للبنات.. فقط

ﻭﻗﺎﺍﺍﺍﺍﻟﺖ إﺣﺪﺍﻫﻦ ﻧﺎﺻﺤﺔ البنات فقط لاسيما البايرات بمناسبة موسم الإجازات وعودة المغتربين لقضاء العيد وإقامة الأفراح والليالي الملاح لإكمال نصف الدين أو إرضاء الو الدين:

عزيزتي البنت..

ﺧﺘﻲ ﺍﻟﻔﻲ ﻳﺪﻙ ﻭﺭﻛﺰﻯ ﻣﻌﺎي :-

1/ ﻟﻮ ﻋﻨﺪﻙ ﺣﺒﻴﺐ وللا زميل من ﻧﻮﻋﻴﺔ ﺍﻟﻌﺎﻣﻞ صاحبك ﻭﻣﺎ ﻓﺎهمة ﻟﻴﻪ ﺭأﺱ ﻣﻦ ﻗﻌﺮ ﺩﺍﻙ ﻃﻮﺍﺍﺍلي ﺯي ﺍﻟﺸﺎﻃﺮة ﻛﺪﺍ ﻓﺘﺸﻲ ﻟﻴﻚ شكلة ﻣﻌﺎﻫﻮ ﻭﺩﻣﻌﺘﻴﻦ ﺗﻼتة وﻗﻮﻟﻲ ﻟﻴﻪ أﻧﺎ ﺣﺎسة إﻧﻨﺎ ﻣﺤﺘﺎﺟﻴﻦ ﻧﺒﻌﺪ ﻣﻦ ﺑﻌﺾ حبة ﻋﺸﺎﻥ ﻧﻘﻴﻢّ ﺍﻟﻌﻼﻗﻪ ﺩي وﺭﻛﺰي ﻋﻠﻰ ﻛﻠﻤﺔ حبة ﻋﺸﺎﻥ ﻟﻮ ﺍلقصة ﻓﺸﻠﺖ ﻳﺎﺧﺘي ﻣﺎ ﺗﻜﻮني ﺩقستي ﻭﺗﺠﻲ ﺗﺪعي علي، أهي دي أﻧﺎ ﻛﻠﻤﺘﻚ.

2/ جيبي ﻭﺭقة ﻭﻗﻠﻢ ﻭﺳﺠﻠﻲ ﻣﻮﺍﻋﻴﺪ ﺭﺣﻼﺕ ﺍﻟﻄﻴﺮﺍﻥ ﻭﺭﻛﺰي ﻋﻠﻰ ﺍﻟﻘﻄﺮية ﻭﺍﻻﺗﺤﺎﺩ وﺑﺎﻟﻜﺘﻴﺮ ﺍلخليجية، أﻭﻭﻭﻋﻚ ﻣﻦ ﻧﺎﺱ ﻃﻴﺮﺍﻥ ﺍﻟﻌﺮﺑﻴﺔ ﻭﻓﻼﻱ ﺩﺑﻲ ﺩﻳﻞ ﻭﺍﺣﺪ ﻣﻦ إﺗﻨﻴﻦ ﻳﺎ ﻣﻔﻠﺴﻴﻦ ﻳﺎ ﺑﺨﻴﻠﻴﻦ، ﻓﻠﺲ ﻟﻲ ﻓﻠﺲ أﺧﻴﺮ ﻟﻴﻚ ﻓﻠﺲ ﺳﻮﺍﻕ ﺍﻟﺮكشة ﺍﻟﺴﺎﻛﻦ ﻓﻲ ﺍﻟﺸﺎﺭﻉ ﺍﻟﻘﺼﺎﺩﻛﻢ.

3/ ﺑﻜﺮة ﻣﻦ ﺍﻟﺪﻏﺶ ﺧﺸﻲ ﻓﻲ ﺍﻹﺳﻜﻴﺮﺕ ﺍﻟﺠﺪﻳﺪ ﻭﺑﻠﻮزﺗﻚ ﺍﻟﺪﺍﺳﺎﻫﻢ ﻣﻦ أﺧﺘﻚ ﻋﺸﺎﻥ ﺗﻼﻗﻲ ﺑﻴﻬﻢ ﺍﻟﺠﻜﺲ ﻓﻲ ﺣﺒﻴﺒﻲ ﻣﻔﻠﺲ ﺩﻳﻚ وبعدها ﻋﻠﻰ ﺍﻟﻤﻄﺎﺭ طوالي للمرابطة.

4/ أﻭعى تختي ﻓﻲ ﺑﺎﻟﻚ ﻭﺩ ﺟﻴﺮﺍﻧﻜﻢ ﺍﻟﺠﺎي ﻣﻦ ﺩﺑﻲ ﻭللا ﻭﺩ ﻋﻤﻚ ﺍﻟﻔﻲ ﺍﻟﺴﻌﻮﺩﻳﺔ، ﻛﺎﻥ ﺩﺍﻳﺮﻙ ﻛﺎﻥ ﻛﻠﻤﻚ ﻣﻦ ﺯمااااﻥ ﻣﺎ ﻛﻨﺘﻲ ﻟي هسي ﺑﺎﻳﺮة، ﻭﻛﺎﻥ ﺍﻟﻠﻪ أﺭﺍﺩ ﻭﻓﻜﺮ ﻓﻴﻚ حاتلقي منافسة ﺷﺮسة ﻣﻦ ﺑﻨﺎﺕ ﺃﻫﻠﻚ ﻭﺑﻨﺎﺕ ﺍﻟﺠﻴﺮﺍﻥ، ﻭﻛﺎﻥ ﺣﺼﻞ ﻭﻋﺪﻳﺘﻲ ﻣﻦ ﺩﻭﺭﻱ ﺍﻟﻤﺠﻤﻮﻋﺎﺕ ده وﻭﺻﻠﺘي ﺍﻟﻨﻬﺎﺋﻲ ﻭﻋﺮستي أﻭﻝ شكلة بيناتكم حاﻳﺬﻛﺮﻙ ﺑﻲ ﻣﺎﺿﻴﻚ ﺍلهو ﻋﺎﺭﻓﻮ ﻭﺣﺎﻓﻈﻮ، اﻟﻌﺒﻲ ﻓﻲ ﺍﻟﻤﻀﻤﻮﻥ يا ﺑﺖ أمي، ﺍﻟﻐﺮﻳﺐ ﻻ ﻋﺎﺭﻑ ﻟﻮﻧﻚ ﺍﻷسمر ﺍلفسختيهو ﺑﺎﻟﻜﺮﻳﻢ وﻻ ﺷﺎﻓﻚ ﺑﺎﻟﺘﻮﺏ ﻭالسفنجة ﺍﻟﺨﺪﺭة ﻣﻨﺘﻈﺮة ﺳﻴﺪ ﺍﻟﻠﺒﻦ ﺑﻲ ﺍلبستلة.

5/ أﺑﻌﺪي ﻣﻦ ﻧﺎﺱ أﻣﺮﻳﻜﺎ وأختيهم، أﻭعى ﺗﺘﻐﺸﻲ ﻓﻴﻬﻢ، ﺍﻟﻮﺍﺣﺪ منهم ﺗﺸﻮﻓﻴﻬﻮ ﻗﺎﺷﺮ ﺗﻘﻮﻟﻲ ﺷﻐﺎﻝ ﻣﻊ أﻭﺑﺎﻣﺎ ذﺍﺗﻮ، ﻓﻲ اﻵﺧﺮ ﻳﻄﻠﻊ ﺑﻐﺴﻞ ﻋﺪة ﻓﻲ ﻣﻄﻌﻢ ﻭﺩﺍﻳﺮ ﻳﺴﻮﻗﻚ ﺗﺮﻏﻲ ليهو ﺍﻟﺼﺎﺑﻮﻥ وبهدلة الإنجليزي مااابتقدري عليها بتحرجك مع الخواجات ساي.

6/ أﺑﻌﺪي ﻣﻦ ﺍلبيجي ﺷﺎﻳﻞ ﺷﻨﻂ ﻛﺘﻴﺮة ﺩﺍﻙ، ﻣﺎااا تفرحي ﺗﻘﻮﻟﻲ ﺩﺍ ﻣﻘﺮﺵ ﺟﺎي ﻣﻠﻴﺎﻥ ﻫﺪﺍﻳﺎ، ﺍﻟﺰﻱ ﺩﺍ ﺗﻠﻘﻲ أﻣﻮ ﻧﺠﺎﺍﺍﺍضة ﻭ أﺧﻮﺍﺗﻮ ﺷﻴﺎﻻﺕ ﺣﺎﻝ وﻃﻠﺒﺎﺗﻬﻢ ﻛﺘﻴﺮة، لمن ﺗﻌﺮﺳﻴﻬﻮ ﺍلحبة دي ﻣﺎ ﺑﺘﻠﻘﻴﻬﺎ ﻣﻨﻮ، ﻛﻠﻬﺎ لي ﺃﻫﻠﻮ.

7/ أسمعي ﻛﻼمي وأﺑﻌﺪي ﻣﻦ ﻧﺎﺱ ﺃﻭﺭﻭﺑﺎ الواحد منهم يجي هنا يعمل فيها سفير وهو هناك كان كابي الزوغة وسايق ليهو تاكسي وأوربا ذاااتا ماعندها عمار.

8/ أﻭﻝ ﻣﺎ ﺗﻘﺒﻀﻲ ﻓﻲ ﻭﺍﺣﺪ ﺍﺳﺄﻟﻴﻬﻮ إﺟﺎﺯﺗﻚ ﻛﻢ؟ ﻛﺎﻥ ﻃﻠﻌﺖ أﻛﺘﺮ ﻣﻦ ﺷﻬﺮ ﺷﻴﻠﻲ ﺳﻔﻨﺠﺎﺗﻚ ﻭ أﺟﺮي ﻣﻨﻮ، أﻭﻭﻭﻋﻚ ﺩه ﺍﻟﻨﻮﻉ ﺍلبيقعد ﻫﻨﺎ 6 ﺷﻬﻮﺭ ﻭﻳﺴﺎﻓﺮ 6 ﺷﻬﻮﺭ، ﺗﻌﺮﺳﻴﻬﻮ ﻳﺮﻣﻴﻚ ﻫﻨﺎ إﻗﺎمة ﻣﺎ بيطلعها ﻟﻴﻚ، ﻗﻌﺎﺩ ﻟﻲ ﻗﻌﺎﺩ ياختي أﻗﻌﺪي ﻓﻲ ﺑﻴﺖ أﺑﻮك.

9/ ﺭﺟﺎﻝ ﺍﻟﻨﺴﻮﺍﻥ أختييييهم، نحن ﺑﻨﻠﻌﺐ ﻋﻠﻰ ﻧﻀﺎفة، ﻣﺎﻟﻚ ﻭﻣﺎﻝ ﺍلفضلة ﻭﺍﻟﻀﺮة.

10/ ركزي على موديل الموبايل وشكل الجزمة بعكسوا الواقع كتير.. والتزمي إنتي كمان بالحشمة والوقار.. كللللهم شبعانين في الحنكشه والموضات والواحد بيقول بس داير لي بت بلد بسيطة ومستورة.. العبي الدور.

أها.. ده غيض من فيض.. النقاط العشر دي بس للمساعدة.. الباقي إنتي وحنكك وحظك.. وأنا ﻏﻴﺮ ﻣﺴﺆولة ﻋﻦ أي ﻣﻘﻠﺐ ﺗﺎﺧﺪﻳﻬﻮ ﻣﻦ ﻭﺍﺣﺪ طلع مفتح أكتر مننا، أﺻﻠﻮ ﺍﻟﻤﻮﺿﻮﻉ ﺩه ﺩﺍﻳﺮ ﻣﻊ ﺍﻟﺸﻄﺎﺭة إﺣﺴﺎﺱ، وﻟﻮ ﻣﺎ ﻋﻨﺪﻙ إﺣﺴﺎﺱ وعينك نجيضه ﻣﺎاااا ﺗﺠﺎﺯﻓﻲ ياختي.. بورة مضمونة ولا عرسة مجهجهة!

تلويح:

أعزائي الشباب.. المغتربون على وصول.. دسوا حبيباتكم!