الفرح عندما تكون في الموعد فتحضر كما حضرت بالامس موزعا للفرح للناس في الشاي والقهوة والشربات.

امتعنا الهلال بالامس قدم مباراة جعلت (العمة) في رؤوسنا اطول هامة وقامة وانصع بياضا.

شفتوا ليك زول لابس ليه عمة حمراء.

يمكن تكون دي فيها شتارة مبالغ فيها.

شفتوا ليكم زول لابس ليه عمة صفراء.

إلّا في صواني الحركة ممكن زول يكون لابس ليه عمة صفراء واقف عكس عقارب الساعة.

وقاعد يتكلم براهو.

قدم الهلال امس مباراة غاية في الروعة كل شيء كان فيها رائعا.

بداية من حركة الاطراف في الهلال الانيق سيسه لا يعرف ان يقدم كورة غير (انيقه).

كورتو انيقة من القون للقون.

من اول لمسة لي اخر لمسة.

عبداللطيف بويا تقدم مستواه كثيرا في الفترة الاخيرة واضاف مع تضحياته التى يقدمها المزيد من التركيز والتدقيق والاجادة.

المعز محجوب اثبت ان الكبير يبقى كبيرا في كل الاحوال ..دافع عن عرينه بهيبة كبيرة فكان كبيرا.

رغم الاخطاء الدفاعية الواضحة إلا ان اتير توماس والمحترف الراقي سمبو قدموا مباراة كبيرة واستطاعوا ان يوقفوا خطورة لاعبي الزمالك الذين يتميزوا بالمهارة.

بشه افضل من يتحرك وافضل من يحسن التعامل والتحرك امام المرمى.

يضع هدفه كما يضع رسالة في هاتف بريده الخاصة.

يفعل ذلك بكل سهولة.

رغم ان بشه اضاع كورة لعبها له مدثر كاريكا اسهل من الكورة التى لعبها له بكري المدينة وسجل منها بشه هدفا.

بكري المدينة مفروض بعد كدا يكتبوا ليه (حلايب) بي اسمو…اي حاجة في المصريين عملها.

صنع هدف التقدم.

ثم جاء وسجل هدف الانتصار بنفسه وهو يفج ليك لاعبي الزمالك مثلما يفج الموت ضحاياه ثم يسجل بيساره هدفا صعبا.

نزار حامد كفى انه نزار الصاقعة ..وهو صاقعة في كل حتى يتحرك فيها.

نيسلون اضاف الكثير لوسط الهلال وهو اعاد ترتيب الاوضاع في وسط الهلال بعد ان كانت هناك (فوضاوية) واضحة في اداء الهلال.

ضبط الايقاع بصورة غاية من الروعة.

مدثر كاريكا هو هكذا دائما يقدم السهل الممتنع.

عمر بخيت شارك بكري المدينة في نجومية المباراة وكان نعم القائد والمعلم.

اما اروع ما كان في مباراة الامس فقد كان جمهور الهلال الذي كان حاضرا رغم موقف الهلال الصعب في البطولة.

ادوا ضهرهم للكورة وقعدوا يشجعوا وهذا افضل ما يمكن ان يقدم للهلال.

معلق المباراة والاستديو التحليلي للمباراة ظل طوال المباراة مندهشا بهذا الجمهور العظيم.

يبقى الهلال عظيما بجمهوره هذا.

دائما هم في الموعد.

…….

ملحوظة : اداء الهلال وحده يؤهله للفوز بالبطولة كلها وليس التأهل عن طريق الشكوى.

هوامش

مبارك سليمان قاد المباراة بوعي وادارك وانضباط.

اتركوا مبارك سيلمان يعمل وما تدخلوا في عمله.

في حقيقة الامر ان ثلاثي الاحتراف في الهلال سيمبو وسيسه ونيلسون كانوا في غاية الروعة.

استمرار سيسه ونيسلون وسيمبو الي جانب سيدي بيه امر لا بد منه.

التسجيلات القادمة اذا اضاف الهلال لكشوفات خمسة لاعبين فقط على مستوى عالي وحسب الحاجة سوف يفوز الهلال بكل البطولات التى يشارك فيها.

سيسه يقدم مباريات كبيرة واظنه افضل طرف محترف يلعب في السودان.

تفوق سيسه في فترة قصيرة حتى على يوسف محمد طرف الهلال السابق.

اذا وجدنا طرف شمال في مستوى سيسه يكون الهلال عالج ازمة الاطراف بصورة نهائية.

دائما نحن نتمنى فارس لاعب الاهلي شندي في الهلال.

المحترف الاثيوبي اديس ايضا يشبه الهلال.

لا بد من دعم الهلال بعناصر قوية.

…..

عاجل : مع سيكافا حقتكم دي يا مريخاب مفروض ما نشوف لينا واحد منكم في الشارع.
[/JUSTIFY]

وإن طال السفر – محمد عبد الماجد
صحيفة قوون