كوش نيوز .. أخبار السودان بين يديك

درع الوطن لفخر الوطن.. كالعادة وبالزيادة!



شارك الموضوع :

درع الوطن لفخر الوطن.. كالعادة وبالزيادة!

[JUSTIFY]
سجل سجل يا تاريخ.. اللقب الثالث للمريخ!

الوصيف يمتطي الركشة.. سيكافا ورديف ودوري وكأس.. حلال يا ناس

العنوان المتوقع لصحيفة (الأتلات) اليوم: ده ما الهلال.. ده لعب عيال الكاردينال!!

* كالعادة.. درع الوطن.. لفخر الوطن!

* المريخ في القمة.. والبقية لا تأتي أبداً!

*

لا جديد في ساحة الكرة السودانية سوى المزيد من التجويد والكثير من (التجريد)!

* في كأس السودان: كالعادة.. القمة حمراء.. والحسرة زرقاء!

* أمس حقق المريخ لقبه السابع على التوالي.. مقابل لقب وحيد للوصيف الخفيف!

* لقب كأس السودان 2012.. لقب كأس 2013.. لقب كأس 2014.. لقب كأس الرديف 2013.. لقب كأس الرديف 2014.. لقب دوري 2013.. ولقب سيكافا القيافة!

* وحصاد الوصيف ظريف وخفيف!

* يد فارغة.. وأخرى لا شيء فيها!

* في الانتظار على المدار: كأس دوري 2014!!

* يا كوتش يا برهان.. الوصيف مالو خسران؟

* الزعيم يحصد الكؤوس.. والوصيف يحصد الحسرات ويذرف الدمعات!

* كأس السودان لبطل أبطال السودان.

* الثلاثية النارية.. بأقل مجهود من الفرقة المريخية!

* وصيف دنيانا لا تعبنا.. لا أجهدنا!

* لا غلط علينا لا زعلنا!

* خسر كالعادة.. وبالزيادة!

* أخد المعلوم.. في إستاد الخرطوم!

* حصدنا الكأس.. وتركنا له الحسرة!

* نثرنا الفرحة.. وذرف الدموع!

* يا جمال دنيانا يا جمالها.. جمال سالم معانا.. يا جمالها!

* سجل سجل يا تاريخ.. الكأس الثالث للمريخ.

* المريخ بطل كأس السودان للعام الثالث على التوالي!

* إعجاز جديد للبطل المتوج.

* هاتريك ألقاب.. للبطل المهاب!

* حلاة الكشة.. ويا حلاة (الركشة)!

* الأول قلع (الضُفر) من اللحم الحي!

* التاني أيمن لو (سعيد).. نحن بالأكتر!

* التالت (راجي) منك فد إشارة.. وخدعة تديني الإشارة!

* النتيجة الختامية: (تالتة) العدوية!

* الجماعة لحدي الآن منتظرين أيمن سعيد يسدد في المرمى!

* حا تنتظروا كتير!

* قال أيه؟ (مدد مدد.. يا شيخ فوزي الأسد)!

* (أسد) يها كم حرف؟

* (مدد) فيها كم ضُفر؟

* و(شيخ) فيها كم راجي؟

* الكيشة قدموا وكشوا!

* المانشيت المتوقع لصحيفة (الأتلات) اليوم : ده ما الهلال.. ده لعب عيال الكاردينال!

* ودي ركشة مبارك البلال!

* قالوا هاربين.. قلنا ثابتين!

* في الخرطوم.. في الأبيض.. في الدمازين.. في كل مكان ظافرين ومتوجين!

* ألم نقل لكم إن حملة تجريد الوصيف من الكؤوس مستمرة؟

* ألم نقل لكم الحاضر يكلم الغائب.. والحايم يكلم النايم..فطومة تحدث الرشيد؟

* ألم نبشركم بأن (التالتة ثابتة في الكأس)؟

* ألم نقل لكم إن جمع الجوي مع الأرضي جائز في عرف الصفوة؟

* ألم نبشركم بالهزيمة قبل أسبوع كامل من الآن؟

* ألم نكتب لكم (سيكافا ورديف ودوري وكأس.. حلال يا ناس)!!

* ألم نحذركم بعبارة (الزعيم في الملعب.. أين المهرب)؟

* اسمعوها مني وانشروها عني: الضربة الثانية يوم الجمعة الجامعة والكلمة السامعة!

* أمس الجماعة ركبوا الركشة!

* ويوم الجمعة الركوب (هايسات)!

* نعيد ونكرر: ذكرى السبتين حاضرة في أذهان الصفوة.

* أجمل ما في لقاء الأمس أن الأهداف الأربعة سجلها أولادنا!

* القون الأول في مرمى ولدنا.. برأس ولدنا!

* والتاني ولدنا (ضفركم)!

* والتالت ولدنا المصري.. (رقصني يا جدع)!

* والرابعة راجي.. بالكربون!

* (في ذمتي يا ناس.. التلاتة حارة عديل.. يا جارنا الوصيف حمل التلاتة تقيل.. رايدانا الكؤوس من بدري ليها نشيل.. مبروك يا زعيم.. من جيل تسلم جيل)!

* (النجمة أم شعاع الليلة ضاوية حلاته.. من حقها غالبة الوصيف بي تلاتة.. راجي وضفر.. وأيمن يزيدوا غلاتها.. وود سالم جمال.. حارس تمام خشباتها)!

* (مين غير الزعيم في الحارة حاسم سيفو؟ ومن غير الأسد بقدل كما علي كيفو؟ التاج والفخار في الدنيا ديمة وليفو.. يحصد للكؤوس.. يشهد عليهو وصيفو)!

* بشراك يا فاروق أبو حوة!

* تهنئة من القلب للوصيف الخفيف!

* أمس ترقى إلى رتبة (نقيب)!

* تلاتة أقوان.. وتلاتة ألقاب متتالية في كأس الكؤوس للزعيم في ليلة ختام درع الوطن!

* سيكافا قولوا معاي واحد!

* رديف (متنى) قولوا اتنين!

* كأس السودان لبطل السودان.. قولوا تلاتة!

* والتلاتة حلاته!

* دقر يا عين!

* تلاتة أقوان.. وتلاتة كؤوس!

* القون الأول للرشيد علي (ضُفر)!

* القون التاني (لأيمن) عبد الماجد!

* والقون التالت لـ(تالتة) الصادق!

* جماعتنا ركبوا (الركشة)!

* والزعيم من جمال لجمال.

* من جمال الوالي.. لجمال سالم!

* نحيي الأبطال.. حسموا النزال.

* الهلال خفيف.. والمريخ مخيف!

* الزعيم في القمة.. والوصيف في الورشة!

* بعد ضربتي الكأس والدوري.. سنبدأ معركة خلع الضروس بجمع الأولاد!

* نبارك لمجلس الإنجازات والألقاب الغالية.

* يحقق النجاح تلو النجاح.. ويترك الجعجعة للعلاعين!

* مبروك للوالي الغالي.. ولا عزاء لمن حاولوا أن يشغلوا المجلس بالشكاوى الخنفشارية!

* هام وعاجل للجماعة: جماهير الزعيم طماعة!!

* لقب الكأس لا يكفيها ولو تحقق للمرة الثالثة على التوالي!

* يوم الجمعة الجاية تاني عندنا طربانة!

* الكتمة الجاية في المعبرة!

* نقول لهم بكل أدب وذوق.. (غُلبنا ليكم من تلاتة ولي فوق)!

* بالأمس دشنا شارع مالك تقاطع شارع سيبمو!

* والجمعة سندشن طريق أتير تقاطع كبري فداسي!

* غيروا إطارات البص.. وفات عليهم أن يغيروا مواسير الدفاع الأزرق!

* التحية لبرهان ومحسن وكل أفراد الجهازين الفني والإداري لأبطال الكأس!

* أشركوا إبراهومة الأشبال.. وجندلوا الهلال!

* خبر الكأس: الوصيف يستلم راية البلابل من المنتخب!

* الأيام دي لو لاقاكم عريس أزرق مفروض تسألوهو: ما بقيتوا (هلال)؟

* التلاتة حبات.. أمانة ما حارات!

* تحية بالغة الخصوصية لراجي البطل.. ورجل المباراة أيمن سعيد، ونجم النجوم جمال سالم.. وفارس الرهان علي جعفر.

* والتهنئة من بعدهم لكل فرسان بني الأحمر.. ولحاتم والجيلي وكل أفراد الجهازين الفني والإداري.

* تهنئة حارة من صديقي طارق تفاحة لناديي الميرغني وأهلي مدني بمناسبة عودتهما إلى الممتاز.

* نمة جميلة من الحبيب الصفوة مرتضى فون: (مزمل سلام الليلة ارفع رأسك.. وفي كبد الحقيقة الليلة سوي عواسك.. اكتب واتمهل وجيب البيوجع ناسك.. وخت في الصورة راجي.. وخلي الإطار بمقاسك)!

* وصلت من القاهرة بمعية وفد الرئيس البشير قبل (ثلاث) ساعات من موعد المباراة!

* (زيارة البشير الليلة جابت فايدة.. طفت نفوساً كانت مشعللة قايدة.. خلت ود سعيد يبدع يشوت العايدة.. وشوف عيني المعز الليلة جاتو الزايدة)!

* الصفوة المهندس أحمد محي الدين قال: وقفنا في حدود التلاتة لأنو الهبشنا بكري ولدنا!

* لو هبشنا خلافو كان نص الدستة ما وقفتنا!

* خبر الأمس: على ذمة الحبيب الصفوة مهيلم الجزولي: الوصيفاب يفضلون استخدام موبايلات (Note 3)!

* خبر كل عام: لقب الكأس.. لصفوة الناس!

* درع الوطن.. لروح القبطان.

* آخر خبر: بص الوصيف.. حملو خفيف.. شايل تلاتة ركاب!!!
[/JUSTIFY]

مزمل ابو القاسم – كبد الحقيقة
صحيفة الصدى

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس