اتعودنــــــــــــــــــــــــــــــــــــا

اتعودنا.
اتعودنا في كل يوم الكهربة تقطع الساعة ستة ونص مساء ..تقوم تتطقطق اصابعينك…تفتح الشباك وتطلع الموبايل من الشاحن.
اتعودنا.

اتعودنا الكهربة وقت تقطع الساعة ستة ونص وخمسة دقائق نموت من الفرحة ونقول الليلة ناس الكهربة ديل عاوزين يجنوا مالهم ما قطعوا الساعة ستة ونص.

واللـه ما قصروا معانا.

اتعودنا.

اتعودنا نطلع الصباح نقيف في الشارع في مظلة المواصلات بتلقى حاجة التومة راجعة من الفرن شايلة ليها (7) رغيفات.

(7) رغيفات بالعدد.

وحاج الجيلي واقف في المظلة كل يوم بقول ليك الليلة الظاهر مواصلات مافي.

هي متين يعني كانت في مواصلات عشان تقول الليلة ما في مواصلات.

اتعودنا.

تجي حافلة مليانة الناس مشمعة فيها …فيها زول فاتح الشباك ومركب السماعات.

وبت ظاهر عليها طالبة.. شغالة بالواتس آب كل خمس دقائق تقوم تضحك براها.

وتاني ترجع (تكشر).

تضحك.

اتعودنا.

اتعودنا زول في الحافلة (نازل معاش) قاعد يتكلم (كلامو كتير) بعترض على اي حاجة.

بعترض على السواق.

وبعترض على الكمساري.

وقت خلاص يزهج يقوم يعترض على الركاب (الزمن بقى كعب والناس مساختهم بقت عاوزة ليها فجل).

ما بتقابلوا.

هذا الرجل وقت يدق للسواق عشان ينزل يقوم السواق يتغاتت عليه ينزلو ليك في المحطة التالية من المحطة العاوز ينزل فيها.

السواق يتآمر عليه مع الكمساري يفوتو محطتو.

الراجل يقوم من مقعدو يهرج ويعترض وينقنق يقول للكمساري يا ولدي انا وقت (نزلت معاش) ما تعبت التعب البتعملوا لي فيه الان.

اتعودنا.

اتعودنا نرجع اخر اليوم الكبري مقفول وواحد من الناس يضرب ليك تلفون يقول ليك عاوز لي قروش.

ترجع الشوارع بقت ضيقة لو عاوز (تتلفت) إلا تقول للزول الجنبك عن اذنك شوية.

عشان تتلفت وترجع كما كنت.

اتعودنا.

اتعودنا نلاقى كل يوم الساعة اربعة وربع عصرا عبدالسميع شيال التقيلة راجع من الشغل.

كل يوم بلاقيني في عمود الكهربة منو ودكان متوكل ود الشيخ.

بلاقيني عبدالسميع وهو في حالة هجوم ضاري على الكمساري.

دائما بكون (ناسي) الباقي عند الكمساري هو بعتبر الحركة دي من الحكومة.

الحكومة خلتوا ينسى الباقي عند الكمساري.

اتعودنا.

اتعودنا الساعة تلاتة (نص النهار) تجيك رسالة من البيت ما تنسى الرغيف وجيب معاك زبادي وطعمية.

وتجيك رسالة بعد الرسالة الاولى دي مباشرة مختصرة وواضحة ، بتتكون من كلمتين (الغاز قطع).

اتعودنا.

اتعودنا تمشي يوم خمسة عشان تصرف ماهيتك …الصرّاف يعاين ليك سمح زي كأنك بتطلب ليك حاجة ما من حقك.

يعاين ليك (24) مرة ويقول ليك الماهية لسع ما جات.

ترجع زعلان ..تضرب لي واحد مرتاح تقول ليه عليك اللـه رسل لي رصيد.

اتعودنا.

اتعودنا الساعة خمسة و23 دقيقة ..يجيك واحد ولا بتعرفو سمح ..يتمغّا قدامك ويقول ليك : (اديني شاحن موبايل).

ما تقدر تقول ليه اي حاجة.

تديّه شاحن موبايل ابرة يقول ليك لا عاوز شاحن مشط.

تديهّ مشط يقول ليك لا عاوز ابرة.

تديّه ليهم الاتنين يقول ليك خليهن هنا بجيك ليهن راجع.

اتعودنا.

اتعودنا في نفس الحتة تعاين لي موبايلك الساعة سبعة و51 دقيقة تلقاه عاوز شحن.

بطاريتو خط واحد.

اللـه يلعن (الواتس آب) يلهط ليك كهربة الموبايل زي الرغيف وقت يمتص ليك السليقة.

وحكمة اللـه (الرغيف) بكون ناشف.

اتعودنا.

اتعودنا في نفس الوقت تلقى ليك اربعة نسوان واقفات في الشارع بعترضن بشدة على الزول البخت (الوسخ) في هذا الركن.

هو الوسخ بختو هنا العربية ما بتدخل هنا مية مرة قلنا النفايات دي طلعوها في الشارع الرئيسي.

الغريبة النسوان الاربعة ديل كل واحدة بتطلع منهن وهن يتلصصن ويمشن على اطراف اصابعهن عشان يختوا كيس الوسخ في نفس الحتة التى اعترضن عليها.

اتعودنا.

اتعودنا على حراق الروح وبقى جلدنا تخين ..ودمنا ذاتو بقى بارد.

ايمان بنت خالتك سعاد جاها عريس قالت عاوزة تقرأ.

وهي لا عاوزة تقرأ ولا حاجة اليوم كلو قاعدة في الحدايق مع (سامي).

ويوم ما تكون قاعدة في الحدائق بتكون قاعدة في (الواتس آب).

اتعودنا.

اتعودنا نمشي الحفلة ، ما نلقى كراسي يجيبوا لينا العشا متأخر والبارد بكون ما بارد (ليه دائما بارد العرس بكون مسخن).

والعريس والعروس بجوا متأخرين.

وفي (مرا) كبيرة في السن كدا في اي حفلة بتفتش ليها في (شافعة) رايحة.

لابسة ليها لبسة حمراء وفي رأسها كاب.

اتعودنا.

اتعودنا في اي دكان يكونوا واقفين في الدكان دا عشرة انفار يجي زول بدون ما يسلم يقول لبتاع الدكان عليك اللـه اعمل لي طحنية بي اتنين جنيه ، سريع عشان انا مستعجل.

زي كأنو الواقفين في الدكان ديل واقفين في صف العمرة ولا بستأذن.

اتعودنا.

اتعودنا مننا ولينا كدا نضاير في نفسنا (الحزن)..ونتنفض ليك كدا مع النور الجيلاني وهو بغني (جانا العيد وانت بعيد ابيت ما تعود تبارك العيد).

والعيد ما بنعرف ليه اي حاجة.

اخر عيد ما شفنا فيه غير (حبة) حلاوة.

نحن ذاتو (الحزن) مبارينا من ميدان الدافوري لمن كانوا بطلعونا برة التقسيمة.

بقولوا لينا انتوا جيبوا الكورة من بدري عشان انتوا لسه صغار ما بقيتوا للكورة.

ونحن شفع نتسابق على الكورة اي واحد فينا عاوز يجيب الكورة وقت تصل الكورة اول – زي كأنك دخلت كلية الطب.

تنتشر من الفرح.

اتعودنا.

اتعودنا نصلح الفول بشوية ضحكة ولمة مع بصلة كدا فوقانية ..وشمار ودكوة.

ومن الشوط الاول ..نقول لبتاع الدكان ألحقنا بي (5) رغيفات زيادة.

ننسف ليك الفول دا نسف صاح ثم نقوم على كدا عشان نحصل المسلسل.

ايام كان الناس بحصلوا المسلسل.

ويقعدوا ليك في النادي الى ان تنتهي السهرة.

ثم نخلق موعد جديد للقاء باكرا في الغد.

نتلملم ..وما نخلي لينا حاجة ما نتكلم فيه.

ووقت خلاص المواضيع تكمل علينا نفتح ليك سيرة اننا لازم نعمل رحلة.

ونجمع لينا قروش.

الغريبة كل مرة كنا بنجمع القروش..لكن ما بانمشي الرحلة.

من الزمن داك كان في بيناتنا جماعة بتاعين لجان.

يجمعوا ليك قروش الرحلة ثم يلغوا ليك الرحلة.

نحن كنا ما فاهمين البحصل شنو؟.

الزمن كان سمح عشان كدا ما كنا بنسأل من القروش ولا بنطالب باعادتها.

اتعودنا.

اتعودنا في البلد دي تمشي ليك اي مؤسسة عشان تطلع ليك رخصة او بطاقة او ورقة رسمية..يشيلوا منك الرسوم.

ثم يقولوا ليك تعال الاسبوع القادم الشبكة طاشة.

والحاجات ماشى تحت تحت (ما في اي شبكة طاشة).

ليه الناس بقت كدا.

ليه الاخلاق اتراجعت كدا بقينا ما بنعمل حاجة ساكت.

لازم تشيل حقك.

وترجع البيت شايل ليك (بطيخة).

البطيخة ان شاء اللـه تنفعكم.

اتعودنا.

اتعودنا تلقى ليك موظف مركز كدا في شاشة الكمبيوتر ..وقدامو كباية شاي وطالب جبنة وشايل ليه سجارة.

وكل مرة يقول ليكم كدا تروا شوية في زول هبش السلك.

ثم يضيف مقولته العتيقة (الشبكة طشت).

اتعودنا.

اتعودنا على نفس الحركات.

الولاية مستعدة جيدا للخريف.

والسلطة مسيطرة تماما على الاوضاع.

والاسعار رخيصة.

والمواصلات فاضية.

وما في اي مشكلة.

اتعودنا.

اتعودنا على الصادق المهدي كل (45) يوم يوقع ليه (اتفاقية) جديدة الدنيا تقوم وتقع.

والناس يحللوا..ويفسروا.

والصادق المهدي يصن كدا عشان يوقع ليه اتفاقية جديدة.

اتعودنا.

اتعودنا على تأجيل رحلة الخطوط الجوية السودانية.

وانك تفتح التلفزيون تلقى نفس الفيلم الخليتو امس شغال.

العجيب قدر ما تلف وترجع على تلك القناة تلقى الفيلم شغال.

وفي نفس المشهد الخليتو فيه.

تغيب شهر تلقى الفيلم في نفس اللقطة.

وحاجة كلتوم معترضة على سيد الدكان الايامات دي فولك كعب.

وسيد اللبن دائما بتعتذر ليه ما عندي ليك قروش لسه ما صرفنا.

وبتاع امجاد البتضرب ليه تلفون عشان يجيك بقول ليك انا بعيد واللـه.

اتعودنا.

اتعودنا ناس عثمان الكحيلي كل اربعاء يقولوا ليك عندهم عم مات.

هم الجماعة ديل عندهم كم عم؟.

واللـه قادر كدا ما تمشي ليهم وتعزيهم في وفاة عمهم.

واللـه قادر ما تقول ليهم نادوا لي الحاجة (مريم) عشان اعزيها.

اتعودنا.

واللـه اتعودنا.

اتعودنا المنتخب الوطني بقيادة محمد عبداللـه مازدا ينهزم (تلاتة).

تلاتة ثابتة كدا.

ما فيها اي تغيير.

التلاتة بتاعة المنتخب بقت لينا زي القهوة والشاي …راسخة رسوخ مبالغ فيه.

حتى دي اتعودنا عليها.

اتعودنا بعد كل (تلاتة) نقوم نهاجم مازدا والمنتخب والاتحاد العام.

وما نتعشى (نبيت القوا).

….

ملحوظة : واللـه حرام عليكم.

هوامش

يا مازدا (التلاتة) في الطلاق (بينونة كبري).

معقولة انت في كل مباراة بتأخد تلاتة.

اقول ليكم شنو؟.

اعمل ليكم ايه.

لا سافرت.

ولا حضرت الكورة.

عليك اللـه خلينا في حالنا.

انتوا ما بتفتروا.

انتوا ما عندكم احساس.

ما عندكم شعور كلكم (صلع).

صعبتوها علينا شديد.

قفلتوها معانا.

وهي اصلها قافلة.

شكلها ح تجي مطرة.

وح نطلع الشارع نغني يا مطيرة صبي لينا في عينينا (كيتا على ناس الولاية).

نقول شنو؟.

في البلد دي بقى البضرب اتنين في اتنين بتطلع ليه بي (تلاتة).

في واحد ما في.

الشال الواحد منو؟.

الموضوع عاوز ليه (صبر).

اصبروا بس.

ما عندنا حاجة نقولها ليكم اكتر من كدا.

…….

عاجل : لو في واحد من ناس الهلال مشى لوزان خلوه يشوف لينا حل لي (تلاتة) مازدا لو اشتكيتوا بتكسبوها.

[/JUSTIFY]

وإن طال السفر – محمد عبد الماجد
صحيفة قوون