اتلتيكو سواها في الريال (سوات العاصفة في ساق الشتيل الني)

[JUSTIFY]الجماعة جابوا ليك غارزيتو متمحن وواضع ايدو في خدو ..زي الطاهر حسن التوم في حتى تكتمل الصورة
ما عاوزين نجيب للقارئ (وجع وش)..لكن سلك لو قلنا ذلك ..بيعتبر الموضوع هروب
لو دي طريقتكم ..اللـه يستر على كبري المك نمر ..مفروض الوالي يطلع قرار يقول ما عاوز اشوف لي (جقر) في كبري المك نمر
إلّا تعادل في الدورة التانية..لكن تعادل في الدورة الاولى ما اظن ..فريق متقدم في الشوط الاول بهدفين يجي يتعادلوا معاه

الواحد لو عاوز (يحتجب) ويغيب لظرف طارئ مع ناس سلك ديل ما بقدر يغيب.
إلّا تكتب ..كسر رقبة تكتب.
فوق رقبتك تكتب.
لو عندكم (سُماية) ما في طريقة للاحتجاب.
لو طقتك (ملاريا) تكتب.
لو كنت اليوم كلو في المرور ..تكتب.
كلو منك يا سلك ..اي احتجاب لظروف فنية ..بابكر سلك بفسرو تفسيرات تانيه.
ح يقعد يشرع طوالي ..ويقول محمد ح يكتب عن عثمان حسين..رغم ان عثمان حسين ما عندو اي علاقة بالموضوع.
عليكم اللـه في اجمل من (شجن)..وقت عثمان حسين يضع حدا للتساؤلات ويقول : (لمتين يلازمك في هواك مُر الشجن؟).
يقوم كدا الشجن يقع من عيونك.
وصحن الطماطم فوق التلاجة من غير ما تشعر يجي واقع.
في حاجات بتحصل كدا ..ما لاقين ليها تفسير.
لكن المواضيع دي انا بحددها ليكم.
الملازمة للشيء هي التوافق والتطابق والسير معه خطوة – خطوة.
ومن هنا جاءت حكاية الزول دا ملازمك زي ضلك.
في الجيش والشرطة بقولوا ليك (ملازم) اول ..او (ملازم) تاني ..يعني قاعد مستعد (24) ساعة.
ملازم المهنة.
عشان كدا لمن بازرعة قال : (لمتين يلازمك في هواك مر الشجن؟) قفل الباب قدام اي احتمال.
اكد تأكيد قاطع ان (الشجن) معاه زي الضل ..كاتم على نفسو.
غير ان (الملازمة) هنا حددها بازرعة في (الهوى) فقط..يعني الشجن كتر خيرو ما عندو معاه قضية ..لكن من يدخل ليه في تجربة (حب) بتجي حكاية الشجن والملازمة.
في ام درمان اشتهر حي الملازمين ..وهي تسمية للكنية عن التلازم والتمسك بالامر.
الملزمة فيها اعتقاد ..وقد جاءت التسمية من جيش الامام المهدي.
اها يا سلك عليك اللـه في داعي تفتح لي موضوع عثمان حسين دا ..انا كل ما اقفلو ..تجي انت تجيب سيرة الشجن.
انا مؤمن ان للقارئ حق عليّ ان احتجب منو شوية ..وما اكتب.
بنحاول نريح القارئ مننا شوية..لكن سلك ما بريحنا.
بفسر الاحتجاب غلط.
ما عاوزين نجيب للقارئ (وجع وش)..لكن سلك لو قلنا ذلك ..باعتبار الموضوع هروب.
هروب من شنو؟.
الموضوع ما عندو اي علاقة بالهروب ..لأني باعتبر ان الاخفاقات والخسائر فيها مواضيع كتابة اكتر من المواضيع التى توجد في الانجازات والانتصارات.
على العموم يا سلك ..بسببك اكتب اليوم مع (صداع) يخليك تشوف حرف العين متل (الابريق).
مع (طشاش) واضح في الشوف …يخليك تتلخبط في اصابعيك الخمسة.
وزغللة في الحلق.
وطمام في المفاصل.
حالة صعبة.
ومباريات شغالة ..ودوريات منقولة وانت بين الكتابة في هذه الظروف والاحتجاب في الظروف التانية.
تصوروا بعد دا كلو ما في طريقة تعتذر عن الكتابة ..عشان سلك بفسر الاحتجاب تفسيرات تانية.
بعدين يا سلك البسمع كلامك يقول المريخ ضارب الاهلي الخرطوم خمسة / صفر.
انت بتنسى يا سلك.
نسيت الاهلي الخرطوم عمل فيكم شنو؟.
لو بتنسى نذكرك ..الاهلي الخرطوم خلاكم تتقدموا في الشوط الاول بهدفين دون رد.
قدموا للجامعة ومنتظرين نتيجة القبول.
لدرجة اني ما انتظرت المباراة ..قمت رسلت العمود لي بشاشة واحمد الحاج.
قلت بعد كدا مباراة المريخ عاوز بيها شنو؟..المباراة انتهت.
انا افتكرت ذلك.
بعد ما خلاص شطّبت وقفلت الجهاز ..سمعت ليك بالخبر.
قالوا الاهلي الخرطوم اتعادل مع المريخ.
انا قلت انتو ناس المريخ ديل جنّوا؟..الاهلي دا يتعادل مع المريخ كيف؟.
إلّا تعادل في الدورة التانية..لكن تعادل في الدورة الاولى ما اظن ..فريق متقدم في الشوط الاول بهدفين يجي يتعادلوا معاه.
الكلام دا يا جماعة في الدورة المدرسية ما قاعد يحصل.
دورة شنو؟.
كلامكم البتعملوا فيه دا يا سلك في دور الفصول ما قاعد يحدث.
وعاملين فيها عندكم فريق كبير.
ولعبتوا مع شالكا.
ولعبتوا مع بايرن ميونخ.
وجبتوا بكري المدينة من غير وجه حق من الهلال.
بكري دا جايبنو عشان تحرقوا قلبو.
ورجعتوا غارزيتو.
غارزيتو في السن دي جايبنو يعمل ليكم شنو؟.
يعني ما فاضل ليكم إلّا تشيلوا (شريحة) فوزي المرضي من الهلال.
وفانلة وليد طاشين.
انتوا خليتوا لينا شنو يا سلك؟..ديل بقلدونا حتى في التعادلات.
اتعادلنا مع الاهلي في شندي ..عجبهم التعادل ..قاموا اتعادلوا مع الاهلي في الخرطوم.
والجماعة جابوا ليك غارزيتو متمحن وواضع ايدو في خدو ..زي الطاهر حسن التوم في (حتى تكتمل الصورة).
انتو قالوا ليكم الصورة بتكتمل بان يضع الطاهر حسن التوم ايدو في خدو.
انتو مساكين.
انتو ما جايبين خبر.
ليها حق (الجقور) تصدع ليكم كبري المنشية لو دا حالكم.
لو دي طريقتكم ..اللـه يستر على كبري المك نمر .
مفروض الوالي يطلع قرار يقول ما عاوز اشوف لي (جقر) في كبري المك نمر.
لكن كبري المك نمر ما الكبري البتصدعو (جقور).
المك نمر في قبرو ما برضى بالكلام دا.
عشان كدا جقوركم دي خلوها تلعب بعيد.
المحيرني وما قادر افهم سرو الى الان ..فريق اتلتيكو مدريد.
اتلتيكو مدريد دا كلو ما يلقى ليك ريال مدريد يضربو ليك.
في حقارة اكتر من كدا.
اتلتيكو مدريد ..الريال عندو زي (المليم).
بضربوا ليك على طول.
وكمان لا واحد.
ولا اتنين.
اتلتيكو مدريد امس ضرب ليك ريال مدريد اربعة.
اربعة دي نحن لمن كنا نأخدها في الدافوري شهر ما بنطلع من البيوت.
وحالتنا بتبقى زي البلاء.
انتو يا ريال مدريد ..تجو بي كل بساطة كدا تنضربوا اربعة من اتلتيكو.
الكلام دا غلط منكم.
مالكم عاوزننا نخلي المريخ ونقبل عليكم.
انتوا عندكم برضو (جمال الوالي).
عندكم بلة جابر.
طيب مالكم؟.
ليه بتعملوا كدا.
اجمل توصيفات الاغنية السودانية ..جاء بها محمد علي ابوقطاطي في (سوات العاصفة في ساق التشتيل الني).
ما فى وصف ابلغ من كدا.
وما في رقة ولطف ..اكتر من رقة ساق الشتيل الني.
وما في اصعب من العاصفة.
والعاصفة بتعمل عمائل في ساق التشيل الني.
ابوقطاطي بصف ما حدث في قلبي ..من الحب مثلما يحدث لساق الشتيل الني من العاصفة.
الحب خلوه.
هسع اتلتيكو مدريد عمل في الريال سوات العاصفة في ساق الشتيل الني.
اول مرة اكتشف ليك ان الريال ساق شتيل ني.
حالتكم صعبة يا ناس الريال.
……
ملحوظة : انت يا سلك قالوا بتشجع بلد الوليد.

هوامش

لا الريال ولا برشلونة ولا اتلتيكو عندكم فيهم نصيب.
شجعوا قدر فريقكم.
قدر ظروفك.
الليلة اتعادلوا لينا في الفاشر وتعالوا لينا يا سلك.
وإلّا اقول ليكم ..هلال الفاشر كايس النقاط التلاتة عديل كدا.
وغارزيتو محنتو زايدة.
ومحسن سيد الخسارة ما كعبة معاه.
الخسارة بترجع ليه برهان تية.
يمكن دي تكون اخر مباراة لغارزيتو في الدوري المحلي.
يكمل معاكم لغاية التمهيدي ويغادر.
خلاص محسن سيد ..قبل على غارزيتو.
غارزيتو تاني ما بدقها.
برهان ثبتوه.
برهان قالوا ليه ما تتعاقد مع اي فريق.
بنحتاج ليك.
فريق يتعادل مع الاهلي في ام درمان ..ما بقدر يغلب في الفاشر.
ما تغشوا نفسكم ساكت.
رمضان عجب ..عاوزنو ينقذكم كل مرة.
طيب جايبين بكري المدينة بـ (3) مليار ليه؟.
خلوا بكري المدينة يقسم لي رمضان عجب.
…
عاجل : العمود دا يا سلك ما عارف اكتمل وإلّا ح ارسلو ناقص كدا.

[/JUSTIFY]