هيثم (قعد في بيتو)، طمبل (نفسو مرقت) ، كلتشي (طشه) ، تراوري (فكت منو)

كابتن الهلال السابق عزالدين الدحيش لم يصبر على المريخ مباراة واحدة…لقى البقاء في المريخ مثل الحياة في كوكب المريخ – غير ممكنة.
لا تطاق.
ناس بلة ديل قاعدين كيف؟.
الجابرهم شنو على (التلتلة) دي.
مباراة واحدة فقط اكتشف بعدها الدحيش الفرق بين الهلال والمريخ بعد ان لبس فيها شعار المريخ فاقشعر جلده وانهار الدحيش (باكيا) واستعصم بالمقصورة حتى لا ينزل لارضية الملعب مع لاعبي المريخ.
الفرق بين الهلال والمريخ يبقى كبيرا…مثل الفرق بين الممتاز وكأس السودان.
هيثم مصطفى حماه غضبه واعماه ليستحمل المريخ (موسما كاملا) ، وليستغل اهل المريخ عاطفة اللاعب فيزينوا له اللعب في المريخ ليكتشف بعد ان سكت فيه الغضب انه ارتكب غلطة عمره عندما وقع في كشوفات المريخ.
بعدها استعصم هيثم مصطفى ببيته ورفض ان يكمل حتى بقية عقده مع فريق المريخ رغم ما بذلوه من مال وتحانيس و(كسير تلج) من اجل ان يلعب معهم ، لكنه رفض كل الرجاءات وفضل ان يبقى في البيت ويجك في شارع النيل من ان يواصل معهم.
هذه نماذج يجب ان يتعلم منها المريخاب فقد اعطاهم الهلال دروسا يجب ان تكون محفوظة عندهم.
قبل ذلك جاء عبده الشيخ من المريخ (مصابا) وهو ملفوظ لم يأت (نجما) كما جاء الدحيش وهيثم مصطفى للمريخ.
صبر الهلالاب على عبده الشيخ قرابة الموسم حتى تم علاجه واعادوا صيغته من جديد ليقدم عبده الشيخ اجمل المواسم مع الهلال.
ويصبح عبده الشيخ انشودة من انشودات الهلال الرائعة يقدم اروع الالحان بما يعزفه باقدامه على المستطيل الاخضر.
حول المستطيل الاخضر الى ان يكون (بيانو) قدم فيه عبده الشيخ اجمل المقطوعات بتمريراته السحرية.
والفرق يوضح.
والفرق يكبر مثلما فاز الهلال بالممتاز (12) مرة فاز المريخ به (7) مرات.
الفرق كبير.
جاء بابكر الحلو باكمبا كابتن المريخ من الاحمر بعد ان عرف باكمبا في المريخ بالتمرد وكان عندهم خميرة عكننة.
باكمبا في الهلال اعاد ترتيب مزاجه وقدم مع الهلال ابداعات جديدة خلده التاريخ وحفظه له.
في الهلال اصبح باكمبا لاعب ملتزم ومنضبط بغير ما عرف عنه في المريخ.
ليهزم باكمبا المريخ مرتين وهو في الهلال.
مرة بالطرشه ومرة بيسراه الحارقة.
وجاء للهلال من المريخ اللاعب ادوارد اشهر ضباط الوسط جاء ادوارد من المريخ بعد اشكاليات كثيرة وصراعات عديدة للاعب في المريخ.
اداورد في الهلال ضبط ايقاعه بصورة لم يكن يتوقعها احد وقدم مواسم وفواصل حافلة حتى اصبح في الهلال كابتنا للمنتخب الوطني بعد ان كان في المريخ لاعب لا يعتمد عليه.
ومثلما جاء عبده الشيخ من المريخ لاعبا صغيرا ومصابا كمان جاء من المريخ ايضا اللاعب حمودة بشير (يافعا).
لكنه مع صغر سنه هذا رفض حمودة بشير المريخ وشال شنطته وطلع من معسكر المريخ بعد ان اختار الهلال عن رغبة اكيدة.
بعد ان فقد المريخ الاتصال باللاعب حمودة بشير اشاعوا ان اصابة اللاعب خطيرة وانه لن يقدم شيئا مع الهلال.
الهلال احتضن حمودة بشير ..اكمل علاجه ثم قدمه في نسخة جديدة كانت غاية في الروعة.
حمودة بشير في الهلال عرف الامان وعرف الجمال وقدم اجمل ما عنده للهلال فكانت اهدافه تتشكل من مباراة الى اخرى.
وجاء من المريخ في عملية هى الاخطر في سوق الانتقالات اللاعب علاءالدين يوسف بعد مسلسل (البصمة) الشهيرة.
حيث ضرب اللاعب رغبة المريخ وامواله بعرض الحائط وجاء للهلال ليتم تزوير بصمته من اجل الاحتفاظ به.
رغبة فييرا للعب في الهلال كانت اكبر حتى بعد ان حاول المريخاب ارهابه وارغامه للعب في المريخ.
في الهلال كان علاءالدين يوسف آخر ناس المريخ نفسهم اتحيروا في التعديل الذي احدثه الهلال في فييرا.
بقوا يشيلوا ويتفرجوا فيه.
الى ان عاد علاءالدين يوسف للمريخ مرة اخرى بعد ان شطبه الهلال مع هيثم مصطفى ليعود فييرا الى حالته الاولى التى كان فيها عندما كان في المريخ.
تاني رجع يضرب ويشلت.
بعد (الروقة) التى ادخلها عليه الهلال.
ما حدث في الهلال حدث عكسه في المريخ.
ومثلما رفض الدحيش المريخ بعد مباراة واحدة وفضل هيثم مصطفى الجلوس في البيت من العودة لممارسة نشاطه في المريخ ضل اخرون في المريخ بعد ان تركوا الهلال.
هيثم طمبل خرج من الهلال بعد قصة معروفة ..فقد لعب طمبل في المريخ وهو مكره.
لعب هيثم طمبل في المريخ كان خطأ صلاح ادريس وليس هيثم طمبل.
هيثم طمبل سوف يأتي يوم ويتحدث فيه عن الفرق بين الهلال والمريخ.
شطب طمبل من المريخ بصورة فيها الكثير من الاستخفاف به ومازال في نفس اللاعب حسرة.
هيثم طمبل كان يمكن ان يكون الى وقتنا هذا بيلعب ناهيك ان يكون قد شطب قبل اكثر من اربعة مواسم.
كلتشي كان في الهلال قريبا من ان يلعب في المنتخب النيجيري كما لعب من الهلال يوسف محمد في منتخب بلاده.
ضاع كلتشى في المريخ وراحت ليه …واصبح مجرد لاعب بعد ان كان نجم يمكنه ان يلعب حتى في الدوريات الاوروبية.
كلتشي طلع من المريخ بعد ان فقد خطورته.
مشى كلتشي الصين ما نفع.
وهو يلعب الان في الاسماعيلي بدون خطورة تذكر.
ولا في زول شاعر بيه.
تراوري في الهلال كان فيه ملامح المهاجم الخطيرة افريقيا كلها كانت بتتكلم عنه.
في الهلال كلتشي وتراوري كانوا بلعبوا في مرحلة المجموعات.
وفي المريخ تراوري بطلع من دور الـ (64).
دا شنو الاحباط دا.
المحترف عندما يلعب في سيكافا ويلعب في فريق هو (وصيف) البطل يتراجع مستواه وتتخلف نجوميته.
وهذا ما حدث لتراوري الذي فكت منه واصبح مجرد لاعب يعترض في ضياع الفرصة ويرفع عيونو للسماء.
بعد ان يشد الشورت.
تراوري في المريخ بقى عنكبة زايد واحد اصلو ما عندنا ليه اكتر من كدا.
تراوري دا تاني ما عندي ليه تسمية اكتر من (عنكبة زايد واحد).
من اقول (عنكبة زايد واحد) اعرفنو طوالي اني قاصد تراوري.
ما بكرر ليكم الكلام.
انا ما بعيد الكلام.
ابقوا عارفين.
ابقوا فاهمين.
عنكبة زايد واحد منو؟.
تراوري.
يقولوا ليكم الكلام الف مرة.
وانا شنو؟.
انا ما بكرر الكلام.
ما بعيدو.
هذا هو الهلال.
وهذا هو المريخ.
والفرق واضح.
بطل ووصيف.
….
ملحوظة : وصافتكم دي بنرجع ليها بكرة نكتب عنها.
هوامش
ناس المريخ قالوا قعدوا مع (ضفر).
يكونوا قعدوا معاه في (قندهار).
درمة قال مباراة القمة فيها (4) ضربات جزاء فيها (3) للهلال.
تتخيلوا كل يوم نكتشف لينا ضربة جزاء جديدة.
مباراة زي التنقيب في الدهب.
هلال السعودية امس الحكم صرف ليه ضربتي جزاء.
يعني ما برانا.
انتوا الحكام ديل جنوا.
بقوا ما بحسبوا ضربات الجزاء.
الحمدلله الهلال اعاد امس بشه وبوي.
وان شاءاللـه تكتمل الافراح باعادة قيد عمر بخيت والمعز محجوب ومهند الطاهر وبكري المدينة واتير توماس.
عبقرية مجلس الهلال في هذه المرة تمثلت في التركيز على الرديف.
اعادوا النجوم الكبار وركزوا على الرديف.
هسع الجماعة ديك يحاكونا.
هسع يقوموا يركزوا على الرديف.
مستقبل الهلال اهم.
يبدو ان الكاردينال يعمل بتخطيط عالي.
الحكاية ما قروش بس.
في عقلية كبيرة.
في شغل صاح.
ان شاءاللـه تكتمل المساعي بالتوفيق.
يا ريت لاعب المنتخب الاثيوبي يوقع في كشوفات الهلال قبل مباراة منتخبه القادمة.
الظروف ما معروفة.
وعاوزينكم تحسموا الملفات من بدري.
خير البر عاجله.
كذلك يجب ان يطلع البرنامج الاعدادي للهلال منذ الآن.
ما عاوزين عشوائية.
نحن اي حاجة عندنا بي نظام.
اوعكم من اللخبطة.
تكتيكوا الحاجات.
وجهزوا الشيتات.
الموسم القادم حتى كاس السودان ما عاوزنو يفلت من الهلال.
تاني ما في تفريط في اي بطولة.
بعد التسجيلات الصاح ننتظر الاعداد السليم.
تاني بكون ما في اي مشكلة.
………
عاجل : عنكبة دا ألحقو اعيروه قبل ما يقفل تلفونو.

[/JUSTIFY]

وإن طال السفر – محمد عبد الماجد
صحيفة قوون