ليه لمن تمشي للغسال بتلقى الاغنية الشغالة في الاذاعة (السنين)

تستوقفني مثل هذه القصص فيها بعض العبر لو كان فينا من (يدكر).

الناس ديل كلهم طلعوا (ما في اي زول في المكتب) مرات في زول بتبرع ويقول ليك الكلام دا.

معليش طلعت من الموضوع.

كان (هتلر) في حياته العامة (جاويشا) في الجيش الالماني مجرد شاويس في الحرب العالمية الاولى لا حول له ولا قوة.

بل ان (هتلر) هذا كان ضمن الجنود المسرحين الذين سرحوا عقب انتهاء الحرب ، فاضحى من بعد ذلك التسريح هائما في شوارع برلين عاطلا لا يجد ما يعمله فيتناهشه الجوع والعطش والبرد.

ابعد من كل ذلك فان هتلر لم يتلق اي تعليم اكثر من الذي هو لعامة الناس.

ذلك الجندي العاطل كما تقول روايته قرر وسط تلك الفوضى التى ضربت المانيا من جراء الحرب العالمية الاولى ان يكون هو سيدها ومنقذها من فوضاها.

عاوز يبقى شيء.

في تلك الفوضى استطاع ذلك الشاويش المسرّح عن العمل ان يثبت وجوده وسط قادة عظام في الجيش الالماني امثال ماكنزن ولودندورف وهند نبرج…واصبح في فترة وجيزة زعيما عليهم.

الناس ديل طبعا في ناس بعرفوهم.

يقول التاريخ ان مع هتلر كانت زوجته (ايفا بروان) التى لم تكن تتمنى غير الزواج من هتلر الى ان تحقق لها ذلك.

من تلك العوالم جاء هتلر ..ووضع ذلك التاريخ وان كان فيه الكثير من الوجع والسوء والخراب.

خرج هتلر من اللا شيء.

هتلر بكل قوته التى عرف بها وزعامته وقبضته الحديدية كان عاطلا عن العمل لا يجد ما يأكله.

كم (هتلر) خرجوا لنا في العالم من تلك الخرابات.

البدايات دائما ما يكون فيها مثل تلك العبر.

بعضها ينبت حزنا وبعضها ينبت فرحا.

وقد نبت لنا الطيب عبداللـه الذي جاء من شندي بالكثير من الفرح حتى ان اسدل علينا (ليل الفرح) فعرفنا في الليل الفرح بعد ان كان الليل عندنا من كتل الهم والشجن والالم.

استوقفني ان اغلب كتّاب اعلام المريخ كتبوا بعد سيكافا عن (ليل الفرح)…وهي اغنية للطيب عبداللـه يقول مطلعها (عود لينا يا ليل الفرح).

وهذا يعني ان الفرح كان غائبا عن المريخ (بركة الاحترفتوا)…فالعودة تأتي بعد غياب.

وإلا عندكم كلام تاني.

الشيء المؤسف ان ذلك الليل الذي غنوا له (فرحا) هو كأس سيكافا.

يعني صاموا وفطروا على بصلة اقصد على سيكافا.

اعود الى الطيب عبداللـه الذي تحجزني عنده بشكل خاص اغنيته التى كبتها ولحنها وتغني بها فكانت من اروع الاغنيات السودانية.

تلك الاغنية هي اغنية (السنين) وكثيرا ما اكتب عن تلك الاغنية ربما لأنها صادفت عندي هوى عند عثمان حسين وقد ذكرت ذلك كثيرا.

اذكر اني في بدايات هواياتنا الصحفية والتى مارسناها في البدء (هواية) اني حملت اوراقي وشنطتي وذهبت الي محاورة عثمان حسين في بيته في السجانة.

استقبلني عثمان حسين بعد ان هاتفته ورتبت معه للحوار اذكر انه طلب ان آتي له بعد الثانية ظهرا من اجل قيلولته التى يهجع فيها.

ذهبت له بعد الثانية ظهرا كما طلب واستقبلنا بكل الترحيب عند الباب وانا لا شيء في الصحافة اتلمس بعض من اسمي في بلاط صاحبة الجلالة.

مع ذلك كان ان استقبلني عثمان حسين وكان لي شرف ان احاوره ليكون ذلك من اسعد الاشياء التى امتعتني في الصحافة.

اذكر اني سألت عثمان حسين وقتها عن اغنية كان يتمنى لو انها كانت من اغنياته فقال بلا تردد هي اغنية (السنين) اغينة الفنان الطيب عبداللـه.

كبرت عندي اغنية (السنين) وانا اذكر ذلك الامر انصافا لهذه الاغنية الكبيرة واكرره دائما.

اعود الى الطيب عبداللـه الذي لم نبعد عنه ونحن نشهد له بـ (السنين).

الشيء الاخر الذي يرتبط عندي بهذه الاغنية هي انني متى ما ذهبت الي (الغسال) عشان اجيب لي هدوم او اوديه ليه هدوم بلقى في الراديو حق الغسال دا شغالة اغنية الطيب عبداللـه (السنين).

في علاقة بين المواضيع دي.

اي وقت امشى فيه للغسال بلقى الاذاعة شغال فيها اغنية (السنين) والغسال مبسوط وفرحان وبنقز ليك مع اغنية الطيب عبداللـه (السنين) بكل الفرح…رغم شقاوية (الحزن) فيها.

في حاجات غريبة بتحصل.

في فلسفات الزول ما بفهمها وقتها.

يمكن نفهمها في وقت لاحق.

يمكن.

دي حاجات نحن ما بنقدر نقول فيها حاجة.

زي المطرة.

المطرة مالها؟.

عندنا زول في الحلة قدر ما تقول ليه حاجة يقول ليك واللـه دي ما بقدر احددها ليك انا.

اجباتو واحدة زي ملاح البامية.

ملاح البامية هسع مالو؟.

تتكلموا ساكت انتوا؟.

الزول دا تقول ليه : الليلة السماء شايل – الليلة ح تجي مطرة يقوم يقول ليك واللـه ما معروف.

تقول ليه الليلة الواطة سخنة يقول ليك احتمال هسع الاحتمال الجابو هنا شنو؟.

في فلسفات غريبة في البلد دي.

نرجع للطيب عبداللـه عليكم اللـه ما تطلعونا من الموضوع.

تشتتوا جهود الزول..وتدفقوا ليه افكارو.

الطيب عبداللـه عندما كان في شندي سبقته الى الخرطوم اغنياته التى كتبها ولحنها وقدمها اغنية (ايام الخوالي) واغنية (اماني).

لذلك عندما جاء للخرطوم كان مكسر الدنيا بلغة ناس الخرطوم كان فنان معروف وهو في سن وقامة صغيرة ولونية مختلفة.

في الخرطوم قدم الطيب عبداللـه اغنية اسحق الحلنقي (الابيض ضميرك) بعد ان وجدها مكتوبة في صحيفة فلحنها وقدمها.

المعروف ان اغلب الاغنيات التى قدمت في ذلك الزمن كان الفنان يأخذها من جريدة.

وقد وجد الفنان محمد وردي اغنية التجاني سعيد (من غير ميعاد) في جريدة..وكذلك وجد اغنية (الطير المهاجر) في مجلة فقدمها قبل ان يلتقى بشعراء تلك الاغنيات.

الطيب عبداللـه وجد قصيدة الحلنقي (الابيض ضميرك) في جريدة فلحنها وكان قبله قد لحنها الفنان ابراهيم حسين لكن ابراهيم حسين تنازل عن الاغنية بعد ان وجد الطيب عبداللـه لحنها وقدمها بصورة رائعة وجميلة.

وهذا امر يثبت روح الفنانين في ذلك الوقت وتعاونهم رغم المنافسة الكبيرة التى كانت بينهم.

من بعد قدم الطيب عبداللـه اغنية يا فتاتي وقدم يخلق من الشبه اربعين وهي اغنية كان يفترض ان يغنيها الفنان محمد وردي لكن الطيب عبداللـه كان اسبق اليها.

الطيب عبداللـه ايضا اشتهر بـ (اندب حظي ام امالي) اغنية الحقيبة الشهيرة.

اردنا ان نقول في هذه المساحة انه كما هنالك جبابرة وظلمة مثل هتلر هنالك رائعون ومبدعون مثل الطيب عبداللـه الذي جمّل لنا الحزن في الاغنية السودانية وقدمه لنا بصورة فيها الكثير من البهو والراحة والجمال.

اها يا جماعة عليكم اللـه ما ارتحتوا من سيكافا شوية.

ترتاحوا وين ؟..وانا عملت ليكم (من الغلاف للغلاف) في حكاية سيكافا دي.

عشان كدا قلت نبرد شوية ونتكلم عن (الطيب عبداللـه).

….

ملحوظة : طبعا في ناس عاوزين الحديث بس عن سيكافا.

هوامش

شنو كمان يا الهلالاب انتوا عاوزين تعملوا لينا (سيكافا) شغلة.

نحن فترنا من سيكافا دا.

عملتوا لينا الشغلة كلها (سيكافا).

واحد مريخابي زوجتو جابت ليها (بنت).

صاحبكم كان عاوز (الولد).

زولكم شال ليه (قفيفة) كدا وقال يمشي يجيب حاجات السماية.

زوجتو قالت ليه اوعك تمشي تجيب لي حاجات شوية.

الراجل مشى جاب ليه بصلة ولميونة وربع كيلو لحمة.

المرا مسكت (القفيفة) وقالت ليه عليك اللـه الحاجات دي لو جابوها ليك في (سيكافا) الهوينة دي بتقبل بيها.

غايتو انتوا يا الهلالاب عاوزين تدخلوا (سيكافا) في اي حاجة.

رأيكم شنو تعملوا ليكم مهرجان تسموه مهرجان (التسكف العالمي).

وتجيبوا ليكم مجموعة من الحمام الطاير.

في واحد شليق قال لي فريق عزام دا في تنزانيا فرقة مسرحية.

قلت ليه باللـه شوف.

نحن كنا فاكرتو فريق كورة.

نحن التزوير دا كنا فاكرنو فقط في فيتا كلوب.

اتاريهو طلع في (عزام) برضو.

عزام شنو كمان؟.

انتوا الاسماء دي بتجيبوها لينا من وين؟.

….

عاجل : هسع في تنزانيا ممكن زول يقول بالطول بالعرض عزام يهز الارض…(احلف ما في زول بقول كدا).

[/JUSTIFY]

وإن طال السفر – محمد عبد الماجد
صحيفة قوون