ما قدروا على (تراوري) إتشطّروا على الشركة الناقلة للممتاز

وقت بتعرفوا تنفعلوا وتغضبوا وتثوروا ما تثوروا في الولد البسافر على كيفو دا

متوكل أحمد علي في موضوع التلفزة ما فاضل ليه إلا يبقى (الجبهة الثورية)

اتحادنا العام وقت متوكل (ينتف) السلك بطلع امين الخزينة ويصرح في الجرايد ويقول موقف المريخ صحيح

الزول البكون (صوتو) عالي ، دائما بكون زول (نفخ) ساكت.

زول (هوا) بس.

زول فلين.

تلقاه بتنفر وبتنهر وبرفع في ايدو وبكفكف في (اكمام القميص) ، وبتف بي صفحة.

التف علاقتو شنو بي الشجاعة.

الموضوع ما عندو اي علاقة.

اول ما تحصل (مشكلة) صاحبكم بتلقاه انسحب…وهبد.

هبد و(همد) كمان.

وقولوا بالمرة كدا متوكل أحمد علي.

الاصوات العالية في اي حتة دليل (ضعف).

دليل هوان.

دليل فراغ عريض.

الزول (النفاخ) ما زول حارة ومثلنا بقول السواي ما حداث.

البشوف ناس المريخ ديل (يتنفروا) يقول قادرين على (ضبط) الامور في نادي المريخ.

البسمع ناس متوكل أحمد علي يصرحوا يقول القبة تحتها فكة.

وهي يا حسرة (حوار) ما فيها.

ولا ابريق.

الحمدلله الحاجات دي في الهلال ما بتحصل ولا في زول في الهلال بقدر يرفع صوتو.

ما في كبير على الهلال.

في المريخ (الفراسة) بس على الاشياء الفارغة في الجد لا اثر لهم.

كلهم بعملوا شتات.

بعد كل مباراة للمريخ يخرج (همد) او غير (همد) عشان يهاجم (الحكام).

يقولوا في (الحكام) ما لم يقله مالك في الخمر.

تهديدات.

وحروبات.

وعنتريات.

ووعيد وتحذيرات ..وعين حمراء.

كل هذه الاشياء (نفخة) ساكت.. ما عندها اي قيمة.

وان كانت هذه النفخات الكضابة نجحت في هرش الحكام…اذ اصبح من الطبيعي ان يحتسب الحكم للمريخ في اي مباراة (ضربة جزاء).

وعادي يكون في هدف تسلل احتسبه الحكم للمريخ.

وفي هدف صحيح في المريخ نقضه الحكم.

هذه الاشياء تعودنا عليها واصبحت من (البديهيات) بل من (الابجديات) في اي مباراة للمريخ.

يصاحب هذا الهجوم الاداري على (الحكام) كورال اعلامي يقطع في (حكم المباراة).

يقطعوا (الحكم) قطيع.

البسوي اعلام المريخ في الحكام يلقى من (تراوري).

تراوري ماخد راحتو على الآخر.

بعمل اي حاجة.

واعلام المريخ (سطر) واحد ما قادر يكتبو في (تراوري).

انتوا قاعدين تخجلوا.

مالكم بتسكتوا كدا.

ما في زول قادر يقول ليه حاجة.

لاعب عمرو (23) سنة يذلكم كل هذا الذل.

مرتبو يتأخر يتأخر من التمرين.

الغداء يتأخر يعمل (شمطة).

الكهربة تقطع يكورك في مدير المعسكر.

تراوري موقف ليك المريخ على فد كراع.

يرفض السفر مع المريخ الى عطبرة يلحقوه المباراة بي عربة خاصة.

شغال على كيفو.

طيب يا ناس النعمان بن كوثل بن تميم الشحضري وينها (فراستكم) ديك؟.

وينها (الجوطة) والعنتريات البتنزلوها على حكام المباراة؟.

تراوري دا ما في (مدير كورة) قادر يثبتو في حدو.

تراوري قبل المريخ كان في الهلال.

لكن تراوري في الهلال ما كان قادر يعمل اي حاجة.

ما بقدر يرفع صوتو.

بكري المدينة براهو ممكن يرفع في وشو (سكين).

نحن لعب زي دا ما بنفع.

نحن كلام زي دا ولا بنقبل بيه.

ولا عندنا ليه صبر.

لو كان تراوري دا بجيب ليكم كل (5) دقائق كأس سيكافا مفروض توقفوه في حدو.

لو غلبكم جيبوا ليه الامين البرير.

الامين البرير نوع دا بشطبو ليكم قبلو.

قبل ما التسجيلات ذاتها تبدأ.

بشطبو ليكم من شهر فبرائر.

المضحك في الامر ان مجلس المريخ في مواضيع ما بتستاهل ولا بتستحق ..بطلعوا (يتعنتروا) فينا.

بعملوا لينا فيها (داحس والغبراء).

وهاك يا خطب.

وهاك يا مثل.

وهاك يا شعر.

ونحن المريخ دا ما بنقبل فيه.

متوكل أحمد علي في موضوع التلفزة ما فاضل ليه إلا يبقى (الجبهة الثورية).

الزول دا على شوية كدا بعلن تأييده لاعلان باريس.

ويا ريت لو كان الكلام دا بي فهم.

دا كلام ساي.

ما عندو قيمة.

ولا عندو معنى.

عنتريات في الفارغة.

يا متوكل يا (الحجاج بن يوسف) انت تراوري دا بلعب في (المهدية).

الزول دا ما قادرين عليه.

الزول دا فشلتو تثبتوه في حدو.

شنو اليوم والتاني ولدكم دا بسافر مالي.

مطار الخرطوم عندو زي موقف شندي.

في اي لحظة بسافر.

في اي وقت.

ما عندو قشة مرة.

انتوا وقت لاعبكم ما قادرين عليه بتحوموا حول بكري المدينة ليه؟.

كدا احسموا موضوع (تراوري) دا في الاول.

تراوري دخلهم مدرسة.

وشال عليهم (العصا).

وما في اي واحد في المريخ قادر يقول ليه حاجة.

وصاحبكم متوكل احمد علي في موضوع التلفزة بنزل من مقصورتو وبنتف سلك الكهربة ويرجع تاني.

انت فراسة (النتف) دي ما تعملها على (تراوري).

بس فالحين لي في (التلفزة).

وقت بتعرفوا تنفعلوا وتغضبوا وتثوروا ما تثوروا في الولد البسافر على كيفو دا.

وقت عندكم احساس قدر دا.

ما تحسو شوية.

الزول دا مسح بيكم الارض.

والموضوع وقت يبقى على (التلفزة) ..زولكم بقوم من مقصورتو عشان (ينتف) السلك.

متوكل دا من الليلة اسمو متوكل أحمد (نتف).

عشان نعرف الموضوع دا حدو وين؟.

اصلو نحن ما عندنا اتحاد.

اتحادنا العام وقت متوكل (ينتف) السلك بطلع امين الخزينة ويصرح في الجرايد ويقول موقف المريخ صحيح.

اها بعد الكلام دا راجيين ليكم فايدة من الاتحاد العام.

لو راجيين ليكم عمار من الاتحاد العام في وجود اسامة عطا المنان اقنعوا ساكت.

ابقوا (قنعانين).

مجلس المريخ بمنع (الكاميرات) من الدخول لاستاد المريخ وبرفض التلفزة.

وقت بتعرفوا تمنعوا ما تمنعوا (تراوري).

يعني انتوا تراوري دا ما بتقدروا تثبتوه في حدو إلا يشيل ليه كاميرا.

ما بتقدروا عليه إلّا اذا لبس ليه (مريلة) صفراء مكتوب فيها (التلفزيون القومي).

زول عمرو (23) سنة يعمل فيكم كدا.

ويسافر على كيفو.

ويرجع على كيفو.

ولا في زول قادر يقول ليه حاجة.

قدرتهم كلها بكبوها في منع التلفزة.

واتحادنا العام بطلع يبارك خطوة المريخ في المنع.

باللـه دا اتحاد.

اسامة عطا (شيرنق) بقول المريخ على حق.

انتوا اصلو المريخ دائما عندكم على حق.

ظهرتوا على حقيقتكم يا اسامة.

وعرفنا ليه (المنتخب) بتراجع كدا.

وما لاقى حق السفر.

انتوا فاضيين لي للمنتخب.

انتوا فاضيين.

امشوا تموا (فطوركم) عليكم اللـه.

الكورة دي خلوها.

ح تودونا (الخور) بي طريقتكم دي.

ونحن ما ناقصين لينا اي (خور) تاني.

……

ملحوظة : تراوري دا لو بلعب في مريخ الفاشر ما بعمل حركاتو دي.

هوامش

الهلال يلعب اليوم مباراة صعبة امام الخرطوم الوطني.

الحذر واجب.

واللعب بمسؤولية طريق الهلال للانتصار.

بعد مباراة الخرطوم سوف يلعب الهلال امام النيل الحصاحيصا.

نرجو ان لا يدخل لاعبو الهلال في حالة من حالات الاسترخاء بعد العيد.

ما تقلوا اللحمة وتمشوا تلعبوا امام النيل.

ناس النيل ديل انتوا عارفنهم من زمان.

بكونوا لابدين ليكم.

لذا الحذر اليوم واجب.

والحذر من مباراة النيل الحصاحيصا ايضا واجب.

المباريات الاخيرة ما بتستحمل اي تراخي.

ونحن نعشم باذن اللـه وببركات هذه الايام الفضيلة ان يدخل الهلال مباراة القمة بثلاث فرصة.

فايز يشيل الكأس.

متعادل يشيل الكأس.

خسران لا قدر اللـه يشيل الكأس.

والموضوع دا ما بعيد.

تذكروا ان الهلال باذن اللـه وفضله يدخل مباراة القمة بثلاث فرص.

وعلى كيفنا.

اسامة عطا الشيرنق مفروض ما يصرح تاني.

الزول دا تصريحاته في منتهى الشتارة.

اسامة دا امنعوه من التصريحات.

وقفوه من الكلام في الجرايد.

دا اشتر شتارة.

اي موضوع يصرح فيه يلخبطو ليكم.

بتاع (لخبطة) بس.

يا اسامة من مصلحتك ومصلحة الاتحاد ما تصرح.

السكات دي صعب.

كمان السكات عاوز ليه (شيرنق).

اسكت عليك اللـه.

نحن عارفنك امين الخزينة.

البلد ما ناقصة تصريحات.

الواحد في البلد دي لو اشترى الخروف ما قصر.

كمان عاوزين تجيبوا لينا مع شراء الخروف تصريحات اسامة عطا الشيرنق.

متوكل احمد (نتف).

واسامة عطا (الشيرنق).

ولسه القائمة طويلة.

…..

عاجل : الليلة ان شاء اللـه كادوقلي تجي فيها (مطرة) العصر.

[/JUSTIFY]

وإن طال السفر – محمد عبد الماجد
صحيفة قوون