باص وخانة

*ياولي…(الجبص) بقى غالي.!
*فجأة…كل الفنانين الشباب بقوا يعملوا حفلات جماهيرية.
*بالله تطلع الشارع تلقي (الحيط) عاملة زي (موقف المواصلات).
*ها…علينا جاي الماشي نادي الضباط يجي بي جاي…والماشي قاعة الصداقة يمشي بي هناك.
*معقولة بس..؟
*واحد صاحبي سألني: (انت الحفلات دي مالها كترت كدا).؟
*قلت ليهو: (انت مجنون…يعني الفنانين يكتروا والحفلات ماتكتر).؟..دا اسمو (عدم انضباط).
*انتو صحي بمناسبة (عدم الانضباط) دي…حفلة صلاح ولي في المسرح القومي خبرها شنو..؟
*طبعاً صلاح ولي ماعندو اي علاقة بـ(الانضباط) في المسرح.
*مرة تلقاهو وراء بتاع الاورغن، ومرة تانية تلقاهو وسط الجمهور، ولما خلااااص يستقر (بيطلع الشجرة).
*معقولة ياولي…انت لو ماخايف على منظرك كفنان، ياخي خاف على (كرعينك) ديل، خصوصاً انو (الجبص) بقى غالي في المستشفيات.
*اها…بمناسبة (الكرعين).
*مرة قلت لي حمد الريح: (يااستاذ…ياخ انت لو ماخايف على اغنياتك البغنيها صلاح ولي دي…ياخي خاف على كرعين الولد دا).
*حمد الريح لحدي هسي بيضحك.
*ماعلينا…نرجع لموضوعنا بتاع (الحفلات).
*طبعاً اظرف حاجة لما تلقى ليك فنان (نص كم) الدخول لي حفلتو بـ(50) جنيه.!
*الزول دا اكيد ماجادي.
*(50) جنيه عديل كدا…انتو الناس دي قايلانا بنلقي القروش دي واقعة ولا (سارقنها).
*اهااااا….(قمت تلخبط).
*خلاص..خلاص…نرجع لموضوعنا ونقول: (عزيزي الفنان…ياخي عليك الله…مافي اي داعي تعمل ليك حفل جماهيري وانت في الاساس مافنان جماهير…خليك في اعراسك…وقيدوماتك…وطهوراتك…لأنك كدا بتريحنا وبتريح نفسك…وبتريح كمان (حيط) الخرطوم دي).
*قال (حفل جماهيري) قال…(ياعمي روح).