محمد عبد الماجد
24 ساعة زعلانين
“””””””””””””””””””””””””””””””
مرات بكون في زعل اعتراضي …زعل من الماهية الكملت زعل من المواصلات المافي
“””””””””””””””””””””””””””””””””””””””””
للنعام آدم مجسم عتيق في الزعل من كلمات الشاعر حسن الدابي (فاوضني بلا زعل يا اخي طمني أنا عندي ظن)
“””””””””””””””””””””””””””””””””””””””””””
بعد استقالة صديق علي صالح من القطاع الرياضي في المريخ الاستقالة القادمة سوف يقدمها محسن سيد
“”””””””””””””””””””””””””””””””””””””””””””””””
في ناس الله خلقهم كدا.
زعلانين اليوم كلو.
السنة كلها يشكو.
يقعدوا في البلد دي يقولوا ليك الحالة صعبة وما قادرين نعيش وما عارفين نعمل شنو؟.
خلاص الحياة دي غلبتنا.
البلد دي اصلو ما بتنقعد.
يسافروا بره ويهاجروا تلاقيهم في العيد يقولوا ليك : والله أخير هنا .الغربة كعبة والبلد دي اصلو الواحد ما بقدر يعيش بعيد عنها.
أنا ما عارفهم عاوزين شنو؟.
الواحد تلاقيه الصباح صاري وشو زي (الطبلة)..تقول ليه مالك؟..يقول ليك جاييني بعد ساعة ونص أعمل بيك شنو بعد كدا (وهو أصلاً ما في ميعاد بينكم).
تجيب ليك (فول) من غير مناسبة كدا (فول تقطعو من رأسك) صاحبكم برضو يزعل يقول ليك : دا فول تجيبو.
في ناس شغلتهم في الحياة دي (الشناف).
لو لقوا ليهم (فول) يندموك عليه ..يطلعوا ليك أي كلام كرهتم في الحياة دي (الفول).
يمرقوه من نفسك.
أصلهم كدا دائماً زعلانين.
تلاقى الواحد يوم (10) يقعد بدون مناسبة كدا يصرصر ليك في وشو.
تقول ليه في شنو؟.
يقول ليك تصدق نحن لي هسع ما صرفنا.
طيب وأنا مالي.
ناس بتحب الزعل زي عيونها.
زعلانين كدا.
طبيعي زعلانين.
الواحد تلاقيه في الشارع بتكلم براهو زي (الكسرة بالسليقة).
أول الكسرة بالسليقة بتتكلم براها.
بتتكلم.
الكسرة بالسليقة دي ممكن تعمل أي حاجة.
تلقاهو بتكلم براهو.
تقول ليه في شنو؟.
يقول ليك مواصلات مافي واقف لي ساعة.
الظروف بتساعد على الزعل.
والحكومة ذاتها بتدعم في (الزعل).
بتفرض الزعل على الناس.
مرات بكون في زعل اعتراضي …زعل من الماهية الكملت زعل من المواصلات المافي.
زعل من (البامية المفروكة) القاعدة قدامك دي.
في زعل اعتراضي كدا.
ومرات كمان في زعل (محبة).
الزول وقت يكون حساس شديد كدا من زول بقوم من غير أي سبب تلقاه بزعل منو.
يفتش ليه في سبب من مافي عشان يزعل.
أنت ما بترد.
أنت ما بتسأل من الناس.
أنت ما سلمت عليَّ كويس.
حاجات صغيرة كدا مرات بتكون ليها تلال زعل في النفوس ..خاصة لو جابت ليها حب.
تقعد تزعل من أقل حاجة.
يمكن دي الحاجات التى رصدتها الأغنية السودانية في كثير من حالات الزعل العاطفي.
محمد الأمين مثلاً عندو (كلام زعل ما بتقصدو بتقول هواي نستبعدو ونضحي بيه وتبعدو ليه كلام زعل ما بتقصدو).
شوفوا الزول وقت يزعل ممكن يقول أي حاجة.
وممكن كمان يعمل أي حاجة.
حكاية (بتقول هواي نستبعدو) فيها استعراض عاطفي ..يعني زي كأنو الزول دا عندو عروض عديدة من (الهوى)…لأن الاستبعاد بتم لشيء قدم مع مجموعة من الأشياء من جنس الصنف.
الاستبعاد نفسو فيه (قسوة) شفتوا كيف؟.
عشان ما تتكلموا ساكت وتبقوا عارفين.
زكي عبدالكريم عندو في الزعل (في لمحة غزل ومجرد أمل ايه لازم الزعل).
في ناس بزعلوا من (الغزل).
الأمل دا فيه حاجة.
بزعلوا منو.
وزعل شديد كمان.
الواحد فيهم عاوز يطق من الزعل.
تلقى جضومو منفخة من الزعل زي فتة العدس.
ويغني عبدالكريم الكابلي كلمات قديمة غناها بعده الراحل محمود عبدالعزيز (كان زعلان أنا ما بزعل وكان مبسوط يا سيدي بالاكتر).
وللنعام آدم مجسم عتيق في الزعل من كلمات الشاعر حسن الدابي (فاوضني بلا زعل يا اخي طمني أنا عندي ظن).
طبعاً في ناس بدون ما يفهموا الموضوع يقعدوا يزعلوا ليك.
بزعلوا من طرف.
هسع باختصار كدا وبعد الجرجرة الطويلة دي عاوز أقول ليكم الموسم دا موسم الزعل في المريخ.
ح تشوفوا (زعولات) لا أول ولا آخر لها.
زعولات ما ليها حد.
وأصلاً ناس المريخ عندهم هذا الفهم.
يزعل جمال الوالي يمشي يقعد في البيت (6) شهور.
يرجع جمال.
يقوم عبدالصمد محمد عثمان يزعل.
عبدالصمد يزعل يقعد في البيت (8) شهور زول يسألو ما في.
هيثم مصطفى ذاتو وقت لعب في المريخ ..موسم كامل كان قاعد في البيت زعلان.
زعلان عشان بلعب في البيت.
هسع الموسم دا مكونات الزعل كلها اجتمعت في المريخ.
والما بشوف من الغربال يبقى أعمى.
المريخاب براهم بعملوها في نفسهم.
بجمعوا النقائض.
أنا ما عارف بعملوا كدا ليه؟.
العاجبكم في الزعل دا شنو؟.
سجلوا (تراوري) من الهلال.
نحن قلنا الحمدلله ريحونا من تراوري على الأقل بكري المدينة يقدر يلعب كورتو من غير زعل.
المريخاب عشان ما بصبروا.
وعشان بخربوها براهم.
مشوا جابوا بكري المدينة.
بقى عندهم شنو؟.
بقى عندهم بكري المدينة وتراوري.
أها عليكم الله ديل بتلموا في حتة واحدة.
تراوري وبكري المدينة (مشكلة) جاهزة.
قالوا ليك في معسكر القاهرة فاصلين بينهم بي (سور).
ما بترايدو.
ويا ريت لو الموضوع وقف على كدا.
ناس المريخ معاهم بكري المدينة وعلاءالدين يوسف …(اكتر ناس بزعلوا في الدنيا).
عارفين عملوا شنو؟.
عملوا شنو؟.
بكري المدينة وعلاء الدين يوسف جابوا ليهم غارزيتو.
عليكم الله في (مشاكل) اكتر من كدا.
خلوا الموسم يبدأ ح تشوفوا (خبط) شديد في المريخ.
حرب غارزيتو ما ح تكون مع بكري المدينة وعلاءالدين يوسف براهم.
غارزيتو ح تكون عندو حرب تانية مع محسن سيد وبرهان.
محسن سيد وبرهان من حتة.
وغارزيتو وابنو من حتة تانية.
السنة دي ح نتفرج في حاجات يمكن تصل لحد الضرب.
مع كل هذه المشاكل الفنية.
هناك مشاكل إدارية.
أنا ما عارف ليه ناس المريخ بعملوا كدا.
ليه بلموا (المشاكل) كلها في سلة واحدة.
ناس المريخ ديل رجعوا عبدالصمد محمد عثمان ومسكوه القطاع الرياضي.
والقطاع الرياضي فيه منو؟.
القطاع الرياضي فيه صديق علي صالح وعادل أبوجريشة.
يعني زي كأنهم قالوا لعبدالصمد محمد عثمان صفي حساباتك.
أول قرار طلعو عبدالصمد وقف ليك صديق علي صالح ..وثبتو ليك.
الكلام دا جابو خالد عزالدين زول صدقو مافي.
لمن الأيام لفت لفة صغيرة كدا وأثبتت كلام خالد عزالدين.
حصل اشتباك (زعلي) عديل كدا بين عبدالصمد وصديق علي صالح.
صديق علي صالح ما كضب.
طوالي قدم استقالتو.
أها تاني شن قولكم؟.
ح تقولوا شنو؟.
يعني انتوا عاوزين الموضوع بعد كدا يجيب ليه دم.
الموضوع دا بعد كدا بصل النيابة.
نصيحة مننا ليكم …نحن برضو ما بنرضي ليكم الحاجة الكعبة.
الحاجات دي مع بعض كلها ما بتجي.
ما ممكن تختوا النار والجاز في حتة واحدة.
شغلكم دا كدا لا بمشي ولا حاجة.
إذا كانت هذه الأمور حصلت وانتوا في مرحلة الإعداد.
طيب لمن تتعادلوا مع هلال الأبيض أو الرابطة كوستي أو هلال كادوقلي ح تعملوا شنو؟.
الخبط بصلنا هنا في جرايدنا.
مواضيعكم دي كدا ما بتمشي.
ألحقوا نفسكم قبل بداية الموسم…عشان نحن السنة دي عاوزين نضرب من طرف.
ما عاوزين لينا شماعات من بدري كدا.
حلوا مشاكلكم وابقوا مارقين.
…….
ملحوظة : المعز محجوب ذاتو بي اسمو وخبرتو ما بقعد احتياطي لجمال سالم ..شوفوا ليكم حل للموضوع دا.
هوامش
بعد استقالة صديق علي صالح من القطاع الرياضي في المريخ الاستقالة القادمة سوف يقدمها محسن سيد.
خليك جاهز يا محسن.
محسن سيد معسكر المريخ ما بتمو.
الزول دا برجع بعد أسبوع.
ولا بقعد ليكم.
ولا تغشوا نفسكم.
الهلالاب كلهم كانوا في كرنفال مهند الطاهر.
أمة الهلال زفة مهند الطاهر عريساً.
وكان الحضور العالي للجماهير لمشاركة مهند الطاهر فرحته أكبر دليل على محبة الجماهير لمهند الطاهر.
وإن شاءالله بيت مال وعيال وهلال.
بشه أيضاً زواجه كان كرنفال.
الهلالاب دائماً في مثل هذه المواقف.
والهلالاب منتظرين قرار الفيفا ..عشان يشاركو بكري المدينة فرحتو.
…………
عاجل : قالوا ليك غارزيتو في القاهرة شايف بكري المدينة عشرة عشرة.
[/JUSTIFY]
وإن طال السفر – محمد عبد الماجد
صحيفة قوون
