الخيزران ساكن رفاعة

الخيزران ساكن رفاعة

ايدو جدلة وعينو ساعة

غنية قديمة جدا بدت تحتل الساحة الغنائية.. وشايف بنياتنا ووليدتنا يتراقصو فيها.. وإن مسكت أقرب واحد فيهم وقلت ليهو الزول دا بيقول في شنو؟.. يقول ليك يا عمك فكنا، المهم نجبجب.. فيجبجب ويكون ما عارف حاجة غير انو في زول في رفاعة قاعدين يغنو ليهو.. وعينو ساعة، تسالو يقول ليك “أيوا يا عمو هو قال ساعة.. بس ما قال لينا الساعة كم؟”

شجر الخيزران.. مستقيم ولدن لين.. يميل مع اقل هبة نسيم.. أما الهبوب فتبهدله بهدلة.يتني وقدر ما يتني ما بتكسر.. واشهر ما كان يستعمل فيه الحيزران هي كراسي الخيزران.. وكانت تدل علي الثراء الفاحش.. زمن كان الديوان ” الصالون” فيهو عناقريب وبروش.. في غنية “أزايّ الليلة وحِرِق بي نار الكماين ديلا”.. يقول الشاعر وهو يتبوبر ويتفشخر بركوب البكاسي جمع بوكسي..

انحنا جماعة ركبنا باكسي

على الديوان النظامو كراسي

يعني نزل في ديوان حق زول ما هين وما ساهل. الكراسي مرصوصة.. وكل واحد فينا قعد فوق كرسي وخلف كراعو.. بدل الدواوين الشينة النظامها بروش.. الواحد يتفرجخ في البرش ما يعرف يتونس واللا يقعد يتحكحك من النمل.. وكراسي الخيزران كراسي جميلة.. وكاتب المقال اخد لو فيهو قعدة ما جاتا شي.. والخيزران ساكن رفاعة يعني البت السمحة اللينة الذي الخيزرانة دي ساكنة رفاعة.. ايدو جدلة.. الجدلة في القواميس العربية يعني الحبل المبروم.. متماسك ولين.. والجدلة ممكن تكون من الحرير برضو.. والجدلة من ادوات زينة العروس.. والسودانيين في فترة كانو مبسوطين من الجدلة.. وأي إيد دايرين يقولو لينة وسمحة بيقولو جدلة.. قال سيد الجعلي فنان من منطقة بربر:-

إيدو *جدلة حرير للوجه تملأ

زي شبيه لونها الشفتو عند ضمرة

.. هنا يهمني كلمة جدلة بس.. لكن للعلم ضمرة دا زول كان صائغ في اتبرا.. وهو يقصد انو زولتو دي لونها زي الدهب الشافو عند ضمرة.. وقالو ضمرة دا كان صائغ لاجود انواع الدهب!! وود الرضي في رميتو المشهورة (طابق البوخة).. قال:-

طابق البوخة

قام نداهو يهتف

نام من الدوخة

ايدو عاقباهو

*جدلة مملوخة

.. يعني ايدو دي لينة لين شديد.. زي التكنها مافيها عضم.. أو ما فيها عضم كلو كلو.. تشبيه زي دا وايد زي دي.. لو بقت في زول أقرب أخصائي عظام يمشي عليهو وإن لقو مافيها عضام، يا الأردن جاتك جدلة مملوخة.. ودائما شعراء الحقيبة قاعدين (يشفو) اللحم من العضم.. كناية عن اللين.. يعني لما يتبسطو من بت (يشفو) اللحم يمرقو منو العضم ويخلوهو براهو ويقعدو يعاينو ويغنو.العبادي في غنية (جدي العزاز) قال:-

الخصرو هضيم لا جوع لا ضيم

(خـاتي عِضَيم) المـا نِضِّـيم

خاتي عضيم.. وهو يقصد انها لينة.. عضيم تصغير عضم.. يعني مافيهو اي عضم.. يخربو.. وزي دي مريحة يا فرد لو عرستها.. تلمها في كيس وتختها فوق كتفك وتركب باظ الوالي!!!