توفيق (رخصتين) في الحلال!

* الليلة حأحكي لَكم عن ثقافة بعض الفنانين الشباب.
* أي والله.. (إنتو قايلني بهظر، صاح؟)
* ولا إنتو يعني قايلنهم ما (مثقفين)؟
* مرة فنان شاب استضافوهو في قناة وقال ليهو ورينا مثلك الأعلى.
* الزول ما كضب وطوالي قال ليهم: (أبوي)!
* قالوا ليهو أبوك شغال شنو؟
* قال ليهم: (فني تبريد وتكييف)!
* أها.. هسي دي عليكم الله ما (ثقافة)؟
* في الناس (القيافة).. حبيت (الثقافة)!
* ومرة فنان شاب سألوهو عن آخر أعمالو الخاصة.
* الزول برضو ما كضب وطوالي قال ليهم: (والله عندي ركشتين شغالات في الخط ودكان مأجرو في السوق الشعبي).
* سوق شعبي (بتاع حنانك)؟
* ومرة فنان شاب سألوهو في حوار صحفي عن كيفية الخروج من (نفق المحلية) إلى العالمية.
* اتخيلوا قال شنو؟
* طبعاً كلكم مركزين مع (النفق) حالياً.
* لا لا.. الزول دا إطلاقاً ما جاوب على أساس (النفق).
* الزول دا قال ليهم وبالواضح: (يمدوا لينا الحفلات لحدي 12).
* شفتو إنكم ظلمتو الراجل دا كيف؟
* غايتو لما تقوموا على (الظلم) ما في زول بلحقكم.
* زي ناس (علي مهدي).
* يطلعوا (الرخصة) للفنانين ويخلوهم (يغنوا الدايرنو).
* مش دا برضو ظلم لـ(المستمع)؟
* إنتو صحي بمناسبة علي مهدي.. مش ممكن برضو يكون في (رخصة للثقافة)؟
* يعني الفنان البيطلع (رخصة الغناء) طوالي يمشي (الشباك التاني) يقدم لـ(رخصة الثقافة).
* وكدا نكون وفقنا (رخصتين) في الحلال.
* (رخص) عليكم يا أخي.
[/JUSTIFY]

الشربكا يحلها – احمد دندش
صحيفة السوداني