المجنــــون (العــــــاقل) الوحيـــد فيهم

شفتوا الزول من يجيب ليك (سليقة) في الغداء اعرف طوالي انو الزول دا ما عندو موضوع

مرة حضرت لي مسرحية لعادل امام خرجت بعدها وانا مقتنع ان (البطيخ) عندو قدرة عجيبة على (الاقناع)

محمد عبدالرحمن واطهر الطاهر اعاد الهلال قيدهما بمليارات الجنيهات كيف يقيم الكاردينال الآن اللاعب بـ (400) الف جنيه فقط

الناس (الفكت) منهم قريب بحاولوا يصلحوا الحكاية بقوموا يقولوا ليك الجنون فنون.

جابوا الكلام دا من وين ؟ – انا ما عارف.

المعني ان زمنهم الفارغ البعملوا فيه دا (فنون).

وان مظاهر الجنون التى تبدو على ملامحهم ما هي إلّا علامات للعبقرية والذكاء الخارق.

زمان نحن كنا بنعرف (الذكاء الخارق) حسب قرايتنا للالغاز بان تستطيع ان تكتشف ليك سر غامض كدا.

يعني ليه (خليفة) بقيف يوماتي الساعة اتنين ونص في طرف الشارع؟.

في السخانة دي بكون واقف يبلع في ريقو زي (الملايا) القصيرة البفرشوها في السرير يجرجرو فيها من الاربع جهات.

اي واحد في البيت يعمل فيها حريف كل ما يدخل على الصالة يقوم يدي الملايا (جرة).

هسع ما اطلع ليكم من الموضوع…

خليها الملايات.

انا كنت بتكلم عن شنو؟.

اتذكرت كنت بتكلم عن الزول البكون واقف في طرف الشارع وببلع في ريقو…(زي فطور السمك).

كل يوم بكون لابس ليه (قميص جديد) وواقف في حتتو في طرف الشارع.

تفتكرو واقف (عبط) كدا.

واقف عدم موضوع.

واقف زيادة عدد.

هي الشوارع ناقصة واقفين.

منتظر شنو؟….ما تسألوني؟.

عاوز منو؟…ما تسألوني؟.

كنا بنكوّن وقتها طوالي (فريق) بتاع مباحث عشان نكشف السر وراء (الوقفة) دي شنو؟.

نحن كنا صعبين.

كنا شفوت.

وكنا بنعرف لمن عبدالغفار يجي شايل ليه (بطيخة) كبيرة …الحلة كلها بتشهد عليها.

كنا بنعرف طوالي انو عبدالغفار دا عاوز يعرس في زوجتو.

عاوز يقنع (الاولي) بالبطيخ.

البطيخة دي ما ساكت.

ما في بطيخة بتظهر يوم 20 ساكت.

البطيخة دي ما من فراغ.

ناس الفلسفة عندهم نظريات زي دي بطلعوا (العلاقة) بين الاشياء وبقوموا في النهاية يصلوا للاجابة الصحيحة.

مرة حضرت لي مسرحية لعادل امام خرجت بعدها وانا مقتنع ان (البطيخ) عندو قدرة عجيبة على الاقناع.

لو عاوز تقنع ليك زول جيب ليه (بطيخة).

والقرع دليل (قناعة).

يعني زول يجيب ليك (قرع) في الغداء دا زول قنعان. دا شغل (قنع) عديل كدا.

الزول القنعان واضح من قرعو.

تلقى من غير مقدمات كدا قاعد (يتقرع) ليك.

الملحات دي ما تجهلوها.

ما تهملوها برضو عندها دلالات.

يعني (سلطة الاسود) في دلالة الملحات هي دليل (مشكلة جاهزة).

من تلقى في الصينية (سلطة اسود) اعرف بي حاستك السادسة في (عكة) ح تقع قريب.

علم الدلالات بشير على مثل هذه الحالات.

السليقة دليل لعدم الموضوع.

شفتوا الزول من يجيب ليك (سليقة) في الغداء اعرف طوالي انو الزول دا ما عندو موضوع.

انتوا فاكرين الروس بعرفوا (عدم الموضوع) كيف؟.

بعرفوه من (سليقة) الزول.

الزول وقت يقولوا ليك عنو الزول دا (سليقة) ساكت…يعني الزول دا ما عندو موضوع.

الحكاية كدا بقت واضحة وظاهرة.

نرجع للموضوع الرئيسي.

مواضيعك الكتيرة دي زي (اللجان) البكونوها ناس الحكومة.

ناس الحكومة يكوّنوا ليهم (لجنة) عشان موضوع.

افترض كدا لجنة عشان الكوبري.

تقوم اللجنة دي تنبثق منها لجنة.

واللجنة المنبثقة تطلع منها لجنة منبثقة.

والمنبثقة التانية تنبثق منها لجنة.

والتالتة تطلع منها رابعة.

والرابعة تطلع منها خامسة.

والموضوع يجر ..لمن يصل للجنة رقم 701.

لو جبت اي لجنة منبثقة بعد ذلك من تلك اللجان وسألتها عن الموضوع شنو؟..ما بعرفو ليك.

موضوع الكوبري بكون اتنسى من اللجنة التالتة.

اللجان الطالعة بعد الرابعة ديك كلها للضرب.

الكوبري يروح فيها ساكت.

هسع انتوا عاوزين تعملوا لي زي (اللجان) دي.

الموضوع الرئيسي نسيتو.

اتذكرت.

الموضوع موضوع الجنون فنون.

الناس بقولوا الجنون فنون.

عشان يصلحوا (الجن) شوية…ويخلوه يبقى (مبرر) شوية ومقنع.

ناس الفنون بحاولوا مرات يتظاهروا بالجنون…تأكيدا على (العبقرية).

والعبقرية ما عندها اي علاقة بالموضوع دا.

بتكونوا لاحظتوا ناس الفنون دائما بيبرموا شعرهم وبلبسبوا ليهم جينز قديم ومهرود وحالتو بالبلاء.

قبل ايام كنت بتابع لي في فيلم هندي للنجم الهندي (شاهيد كابور) وجدت ليك شاهيد كابور دا طالع لينا في الفيلم بي حكمة غريبة خالص.

الكلام دا كلو بمناسبة الجينز القديم.

شاهيد كابور شبه نفسو في الفيلم بـ (الجينز القديم) مدللا على ذلك ان اي واحد فيكم بكون برتاح على وجه خاص للجينز القديم.

يكون عندو مية بنطلون.

اول ما يكون عاوز يطلع بلقى نفسو مشي من غير ما يشعر نحو (الجينز القديم).

من هنا ثبتت الراحة التى تنشأ بين الجينز القديم وصاحبه لذا اكتسب الجينز القديم تلك الالفة والمودة واصبح عنده شخصية مستقلة عن كل البنطالين التى هي في الدولاب.

وشاهيد كابور عاوز يقول انو الناس بترتاح ليه زي (الجينز القديم).

شفتوا (النظرية) دي كيف؟.

هسع انتوا شفتوا النظرية البعملوا فيها ناس المريخ ديل.

جماعتكم ديل طلعوا ليهم (120) معلقة في بكري المدينة.

بكري المدينة والسكين.

السكين وبكري المدنية.

ما بين السكينة وبكري المدنية.

بكري المدينة شايلاه السكينة.

ناس المريخ ما خلوا ليهم موضوع.

اي حاجة بتخطر على بالكم عن (السكين) او عن (بكري المدينة) اعلام المريخ عملها.

عملوا لينا موضوع بكري المدينة والسكينة زي مواضيع المطالعة.

ما خلوا ليهم حاجة ما كتبوا فيها.

هجوم مبالغ فيه على بكري المدينة.

هسع زولكم دي بي سكينتو ناس المريخ عاوزين يدفعوا فيه (2) مليار ومنزل.

اول هي قروشكم.

هي حقتكم.

ليكم حق تدفعوا (القروش) دي في بكري المدينة.

واضح من بدري ناس المريخ (السكينة) زمان كانت عاملة ليهم (خوفة).

عاملة ليهم (هلع).

عشان كدا القروش الدفعوه المريخاب دي دفعوها في (السكينة) ما دفعوها في بكري المدينة.

دا دفع (خوف).

كمان نحن ما بنعرف دفع الخوف من دفع الاقتناع.

البعملوا فيه المريخاب دا ما (جنون)…دي (اندراوة) ساكت.

ومعروف في المثل ان الجن بنداوي لكن الكعبة الاندراوة.

جماعتكم ديل في كل تسجيلات بقعدوا يندروا لينا كدا.

عليكم اللـه هسع البعمل فيه المصري ايمن سعيد دا ما (اندراوة).

واللـه دا فايت الاندراوة بي غادي.

حركاتو البعمل فيها دي اكعب من (الاندراوة).

المضحك ان ايمن سعيد دا مع اندراوتو دي قاعد يشيل نجومية المباراة.

صاحبكم لاقي لي الجماعة الروش ديل ..قام دور فيهم (هرجلة).

وبقى ليك بي هرجلتو دي بشيل نجومية المباراة.

لاقى الفريق خلا ساكت.

…..

ملحوظة : في ريحة (عدس) العدس دلالتو شنو في عالم الدلالات؟.

هوامش

زمان كان عندنا حلة كلها (مجانين).

حلة ما فيها (عاقل) واحد.

الواحد يجي راجع الساعة اربعة من الشغل يلقي ليك ناس الحلة كلهم طالعين في الشجر.

الكهربة تقطع يشغلوا المراوح والمكيفات.

وكمان يقولوا ليك الكهربة وقت تكون قاطعة (المكيفات) ما بتصرف عشان كدا المكيفات ما بشغلوها إلّا وقت الكهربة تقطع.

حلتنا دي اعقل واحد فيها كان وقت يمشي يصلح ليه فول بقول لبتاع الفول اسمع (الزيت) اعملوا لي في (البيبسي).

مباراة الهلال اليوم امام المريخ الفاشر مباراة ما ساهلة.

خاصة بعد تصريحات الكاردينال الاخيرة.

تصريحات الكاردينال يمكن ان تحبط نجوم الهلال.

حكاية (السقف) الذي تضعه الاندية نحن غير مقتنعين بيها.

ويمكن بسببها الهلال يفقد كتير.

يجب ان يكون السقف مفتوح.

اذا اشتغل الكاردينال بذلك سوف يفقد الكثير.

وسوف يكون هو اكثر الخاسرين.

خاصة ان الجماهير قناعاتها مبنية على قدرة الرئيس في التسجيلات.

اذا فشل الكاردينال في اعادة قيد نجوم الهلال المفكوكين..فلن يصمد كثيرا في رئاسة الهلال.

وان كنا نظن ان الخطأ هو خطأ المجلس السابق الذي كان يفترض ان يعيد قيد اولئك النجوم من التسجيلات الماضية.

على اشرف الكاردينال ان يدفع الثمن.

اذا كان الكاردينال يريد ان يضع (400) الف لكل لاعب مطلق السراح كان افضل له ألا يترشح.

محمد عبدالرحمن في التسجيلات الماضية اعاد قيده بمبلغ تجاوز المليار.

وكذلك تجاوزت قيمة اعادة قيد الناشيء اطهر الطاهر المليار.

كيف يعرض الكاردينال (400) الف جنيه على لاعبين في حجم بكري المدينة وبشه ونزار حامد.

…………

عاجل : يا كاردينال شد حيلك ساكت ..واتحزم للتسجيلات.

[/JUSTIFY]

وإن طال السفر – محمد عبد الماجد
صحيفة قوون