اضرب عصفورين بحجر واحصل على نص فرخة رصيد مجاني

زمنا قبل الفضائيات كان اي واحد حفظ ليه اسم لاعبين في الارسنال بمنح وسام (الخبرة) من الطبقة الاولى ويطلق عليه في الحلة لقب (خبير)

المباراة كلها قالوا ليك جمهور عطبرة بغني لنزار حامد في اغنية العطبراوي (ما اعتيادي اصلك ما اعتيادي)

مازدا بتاعنا دا لو مسك (انجلترا) …كانت انجلترا في اول مباراة اعدادية بتتغلب تلاتة

انا ضد الفاتح النقر….(اقيفوا ما تفهمونا غلط لمن تفهمو الكلام من ثم لو عاوزين تغالطوا غالطوا).

ما تغالطوا من غير فهم.

وضد نقد.

وضد برهان تية.

ومحمد محي الدين الديبة.

ضد التحاليل الفنية والتى قالت ان الهلال لعب بطريقة 4 4- 2..امام الامل عطبرة.

ضد حكاية الاسلوب البقولوه في القنوات الفضائية.

نحن زمان كان عندنا مدرب كان ماسكنا (13) سنة.

(13) سنة بنلف في الميدان.

في الـ (13) سنة دي كان بقول لينا جملة واحدة.

جملة واحدة ما في غيرها.

كان بقول لينا جملة واحدة : (اطلعوا وانزلوا كلكم مع الهجمة).

بس كدا.

(13) سنة كان بقول لينا في الجملة دي (اطلعوا وانزلوا كلكم مع الهجمة).

ونحن عشان اكون صريح معاكم كنا ما فاهمين اي حاجة.

وكنا بنعتبر هذه الجملة هي قمة التدريب.

وانها اصعب حاجة في عالم كورة القدم.

وكان مدربنا على جملتو دي بيعتبر (خبير فني) كبير ..وكان معتمد من ضمن الخبراء الفي البلد دي.

اصلا في البلد دي اي واحد عمل ليه (جلحات) بعمل ليك فيها خبير.

البعمل فيها خبير في الموية.

والبعمل خبير في الملاريا.

والبعمل فيها خبير في الطقس.

والبعمل فيها خبير في اغنيات عبدالعزيز محمد داؤود.

اي واحد بعمل فيها (خبير) حسب صلعتو.

مدربنا كان خبير في عالم كورة القدم.

وكان اليوم والتاني بقول لينا الفيفا غيرت القانون دا وعملت قانون جديد.

وكنا نحن بنشيل ونصدق.

زولكم كان عامل فيها خبير في (الفيفا).

وزمنا داك كان قبل الفضائيات اي واحد حفظ ليه اسم لاعبين في الارسنال او يوناتيد بمنح وسام (الخبرة) من الطبقة الاولى ويطلق عليه في الحلة لقب (خبير).

رغم اني في قناعة نفسي …(بيني وبين نفسي) يعني شايف حكاية (اطلعوا وانزلوا كلكم مع الهجمة) والتى كان يرددها لنا مدربنا المباراة كلها ما عاوزة ليها اي (خبير).

وما عاوزة ليها حتى مساعد مدرب.

ولا مدرب حراس.

العبارة دي اي ممرض في الدنيا ممكن يصرفها ليك (وما تجيك اي عوجة).

زي الحقنة.

الدليل على ان عبارة المدرب دا كانت ما نافعة وما فيها اي فايدة هو اننا في كل موسم كنا بنلعب سنترليق البقاء او الهبوط.

كل سنة نحن في الحالة دي.

تفتكروا لو عبارة (اطلعوا وانزلوا كلكم مع الهجمة)…فيها فايدة بنلعب في كل موسم (سنترليق).

تفتكروا الجملة دي فيها فايدة.

كنا بنطلع من (الهبوط) بي كرامة البليلة.

الغريبة ان مدربنا كان لابس ليه (نضارة) وكان عندو (13) شهادة من الفيفا وعندو (صلعة) وبعد المجهود دا كلو ما بقول لينا اكتر من (اطلعوا وانزلوا كلكم مع الهجمة).

وفي قناعاتي الخاصة (بيني وبين نفسي) والكلام دا ما يطلع من العمود دا.

عبارة (اطلعوا وانزلوا كلكم مع الهجمة) ما عاوزة ليها (نضارة) نظر.

ولا حتى نضارة هوا.

ما عاوزة التعب دا.

بدون (نضارة) ممكن تقولها.

وكنا على قناعة تامة ان عبارة (اطلعوا وانزلوا كلكم مع الهجمة) ما عاوزة ليها ولا (شهادة تقديرية) ولا شهادة من اللجنة الشعبية ناهيك عن (13) شهادة من الفيفا.

دا كلام فارغ ساكت.

عليكم اللـه ما تخموا الناس.

نحن فترنا من الخم البعملوا فيه الجماعة ديل.

والشيء البتغيظ – عمكم مع عبارتو (اطلعوا وانزلوا كلكم مع الهجمة) عامل ليه (صلعة).

الصلعة في شنو؟.

خسارة (الصلعة) واللـه.

البسوى والما بسوى عمل ليه (صلعة).

هسع العبارة دي عاوزة ليها (صلعة).

جلحة واحدة في صفحة واحدة كتيرة عليها.

دي اي مشجع يدخل الاستاد اول مرة ممكن يقولها ليك.

حارقين رزنا في الفاضي ساكت.

لو عارفين الحكاية (هملة) كدا كنا بقينا مدربين.

هسع الواحد فينا كان بعد الخبرات دي يكون ماسك المنتخب الانجليزي.

اتخيلوا مازدا يمسك المنتخب الانجليزي تتخيلوا البحصل شنو؟.

البحصل واضح يا جماعة.

مازدا بتاعنا دا لو مسك (انجلترا) …كانت انجلترا في اول مباراة اعدادية بتتغلب تلاتة.

وبعد المباراة الاعدادية دي …المنتخب الانجليزي تاني ح يتغلب تلاتة.

واول مباراة رسمية للمنتخب ا لانجليزي الانجليز ح يتغلبوا (تلاتة).

وفي المباراة التالية تاني ح يتغلبوا (تلاتة).

وح تستمر (تلاتات) المنتخب الانجليزي كدا لمن يفهموا حاجة.

الشيء الوحيد البضمنو للانجليز ديل لو مسكهم مازدا انهم في اي مباراة ح يتغلبوا تلاتة.

المنتخب الانجليزي بقيادة لامبارد وجون تيري وستفين جيرارد ووين روني لو لعب امام الصومال ح يتغلب تلاتة لو كان المنتخب الانجليزي بقوده فنيا السوداني محمد عبداللـه مازدا.

دي حاجة اسألوني منها.

الاكيدة الوحيدة في كورة القدم السودانية.

عشان كدا نظريات المدربين ديل وتحليلاتهم ما قاعد اقتنع بيها.

الواحد فيهم يمسك ليك في حكاية (الثبات الانفعالي) ويقعد يحلل لينا في المباراة.

الطريقة التى لعب بها الهلال امام الامل في عطبرة كانت طريقة (عطبراوية).

الهلال لعب بالاسلوب العطبراوي.

الشغل العمل الهلال دا شغل حسن خليفة العطبراوي.

المباراة كلها قالوا ليك جمهور عطبرة بغني لنزار حامد في اغنية العطبراوي ما اعتيادي اصلك ما اعتيادي.

الهلال كلو كان ما اعتيادي.

حسن خليفة العطبراوي فنان بحجم الوطن كان صاحب (هلالية) صارخة غني للهلال وعرف في عطبرة بحبه الشديد للهلال.

لذلك عندما يلعب الهلال في عطبرة يلعب بنكهة العطبراوي.

الكورة تتنقل بين لاعبي الهلال على انغام (نسانا حبيبنا الما منظور ينسانا).

ولمن الهلال يسجل قون حارس الامل عطبرة بقعد يغني (القلوب مرتاحة وانت يا قلبي الما لقيت ليك راحة).

العطبراوي يختلف عن كل الفنانين ان الاغاني الوطينة هى التى قدمته ..وصل للناس باغنياته الرائعات عن الوطن.

كان يحتفي بالوطن احتفاء عظيما في اغنياته حتى انه كان يغني للوطن في المناسبات الخاصة.

العريس كان عادي ينزل من الكوشة ويقول للعطبراوي غني لينا (انا سوداني).

والعروسة كانت بدون حرج بتطلب من العطبراوي ان يغني ليها (مرحبتين بلدنا حبابة).

والناس تقعد تهجج ليك في يا غريب يلا لي بلدك ..لمن الشمس تشرق.

هكذا كان العطبراوي.

مع اغنياته تلك ..اتسجن حسن خليفة العطبراوي ودخل المعتقل بسبب نضاله ..واغنياته التى كانت تقاتل مع الجنود والشعب ضد الاستعمار.

هذا الفنان الكبير ..فخورين نحن بهلاليته.

وقبل ذلك نحن فخورين بوطنيته ..لكن حق لنا ان نفخر بان يكون فنان بتلك القامة هلاليا.

سعداء بذلك.

دفع ضريبة الوطن مع عطبرة حتى اضحت عطبرة قلعة للوطنية ورمزا للوطن.

اضحى للسكة حديد في عطبرة عبق (نسانا حبيبنا الما منظور ينسانا مالو سافر روح ماغشانا).

الاغنية التى كتبها حسب الباري سليمان وقدمها للعطبراوي دون ان يظهر له خشية من ان يرفض العطبراوي ان يتغني بالاغنية نتيجة لصغر سن شاعرها.

فقد كتبها حسب الباري سليمان وهو دون الـ (14) عاما.

عطبرة الامل والسكة الحديد والشاطيء.

عطبرة حسن خليفة العطبراوي ومصطفى مضوي وهاشم خوجلي.

مصطفى مضوي قدم اغنيات عاطفية بتفاصيل خاصة …اغنياته تشبه عاطفة عطبرة العفيفة.

اما هاشم خوجلي فهو كل الابداع يبني في نجوميته بعيدا عن الاضواء.

هاشم خوجلي حالة اخرى من حالات الابداع العطبراوي الذي يستعصم بعطبرة ويرفض دونه كل الدرر.

لكن من دون شك نحن على موعد مع هاشم خوجلي.

……

ملحوظة : اقيف هنا.

هوامش

الهلال في عطبرة بحجر واحد ضرب عصفورين.

واحد من العصفورين…(المريخ).

قعدوا يرجفوا لينا من غير سبب.

انتوا بترجفوا مالكم؟.

زمان كان في شركة اتصالات بتقدم خدمة عجيبة…كانت بتقول لينا اضرب عصفورين بحجر واحد واحصل على نص فرخة رصيد مجاني.

عارفين الرصيد بصلك كيف؟.

بصلك (ديلفيري).

لكن دا هسع ما موضوعنا.

ناس الارصاد كلموهم يشوفوا لينا حالة الطقس.

عاوزين نعرف العيد فيه مطرة.

اصلو الجماعة ديل كل ما يكونوا عاوزين يحركوا السوق شوية يقوموا يتوقعوا ليك (مطرة).

ناس الارصاد قالوا العيد السنة دي ما فيه (خروف).

الاسعار مولعة.

هسع نحن سألناكم من الخروف.

ركزوا في (مطرتكم).

الليلة المريخ والاهلي شندي.

المريخ مستواه اتراجع.

لكن الاهلي برضو مستواه متراجع.

والتحكيم ما بقصر مع المريخ.

نشوف البحصل.

وبعدين نرجع ليكم.

……….

عاجل : نجومية المباراة قبل ما تبدأ المباراة امنحوها مجدي عبداللطيف ..(طبختكم) بقت ظاهرة.
[/JUSTIFY]

وإن طال السفر – محمد عبد الماجد
صحيفة قوون