عمق إحساسك

ممكن أعرف عمق إحساسك

وهل لازلنا جماعتك وناسك

ولسه حديثك بين جلاسك

ولا الواقع غير روحك.. ولوث حتى عبير أنفاسك..!؟

***

ما بتخيل يوم تتغير.. أو تتحول عني حواسك!!

إنتا ربيع العمر الزاهر.. ومهما تعلى بنفضل ساسك

وحبنا بفضل نور أيامك.. ولون أحلامك.. وضي نبراسك

وإنتا العيد العاد بالفرحة.. وعما الحلة رنين أجراسك

وإنتا النيل الفاض بي خيرو.. ونحنا المطر البروي يباسك

وإنت الكنز الغالي علينا.. ونفضل جنبك زي حراسك

روحك جوهر ما بتكرر.. ونحن بنعرف قيمة ماسك

كضب الحاول يجهل قدرك.. وقال بي كلمة أهانك وداسك

تسلم لينا كتير يا ريدنا.. يسلم عمرك.. ويسلم راسك

عالي مقامك.. وين أيامك.. ومين بالله النالك وحازك؟!!

ما بتخيل إنك تنسى.. وأنا متأكدة من إخلاصك

****

وممكن أحلف إني حبيبتك

وإني صديقتك.. وإني قريبتك

وإني الزول الواثق فيهو.. بيفهم قصدك ويستر عيبتك

وإني بسامح دايماً واغفر.. حتى ظنونك وشكك وريبتك

وإني خليلتك.. وإني صغيرتك.. وإني حلالك وإني ربيبتك

وإني مهندس كل أيامك.. وفي أوجاعك ببقى طبيبتك

وإني العشتا معاك الفرحة.. وإني وقفتا معاك في مصيبتك

وإني النور الضوا ظلامك.. وإني الأمل البدد خيبتك

وإني وحاتك ما بتكرر.. لا في حضورك.. ولا في غيبتك

وإني حبيبة عمرك كلو.. صباك وشبابك.. وعجزك وشيبتك

*****

وحاول أفهم عمق إحساسك

وأعرف إننا أروع ناسك

وإننا ريدك وساسك وراسك

ومهما تبعد عني وترحل.. برضك بفضل ياخي ملاذك

وبجري محل الدم في وريدك.. وبي تتحرك كل حواسك

سيب أوهامك وألحق نفسك.. أنا يا غالي شهيق أنفاسك

ودوني بتفقد معنى حياتك.. وبينطفي بالجد نبراسك.

# تلويح:

وأنا وحدي التي أدري عمق ذلك الإحساس.. لأني صاحبته وسيدة انفعالاته.. دمت لي.!!