ائمة المساجد والفيفا أول مرة يتفقوا في حاجة

[CENTER][B][SIZE=5] ائمة المساجد والفيفا أول مرة يتفقوا في حاجة [/SIZE][/B][/CENTER] [SIZE=5][JUSTIFY] لو على بله جابر هينة انتوا يا ناس المريخ مشكلتكم ما في بله مشكلتكم في جمال الوالي
“””””””””””””””””””””””””””””
علي جعفر دا لو عندنا زيو في الهلال (7) كنا شطبناهم السبعة ، وارتحنا منهم
“””””””””””””””””””””””””””””””””””””””
متوكل أحمد علي مفتكر انو لو صرح في الزعيم او في الصدي الفيفا ممكن تخاف وتسمع كلامو زي ناس اسامة عطا المنان
“”””””””””””””””””””””””””
الهلال اضاف (8) لاعبين لكشف الرديف وهذه هي الاضافة الحقيقية للهلال
“””””””””””””””””””””””””””””””””””””””””
نحن خلونا ما تشتغلوا بينا كتير.
انسونا.
يمكن يكون كلامنا كتير- ويمكن بنتكلم ساي وبنقعد ننظر ليكم بدون مناسبة.
واحد عزموه ليك (غداء) مشى للغداء من الساعة واحدة.
دخل ليه في جلابية وشال موبايلو وفات.
دخلوه ليك الصالون.
جابوا ليك (البطيخ مقطع ساقط) قبل الغداء نظام بجهزوا في (التحلية) قبل الاكل.
البطيخ دخل الصالون صاحبكم اعاصبو باظت.
ضعيف شديد قدام البطيخ غلبو يصبر الى ان يتغدي ويمشي على البطيخ (البارد).
قام صاحبكم شال ليه (قطعة) بطيخ.
قطعة البطيخ ريحتو ليك باردة ولذيذة.
تاني شال ليه قطعة.
نزلت ليه في جوفو زي (الهبابة).
لحقها ليك بالقطعة الثالثة.
الناس الفي الصالون اضايقو من حركات الرجل دا (دا شنو الزول الشفقان دا؟).
اتناول ليك القطعة الرابعة (الموضوع دا ازعج ليك الجماعة خالص).
عاوز يشيل القطعة الخامسة لقى ليك الصالون كلو بعاين فوقو ، شبوا ليك فيه زي الكدائس.
ما اشتغل بيهم (قلت ليكم ضعيف قدام البطيخ) شال ليه قطعة خامسة وقال ليهم يا جماعة انا اصلا باكل البطيخ قبل الغدا..طبعي كدا.
وعلى كدا دخل ليك في القطعة السادسة.
حكاية البطيخ دا ما عندها علاقة بالسياسة.
الموضوع (بطيخي) صرف.
ما تقعدوا تفسروا على كيفكم وتحللوا حسب تفكيركم.
الموضوع ما كدا.
انا ما قلت اي حاجة.
ولا قلت شيء.
براكم بتلفوا وتدوروا وتعملوها فينا.
امس بله جابر اعترض في (الصدي) وقال محمد عبدالماجد ما عندو شغلة غيري ، وبدل (التريقة) دي احسن يكتب ليه حاجة تطور الكورة في السودان حسب ما نقل لي.
شوفوا بله جابر كمان.
الولد معترض وزعلان وشايف تطوير الكورة بكون لمن نكتب حاجة فيها فايدة.
عاوزنا نخلي (الكشافات) دي كلها ونقعد نكتب عن (تطوير كرة القدم في السودان).
يعني نبقى محاضرين وخبراء فنيين.
ونقعد ننظر للجماعة يفترض وينبغي وحيث ان وريثما يتم وكيفما وفي الحقيقة وايدلوجية الفكرة منبثقة من البعد الرابع للوحة السيرالية.
يا بله جابر لو كتبنا ليكم الكلام دا بقع ليكم وإلّا بتقولوا دا شنو البنظر فينا دا؟.
كورتنا دي ما عاوزة ليها (تعسيم).
ما عاوزة ليها (تنظير).
بناخدها كدا قدر حالها.
بله جابر نحن ما بنشوف كلامو في الجرايد بله جابر بنشوف كورتو في الملعب.
نحن ما عندنا معاك قضية يا بله نحن قضيتنا مع (الكشافات) عشان الامور تبقى ليك واضحة وما يلخبطوا ليك رأسك ساكت.
كلام بله جابر ووجهة نظرو ما عندنا عليه اعتراض.
لكن كورتو عندنا فوقها مليون رأي.
بعدين يا بله جابر ما تزعل الموضوع ما بستاهل تصور انا كل ما اقول اتجاوز بله جابر ، واكتب عن (خليفة) مثلا يلاقيني ليك واحد يقول لي عليك الله بله جابر دا ما تخليه.
اقول ليه انت هلالابي.
يقول لي ابدا انا مريخابي لكن بله جابر دا معذبنا عذاب.
اقول ليه لو على بله جابر هينة انتوا يا ناس المريخ مشكلتكم ما في بله مشكلتكم انتوا في جمال الوالي.
والمريخابي يقول لي بله جابر ما تخليه ومعاهو علي جعفر عليك الله.
علي جعفر كورتو زي (السماية) البقسموها ما بتفهم فيها اي حاجة.
لاعب وقت يكون عاوز يلف بتشيل هم للفة.
ويتشوبح تقول عاوز يرسم ليه (كاريكاتير).
علي جعفر دا لو عندنا زيو في الهلال (7) كنا شطبناهم السبعة ، وارتحنا منهم.
انتوا يا ناس المريخ فريقكم البقى كلو علي جعفر وبله جابر وعنكبة وبكري المدينة وضفر بتستحملوه كيف؟.
بتصبروا على الجماعة ديل كيف؟.
نحن بكري المدينة براهو كان (متلتلنا).
اها يا ناس المريخ بقوا ليكم (21) اروش كورتهم كلها في الكشافات.
ديل بتصبروا عليهم كيف؟.
الجباركم شنو؟.
نحن الهلال دا لو كان فيه ضفر وعلي جعفر كنا بقينا مورداب كنا خلينا ليهم الكورة.
علي جعفر خليه هسع خلينا في بله جابر.
هسع عليكم الله البعمل فيه متوكل أحمد علي دا بله جابر بعملو.
نحن ساكت شايلنها مع بله جابر.
بله جابر ما عندو ذنب معليش يا بله لكن انا اي كورة بتوديها (الكشافات) بكتب عنها.
لو ما عاوزنا نكتب عنك بنتكب عن (الكشافات).
الكشافات بكرة كمان بتقوم تطلع في (الصدي) وتقوم تشكي مننا.
بنخلي (الكشافات).
لكن لا جمال الوالي.
ولا وزير المالية ما بنخليهم.
كملوا لينا قروش البلد في حاجات ما بتستاهل.
وضايعين ناس بله جابر.
معليش يا بله معليش يا كابتن ألعب كورتك بس…وان شاءالله تمشي لي قدام وتلعب في باريس سان جيرمان.
وناس الصحافة الرياضية في فرنسا يكتبوا عن الباك العصري السوداني الذي يلعب في باريس سان جيرمان.
كورتو زي غنا محمد الامين.
معليش يا محمد الامين (الليلة استحملنا شوية).
الحاجة الما بتتخيلوها ولا بتقع ليكم.
ائمة الجوامع يوم الجمعة انتقدوا توقيع بكري المدينة لعقده مع المريخ بعد ان وقع عقد مع الهلال.
وقالوا الكلام دا من الناحية الدينية ما صاح.
بكري المدينة يمكن يكون ما عارف الحكاية دي.
لكن جمال الوالي ما عارف.
متوكل القاعد يصرح اليوم كلو ما عارف انو الموضوع دا غلط.
بعدين انت يا متوكل تستقيل او ما تستقيل واحد.
ما فارقة كتير.
يعني عليك الله لو استقلت المريخ ح يهبط من الممتاز ام كهربة النادي ح يقطعوها؟.
انت يا متوكل لو استقلت المستفيد الاول من الموضوع دا فريق المريخ.
استقيل يا زول.
ائمة الجوامع يوم الجمعة اتفقوا مع (الفيفا).
طبعا ائمة الجوامع ما عندهم علاقة بقواعد الفيفا.
لكن الفيفا عنده الكثير من القواعد المبنية على احترام العقود.
اها يا مامون ابوشيبة الموضوع بقى عليكم عالمي ومحلي.
بقى عليكم من الفيفا ومن ائمة الجوامع.
بتقولوا شنو؟.
مامون ابوشيبة مرات بشبكنا ليك مواعظ وحكم ومثل والحكاية وقت تبقى خروج من المريخ وعدم التزام مامون ابوشيبة بعمل فيها ما عارف.
بعتبر الحكاية متكتكة.
يعني ناس الاتحاد العام هلالاب.
والحكام (هلالاب).
والفيفا (هلالاب).
وائمة المساجد (هلالاب).
والله يا ابوشيبة ما عارفين نعمل معاك شنو؟.
………
ملحوظة : بكري المدينة خلاص ائمة الجوامع انتهوا منو..وفي انتظار الفيفا.
هوامش
متوكل أحمد علي مفتكر (الفيفا) دي في السوق العربي.
ومفتكر انو لو صرح في الزعيم او في الصدي الفيفا ممكن تخاف وتسمع كلامو زي ناس اسامة عطا المنان.
يا متوكل ناس الفيفا ديل لا بقرأوا الزعيم ولا بقرأوا الصدي.
ما تتعب ساكت.
ولا بعرفوا بله جابر.
لو عاوز تستقيل استقيل ساي ما تعمل نفسك حالف وداخل في مراهنات مع عماد الطيب.
بعدين عماد الطيب دا الامين العام للهلال ما بترد عليه انت.
انت عضو في المجلس.
انتوا ما عندكم امين عام.
وإلّا انت ماسك اي حاجة.
تصرح وتسجل وتنتف السلك كمان.
لو قريش في المجلس ما بتمدد كدا.
ولا بتعمل البتعمل فيه دا.
لاقى لي ناس همد ديل وشغال شمال ويمين.
الهلال امس اضاف (8) لاعبين لكشف الرديف وهذه هي الاضافة الحقيقية للهلال.
مستقبل الهلال مهم.
يا ريت مجلس الهلال يتعاقد مع مدير فني اجنبي للاشراف على فريق الرديف.
ويا ريت يكون الاعتماد في الفريق الاول كبيرا على لاعبي الرديف حتى لا تضيع هذه المواهب بالاهمال.
ناس الهلال لملموا المواهب كلها في اندية الخرطوم.
ومنتظرين صلاح نمر.
يفترض ان يقدم الهلال طلبا رسميا لفريق الاهلي شندي من اجل اطلاق سراح احمد حسن للهلال.
قدموا طلبكم لاهلي شندي ..وانتظروا النتيجة.
مفروض الهلال يطلب من الاهلي شندي أحمد حسن والدعيع ..نشوف صلاح ادريس ح يتصرف كيف؟.
يا عماد الطيب اعملوا هذه الخطوة اللاعب الوطني قيمتو كبيرة في الفريق.
ما عاوزين الهلال يبقى كلو اجانب.
كملوا جميلكم وجيبوا الدعيع وأحمد حسن.
سوف نعود لاحقا لنكتب عن الغزال مهند الطاهر.
………
عاجل : يا بله جابر لو عاوز الكورة تتطور مفروض يرجعوك انت للوراء (35) سنة ويبدأوا معاك من اول وجديد في الكورة…يبدأوا معاك من (الجدعة) يا كابتن.

[/JUSTIFY] [/SIZE]

وإن طال السفر – محمد عبد الماجد
صحيفة قوون